Mambo Niliyojifunza Kwenye Kitabu cha The Art of Power (Sanaa ya Madaraka)

Habari ya leo rafiki na msomaji wa mtandao wa fikra za kitajiri. Ni matumaini yangu kuwa upo vizuri na mapambano yanazidi kushika kasi katika kipindi hiki ambacho tunamalizia robo ya kwanza ya mwaka 2017. Ikiwa ni wiki ya kumi na mbili tokea nianze kukushirikisha uchambuzi wa kitabu kimoja kila wiki ni matarajio yangu kuwa uchambuzi wa vitabu hivi umekusaidia kwa kiasi flani katika kipindi hiki cha robo ya kwanza ya mwaka. 

Kama mpaka sasa haujafanikiwa kujifunza kitu chochote katika makala hizi za uchambuzi wa vitabu nakushauri ni vyema husiendelee kupoteza muda wako na badala yake ufanye mambo ambayo umeyazoea. Hii ni kutokana na ukweli kwamba uchambuzi wa vitabu kupitia kwenye mtandao wa fikra za kitajiri unalenga uwasaidie wale wenye kiu ya kubadilisha maisha yao kupitia usomaji wa vitabu ikiwa ni pamoja na kutumia mbinu na maarifa tunayojifunza kwenye vitabu hivi katika kuboresha maisha yetu.

Kujiunga na mtandao wa fikra za kitajiri BONYEZA HAPA na ujaze fomu ili uendelee kunufaika na mwaliko huu ambao unakulenga wewe mwenye kiu ya kutimiza ndoto za maisha yako. Kwa kujiunga na mtandao huu utapata makala za mtandao wa fikra za kitajiri moja kwa moja kwenye barua pepe yako.

Kitabu cha wiki hii ni “The Art of Power” kutoka kwa mwandishi na Mtawa wa Kibuddha Thich Nhat Hanh. Mwandishi wa kitabu hiki amekuwa ni mpenda amani kwa muda mrefu kiasi cha kutumia muda wake mwingi katika kusuruhisha sehemu zenye vita ikiwa ni pamoja na kuwasaidia wahanga wa vita.

Kwa ujumla mwandishi anatushirikisha kuwa kwa maumbile kila mmoja wetu amezaliwa na nguvu ya madaraka ndani mwake na nguvu hii inaanza kutumika ipasavyo pale muhusika anapotambua yeye ni nani na ameumbwa ili atimize nini katika ulimwengu huu. Pia katika kitabu hiki mwandishi anatushirikisha umuhimu wa kutumia vizuri nguvu ya madaraka yetu kwa kutambua kuwa madaraka uliyonayo ndani mwake kuna nguvu ya kuyaangamiza pale yanapotumiwa vibaya.

Karibu tujifunze wote machache niliyojifunza kutoka kwenye kitabu hiki:

1. Madaraka halisi kwa kila mtu chimbuko lake ni kuishi maisha yenye furaha kwa wakati uliopo, maisha yasiyo na hofu, ulevi, ubaguzi, hasira na upumbavu wa kila aina. Hii ndio haki ya kuzaliwa ambayo kila mtu amezaliwa nayo hata kama yeye mwenyewe hajatambua haki hiyo. Mwandishi anatushirikisha kuwa watu wengi katika jamii wameishi kwenye msingi wa uongo wa kuwa madaraka yanatokana na elimu, utajiri, mafanikio, ukubwa wa vyombo vya jeshi, umaarufu, kipaji na nguvu au nafasi ya kisiasa. Hii ni kinyuma kabisa na maana halisi ya madaraka ambayo mwandishi anatushirikisha hapa kutokana na ukweli kwamba madaraka yanatakiwa yaanzie kwenye mfumo wa fikra wa kila mtu pasipo kujali nafasi au elimu yake.

2. Kutaka kuwa tajiri, maarufu au mafanikio ya namna yoyote ile sio jambo baya endapo tunatafuta vitu hivi kama msingi wa kutusaidia kuendelea kuishi maisha yenye furaha ya kweli katika nafsi zetu na wale tunaowapenda au jamii inayotuzunguka kwa ujumla. Kama vitu hivi vinapelekea madaraka ambayo yana athari kwa watu wengine na nafsi zetu basi vyote hivi havifai katika maisha yetu.

3. Madaraka ya kweli ni lazima yazingatie mambo yanayotokea ndani na nje ya mhusika. Kwa maana hii mwandishi anatushirikisha kuwa madaraka ambayo kila mtu amerithishwa kupitia uumbaji ni lazima yazingatie mahitaji ya nafsi kupitia mfumo wa fikra lakini pia mahitaji ya watu wanaokuzunguka. Madaraka ya namna hii yanajengwa katika msingi wa kufurahia kazi unayofanya ambayo pia ni lazima iwe inawasaidia watu wanaokuzunguka kutambua na kutumia vyema madaraka yao. Hii ni kwa mtu yeyote yule kuanzia kwa mfanyabiashara, mkulima, msanii, mwanasiasa au mfanyakazi. Kila mmoja katika makundi haya ni vyema kutanguliza lengo kubwa la kuwasaidia watu kupitia kazi yake na hatimaye mafanikio mengine yafuate.

4. Madaraka ya kweli ni yale yanayoongozwa na furaha kwa nafsi yako na watu wako wa karibu katika kila hatua unayopiga. Hapa mwandishi anatushirikisha kuwa ni muhimu kuishi maisha ya furaha kila iitwapo leo kana kwamba kesho hatutakuwepo. Hii ni kutokana na ukweli kwamba wengi wetu tumekuwa tukisubirisha furaha ya maisha yetu kwa kutegemea kuwa tutafurahi siku tukimiliki vitu flani lakini hata pale tunapofanikiwa kuvipata tunajikuta bado hatuna furaha rohoni mwetu. Ili kuondokana na hali kama hii mwandishi anatushauri kuishi leo kwa vile hakuna mwenye uhakika wa kwamba kesho atakuwepo.

