Mambo Niliyojifunza Kwenye Kitabu cha Noble Purpose: The Joy of Living Meaningful Life (Furaha ya Kuishi Kusudi la Maisha Yako)

Rafiki na msomaji wa mtandao wa fikra za kitajiri ni matumaini yangu kuwa upo vizuri na unaendelea kupambana kwa ajili ya kuyaboresha maisha yako. Karibu tena katika mtandao wa fikra za kitajiri kwa ajili ya kupata chakula cha akili yako kutoka kwenye uchambuzi wa kitabu cha wiki hii.  Kama kawaida mtandao wa fikra za kitajiri unaendelea kutimiza ahadi yake ya kukuletea uchambuzi wa kitabu kimoja kila mwisho wa wiki (ijumaa) ili kupitia uchambuzi wa vitabu hivi tuendelee kuyaboresha maisha yetu.

Lengo kubwa la mtandao wa fikra za kitajiri ni kuona wewe unaanza kuishi kusudi la maisha yako ambapo kazi kubwa iliyopo mbele yako ni kubadilisha fikra zako. Mtandao huu umedhamiria kufanya kila liwezekanalo ili kukupatia maarifa yatakayo kusaidia ubadili fikra zako ili ziwe za kitajiri katika kila sehemu ya maisha yako. Kujiunga na mtandao wa fikra za kitajiri BONYEZA HAPA na kujaza fomu ili upate makala moja kwa moja kwenye barua pepe yako.

Katika wiki hii ya sita ninakuletea uchambuzi wa kitabu cha Noble Purpose ambacho kimeandikwa na mwandishi William Damon. Mwandishi kupitia kitabu hiki anahamasisha kila mtu kuishi kusudi la maisha yake ili kuwa na maisha yenye furaha. Kwa ujumla mwandishi anatufundisha kuwa maisha ni zaidi ya kuziridhisha tamaa za mwili na badala yake chimbuko la maisha yenye furaha ya kweli ni kuishi kalama za wito wetu kwa ajili ya kuishi maisha yenye faida kwenye jamii. Muhimu tunafundishwa kuwa ili kufanikiwa katika maisha haya ni lazima tuongozwe na roho mtakatifu au waweza sema nguvu iliyo nje ya upeo wa fahamu zetu kulingana na imani yako.

Karibu tufaidike wote maarifa niliyojifunza kutoka kwenye kitabu hiki:-

1. Ili kuishi maisha yenye furaha ni lazima uongozwe na vitu vitatu (a) kitu unachokiishi (something to live on) (b) kitu kinachokufanya uishi (something to live for) na (c) kitu ambacho upo tayari kufa kwa ajili yake (something to die for). Hapa mwandishi anatufundisha kuwa maisha ambayo hayana misingi angalau miwili kati ya hii mitatu ni maisha ambayo ni mfu. Ili uishi maisha yenye madhumuni katika ulimwengu huu ni muhimu kuhakikisha unatumia misingi hiyo mitatu katika yale unayoyafanya.

2. Kadri tunavyofahamu sisi ni nani na ulimwenguni humu tumo kwa makusudi gani inasaidia kukuza safari yetu ya kuishi maisha ya mafanikio. Haijalishi kusudi la maisha yako ni lipi cha msingi ni wewe kutambua kwa nini uliumbwa katika ulimwengu na baada ya hapo wajibu wako ni kuishi kwa kadri ya wito wako. Wapo wenye wito wa kumtumikia Mungu, wapo wenye wito wa kuwa baba/mama wa familia bora, kuwa mwanamuziki, mwanasiasa au mfanyabiashara hivyo kuanzia sasa hakikisha unatambua kusudi la maisha yako na anza kuliishi mara moja.

3. Kadri unavyotambua kusudi la maisha yako ndivyo unapata msukumo wa nguvu kubwa kutoka ndani mwako kwa ajili ya kufanikiwa zaidi. Hapo ndipo utatambua kuwa kuna nguvu na vipawa zaidi ambavyo vilikuwa havijatumiwa kutokana na wewe kutokujitambua wewe ni nani na umeumbwa kutimiza madhumuni yapi katika ulimwengu huu.

4. Hakikisha kila siku unafanya jambo ambalo linachangia kufikia kusudi la maisha yako. Hapa ni muhimu kufahamu kuwa ili kufanikiwa kuishi kusudi la maisha yako ni lazima uwe tayari kuipangilia siku yako ili kila siku ikupe ushindi mdogo na ushindi huu utumike kama msingi wa kufikia kusudi kubwa la maisha yako.

5. Ili tuishi kusudi la maisha yetu ni lazima kwanza tutambue vipaumbele vya maisha yetu kwa kuhakikisha tunatanguliza kutumia kalama na ujuzi wetu kufanya yale ambayo yanaridhisha roho zetu. Hapa tunakiwa kufahamu kuwa katika maisha furaha ya kweli inatokana na kufanya yale ambayo nafsi zetu zinaridhishwa na matokeo ya matendo yetu. Kama una matendo ambayo yanasababisha huzuni ya roho huna budi kuachana nayo mara moja ili utoe nafasi kwa matendo yanayoifurahisha roho yako.

6. Maisha ya kusudi la maisha yako yapo hapo ulipo na wala husitegemee kuwa ni yapo sehemu nyingine. Maisha haya yanahusisha matendo yetu ya kila siku japo ni wachache wanajua hilo. Kama wewe ni mwalimu fikiria kufundisha wanafunzi wako kuliko mwalimu yeyote yule ambaye amewahi kuwepo, kama ni daktari lenga kuwahudumia wagonjwa kwa roho moja, kama ni mfanyabiashara fikiria kutoa huduma bora kwa wateja wako kwa kadri uwezavyo na kama wewe ni kiongozi au mwajiri fikiria kuwatendea watu wako unaowaongoza kwa kadri unavyoweza kuwaridhisha. Haya ndiyo maisha bora ambayo kila mtu ameumbwa kuyaishi.

7. Maana halisi ya kusudi la maisha yako ni lile lengo kubwa la maisha yako ambalo ni imara na linajumuisha kila sekta ya maisha yako na unapaswa kulikamilisha katika maisha yako si tu kwa ajili ya faida yako bali kwa ajili ya jamii nzima. Somo la kujifunza hapa ni kuwa kusudi la maisha ni (a) lengo kubwa ambalo ni msingi wa maisha yako yote (b) imara na halitakiwi kubadilika mara kwa mara (c) ni ufunguo wa sisi kuujua ukweli wa tuliumbwa kukamilisha nini hapa duniani (d) linajikita kwenye kukamilisha kitu katika maisha yetu si tu kwa faida yetu tu bali kwa ajili ya wengine. Kutokana na ukweli huu utagundua kuwa unapoishi kusudi la maisha yako utajikuta katika ulimwengu wa matendo mema ambayo hayana athari mbaya kwa maisha ya wengine wanaokuzunguka.

