Karibu tena katika makala
yangu ya leo ambayo inalenga kukumbusha misingi uliyojiwekea mwaka 2017
kwa ajili ya kuyaboresha maisha yako. Imekuwa ni kawaida kwa walio wengi kila
tunapoanza mwaka mpya tunajiwekea malengo kemukemu kwa ajili ya kuyatimiza
katika kipindi cha mwaka husika.
Pamoja na kujiwekea malengo,
kwa walio wengi tumekuwa tunajikuta tunarudia maisha yetu yaleyale na pengine kuyasahau
kabisa yale tuliyolenga kutekeleza. Kadri siku zinavyokwenda watu wengi wanasukuma
majukumu waliolenga kutekeleza kwenye siku za mbele na hatimaye wanajikuta
mwaka unaisha pasipo kutekeleza jambo lolote kati ya yale waliopanga
kuyatekeleza kama kawaida wanajisemea haya nitayatekeleza mwaka kesho.
Rafiki yangu leo hii naomba
tunapomaliza mwezi wa kwanza katika mwaka 2017 hebu tujiulize mpaka sasa tupo
kwenye njia sahihi ya kufikia yale tulopanga hama tunaendelea na mfumo ule ule.
Tunapomaliza mwezi wa kwanza kati ya miezi 12 ya mwaka 2017 karibu tutafakali wote maswali haya:
1#
Je mimi ni yuleyule wa mwaka 2016?. Katika swali hili mpendwa
rafiki yangu naomba ujiulize maswali ya namna ambavyo umebadilika kifikra, tabia,
kimtazamo na vitendo kwa kipindi hiki cha mwezi mmoja ukilinganisha na mwaka
2016. Kama wewe ni yule yule wa mwaka 2016 sahau kabisa mwaka 2017 kupiga hatua
kubwa ukilinganisha na mwaka uliopita.
2#
Je unakumbuka yale ambayo umelenga kuyakamilisha mwaka huu?. Rafiki
wengi tunaishia kusema mwaka mpya na mambo mapya lakini je hayo mapya kweli
tunayatambua? Je tumeainisha yale ambayo yanatakiwa kupewa kipaumbele mwaka
huu? Je mpaka sasa bado unayakumbuka yale ambayo umejipanga kuyatekeleza. Ushauri
kama haukuandika malengo yako kwa mwaka huu bado muda upo nakushauri ufanye
hivyo mapema iwezekanavyo na baada kuyaandika yavunjevunje kwa miezi kumi na
moja iliyobakia kwa ajili ya kujitathimini kwa muda uliobakia.
3#
Je nimeanza kuchukua hatua?. Rafiki malengo pasipo
kuweka jitihada za kuyafanikisha ni sawa kutegemea kuendesha gari lisilokuwa na
mafuta. Kama kweli unataka mwaka 2017 kuwa wa mafanikio kwako ikilinganishwa na
miaka mingine anza mara moja kuchukua hatua pasipo kujali urefu wa hatua zako
cha msingi ni wewe kuanza mara moja.
Soma: Mambo 20 Niliyojifunza Kwenye Kitabu cha The Power of the First Step (Nguvu ya Hatua ya Kwanza)
4#
Je nimeanza kudhibiti matumizi yangu ya fedha?. Tunafahamu
fika kuwa fedha ni muhimili wa kutuwezesha kusonga mbele katika yale
tunayofanya. Na bila ya kudhibiti matumizi yetu ya fedha hatuwezi kufanikiwa
kusonga mbele hivyo ni vyema kuhakikisha tunapoendelea na mwaka 2017 tujiwekee
misingi ambayo itadhibiti matumizi ya fedha tunazopata pasipo kujali kiasi cha
fedha hizo.
5#
Je nimerejesha uhuru wangu?. Swali hili msingi wake mkuu
ni jinsi gani ambavyo tumekuwa watumwa wa simu zetu. Tumeshindwa kudhibiti
hisia zetu linapokuja suala la matumizi ya simu kisasa (smart phone) kutokana
na ukweli kwamba simu hizi zinatumia muda wetu mwingi hasa kwenye mitandao ya
kijamii ambako kila muda kuna meseji za hovyo zinazotumwa. Rafiki kama unataka
mwaka 2017 uwe wa mafanikio kwako hakikisha unarejesha uhuru wako kwa kupanga
muda unaotakiwa kuingia kwenye simu yako na hata pale unapokuwa kwenye simu
yako hakikisha una vipaumbele vya kufanya.
Haya ndiyo maswali ambayo
nimekushirikisha tunapomaliza mwezi wa kwanza katika mwaka 2017. Ni matumaini
yangu kuwa endapo utayafanyia kazi utabadilisha maisha yako na hivyo kupiga
hatua ili mwaka 2017 uwe wenye mafanikio
kwako. Niendelee kukuomba usambaze jumbe hizi kwa kadri uwezavyo ili yale
unayojifunza yawafikie wengi na hatimaye tufanikiwe kuibadilisha dunia hii kuwa
mahali pazuri pa kuishi. Nakutakia
mapambano mema.
Ili kupata makala za namna
hii moja kwa moja kwenye barua pepe yako BONYEZA HAPA
Karibuni kwenye fikra
tajiri ili upate elimu hisiyokuwa na mwisho.
Born to Win~Dream Big