5. Msingi wa madaraka tuliyonayo au tunayoyataka ni lazima uwe ni mapenzi ya dhati kwa familia zetu, wenza na watoto wetu, jamii inayotuzunguka. Ili kufanikiwa katika msingi huu ni lazima tusikubali kuruhusu maisha yetu yatawaliwe na yale tunayoyafanya kiasi cha kusahau kuwa karibu na wapendwa wetu. Daima tunakiwa kufahamu kuwa kuna furaha nje ya hayo tunayokimbizana nayo kila siku na furaha hiyo haipo sehemu nyingine zaidi ya kuwa na muda wa kufurahi na familia zetu.

6. Hata kama wewe ni tajiri mkubwa au maarufu kiasi gani ni lazima utambue kuwa hakuna furaha kama hauna mapenzi yanayoongozwa na hamasa ya ndani mwako bila kufahamu hili ni dhahiri kuwa yote unayofanya ni sawa na bure. Mwandishi anatushirikisha kuwa utajiri au mafanikio ya namna yoyote ile ni lazima yatokane na misingi ya kiroho ambayo ni upendo kwa nafsi zetu na wengine, huruma na kuepuka kiburi.

7. Madaraka ya kweli ni lazima yajengwe kwenye msingi wa imani kwani tunafahamu kuwa hata maandiko matakatifu yanasema kuwa kwa imani ndogo mtu anaweza kuhamisha milima. Katika hili ni lazima tutambue imani ni kuwa na uhakika pamoja na uhaminifu katika mambo yanayotarajiwa. Hivyo imani ni kufuata njia ambayo inakupeleka kwenye uhuru, wokovu au ukombozi na yenye uhakika wa kukutoa kwenye kila aina ya mateso. Hii ndiyo imani ya kweli ambayo kwa undani wake utagundua kuwa ndiyo msingi wa madaraka ambayo mwandishi anatufundisha kupitia kitabu hiki.

8. Madaraka ya kweli yanatokana na mwendelezo wa bidii zako pasipo kurudi nyuma au kutafuta njia ya mkato. Njia rahisi ya kufanikiwa katika siri hii ni kujenga tabia ya utulivu wa akili katika kila jambo unalofanya na kuhakikisha unatenga muda wa kuongea na nafsi yako kila siku. Pia, mwandishi anatushirikisha kuwa mafanikio ya zoezi hili ni muhimu yapate baraka za wanafamilia. Hata hivyo mwandishi anatushirikisha kuwa ni muhimu kujenga tabia ya kupenda kufanya tajuhudi/tafakari (meditation) kama njia ya kutuwezesha kuwa na utulivu wa akili.

9. Mfumo wa ubongo wetu umejengwa katika namna ambayo unahifadhi mbegu za mema na mabaya. Kadri utakavyomwagilia mbegu za mema kupitia fikra zako ndivyo utapata matokeo mema na kinyume chake ni kwamba utapata matokeo mabaya kwa kutoa nafasi ya mawazo hasi katika fikra zako. Hivyo kuanzia sasa fahamu kuwa hasira, chuki, wivu, hofu, roho ya visasi, kutokujiamini na mengine mengi ambayo yamekusumbua kwa muda ni matokeo ya mbegu hasi ambazo umekuwa ukizimwagilia katika mfumo wako wa fikra. Hili kuepuka fikra hasi mwandishi anatushirikisha kuwa hatuna budi ya kuendelea na fikra hizo hadi zikajidhihirishe kwenye vitendo na badala yake tunatakiwa kubadilisha fikra hasi kwa fikra chanya.

10. Jifunze kutumia nguvu ya utulivu wa akili katika kila hali inayokuzunguka. Mwandishi anatufundishwa kuwa utulivu wa akili ni dhana pekee ya kumwezesha mtu kufikia mafanikio makubwa katika ulimwengu wa roho na mwili. Dhana hii imejengwa kwenye siri ya kuhakikisha akili yako kila wakati inatambua ni kipi kinatakiwa kufanyika kwa wakati huo na kipi hakipaswi kupewa nafasi. Mfano, kama unatembea badala kuwaza makosa yako ya nyuma au uoga wa maisha ya baadae unatakiwa akili yako yote iwe kwenye kila hatua ya mguu wako na hivyo utajikuta unapata furaha kwenye tendo la kutembea vivyo hivyo kwenye shughuli nyinginezo. Kwa kuishi msingi wa nguvu hii utafanikiwa kuepuka kufanya makosa na madhara mengi ya kiafya na hivyo kufanikiwa kuishi maisha yenye furaha muda wote.

Soma: Mambo Niliyojifunza Kwenye Kitabu cha Illiussions: The Adventures of a Reluctant Messiah (Uongo/Ndoto: Safari za Masiha Mkaidi)

11. Jifunze kufanya vitu kwa ukamilifu. Hapa mwandishi anatushirikisha kuwa hakuna mwenye uhakika kuwa kesho atakuwepo kwani yawezekana leo upo vizuri lakini kesho ukaaga dunia kwa ajili au tukio lolote lile. Hivyo ni muhimu kuishi maisha ya ukamilifu kwa kila jambo unalofanya. Kama umetenga muda wa kuwa na mwenzi wako kuwa naye kana kwamba hautakuwa na muda mwingine wa kukaa naye. Kwa ujumla tunafundishwa kuepuka kusubirisha jambo lolote kwa kutegemea kuwa litafanywa baadae.