8. Wito wako upo kwenye kazi yako ya kila siku. Watu wengi wameshindwa kuishi wito wa maisha yao kwa vile wamekuwa wanatofautisha kazi wanazofanya na wito wao. Hapa tunafundishwa kuwa wito wetu upo kwenye kazi zetu za kila siku na hivyo ili kuishi wito huu ni lazima kwanza uipende kazi yako na hatimaye kupitia kazi hiyo watu wengi wanufaike na matunda yako. Kwa ukweli huu pale unapoiona kazi yako kama wito wako au kusudi halisi la maisha yako moja kwa moja kazi itabadilisha mtazamo wako wote juu ya kazi yako na hivyo kufanikiwa kupata mafanikio makubwa kwako wewe na wale unaowahudumia.

9. Unapoikubali kazi yako kama wito wako inakuwa mwanzo wa safari ya kuishi kusudi la maisha yako. Hii ni kutokana na ukweli kwamba kazi unayofanya inachukua sehemu kubwa ya muda wako na hivyo husipokuwa na furaha katika muda huu ni vigumu kupata furaha kwa muda uliobakia. Kanuni hii inatakiwa kufanya kazi kwa wafanyakazi wote pasipokujali cheo, muda walionao kazini au kazi wanazofanya. Kama unafanya kazi ya kufagia barabara fagia kana kwamba hakuna mtu mwingine ambaye atafagia vizuri kuliko wewe vivyo hivyo kwa kazi nyinginezo unazofanya fanya kama vile wewe ndo mtaalamu namba moja kwa ubora katika kazi hiyo.

10. Unapoiona kazi yako kama wito huna budi kusukumwa na wito huo kufanya kazi badala ya kusukumwa na malipo ya fedha ya kazi husika. Hapa tunafundishwa kuwa katika kila kazi tunayofanya hatupaswi kutanguliza fedha mbele badala tunatakiwa kutoa huduma yenye thamani kubwa kwa wale tunaowahudumia na hatimaye fedha zitafuatia baadae. Pia tunasisitizwa kuweka lengo la kutoa huduma bora kwa wateja badala ya kuweka lengo la kuongeza faida tu. Nilichojifunza hapa ni kwamba unapojikita kwenye kuongeza faida tu ni rahisi kutumia mbinu ambazo sio halali kama vile kushindwa kujali afya za wateja unaowahudumia na hivyo kwenda kinyume na kusudi la maisha yetu.

11. Unaweza kupata kusudi la maisha yako sehemu yoyote ile. Kusudi la maisha yako linaweza kuwa kwenye jamii yako ya karibu, marafiki, ndugu, familia, imani (kanisani au msikitini), jamii na hata kwa watu walio mbali na upeo wako. Mfano katika ngazi ya familia kusudi la maisha yako linaweza kuwasaidia wafamilia wote kufikia ndoto zao au kuwasaidia wale wasiojiweza. Vivyo hivyo kusudi la maisha yako linaweza kuwa baba/mama bora wa familia. Hivyo hauna sababu ya kuumiza kichwa sana ukifikiria ni wapi utapata kusudi la maisha yako badala yake anzia hapo ulipo. Kwa upande wa imani unapata nafasi ya kutambua kwa undani upendo wa Mwenyezi Mungu kwa wanadamu.

12. Unaweza kuishi kusudi la maisha yako kupitia matendo mema kwenye jamii. Matendo haya yanajumuisha upendo kwa watu wote mfano, upendo kwa wazee, watoto, walemavu, yatima na wajane. Unaweza kuanzisha mfuko au taasisi ya kusaidia watu wenye mahitaji na kupitia taasisi hiyo ukafanikiwa kuwafiki watu wengi. Mfano, angalia maisha ya Mother Theresa, unaweza ukafuatilia historia ya maisha yake kwenye mtandao kama haujui historia yake.

13. Kusudi la maisha yako linaweza kuwa kwenye utamaduni wako. Baadhi ya tamaduni zinawaongoza wanajamii kuishi maisha yenye thamani kwa watu wengine. hivyo kupitia utamaduni wako unaweza kupata kusudi la maisha yako. Mfano, baadhi ya tamaduni zetu zinatenga wajibu wa watu kulingana na umri au jinsi zao, hivyo kupitia tamaduni hizi unaweza kupata kusudi la maisha yako.

14. Kusudi halisi la maisha yako ni lazima lijikite kwenye matendo ya halali kwenye jamii inayokuzunguka. Ni lazima yale tunayoyafanya kupitia wito wetu yawe ni matendo yanayokubalika kisheria pasipo kufanya hivyo tunakuwa bado hatujafahamu ukweli juu ya maisha yetu.

15. Ni lazima tuwe tayari kuomba msamaha au kujisahihisha pale inapotokea matendo yetu yameenda kinyume na matarajio yetu hadi kusababisha madhara kwa wengine. Hii ni kutokana na ukweli kwamba sisi ni binadamu na hivyo ni rahisi kufanya makosa. Hata hivyo kama bado huna nafasi ya kufanya marekebisho ya makosa yako kabla hayajasababisha madhara makubwa fanya hivyo mara moja pale unapopata angalizo. Hivyo ni muhimu maamuzi na matendo yetu ambayo yanailenga jamii yakafanywa kwa tahadhari na unyenyekevu wa hali ya juu.

16. Kila mtu anaweza kuishi kusudi la maisha lakini njia pekee ya kujua kama kusudi hilo ni halisi ni kuona kama linaendana na misingi ya kijamii. Hii ni kutokana na ukweli kwamba kuna watu wanaishi maisha yenye kiburi na kila aina ya ubinafsi labda kutokana na madaraka yao lakini bado wakajiona kuwa wanaishi kusudi la maisha yao. Jambo la kujifunza hapa ni kwamba matendo yetu ni lazima yakubalike kwenye jamii zetu kwa kuzingatia sheria na tamaduni zetu.

17. Maisha yaliyojengwa kwenye misingi ya kusudi la maisha ni maisha ambayo yametumiwa vizuri ulimwenguni hapa na kinyume chake ni kwamba maisha ambayo hayajajengwa kwenye kusudi lake ni maisha yaliyopotezwa. Hii haijalishi maisha hayo ni marefu au mafupi, masikini au tajiri, afya njema au maradhi, yenye madaraka au yasiyokuwa na madaraka. Hivyo ni muhimu kila mmoja wetu kutafuta kusudi halisi la maisha yake na kuanza kuliishi mara moja.

18. Tafiti za kisaikolojia zinaonyesha kuwa watu wenye furaha ya maisha ni wale ambao hawatumii nguvu nyingi kupata furaha hiyo. Kwa maana nyingine ni kwamba watu wenye furaha ya maisha ni wale ambao wamejitosa kufanya vitu ambavyo vinawapa furaha ya nafsi zao. Hivyo, kama unataka kuishi maisha yenye furaha huna budi kufahamu ni yapi yanairidhisha nafsi yako na kuanza kuyatekeleza mara moja. Mambo hayo si mengine bali ni yale yanayounda msingi wa kusudi la maisha yako.

