JIUNGE NA KUNDI LA WHATSAPP LA FIKRA ZA KITAJIRI KWA KUBONYEZA HAPA NA KUJIUNGA BURE. Jiunge sasa nafasi ni chache.
✍🏾Karibu katika neno
la tafakari ya leo ambapo nalenga kukufundisha siri kubwa ya kuona fursa katika
mazingira yanayokuzunguka. Siri hii si nyingine bali ni kuyafundisha macho
kuona upande chanya badala ya hasi katika kila fursa inayojitokeza mbele yako.
kabla kuangalia upande hasi unatakiwa kuanza na upande chanya kwenye kila fursa
inayojitokeza.
✍🏾Kabla ya kuendelea
na ufafanuzi wa neno la tafakari ya leo hebu tujifunze kitu kutoka kwenye
maongezi haya: Juzi nilibahatika kuwa sehemu moja na Mtumishi mmoja wa shirika
la Wanyamapori (TANAPA) ambaye kwa haraka haraka anaweza kuwa na zaidi ya miaka
50. Tukiwa kwenye gari na watumishi wenzake akaanzisha maongoezi ambayo
yalihusiana na thamani iliyopo kwenye uwekezaji wa ardhi.
✍🏾Hii ni sehemu ya kwanza
ya maongezi: “mwaka 1993 nikiwa ndo naanza kazi niliitiwa kununua kiwanja
ambacho kilikuwa barabara kuu pale Himo Mkoani Kilimanjaro, kiwanja kile
kilikuwa kikubwa na kipo eneo zuri la biashara hila kwangu mimi cha kwanza
nilichokiona katika kiwanja kile ni uwepo wa mawe kwenye kila eneo la kiwanja. Nakamwabia
yule kijana aliyetaka kuniuzia hapa unataka watoto wangu waje kujikwaa na kutoa
kucha kila siku kutokana na mawe haya au unataka kuniibia? Ukweli kile kiwanja
niliachana nacho japo kilikuwa kinauzwa kwa Tshs. 30,000/= kwa kipindi kile. Hilo
ndo lilikuwa kosa langu, baada ya miaka 10 kiwanja kile kilikuja kuuzwa kwa milioni
thelathini (Tshs. 30M) na hadi sasa kuna kituo cha mafuta kimejengwa pale”.
✍🏾Sehemu ya pili ya
maongezi yake: “2001 nikiwa Kahama nikamfuata kijana mmoja wa ardhi anionyeshe
kiwanja cha kununua. Kijana yule akanieleza kuna kiwanja kizuri sana hebu ona ramani
yake kabla hatujaenda kukiona. Kweli niliona kipo eneo zuri kwenye ramani na
ndipo tukaenda kukiona. Baada ya kufika kwenye eneo la kiwanja ilikuwa kidogo
nimchape kijana yule kibao maana kiwanja alichopamba awali kilikuwa na mashimo
ya mengi maana uchimbaji wa mchanga ulikuwa unaendelea ndani ya eneo lile. Yule
kijana akaendelea kunisihi ninunue kiwanja kile kwa kuwa kipo barabara kuu ya
Kahama kuelekea Burundi. Nilikataa kununua kiwanja kile na hilo lilikuwa kosa
langu la pili. Baada ya miaka 5 nilipita tena katika eneo lile na sikuweza
kuliona eneo lenye mashimo bali nilichokiona ni Hoteli kubwa ya kifahari. Baada
ya pale nilijifunza kutokana na makosa yangu na ndipo nikaanza kuwekeza kwenye
ardhi bila kujali ina kasoro gani”.
✍🏾Kupitia maongezi
haya tunachojifunza ni kuwa mhusika alichoweza kuona katika viwanja vyote ni
vikwazo au upande hasi kwenye fursa hizo. Katika kiwanja cha kwanza aliona mawe
kama kikwazo akasahau kuwa mawe hayo angeweza kuyaona katika upande wa fursa na
yakatumika kwa ajili ya kuongeza thamani ya kiwanja. Mfano, angeweza kutumia
mawe hayo wakati wa ujenzi wa msingi au kuponda kokoto kwa ajili ya kazi za
ujenzi. Katika kiwanja cha Kahama yeye aliona mashimo kama kikwazo katika
kiwanja husika akasahau kuwa mashimo yale yalikuwa ni ya muda tu maana angeweza
kutumia gharama ndogo kuziba mashimo hayo kwa kujaza kifusi cha udongo.
Somo jingine la
kujifunza kutokana na maongezi hayo ni kuwa kadri unavyotanguliza kuona upande
hasi ndivyo unapoteza nafasi ya kuona upande chanya kwenye fursa husika. Unapotanguliza
upande hasi unajikuta umejifunga ndani ya boksi kiasi ambacho hautaweza kuona
upande chanya wa fursa husika. Kumbe hapa ambacho ungetakiwa kufanya baada
kuona kuwa pamoja na kwamba fursa inaonekana kuwa na thamani kubwa kwa baadae
hila kwa wakati huo ina changamoto kadhaa. Tumia changamoto hizo zilizopo
kumponda muuzaji ili akupunguzie bei katika biashara husika.
✍🏾Mwisho, neno la
tafakari ya leo limetufunulia umuhimu wa kutazama upande chanya katika kila
fursa tunayokutana nayo badala ya kutanguliza upande hasi. Unapotanguliza upande
hasi moja kwa moja unaifunga akili yako kuona upande chanya kwenye fursa
iliyopo mbele yako. Macho yako yanaona nini? Kuanzia sasa hakikisha macho yako
yanaona upande chanya kwenye kila fursa inayojitokeza.
Nakutakia kila la
kheri kwenye siku hii ya leo. Kumbuka husikose kutoa mrejesho wa kile ambacho
unajifunza kutokana na uwepo wako kwenye kundi hili.
BORN
TO WIN ~ DREAM BIG
🗣🗣
Mwalimu Augustine Mathias
Mawasiliano: 0763
745 451/0786 881 155/0629 078 410
Barua pepe:
fikrazakitajiri@gmail.com
Tovuti:
fikrazakitajiri.blogspot.com