12. Fahamu kuwa madaraka na vitu vyote tulivyo navyo katika dunia hii ni vya muda tu na hivyo umiliki wake sio wa kudumu. Hii inajumuisha maisha yetu. Wapendwa wetu na umiliki wa mali tulizonazo katika dunia hii. Mwandishi anatushirikisha kuwa unapotambuwa kuwa kila ulichonacho una umiliki wa muda itakuwa rahisi kwako kuhakikisha unapata furaha ya kutosha wakati huu kikiwa bado kwenye miliki yako. Mwandishi anatushirikisha kuwa kwenye msiba sio wote wanalia kwa sababu ya kupoteza mpendwa wao bali wengi wao wanalia kwa kujutia kuwa kwa muda ambao wameishi na marehemu hawakupata muda wa kumtumia vizuri na hivyo ameondoka kabla hawajafaidi uwepo wake.

13. Tumia madaraka uliyonayo vizuri ili uepuke kuumiza watu wa chini yako. Kama wewe ni mwalimu, baba/mama, kiongonzi au mwajiri hakikisha unatumia madaraka yako vizuri pindi unapowakanya watu wa chini yako ili kuepuka kuumiza nafsi yako au wale waliopo chini yako. Hapa mwandishi anatushauri kuwa muda wote tunatakiwa kutumia madaraka yetu vizuri ili tuwasaidie watu wa chini wafikie malengo yao pasipo kuwa na msongo wa mawazo au maumivu ya roho. Kiongozi bora ni yule anayetanguliza upendo, busara, huruma na hasiye na majivuno kwa watu wake kwa kuhakikisha anaishi hisia za machungu wanayopata watu wake.

14. Cheo hakitoi madaraka ya kweli bali madaraka ya kweli yanapatikana kutokana na juhudi za muhusika kujifunza mbinu za uongozi wa kweli. Madaraka ya kweli yanaanzia kwanza kwa muhusika kujifunza na kutumia mbinu za utulivu wa akili. Utulivu wa akili ni chanzo cha furaha, amani, upendo na busara na vyote hivi ndo nyenzo muhimu za madaraka ya kweli. Hii ni kutokana na ukweli kwamba unapokuwa na vitu hivi ni rahisi wafuasi wako kukusilikiliza kile unachoongea na hivyo nguvu ya madaraka yako itakufuata pasipo kutumia nguvu nyingi. Hapa tunajifunza kuwa viongozi wengi wamekuwa wakitumia nguvu nyingi ili waonekane kuwa wana madaraka makubwa.

15. Viongozi wengi wametumia nguvu nyingi na hivyo kuwanyanyasa watu wengi kupitia maamuzi yao. Hii inasababishwa na kushindwa kutambua kuwa madaraka waliyonayo yana nguvu ya roho mtakatifu ndani mwake hivyo kama kiongozi ni lazima uwe tayari kuongozwa na vipaji vya roho mtakatifu kuliko kuongozwa na maono binafsi. Maono haya mara nyingi yamejaa majivuno, kiburi na visasi. Kwa kutambua kuwa wewe hapo ulipo tayari ni kiongozi kwa madaraka uliyonayo kuanzia sasa mfanye roho mtakatifu akuongoze katika matendo yako yote. Mwandishi anamalizia kwa kusema kuwa viongozi watapata upinzani kutoka kwa wafuasi wao endapo watatumia madaraka yao vibaya na pale wanapotumia madaraka yao vizuri kwa kuongozwa na nguvu ya roho watafanikiwa kufanya vitu vikubwa pasipo kupata changamoto nyingi.

16. Pesa na vyeo vya siasa vyote vinaweza kukupa nguvu ya madaraka lakini vyote hivi hakuna hata kimoja ambacho kitakuhakikishia furaha ya kweli endapo hujajua jinsi za kuvitumia. Kwa pesa unaweza kununua kila kitu, unaweza kununua mtu yeyote yule au kwenda mahali popote japo bado kuna muda utajikuta kwenye sononeko la roho kutokana na matendo yako ambayo yanawaumiza watu wengi.

17. Pesa na umaarufu kama vyenyewe havina ushetani ndani yake bali ushetani unakuja pale ambapo unashindwa kuvitumia kama inavyotakiwa. Unaweza kutumia pesa na umaarufu wako kwa ajili ya kuwanyanyasa watu wengine unaweza kutumia vyote hivyo kwa ajili ya kuwainua watu wengi zaidi. Kwa ujumla ni kwamba ufanisi katika vyote ni lazima uongozwe na roho mtakatifu. Wote ni mashahidi kuwa pamoja na kwamba Marekani ni taifa kubwa duniani lakini Marekani haipo hata kati ya mataifa kumi yenye watu wenye furaha zaidi. Hivyo ni muhimu kujifunza kuwa furaha ya kweli inatokana ndani mwetu pasipo kujali magumu au mema tuliyonayo.

18. Furaha ya kweli haitokani na ukubwa wa akaunti zetu za benki bali furaha ya kweli inatokana jinsi tunavyochukulia mazingira yetu ya kila siku. Kwa ujumla furaha ya kweli inatokana na kuwa na uhuru, huruma, upendo, busara na kuridhika na kile tulichonacho kwa sasa. Hapa tunakiwa kufahamu kuwa furaha hainunuliwi kwa wingi wa mali kwani wapo matajiri wakubwa lakini bado wanaishi maisha yenye huzuni rohoni mwao.

19. Kila mtu ameumbwa kuishi maisha yenye furaha hapa duniani na hivyo kila mtu amepewa mamlaka ya kuishi maisha hayo. Pamoja na mamlaka hayo kila mmoja amezungukwa na nguvu zinazomsukuma kutoka kwenye maisha hayo ya furaha. Nguvu hizi zinajumuisha maisha ya kutimiza hanasa za mwili ambazo mara nyingi zinajikita kwenye furaha ya muda mfupi na baada ya hapo ni majonzi na huzuni ya roho.