19. Kusudi la maisha yako linaweza kuwa wokovu kwa maisha ya wengine. Hapa mtu yupo tayari kupoteza maisha yake ajili ya kuokoa maisha ya wengine au nchi yake. Mfano, katika nyakati za vita kuna baadhi ya watu ambao wapo tayari kufa kwa ajili ya kuilinda nchi yao. Hata hivyo, humu duniani kuna kila aina ya vita ambayo kila mmoja wetu anapigana kuishinda. Hivyo unaweza kuangalia ni vita ipi inawatesa watu wengi na wewe ukajitosa kuwasaidia ili wapambane dhidi ya vita hiyo.

20. Ulimwengu unakusubiria utumie kalama/vipawa ulivyopewa kwa ajili kuboresha dunia hii kuwa mahali pazuri kwa viumbe wote. Hivyo, kadri unavyozidi kuchelewa kutumia vipawa hivyo ndivyo unavyozidi kupoteza jambo ambalo ni kinyume na malengo ya uwepo wako hapa duniani. Pia, tunatakiwa kukumbuka kuwa suala la kuishi kusudi la maisha yako sit u faida kwa ulimwengu bali ni fadia na kwako pia kwa vile unaboresha afya yako ya kiroho, kiakili na kimwili.

Mambo Muhimu ya Kuzingatia katika Kutafuta Ukweli wa Kusudi/Dhamira ya Maisha Yako.

Mwandishi anatushirikisha kanuni tisa kwa ajili ya kufikia kusudi la maisha yetu. Karibu tujifunze wote kanuni hizi:-

21. Kamwe hatupaswi kusema ni mapema mno au tumechelewa kuishi kusudi la maisha yetu. Hii ni kutokana na ukweli kwamba kusudi la maisha yako unaweza kuliishi katika sehemu yoyote na muda wowote wa maisha yako.

22. Pamoja na kwamba kusudi la maisha yako lipo sehemu yeyote ile, ukweli ni kwamba ni rahisi kulipata kusudi la maisha katika sehemu ambazo una uzoefu nazo. Sehemu hizi zinaweza kuwa familia yako, marafiki, kanisani, kipaji chako, ajira au biashara yako na mazingira yanayokuzunguka kwa ujumla.

23. Tafuta watu ambao ni “role model” wako. Hawa ni watu ambao kupitia maisha yao unapata hamasa ya kufikia maisha ya ndoto zako. Ni watu ambao wameishi maisha ya mafanikio kwenye jamii zao hivyo na wewe kupitia wao unaweza kujifunza mengi. Hapa unaweza kuanza kuwa karibu na wale ambao unatamani maisha yao kwa ajili ya kujifunza kutoka kwao.

24. Kama inawezekana pata sapoti kutoka kutoka kwa watu wenye mtazamo kama wako. Lakini kuwa tayari kusimama kwenye kusudi la maisha yako hata kama hakuna mwenye mawazo au maisha ya namna hiyo. Hii ni kutoka na ukweli kwamba kusudi la maisha yako linaweza kuwa sio maarufu kwa wakati huu na hivyo ukajikuta hauna sapoti kutoka kwa watu wengine.

25. Kuwa tayari kusimama imara kwa vikwazo na changamoto za hapa na pale. Katika safari yako utapata mafanikio pamoja na kushindwa kufikia baadhi ya malengo lakini katika yote haya haupaswi kuicha njia yako.

26. Endelea kuwa mnyenyekevu na mwenye hekima katika matendo yako. Haupaswi kudanganywa au kuridhika na mafanikio unayoyapata kutoka kwenye kusudi la maisha yako na badala yake unatakiwa kuendelea kuishi maisha yenye faida kwa watu wote.

27. Kuwa na uhakika kuwa kusudi la maisha yako linaendelea kuwa halisi lakini pia na njia unazotumia kulifikia kusudi hilo hazina athari kwa wengine. katika kila hatua jiulize maswali haya: Je nini nahitaji kupata katika maisha haya? Kwa nini nahitaji kupata kitu/vitu hivi? na Je njia ninazotumia kupata vitu hivyo ni halali? Ni rahisi sana kupata kusudi la maisha yako lakini vigumu kuliishi kwa kuzingatia njia na sababu zinazokusukuma kuishi kusudi hilo.

28. Sherekea kusudi la maisha yako na ona fahari ya kuliishi kwa watu wanaokuzunguka. Hii ni kutokana na ukweli kwamba kusudi la maisha yako ni zawadi tena zawadi ambayo unapaswa kuitumia kwa faida ya wengi.

29. Hakikisha zawadi ya kusudi la maisha yako inarithiwa na vizazi na vizazi. Wafanye watoto wako na jamii nzima ijufunze kutoka kwako na hata pale ambapo ukomo wa maisha yako utaisha utakuwa umeacha alama kwa wengine.

Mpendwa rafiki na msomaji wa mtandao wa fikra za kitajiri, haya ni machache kati ya mengi ambayo nimejifunza kwenye Noble Purpose, naamini kama utayafanyia kazi yataboresha maisha yako. Niendelee kukuomba usambaze jumbe hizi kwa kadri uwezavyo ili yale unayojifunza yawafikie wengi na hatimaye tufanikiwe kuibadilisha dunia hii kuwa mahali pazuri pa kuishi (Unaposambaza makala hizi hakikisha haukopi na kupest badala yake share link ili hatimiliki za mwandishi wa makala ziheshimiwe). Nakutakia mapambano mema.

Ili kupata makala za namna hii kwenye barua pepe yako BONYEZA HAPA na acha taarifa zako. 

Karibuni kwenye fikra za kitajiri ili upate elimu hisiyokuwa na mwisho.

Born to Win~Dream Big 

Augustine Mathias Bilondwa
Namba ya Simu:      0786881155
Mwanzilishi wa Mtandao wa fikrazakitajiri.blogspot.com

Barua pepe:  fikrazatajiri@gmail.com

Ukurasa wa facebook: Fikra za Kitajiri: Fikri na Kutenda Kitajiri: Elimika na Tajirika

UCHAMBUZI WA KITABU The Rules of Money: How to Make It and How to Hold on to It (Kanuni za Pesa: Jinsi ya Kuzitengeneza na Jinsi ya Kuendelea Kutengeneza Pesa Zaidi)

Habari ya leo rafiki na msomaji wa mtandao wa fikra za kitajiri. Ni matumaini yangu kuwa unaendelea vizuri katika mapambano ya kuboresha maisha yako kwa kuhakikisha kila siku unakuwa bora zaidi kupitia ushindi mdogo mdogo. Leo hii ninakuletea uchambuzi maalumu wa kitabu cha The Rules of Money ambacho kimeandikwa na mwandishi mahiri Richard Templar.

Kupitia kitabu hiki mwandishi anatushirikisha kanuni 107 za pesa ambazo kupitia uchambuzi huu nitakushirikisha kanuni zote ili uanze kuzitumia kwa ajili ya kutengeneza pesa zaidi na zaidi katika mchezo huu wa fedha. Kwa ujumla katika kitabu hiki tunafundishwa kuwa pesa hawezi kununua furaha au mapenzi yako bali pesa inaweza kununua kila aina ya vitu na hivyo kukuwezesha kumiliki kila aina vitu unavyohitaji. Lakini katika yote ni muhimu kukumbuka kuwa furaha ya kweli juu ya matumizi ya pesa yako inatengenezwa na wewe mwenyewe kutoka ndani mwako.

Kanuni hizi zimegawanyika katika makundi saba na kila kundi lina kanuni zinazokuhusu wewe na pesa yako. Karibu tujifunze wote kwa haya machache niliyojifunza kwenye kitabu hiki;

SEHEMU YA KWANZA: FIKRI KITAJIRI (THINKING WEALTHY)

1. Kanuni ya Kwanza: Kila mtu anaweza kuwa na fedha anazozitaka, ni suala la yeye kujiweka sawa kwenye kanuni za kutengeneza fedha. Kuwa na pesa ni haki ya kila mmoja bila kujali rangi, kabila, umri, historia ya wazazi wake au utaifa wake. Kila siku inafungua mlango kwako kwa ajili ya kutumia fursa zilizopo ili kuweza kutengeneza pesa unazotaka na hivyo ni muhimu kwako kujifunza mbinu wanazotumia matajiri kutengeneza pesa zaidi na mbinu hizo zipo wazi kwa kila mmoja. Kitu pekee kinachoweza kukukwamisha ni wewe mwenyewe na mtazamo wako juu ya upatikanaji wa fedha. Kanuni hii ndio kanuni kuu ya kutengeneza pesa na kanuni nyingine zinahusu wewe kujijengea misingi ya ya kuendelea kutengeneza pesa zaidi na ziadi.

Soma: Salamu za Mwaka 2017 kwa Wafanyakazi wa Umma na Sekta Binafsi. Fahamu siri 10 Ambazo Zitayabadilisha Maisha Yako kwa Ujumla

2. Kanuni ya Pili: Kuwa na maana yako ya neno “utajiri”. Katika kanuni hii mwandishi anatushirikisha kuwa utajiri unaanza na wewe kufafanunua nini maana ya utajiri kwa mtazamo wako. Nini hasa unataka kupata ili ukishapata vitu hivyo ndo uone kuwa umekuwa tajiri. Hivyo kabla haujaanza safari ya utajiri anza kwa kuadaa orodha ya yale yote unayoyataka katika maisha yako ya utajiri. Hapa haupaswi kujifunga kwa kutengeneza picha finyu bali unatakiwa kuwa na fikra pana ambazo pengine zinakufanya uziogope kwa sasa.

3. Kanuni ya Tatu: Tengeneza lengo lako. Baada ya kuwa na maana yako ya utajiri ambayo ni sawa na kilele cha safari yako hivyo unapaswa kutengeneza lengo kubwa ambalo litakuwa ni njia ya kuelekea kwenye kilele hicho.  Hapa unapaswa kuweka muda ambao unategemea kufikia kilele cha utajiri wako, eleza njia zipi zitatumika kufikia utajiri huo, ainisha changamoto ambazo ambazo unahisi zinaweza kukukwamisha na hatimaye kuwa na mpango wa kupambana na changamoto hizo. Lengo linatakiwa liwe linatekelezeka, lenye uhalisia na linatoka ndani mwako.

Soma: Mambo 25 Niliyojifunza Kwenye Kitabu cha Supercoach; 10 Secrets to Transform Anyone’s Life (Siri Zitakazobadilisha Maisha ya Mtu Yeyote kwa Ujumla)

4. Kanuni ya Nne: Lifanye lengo lako kuwa siri. Unapoanza safari ya kuishi lengo kubwa ulilojiwekea ina maana kuwa unaanza maisha mapya ambayo yatakufanya uwe mtu wa tofauti ikilinganishwa na maisha yako ya zamani. Hivyo katika maisha haya mapya wapo wengi ambao hawatafurahia jinsi unavyobadilika kutokana na chuki zao au wivu kwa vile unaelekea kwenye maisha ya tofauti na wao. Kwa hali kama hii unatakiwa malengo uliyojiwekea yawe siri yako ili husikatishwe tamaa na maneno ya jamii inayokuzunguka.

5. Kanuni ya Tano: Watu wengi ni wavivu wa kufikia utajiri wao. Hakuna njia nyingine ya kuwa tajiri zaidi ya kufanya kazi kwa bidii. Ni lazima uwe tayari kufanya kazi kwa nguvu zako zote kuhakikisha unafanikisha malengo uliyojiwekea. Hakikisha unaamka asubuhi na kuanza kutekeleza majukumu yako ya kila siku na hata pale unapoenda kulala fanya hivyo ukiwa katika picha kubwa ya lengo kubwa la maisha yako.

Husitegemee kuwa tajiri kwa fedha za kurithi, fedha za bahati na sibu au fedha za kuokota. Watu wengi wanataka utajiri lakini hawapo tayari kujibidisha ili wafikie utajiri huo, hawapo tayari kujifunza, hawapo tayari kufanya kazi, hawapo tayari kutoa sadaka kwa ajili ya kuupata utajiri na mbaya zaidi wengi wana fikra hasi kuwa ili uwe tajiri ni lazima uende kwa wachawi au utajiri ni kwa ajili ya wateule wachache. Utajiri wa kweli hauko hivyo bali ni lazima uandaliwe kwa kutumia misingi na mifumo ambayo inakuhusisha wewe kama mhusika mkuu wa safari hii. Hii nikutokana na ukweli kwamba matajiri wote wana sifa kubwa ya kufanya kazi za ziada kiasi kwamba kazi wanazofanya kwa siku ni zaidi ya zile tunazofanya kwa mwezi mzima.

6. Kanuni ya Sita: Jifanyie tathmini ambayo ni ya kweli. Ili uwe tajiri ni lazima ujifanyie upekuzi kwanza. Katika upekuzi huu unatakiwa kufahamu ni tabia zipi ambazo zimekufikisha hapo ulipo na hatimaye weka mikakati ya kukabiliana na tabia ambazo zinakukwamisha. Kaa chini na fikiria ni tabia zipi ambazo ukianza kuzifanya zitapelekea utajiri wako uongezeke na anza mara moja kuzifanyia kazi. Kuwa mkweli kwenye matumizi ya pesa yako, muda, marafiki na manunuzi yako.  Kisha jenga tabia ya kutenga kiasi cha fedha kwenye kila shilingi inayoingia mkononi mwako kwa ajili ya uwekezaji wa muda mfupi na muda mrefu. 

7. Kanuni ya Saba: Fahamu imani/kauli zako kuhusu pesa na vyanzo vya kauli hizo. Katika jamii tunazoishi kuna kila kauli juu ya fedha na utajiri kwa ujumla. Wapo wanaoamini kuwa pesa ni chanzo cha maovu yote, utajiri ni kwa wateule tu, matajiri ni watu wabaya, warafi, wachoyo, wachawi kwa maana ya kwamba hauwezi kuwa na fedha na kwa wakati huo huo ukawa msafi wa roho, ni afadhari kuwa maskini na kauli nyinginezo. Je wewe imani/kauli zako juu ya fedha na utajiri ni zipi? Pata muda wa kutafakari na hatimaye jipe imani/kauli mpya ambazo zitakupeleka kwenye mtazamo mpya juu ya pesa na utajiri.