Soma: Mambo 25 Niliyojifunza Kwenye Kitabu cha Keys to Leadership (Misingi ya Uongozi)

20. Njia pekee ya kumpenda mwenza wako au watu wanaokuzunguka kwanza kabisa unatakiwa kuuona uzuri na ukweli ndani mwako na baada ya hapo unaweza kuuona uzuri na ukweli katika watu wengine. Mwandishi anatukumbusha kile ambacho maandiko matakatifu yanatueleza kuwa “mpende jirani yako kama unavyojipenda mwenyewe”. Kwa maana hii hauwezi kuwapenda watu wako wa karibu kama wewe mwenyewe hauoni uzuri ndani mwako. Kama wewe hujipendi hutaweza vipi kuwapenda wenzio? Kama wewe mwenyewe hujitambui, ujielewi au hujikubali utaweza vipi kuwakubali/kuwaelewa watu wengine?

21. Njia rahisi ya kukuza upendo kwa watu wako wa karibu ni kuhakikisha wana uwepo wako wa kiakili na kimwili pale wanapokuhitaji. Ni mara nyingi kukuta wazazi au mtu na mwenza wake wanamezwa na kazi kiasi ambacho kila mmoja anahitaji uwepo wa mwingine pasipo mafanikio. Pia, katika hali kama hii watoto nao wanakosa vitu muhimu kutoka kwa wazazi. Mwandishi anatushirikisha kuwa kama unataka kukuza upendo wako huna budi ya kuhakikisha una muda wa kukaa karibu na uwapendao kwa ajili ya kushirikishana mambo muhimu. Hii ni kutokana na ukweli kwamba upendo haukuzwi kwa zawadi za vitu bali upendo unaboreshwa kwa kufarijiana.

22. Kiongozi mwenye mafanikio ni yule anayesikiliza na kutatua matakwa ya wafusi wake. Ni lazima kama kiongozi uwepo kwa ajili ya watu wako ili ufahamu changamoto zinazowakabili na hatimaye uwe tayari kuzifanyia kazi kwa maslahi ya wafuasi wako na wewe pia.

Soma:Mambo Niliyojifunza Kwenye Kitabu cha The Effective Executive (Ufanisi wa Watendaji/Viongozi)

23. Kama mfanyabiashara jifunze kufanyia kazi vitu ambavyo sio lazima vichangie kwenye biashara yako. Somo hapa ni kwamba hatupaswi kumezwa na shughuli za kutafuta faida au shilingi kila wakati kwani vitu mambo mengine ambayo tunapaswa kufanya kwa kuongozwa na utu wetu. Hapa tunatakiwa kuishi kwa kuongozwa na sheria ya asili ya uwili kinzani katika kila tunalofanya. Kwa maana hii tunatakiwa kutambua kuwa kama kuna faida pia hasara ipo, kama kuna tajiri pia masikini yupo, kama kuna kupanda pia kuna kushuka n.k. Hivyo muhimu ni kuhakikisha kila tunalofanya tufanye kwa wastani pasipo kuumiza wenzetu kwa kisingizio cha kutafuta shilingi.

Haya ni machache kati ya mengi ambayo mwandishi ametushirikisha kupitia kitabu hiki. Kama ni asilimia basi nilichokushirikisha hapa ni kama asilimia 20 tu katika mafundisho yaliyopo ndani ya kitabu hiki. Mafundisho haya yanagusia maisha ya kiroho, kijamii, kisiasa na kiuchumi hivyo nakushauri upate muda wa kusoma kitabu hiki kwa ajili ya kubadilisha maisha yako. Kupata nakala ya kitabu hiki BONYEZA HAPA na ujiunge na mtandao wa fikra za kitajiri kisha nitumie ujumbe wa kuomba kitabu hiki kupitia barua pepe fikrazakitajiri@gmail.com.

Niendelee kukuomba usambaze jumbe hizi kwa kadri uwezavyo ili yale unayojifunza yawafikie wengi na hatimaye tufanikiwe kuibadilisha dunia hii kuwa mahali pazuri pa kuishi (Unaposambaza makala hizi hakikisha haukopi na kupest badala yake share link ili hatimiliki za mwandishi wa makala ziheshimiwe). Nakutakia mapambano mema.

Karibuni kwenye fikra za kitajiri ili upate elimu hisiyokuwa na mwisho.

Born to Win ~ Dream Big 

Augustine Mathias Bilondwa
Namba ya Simu:      +255 786 881 155
Mwanzilishi wa Mtandao wa fikrazakitajiri.blogspot.com

Barua pepe:  fikrazatajiri@gmail.com

Ukurasa wa facebook: Fikra za Kitajiri: Fikri na Kutenda Kitajiri: Elimika na Tajirika

Mambo Niliyojifunza Kwenye Kitabu cha Alex Ferguson Autobiography (Hisitoria ya Maisha ya Alex Ferguson)

Rafiki na msomaji wa mtandao wa fikra za kitajiri ni matumaini yangu kuwa upo vizuri na unaendeleza mapambano kwa ajili ya kuboresha maisha yako. Kama ambavyo nimekuhalika mwaka huu kuwa nami katika usomaji wa vitabu mbalimbali leo hii ikiwa ni wiki ya kumi na moja naendelea kutimiza ahadi yangu.  Mwaliko huu ni kwa ajili ya kila mwenye kiu ya kubadilisha maisha yake kupitia usomaji wa vitabu ikiwa ni pamoja na kutumia mbinu na maarifa tunayojifunza kwenye vitabu hivi. Kampeni hii ni kwa ajili ya kila mtu pasipokujali anajua kiingereza au haujui cha msingi ni kujua kusoma kwani vitabu vyote vinachambuliwa kwa lugha ya Kiswahili.