Soma: Mwaka 2017 Jifunze Kusema Hapana kwa Mambo haya ili Kuwa na Uhuru wa Kifedha

8. Kanuni ya Nane: Fahamu kuwa Utajiri ni Mchakato na sio zawadi. Katika kutafuta utajiri ni lazima ujitoe kufanya kazi kwa bidii ili fedha zifuatie kama zawadi kwa bidii na ubunifu katika utendaji kazi wako. Kadri unavyofanyakazi kwa bidii na ubunifu ndivyo utavyopata pesa zaidi.

9. Kanuni ya Tisa: Andaa sababu zinazokusukuma kuwa tajiri. Hakikisha unaandaa sababu za kwa nini unataka kuwa tajiri. Eleza nini utafanyia pesa zako pindi ukiwa na pesa za ndoto yako, chagua ni starehe zipo utakuwanazo pindi ukiwa tajiri, sehemu zipi utapenda kutembelea, vitega uchumi vipi utapenda kuwa navyo n.k. Hapa unatakiwa kuandaa sababu ambazo zitakufanya uridhike na kufurahia utajiri wako badala ya kuja kuangamizwa na utajiri wako. Pia andaa orodha ya vitu ambavyo hautakuwa tayari kufanya kupitia utajiri wako ili kesho na keshokutwa uongozwe na hiyo kuepuka matumizi mabaya ya fedha zako.

10. Kanuni ya Kumi: Fahamu kuwa Pesa zinatengeneza Pesa. Tumia pesa zako kuhakikisha zinatengeneza pesa nyingine zaidi na zaidi. Ndio maana matajiri wanaendelea kuwa matajiri wakati masikini nao wanaendelea kuwa masikini. Hivyo kwa kutumia kanuni hii unatakiwa kutumia pesa kidogo ulizonazo sasa kwa ajili ya kuzalisha pesa zaidi na zaidi kwani hiyo ndo njia pekee ya kuwa tajiri. Hakikisha unatenga kiasi cha pesa katika pato lako kwa ajili ya kuwekeza ili kiasi hicho ndo kitumike kama mbegu ya kuzalisha pesa nyingine. Kama ilivyo kwa mkulima au mfugaji hawezi kula mbegu au mifugo yake yote na akategemea kuzalisha zaidi shambani au mifugo kuongezeka ndivyo ilivyo kwenye fedha. Uamzi upo mikononi mwako kati ya kuchagua kuwa masikini au kuwa kati ya matajiri.

11. Kanuni ya Kumi na Moja: Kokotoa faida kabla ya kuwekeza fedha zako. Utajiri ni hesabu hivyo unatakiwa kabla ya kuwekeza kwenye kitega uchumi chochote kile ni lazima ufanye hesabu za kufahamu faida yako itakuwa kiasi gani hadi pale utakapofanikiwa kurejesha kiasi ulichowekeza. Changanua faida na hasara kwenye kila aina ya uwekezaji unaotaka kufanya. Unapochanganua faida za mradi flani unatakiwa kukumbuka suala la kodi na gharama nyingine ambazo zitawezesha mradi wako uendelee kukuingizia faida.

12. Kanuni ya Kumi na Mbili: Kama utachukulia pesa kama suluhisho la matatizo utaiona kama chanzo cha matatizo. Katika safari yako ya utajiri ni lazima ukumbuke kuwa pesa hazitaweza kumaliza matatizo yako yote ya kimahusiano, afya, kijamii, usalama, kiroho na furaha. Hivyo ni muhimu kufahamu fika matatizo yote hayo wewe ndo muhusika mkuu wa kuyatatua na wala sio fedha zako. Fedha haziwezi kukupa furaha ya kudumu, amani, upendo, kupunguza uzito wa mwili wako na mengine mengi na badala yake vitu hivi vinaanzia ndani mwako.

13. Kanuni ya Kumi na Tatu: Unaweza Kutengeneza Pesa za Kutosha, Unaweza Kuipenda Kazi Yako na Unaweza Kupata Usingizi Vizuri. Kwenye jamii kumekuwepo na upotoshaji kuwa ili kuwa tajiri ni lazima kwanza uuze roho yako au uwatoe sadaka ndugu zako (maarufu kama ufreemason), uwe mchoyo, banifu, kukosa usingizi na kukosa muda wa kuwajali watu wengine; lakini ukweli ni kwamba utajiri  wa kweli ni kinyume kabisa na mitazamo hiyo. Hii ni kutokana na ukweli ambao tumeuona kwenye kanuni ya kwanza kuwa fedha zipo nyingi na za kutosha kwa ajili ya yeyote yule ambaye anajua mbinu halali za kuzitafuta na mbinu hizo zipo wazi kwa kila mmoja. Hivyo wewe ndo mwamuzi wa maisha yako ya utajiri lakini muhimu ni kufahamu kuwa unaweza kuwa tajiri na ukaendelea kupenda kazi yako na kupata usingizi vizuri tu.

14. Kanuni ya Kumi na Nne: Husitengeneze Pesa kwa Kuwa Mtu Mbaya. Hakikisha unatafuta utajiri kwa njia ambazo ni halali kwani pesa za namna hii ndo zitakupa amani kutoka rohoni mwako tofauti na fedha za wizi, udanganyifu, rushwa, uchawi au kwa kuvunja sheria kwa namna yoyote ile. Mwandishi anatufundisha kuwa ni muhimu zoezi la kutengeneza fedha ulichukulie kama sehemu ya mchezo ambao uwa unaupenda sana na hivyo uendelee kutengeneza fedha kwa kadri upendavyo kupitia mchezo wa fedha. Hii ni kutokana na ukweli kwamba tunahitaji utajiri kwa ajili ya kuendelea kuyaboresha maisha yetu hivyo hatupo tayari kuona utajiri wetu unakuwa chanzo cha kutuweka mbali  na wapendwa wetu, kazi zetu, nyumba zetu, hobi zetu na mengine mengi.

15. Kanuni ya Kumi na Tano: Fahamu Uhusiano Kati ya Pesa na Furaha. Ni muhimu kufahamu kuwa pesa haiwezi kununua furaha. Wote ni mashahidi kuwa pesa kidogo zinaweza kukufanya uwe na maisha ya uzuni hasa pale mahitaji ya pesa yanapozidi kiasi ulichonacho. Hata hivyo wapo matajiri wengi ambao wanaishi maisha ya uzuni pamoja na kwamba wana pesa nyingi. Muhimu ni kufahamu kuwa unaweza kuwa masikini/tajiri na ukawa na furaha au ukakosa maisha ya furaha. Hivyo, jambo la muhimu unatakiwa ufahamu kuwa furaha inaanzia ndani mwako pasipo kujali kipato ulichonacho. Hii ni kutokana na ukweli kwamba sio pesa au vitu unavyomiliki vitakufanya uwe na furaha bali furaha unaitengeneza mwenyewe.