Kujiunga na mtandao wa fikra za kitajiri BONYEZA HAPA na ujaze fomu ili uendelee kunufaika na mwaliko huu ambao unakulenga wewe mwenye kiu ya kutimiza ndoto za maisha yako. Kwa kujiunga na mtandao huu utapata makala za mtandao wa fikra za kitajiri moja kwa moja kwenye barua pepe yako.

Kitabu cha wiki hii ni “Alex Ferguson My Autobiography” ambacho kwa ufupi ni hisitoria ya maisha ya Kocha Mstaafu wa Timu ya Mpira ya Manchester United. Katika kitabu hiki mwandishi Sir Alex Ferguson anatushirikisha maisha yake ambayo kwa ujumla kuna mengi ya kujifunza kwa mtu yeyote ambaye anahitaji kuishi maisha ya mafanikio.

Itakumbukwa kuwa Sir Alex Ferguson ni kati ya makocha ambao hauwezi kutaja mafanikio ya klabu ya Manchester United pasipo kutaja jina lake kutokana na heshima ya mafanikio aliyojijengea kwa kipindi chote cha miaka 26 (1986/17 – 2012/13) akiwa maneja wa timu hii. Kwa kipindi hiki chote alikutana na vipindi vya kupanda na kushuka lakini hatimaye alifanikiwa kuhitimisha safari yake kwa mafanikio makubwa sana.

Karibu tujifunze wote machache ambayo nimejifunza kwenye kitabu hiki;

1. Ili kupata mafanikio ya muda mrefu ni lazima uwe na uvumilivu. Mwandishi anatushirikisha kuwa maisha ya mafanikio yanaanzia kwenye kilima ambacho mwanzo wa safari utaona kama vile ni ndoto kufanikiwa kupanda kilima hicho. Hii ni kutokana na hali ambayo yeye mwenye alikumbana nayo kipindi anakabidhiwa timu mwaka 1986.

2. Ili ufanikiwe ni lazima uwe na watu wanaokusapoti kwanza kabisa ukianzia na familia yako. Mara nyingi tumekuwa tukisikia msemo wa “kila kwenye mafanikio ya mwanamme fahamu kuwa kuna mwanamke nyuma yake”. Kocha Sir Alex Ferguson amedhihirisha msemo huu kwa kutuambia kuwa mafanikio yake kwa ujumla yalichangiwa na sapoti ya mwenza wake na watoto wake kwa ujumla.

3. Mafanikio ya kesho yanajengwa na msingi imara wa leo. Mwandishi anatushirikisha kuwa katika maisha yake kuna kipindi alihisi kuwa angefukuzwa kazi kutokana na imani yake ya kujenga timu ya vijana jambo ambalo lilipelekea timu kuyumba katika michezo ya ligu kuu. Lakini kwa vile alikuwa na nia thabiti kwenye kazi yake alifanikiwa kushawishi viongozi wake na hatimaye akajenga timu imara ambayo ilishinda mataji mengi.

4. Ili upate mafanikio ni lazima utafute changamoto mpya kwa kuhama mazingira uliyokulia na kutafuta sehemu mpya. Mwandishi alianzia kazi yake nchini mwake (Scotland) lakini baada ya kuhamia Uingereza alifanikiwa kupata changamoto nyingi ambazo zilimjenga katika kazi yake na hatimaye kufanikiwa kustaafu akiwa kocha mwenye mafanikio zaidi.

5. Ili ufanikiwe ni lazima dhamira yako yote iwekwe kwenye kazi husika unayofanya. Sir Alex Ferguson anatushirikisha kuwa kuna kipindi aliwahi kuhojiwa kuwa kwa nini timu yake ikiwa uwanjani hajawahi onekana akiwa na tabasamu na yeye alijibu kuwa timu yake ikiwa inacheza sio sehemu ya kutabasamu bali ni sehemu ya kutafuta ushindi basi. Muhimu hapa tunafundishwa kuthamini kazi zetu kwa kutuliza akili zetu (mind concentration) pindi tunapowajibika.

6. Mafanikio ya aina yoyote ile yanajengwa kwenye msukumo wa dhati wa kuhitaji mafanikio kwa kila hali. Mwadishi anatushirikisha kuwa yeye binafsi baada kuondoka Scotland na kuhamia Uingereza alikuwa na nia moja nayo si nyingine bali ni kufanikiwa katika kazi yake mpya.

7. Jamii inayokuzunguka inatazama mabaya yako na kusahau mema uliyotenda. Hii ni sawa na msemo uliyotumiwa na Bwana Yesu kuwa “watu wanataka mikate” kwa maana ya kwamba watu wapo kwa ajili ya mazuri unayofanya na hasa kwa faida yao na pale unapoteleza kidogo hakuna hata mmoja atakumbuka wema wako wa jana. Mwandishi anatushirikisha kuwa katika kipindi chake chote ilikuwa ni kawaida mashabiki kumtukana kutokana na timu kupoteza mchezo mmoja tu huku wakisahau makombe yote waliyowahi kushinda akiwa timu meneja.

8. Muda wote kuwa tayari kwa changamoto na fursa mpya pasipo kujali umri wako ili kuepuka kukaa bila kazi. Kocha Alex Ferguson anatushirikisha kuwa yeye binafsi baada kustaafu akiwa na umri wa zaidi ya miaka 70 aliamua kutafuta fursa mpya ili apate changamoto na uzoefu mpya na hatimaye kuepuka kukaa bila kazi.

9. Kubali kuteseka kwa ajili ya mafanikio ya baadae. Mwandishi anatushirikisha kuwa katika miaka 39 aliyofanya kazi ya ukocha mara nyingi alipata hamasa ya kusonga mbele pasipo kujali ugumu wa matokeo kwani aliamini katika msemo wa mazuri yanakuja kutokana na mateso ya sasa. Kwa maana nyingine mafanikio yako ya kesho yanaandaliwa na bidii na jitihada zako za sasa.

10. Chimbuko/asili yako haina nafasi ya kuamua hatma ya mafanikio yako. Mwandishi anatushirikisha kuwa wapo wengi ambao walimbeza kutokana na chimbuko lake hasa ikizingatiwa kuwa alizaliwa katika wilaya ambayo shughuli kubwa ya kiuchumi ilikuwa kutengeneza boti. Wengi walidhani kuwa hakuwa na lolote katika tasnia ya mpira ingawa kadri muda ulivyosogea walinyamazishwa na mafanikio yake. Na hapa mwandishi anatushirikisha kuwa ukifuatilia maisha ya watu wengi wenye mafanikio utagundua kuwa wengi wao wamekulia katika mazingira magumu kuanzia kwenye familia zao hadi jamii zilizowazunguka.

11. Katika kila hatua unazopiga tengeneza marafiki wanaoendana na mitazamo yako. Mwandishi anatushirikisha jinsi ambavyo marafiki wake katika ngazi tofauti walivyokuwa na mchango mkubwa kwake hasa katika ngazi ya familia na hatimaye ufanisi wa kazi yake. Pia, kupitia marafiki hawa mara nyingi waliweza kumpa mrejesho na ushauri juu ya mwenendo wa timu yake ikiwa ni pamoja na taarifa za wachezaji wazuri.

12. Mara zote tofautisha mambo binafsi/familia na majukumu ya kazi yako. Mwandishi anatushirikisha kuwa ni muhimu sana kila unapokuwa kazini hakikisha unatimiza majukumu yako pasipo kuruhusu mwingiliano wa mambo binafsi au familia. Hii itakusaidia kutimiza majukumu yako kwa ufanisi na hivyo kupata mafanikio makubwa katika kila unalogusa.

13. Epuka mazoea yaliyopitiliza na wafanyakazi wako. Mwandishi anatushirikisha kuwa yeye binafsi katika kipindi chake chote ambacho amefanya kazi ya ukocha amekutana na wachezaji wa kila aina na wenye kila tabia. Kwa ujumla ufanisi wake ulitokana na misimamo yake ya kusimamia haki na wajibu wa kila mchezaji pasipo kuruhusu mazoea yasiyo ya lazima na wachezaji wake.

Soma:Mambo Niliyojifunza Kwenye Kitabu cha “Hiring and Keeping the Best People” (Kuajiri na Kulinda Wafanyakazi Bora)

14. Ili uwe na ufanisi ni lazima uwe na msimamo na uwe tayari kusimama kwenye kile unachokiamini pasipo kuogopa au kuyumbishwa na mtu yeyote. Kila mtu ana wajibu na mamlaka katika nafasi yake hivyo kwa kila namna ni lazima utumie mamlaka uliyonayo kusimamia maamuzi yako.

15. Daima husikubali kuridhishwa na mafanikio uliyonayo. Kila hatua ya mafanikio inabidi ifungue hatua moja ya ziada juu ya pale ulipo. Mwandishi anatushirikisha kuwa yeye binafsi baada ya kushinda Kombe la Ulaya (European Cup) akiwa na umri wa miaka 60 alihisi ulikuwa muda muhafaka wa kustaafu. Hii ni kutokana na mafanikio aliyoyapata japo baada ya kupata ushauri kutoka kwa familia yake alifanikiwa kufanya kazi miaka 11 mingine na kupata mafanikio ya kunyakua makombe mengi.

16. Safari ya ushindi inaambatana na safari ya kushindwa; muda wote jifunze kutoka kwenye makosa unayofanya. Mwandishi anatushirikisha jinsi ambavyo mara nyingi alifanya makosa hasa kwenye mauzo ya wachezaji muhimu akidhani kuwa ni biashara. Baada ya msimu kumalizika na kuanza msimu mpya alijikuta kwenye wakati mgumu wa kuziba pengo la mtu aliyeuzwa. Hili kukabiliana na changamoto hii ilibidi kabla ya kuuza mchezaji awe ameandaa mbadala wake.

17. Kama meneja/kiongozi unatakiwa ufahamu tabia za unaowaongoza kwa undani ikiwa ni pamoja na kuwafahamu mapungufu ya kila mmoja. Mwandishi anatushirikisha kuwa yeye binafsi mafanikio yake yalitokana na wachezaji wake katika vipindi tofauti na hivyo kama meneja ilimbidi kufahamu tabia na mapungufu ya kila mchezaji wake. Mwandishi anamtolea mfano David Beckham kama mchezaji ambaye kamwe hakuwahi kukubali makosa yake hata kama amesababisha timu ipoteze mchezo. Pamoja na mapungufu hayo, Kama meneja wa timu ilimbidi atafute namna bora ya kuendelea kumtumia David kutokana na kipaji alichokuwa nacho.

18. Kama meneja au kiongozi daima husivumilie tabia za mwajiriwa ambaye anajiona yeye ni bora kuliko mwajiri wake. Hapa mwandishi anatushirikisha jinsi ambavyo ilimbidi alazimishe uongozi kumuuza David kutokana na tabia zake zisizovumilika ambazo zilikuwa zinaigharimu timu. Hii ilitokana na tabia yake ambapo ilifikia hatua ya kuona yeye ni bora kuliko Alex Ferguson.