16. Kanuni ya Kumi na Sita: Fahamu Tofauti kati ya Bei na Thamani. Sio lazima bei ya kitu iendane na thamani ya kitu hicho. Mfano, ni kawaida sana kukuta chupa moja ya soda katika duka la kawaida inauzwa kwa shilingi 1,000/ lakini soda hiyohiyo ikauzwa kwa shilingi 5,000/ katika hotel kubwa. Kinachotofautisha bei ni mazingira ambayo soda hiyo inatolewa kwa mteja. Somo la kujifunza ni kwamba watu wapo tayari kulipia ongezeko la thamani ya huduma yako kuliko thamani halisi ya huduma husika. Kama unataka kuwa tajiri ni lazima ufahamu somo hili na kulitumia kwa ajili ya kuzalisha faida zaidi kwa ajili ya kuongeza utajiri wako.

17. Kanuni ya Kumi na Saba: Fahamu Jinsi Matajiri Wanavyofikri. Kama unataka kuwa tajiri ni lazima uwe tayari kujifunza maisha ya matajiri jinsi wanavyofikria, wanvyofanyakazi, wanavyovaa, wanavyotumia pesa zao na maisha yao kwa ujumla. Hii ni kutokana na ukweli kwamba kama unaenda vitani kwa ajili ya ushindi ni lazima utumie muda mwingi kumsoma mpinzani wako ili utakapokuwa kwenye uwanja wa vita hasikusumbue. Ndivyo ilivyo kwenye kutengeneza utajiri ni lazima uwe tayari kufahamu zaidi juu pesa, upate muda wa kuongea na matajiri, kusoma historia zao na kuhakikisha unakuwa na kiu ya kufahamu mbinu wanazotumia kukuza utajiri wao.

18. Kanuni ya Kumi na Nane: Husiwe na Wivu na Mafanikio ya Wengine. Wote tunaweka juhudi kila mmoja kwa muda wake na kila mmoja mipango yake hivyo hakuna sababu ya kuwa na wivu kwa mafanikio ya wengine kwani jinsi walivyo ni matokeo ya jitihada na ubunifu katika kazi zao. Jambo la muhimu unaloweza kufanya ni kujifunza kutoka kwao ili kufahamu namna ambavyo wamefanikisha ndoto za maisha yao. Hivyo kila unapopata nafasi ya kukutana na mtu mwenye mafanikio hakikisha unajifunza kitu kipya kutoka kwake. Fanya yale wanayoyafanya matajiri na hatimaye na wewe utakuwa kama wao.

19. Kanuni ya Kumi na Tisa: Kazi Ngumu ni Kujidhibiti Mwenyewe Kuliko Unavyopaswa Kudhibiti Pesa Yako. Kazi kubwa iliyopo mbele yako ni wewe kubadilika na kufanya yale yanayofanywa na matajiri. Kwa maana nyingine kubadilisha tabia zako ili ziendane na tabia za matajiri. Hapa unapaswa kujiuliza maswali kama haya; Je nipotayari kuanza safari ya utajiri? Je nipo tayari kubadilika? Je nina nia ya kweli ya kuwa tajiri? Je nipo tayari kuvumilia pasipo kukata tamaa? Je nipo tayari kujitoa sadaka? Je nina nguvu za kutosha?. Majibu ya maswali haya ni mwanga tosha kuonesha kama upo tayari kuanza safari ya utajiri. Ukifanikiwa katika hatua hii ndipo utagundua kuwa ni vigumu kujidhibiti kuliko ambavyo utadhibiti pesa yako.

Soma: Dunia Inabadilika kwa Kasi Sana; Je Umeijenga Safina Yako?

Mpendwa rafiki na msomaji wa mtandao wa fikra za kitajiri, haya ni machache kati ya mengi ambayo nimejifunza kwenye sehemu hii ya kwanza ya kitabu hiki cha The Rules of Money, naamini kama utayafanyia kazi yataboresha maisha yako. Niendelee kukuomba usambaze jumbe hizi kwa kadri uwezavyo ili yale unayojifunza yawafikie wengi na hatimaye tufanikiwe kuibadilisha dunia hii kuwa mahali pazuri pa kuishi (Unaposambaza makala hizi hakikisha haukopi na kupest badala yake share link ili hatimiliki za mwandishi wa makala ziheshimiwe). Nakutakia mapambano mema.

Uchambuzi wa kina wa kanuni zote (107) umeandaliwa kwa mfumo wa pdf na unapatikana kwa gharama ya Shilingi za Kitanzania (TSHS) elfu tano tu (5,000/=). Uchambuzi wa kanuni zote una jumla ya kurasa 39 na ni kitabu ambacho unaweza kusoma kwenye simu yako ya mkononi kama ni simu janja (smart phone) au kwenye kompyuta mpakato (pc).

Kupata uchambuzi wa kanuni zote tuma pesa yako kwa njia ya M-pesa au Airtel Money kupitia namba zifuatazo:-

M – Pesa tumia namba: 0763 745 451 (Majina ni Augustine Mathias)

Airtel Money tumia namba: 0786 881 155 (Majina ni Augustine Mathias)

Baada kutuma pesa hiyo nitumie ujumbe kwenye namba ya airtel (0786 881 155) ukiwa na barua pepe yako ili nikutumie uchambuzi wa kanuni hizi moja kwa moja kwenye mtandao wako.

Karibu kwenye mtandao wa FIKRA ZA KITAJIRI ili upate elimu isiyokuwa na mwisho.

Born to Win~Dream Big 

Augustine Mathias Bilondwa
Namba ya Simu:      0786881155
Mwanzilishi wa Mtandao wa fikrazakitajiri.blogspot.com

Barua pepe:  fikrazatajiri@gmail.com

Ukurasa wa facebook: Fikra za Kitajiri: Fikri na Kutenda Kitajiri: Elimika na Tajirika

Jiunge na Mtandao wa Fikra za Kitajiri

*Lazima ijazwe

Barua pepe *

Jina la Kwanza *

Jina la Ukoo

Namba ya simu

Mambo 20 Niliyojifunza Kwenye Kitabu cha Mind Frick: Master Your Inner World to Succeed in the Outer World (Dhibiti Mazingira Yako ya Ndani ili Ufanikiwe Katika Mazingira ya Nje)

Habari ya leo rafiki yangu na msomaji wa mtandao wa fikra za kitajiri. Karibu tena katika uchambuzi wa kitabu ambapo leo hii ikiwa ni wiki ya sita katika mwaka 2017 naendelea kutimiza ahadi yangu kwako ya kuhakikisha nakuletea uchambuzi wa kitabu kimoja kila mwisho wa wiki (Ijumaa).