19. Kama kiongozi au meneja unatakiwa kulinda wafanyakazi wako wenye mchango mkubwa kwenye kampuni au taasisi yako. Hapa mwandishi anatushirikisha jinsi ambavyo ilimbidi awalinde Ryan Giggs na Paul Scholes kwa kipindi cha miongo miwili kutokana na tabia pamoja na mchango wao kwa Club ya Mancester United.

20. Jifunze kuepuka kupoteza fursa uliyonayo mkononi. Mwandishi anatolea mfano jinsi ambavyo Sporting Lisbon ilimuuza Christiano Ronaldo kwa Manchester United kwa makubaliano kuwa pindi Manchester ikitaka kumuuza lazima Sporting ipewe kipaumbele. Lakini cha kushangaza Ronaldo aliyenunuliwa kwa £12 milioni baada ya kipindi cha miaka 6 aliuzwa kwa £80 kiasi ambacho Sporting walishindwa na ndipo Ronaldo akatimukia Real Madrid. Hili ni fundisho kwetu kwa fursa tulizonazo, mfano viwanja au ardhi au rasilimali yoyote ile, kabla ya kuuza hakikisha unafanya tathimini ili kesho husije kujutia maamuzi yako.

21. Jifunze kutoka kwa wapinzani wako ili uboreshe kazi zako. Mwandishi anatushirikisha kuwa daima hakuwaona mameneja wa timu pinzani (Arsene Wenger, Jose Mourinho na wengineo)  kama maadui na badala yake aliwatumia kujifunza ni wapi aboreshe zaidi kwa ajili ya kupata matokeo mazuri.

Haya ni machache kati ya mengi ambayo Sir Alex Ferguson anatushirikisha kupitia historia ya maisha yake. Kitabu hiki kina mengi ambayo tunaweza kuyatumia katika maisha yetu ya kila siku hivyo nashauri kila mwenye utamaduni wa kusoma vitabu akisome. Kupata nakala ya kitabu hiki BONYEZA HAPA na ujiunge na mtandao wa fikra za kitajiri kisha nitumie ujumbe wa kuomba kitabu hiki kupitia barua pepe fikrazakitajiri@gmail.com. 

Niendelee kukuomba usambaze jumbe hizi kwa kadri uwezavyo ili yale unayojifunza yawafikie wengi na hatimaye tufanikiwe kuibadilisha dunia hii kuwa mahali pazuri pa kuishi (Unaposambaza makala hizi hakikisha haukopi na kupest badala yake share link ili hatimiliki za mwandishi wa makala ziheshimiwe). Nakutakia mapambano mema.

Karibuni kwenye fikra za kitajiri ili upate elimu hisiyokuwa na mwisho.

Born to Win ~ Dream Big 

Augustine Mathias Bilondwa
Namba ya Simu:      +255 786881155
Mwanzilishi wa Mtandao wa fikrazakitajiri.blogspot.com

Barua pepe:  fikrazatajiri@gmail.com

Ukurasa wa facebook: Fikra za Kitajiri: Fikri na Kutenda Kitajiri: Elimika na Tajirika

Uchambuzi wa Kitabu the Rules Of Money (Kanuni za Pesa):MWENDELEZO WA SEHEMU YA PILI: KUWA TAJIRI (GETTING WEALTHY)

Habari ya leo rafiki na msomaji wa mtandao wa fikra za kitajiri. Leo naendelea kukuletea uchambuzi maalum wa kitabu cha The Rules of Money ambapo wiki hii tutaangalia mwendelezo wa sehemu ya pili na shehemu ya sehemu ya tatu kitabu hiki. Kama hukusoma sehemu ya kwanza na pili ya uchambuzi wa kitabu hiki BONYEZA HAPA - SEHEMU YA KWANZA au BONYEZA HAPA - SEHEMU YA PILI.

Karibu tuendelee kujifunza wote kanuni hizi muhimu kwa ajili ya kuboresha maisha yetu:-

46. Kanuni ya Arobaini na Sita: Tenga Asilimia ya Pato Lako kwa Ajili ya Akiba. Katika safari ya utajiri ni lazima ufahamu kuwa kamwe hauwezi kuwa tajiri kama unatumia kiasi chote cha fedha unazopata. Ili uwe tajiri ni lazima uwe na utaratibu wa kuwekeza sehemu ya pato lako kama akiba. Mwandishi anatushirikisha kuwa ni vyema ukawa na utaratibu wa kutenga pesa nyingi kwa ajili ya akiba yako ya baadae kwani wengi wamekuwa wanatumia pesa zote wanazopata pasipo kutenga hata shilingi kwa ajili ya akiba. Hapa mwandishi anatushirikisha kuwa ni vyema ukawekeza akiba yako sehemu ambayo ina ongezeko la riba kwa kila mwaka ili fedha zako ziongozeke.

47. Kanuni ya Arobaini na Saba: Husikodi bali Nunua. Mwandishi anatushirikisha kuwa ni vyema ukanunua au kujenga nyumba yako hata kama ni kwa mkopo kuliko kukodi. Hii ni kutokana na ukweli kwamba pesa unayolipa kwenye pango kamwe haitarudi kwako tofauti na ambavyo ungekuwa unalipia mkopo na riba yake ambao uliutumia kujenga au kununua nyumba. Epuka gharama ya pango la aina yoyote ile kwa kuweka mipango ya kununua rasilimali ambayo unakusudia kukodishwa. Pia, fahamu kanuni ya kwamba nunua kwa bei rahisi na uza kwa bei ya juu ili kuepuka hasara katika biashara zako.