Pia, rafiki napenda nikufahamishe kuwa ahadi yangu kwako haina gharama yoyote kwa maana ya kwamba ni ya bure kabisa na hivyo unachotakiwa kufanya ni kutenga angalau saa moja kila ijumaa au jumamosi kwa ajili ya kupitia mafundisho haya ili kwa pamoja tufanikiwe kuyaboresha maisha yetu. Niendelee kukumbusha pia kama unataka kupata makala za mtandao wa fikra za kitajiri moja kwa moja kwenye anuani yako ya barua pepe BONYEZA HAPA na kuacha taarifa zako na utakuwa umeunganishwa bure kwenye mtandao wa fikra za kitajiri.

Katika uchambuzi wa wiki hii nitakushirikisha machache niliyojifunza kwenye kitabu cha Mind Frick ambacho kimeandikwa na T. Harv Eker. Mwandishi wa huyu ni Milionea, Mwandishi na Mzungumzaji mashuhuri kwenye masuala ya kuihamasisha jamii kuishi ndoto za maisha yao kwa mafanikio makubwa sana. Pia, unaweza kusoma kitabu chake cha Secrets of the Millionaire Mind ambapo katika kitabu hiki pia anatufundisha umuhimu wa kubadilisha fikra zetu ili ziwe za kitajiri (kupata vitabu hivi tuma ujumbe kwenye fikrazakitajiri@gmail.com nitakutumia nakala ya pdf).

Karibu tujifunze wote yale ambayo ni ya muhimu kuboresha maisha yetu kutoka katika kitabu hiki;

1. Katika maisha watu wengi hawaishi kusudi la maisha yao bali wanaishi ili mradi tu maisha yaende. Hapa mwandishi anatushirikisha kuwa katika jamii wengi wameishi maisha ya msongo wa mawazo kutokana na kufanya yale ambayo si vipaumbele vya mapenzi yao bali tu wanafanya kwa vile wamekosa mbadala. Lakini habari ni njema ni kwamba milango ipo wazi kwa ajili wale ambao wana nia ya kweli na wapo tayari kutafuta kusudi halisi la maisha yao. Hivyo kila mmoja anaweza kubadilisha maisha yake na kuishi maisha mapya yenye vipaumbele vya mapenzi yake.

2. Njia pekee kwa kila mmoja kuishi kusudi la maisha yake ni kuhakikisha kwanza anajiamini ya kwamba anaweza kufanikisha jambo lolote ambalo amedhamiria. Hapa tunafundishwa kwamba ni lazima kwanza tujipende na kujiamini kutokana na ukweli kwamba kama haujipendi/kujiamini kamwe hauwezi kupendwa wala kuaminiwa na wengine. Pale unapojipenda na kujiamini mwenyewe kuna nguvu kubwa yenye hamasa inayotoka ndani mwako hivyo kukufanya ubadili mtazamo na vitendo vyako katika mazingira yanayokuzunguka.

3. Kama unataka kuwa na maisha yenye furaha hakikisha unafanya vitu ambavyo hautajutia mara baada ya kuvifanya au hata baada ya ukomo wa maisha yako. Mwandishi anatuhamasisha kuwa furaha ya kweli inatokana na kufanya kwa ubora wa hali ya juu yale ambayo ni kipaumbele katika maisha yetu. Kwa ufupi ni kwamba inabidi tuishi maisha yetu kwa viwango vya juu ili pale ukomo wa maisha yetu utakapowadia tusijutie yale ambayo hatukutekeleza. Hata hivyo kufanikisha maisha haya ni lazima tutambue kuwa chanzo cha kweli cha furaha ya maisha yetu kipo ndani mwetu na hivyo kila mmoja ana wajibu wa kuishi maisha yenye furaha pasipokujali ya maisha aliyonayo.

Soma: Hii Hapa Kauli Mbiu Ambayo Nakusihi iwe Mwongozo wako kipindi chote cha mwaka 2017

4. Hali ya maisha tunayoyataka yamo ndani ya uwezo wetu na hivyo ni lazima tutambue kuwa maisha yetu tunayaandaa sisi wenyewe. Kila mmoja ni muhusika mkuu (steering) wa filamu ya maisha yake hivyo ni wajibu wa kila mmoja kufanya kila liwezekanalo kuboresha matukio ya maisha yake.

Soma: Mambo 25 Niliyojifunza Kwenye Kitabu cha Supercoach; 10 Secrets to Transform Anyone’s Life (Siri Zitakazobadilisha Maisha ya Mtu Yeyote kwa Ujumla)

5. Mafanikio kwenye biashara au kitu chochote kile ambacho mtu ameamua kufanya ni lazima yaanzie ndani. Biashara yoyote ambayo imejengwa kwa dhamira kutoka ndani ni lazima iwe biashara yenye mafanikio kwa mmiliki. Muhimu nikutambua kuwa undani wako (fikra) ndo unaumba mwonekano wako kwa nje hivyo furaha, amani na nguvu ni lazima vianzie ndani mwako.

6. Furaha na mafanikio vyote vinaanzia akilini mwako hivyo wewe huyo huyo unaweza kuwa katika hali ya uchanya au hasi. Ili ufanikiwe zaidi katika maisha yako ni lazima uifundishe akili yako kuona uchanya katika matukio ya maisha yako.

Soma: ZIJUE SHERIA ZA ASILI NA JINSI YA KUZITUMIA KUFIKIA MAFANIKIO MAKUBWA SANA - SEHEMU YA NNE

7. Nafsi yako inaishi (exist) katika nafsi mbili ambazo ni nafsi yako halisi (wewe wa ukweli) na nafsi yako ya uongo (wewe wa uongo). Nafsi yako halisi ni jinsi vile ulivyoumbwa na nafsi yako ya uongo ni ile ambayo umejifunza kuwa katika maisha yako ya kila siku. Hapa tunafundishwa kuwa tulikuja ulimwenguni humu tukiwa wazi na kupitia jamii inayotuzunguka tumejikuta tupo jinsi tulivyo kwa sasa. Hivyo utagundua kuwa fikra na mitazamo juu ya maisha yetu kwa sasa ni chimbuko la yale tuliyojifunza katika ulimwengu huu. Kumbe basi kwa ukweli huu kila mmoja ana nafasi ya kubadilisha fikra na mitazamo juu yake yeye mwenyewe na maisha yake kwa ujumla.

8. Asilimia kubwa ya mwonekano na tabia zako ni matokeo ya makuzi na malezi yako kutoka kwa wazazi/walezi, walimu, viongozi wa dini, ndungu, marafiki au jamii inayokuzunguka kwa ujumla wake. Pamoja na ukweli huu kila mmoja anaweza kubadilisha mwonekano au tabia zake kwa kujifunza kutenda yale ya muhimu katika maisha yake.

9. Wewe ni tunda la yale unayoyawaza kwa muda mrefu. Una uwezo wa kuchagua yale ambayo yana kipaumbele katika maisha yako ili yatawale sehemu kubwa ya mfumo wa fikra zako.

10. Wengi tumeshikiliwa na fikra au mitazamo yetu kila tunapojaribu kusonga mbele pasipokufahamu. Kwa vile hatujui kuwa sisi ndo tunaumba matokeo ya maisha yetu tumeendelea kulalamikia mfumo wa nje ya nafsi yetu kama vile serikali, wazazi au mazingira kwa ujumla. Maisha ya namna hii yametufanya tuwe na hofu, wivu, chuki na mambo mengine mabaya katika maisha yetu ya kila siku. Lakini habari njema ni kwamba siku ambayo utatambua kuwa wewe ndo umekuwa ukijikwamisha kupitia mitazamo na fikra zako ndo siku utaanza kubadilika mara moja.

11. Kila mmoja ana kuishi kusudi la maisha yake kwa kubadilisha mazoea ya fikra/mtazamo wake. Kwa kufanya hivyo hisia na vitendo vya mhusika vinabadilika kuelekea kwenye maisha mapya ya kusudi la maisha yake. Maisha haya yatakuwa ni maisha yenye amani, furaha, upendo, busara, hekima na kila aina ya mafanikio.

12. Ili kuwa na maisha yenye utulivu wa fikra na amani katika mazingira yanayotuzunguka ni lazima tukubali kuwa kuna nguvu ya ziada ambayo inafanya kazi juu ya maisha. Nguvu hii ya asili imefichika kwenye upeo wetu wa fikra na hivyo kwa asili kila mtu ana imani yake juu nguvu hii; wapo wanaosema kuwa kuna Mungu, wengine wanasema ni miungu na wengine wanasema kuna nguvu ya ajabu ya kisayansi. Sisi ni sehemu ya nguvu na yenyewe ni sehemu yetu na kila sehemu tulipo nguvu hii pia ipo kwa ajili ya kutuongoza. Hivyo la muhimu ni wewe kufahamu na kutii misingi ya imani yako ili ikuongoze kuishi maisha ya amani na upendo.

13. Toka kuumbwa kwetu tumekuwa na muunganiko wa nguvu hii ya asili japo kadri tunavyozidi kukua na kufundishwa nafsi zetu za uongo (rejea namba 7) ndivyo tunavyotenganishwa na nguvu hii ya asili au waweza sema roho mtakatifu. Mfano, mtoto kadri anavyokua ndivyo anabadilika kutoka kwenye roho ya kujiamini na kuanza kuishi maisha ya hofu ambayo ni kinyume na matakwa ya nguvu hii ya asili.

14. Kadri mtu anavyoanza kuishi kusudi la maisha yake ndivyo anavyorejesha muunganiko wake na nguvu ya asili (roho mtakatifu) na hivyo kurejesha nafsi yake halisi (true self rejea namba 7). Na njia pekee ya kurejesha nafsi yako halisi ni kuutafuta ukweli. Katika muunganiko huu ni rahisi mtu kuishi maisha yenye furaha na kila aina ya maifanikio.

15. Kinachowatufautisha watu ni namna ambavyo wamefanikiwa kuishi kusudi la maisha yao na hivyo kurejesha nafsi yao halisi yenye muunganiko na nguvu ya asili. Kwa muunganiko huu na nguvu ya asili watu wenye mafanikio wameweza kuona fursa nyingi na hivyo kuzitumia kupata mafanikio makubwa sana. Pia, kwa kuunganika na nguvu hii ya asili wanamafanikio wameweza kuishi maisha yasiyo na msongo wa mawazo ikilinganishwa na watu ambao hawajui kusudi la maisha yao.

16. Fikra zinaleta hisia, hisia zinaleta vitendo na kupitia vitendo tunapata matokeo ya fikra zetu. Hivyo kama unataka kuacha tabia ambayo huipendi katika maisha huna budi kuhakikisha unaanza na kudhibiti fikra na hisia zako. Unaweza kutumia kanuni hii kuhakikisha unapambana na hisia zinazopelekea uwe na maisha ya hofu, chuki, wivu au wasiwasi. 

17. Sio lazima kila jambo unalofikria lifanyiwe kazi. Mfumo wa fikra ni sawa na viungo vingine vya mwili kama vile mguu, mkono au tumbo. Hatuwezi kusema kuwa wewe ni miguu tu au wewe ni mkono tu bali tunapotamka kuhusu wewe tunamaanisha wewe kwa ujumla wako. Hivyo jinsi tunavyoweza kudhibiti viungo vya miili yetu ndivyo tunapaswa kudhibiti mfumo wa fikra zetu ili kuhakikisha tunawaza yale ambayo ni muhimu katika maisha yetu.

18. Ubora wa maisha yako unategemea na ubora wa fikra zako. Unakukumbuka msemo mmoja kipindi tunafundishwa kompyuta enzi hizo? “Gabbage in gabbage out”. Ndivyo ilivyo hata kwenye mfumo wa fikra zetu kama utaweka mabaya tegemea kupata mabaya na ukiweka mazuri tegemea kupata mazuri pia. Uamzi upo mikononi mwako kuchagua ni yapi uendelee kuyawaza kwa muda kwa ajili ya maisha unayoyataka.

19.  Msongo wa mawazo ni hatari kwa afya yako na utajiri wako pia. Yapo magonjwa mengi ambayo yanaambatana na msongo wa mawazo na hivyo njia ya pekee ya kuepukana na magonjwa haya ni kukabiliana na fikra zinazopelekea msongo wa mawazo.

20. Unapoamua kuanza kuishi maisha yenye fikra chanya ni lazima utambue kuwa kuna upande mmoja wa fikra ambao hautakuwa tayari kukuruhusu kuachana na mazoea yako. Upande huu ni ule wa fikra ambazo umeizoesha akili yako kwenye tabia za maisha yako ya sasa, hivyo unatakiwa kuwa tayari kuubadilisha upande huu. Pia, katika mchakato huu wa maisha yako mapya ni lazima uwe mvumilivu kutokana na ukweli kwamba mabadiliko hayatatokea mara moja bali ni zoezi la muda ambalo litakuhusisha wewe kwenye kila sekta ya maisha yako.

Mpendwa rafiki na msomaji wa mtandao wa fikra za kitajiri, haya ni machache kati ya mengi ambayo nimejifunza kutoka kwenye kitabu hiki, naamini kama utayafanyia kazi yataboresha maisha yako. Niendelee kukuomba usambaze jumbe hizi kwa kadri uwezavyo ili yale unayojifunza yawafikie wengi na hatimaye tufanikiwe kuibadilisha dunia hii kuwa mahali pazuri pa kuishi (Unaposambaza makala hizi hakikisha haukopi na kupest badala yake share link ili hatimiliki za mwandishi wa makala ziheshimiwe). Nakutakia mapambano mema.

Ili kupata makala za namna hii acha taarifa zako kwa kujaza fomu hapo chini.

Karibuni kwenye fikra za kitajiri ili upate elimu hisiyokuwa na mwisho.

Born to Win~Dream Big

Augustine Mathias Bilondwa
Namba ya Simu:      0786881155
Mwanzilishi wa Mtandao wa fikrazakitajiri.blogspot.com

Barua pepe:  fikrazatajiri@gmail.com

Jiunge na Mtandao wa Fikra za Kitajiri

* Lazima ijazwe

Barua pepe *

Jina la Kwanza *

Jina la Ukoo

Namba ya simu