48. Kanuni ya Arobaini na Nane: Fahamu Nini Maana ya Uwekezaji. Kwa ujumla uwekezaji unakuwa na malengo mawili ambayo ni ambayo ni kuzalisha kipato na kuongezeka thamani. Mfano kama unawekeza kwenye majengo lengo lako linapaswa kuwa kuongeza kipato kupitia kwenye malipo ya wapangaji na ongezeko la thamani ya nyumba zako. Vivyo hivyo kwenye uwekezaji wa hisa ni lazima unufaike kupitia gawio na ongezeko la thamani la hisa zako ikilinganishwa na thamani ya hisa uliyonunulia. Hata hivyo unatakiwa kufahamu kuwa uwekezaji wa aina yoyote ile ni sawa na kucheza kamari hivyo unatakiwa kuwa na taarifa sahihi kabla ya kuwekeza.

49. Kanuni ya Arobaini na Tisa: Kusanya Mtaji na Uwekeze kwa Umakini. Mwandishi anatushirikisha kuwa watu wengi wameshindwa kuwa tajiri kwa vile ni wavivu na wanashindwa kuzalisha pesa kutoka kwenye pesa ndogo wanazopata kila siku. Walio wengi wameshindwa kuwekeza pesa wanazopata kwa vile wanatumia pesa zote wakiamini kuwa watapata pesa nyingine. Hii ni tabia mbaya ambayo kamwe hauwezi kuwa tajiri kwani utajiri unapatikana kwa kutumia pesa uliyonayo kuzalisha pesa zaidi na zaidi. Husikubali kuendeshwa na starehe na badala yake tenga kiasi cha fedha kwa ajili ya uwekezaji kabla ya kufanya matumizi mengine.

50. Kanuni ya Hamsini: Fahamu Kuwa Uwekezaji Kwenye Majumba Katika Kipindi cha Muda Mrefu Kamwe Hauwezi Kuuzidi Uwekezaji wa Hisa. Baada ya kukusanya mtaji wengi wanajiuliza ni sehemu ipi sahihi wawekeze fedha zao. Mwandishi anashauri kuwa kama lengo lako ni kuwekeza kwa muda mrefu ni vyema ukachagua kuwekeza kwenye hisa ikilinganishwa na majengo. Muhimu unatakiwa kufahamu kuwa uwekezaji wa hisa unatengemea kupata faida kupitia gawio ambalo pia linategemea faida iliyotengenezwa na kampuni husika. Njia nyingine ya kunufaika na hisa ni kupitia ongezeko la thamani ya hisa zako na ndio maana unapochagua uwekezaji wa namna hii ni lazima uwe na malengo ya kuwekeza kwa muda mrefu ikilinganishwa na uwekezaji wa aina nyingine.

51. Kanuni ya Hamsini na Moja: Kuwa Mtaalamu wa Sanaa/sayansi ya Kuuza. Kama ambavyo tumeona kuwa ili kuwa tajiri ni lazima ujifunze sanaa ya kufanya dili za biashara (rejea kanuni namba 33) ndivyo ilivyo sanaa ya kuuza. Hii ni kutokana na ukweli kwamba sanaa ya dili za kibiashara inategemea sanaa ya kuuza. Unanunua kwa ajili ya kuuza tena kwa faida kwani huu ndio msingi wa kukuza utajiri wako. Hauwezi kutengeneza pesa kama hauwezi kuuza na hii ni siri ambayo matajiri wengi wanafahamu na kuitumia ikilinganishwa na masikini au watu wa kawaida. Pia unatakiwa kufahamu kuwa ili uwe na mauzo ya juu ni lazima ufahamu ni vitu vipi vinanunuliwa kwa wingi na watu wengi.

52. Kanuni ya Hamsini na Mbili: Jione Wewe Mwenyewe Kama Wengine Unaowakubali. Kama unahitaji kuongeza mauzo yako ni lazima uwe tayari kufanya yale yanayofanywa na wauzaji wakubwa. Hivyo ni vyema ukajifunza jinsi kutoka kwa wauzaji mahiri kwa ajili ya kuongeza mauzo yako. Hii inajumuisha tabia yako, mwonekano wako, uchangamfu wako, ahadi zako, fikra zako, mawasiliano yako na bidii zako kwani haya yote ndo yanaamua mauzo yako.

53. Kanuni ya Hamsini na Tatu: Husiamini Kuwa Utashinda Kila Wakati. Safari hii ya kuwa tajiri inabidi uende nayo kwa umakini hasa kwenye suala la bahati na sibu, kamwe husiamini kuwa unaweza kushinda na kuwa tajiri kwa haraka na badala yake unatakiwa kuongeza bidii katika yale unayofanya kwa ajili ya kuongeza mapato yako. Pia, mwandishi anatushirikisha kuwa katika safari hii kuna kupanda na kushuka hivyo ni vyema kujifunza katika kila hali tunayokutana nayo.

54. Kanuni ya Hamsini na Nne: Husinunue Hisa Mwenyewe Kama Haujui Kinachoendelea Kwenye Soko la Hisa. Mwandishi anatushirikisha kuwa kabla ya kuwekeza kwenye soko la hisa ni vyema kwanza ukawa na uelewa jinsi soko la hisa linavyofanya kazi. Unaweza kujifunza kuhusu soko la hisa kwa kusoma taarifa za fedha zinazohusu soko la hisa, kwa kuongea na watu wenye uelewa na soko la hisa, kwa kuangalia vipindi maalumu vya TV au kwa kuomba ushauri kutoka watu mbalimbali wanaohusika na soko la hisa. Fuatilia mwenendo wa hisa za kampuni tofauti tofauti kwenye soko la hisa kabla haujaamua kununua hisa za kampuni flani.

55. Kanuni ya Hamsini na Tano: Fahamu Undani wa Jinsi Soko la Hisa Linavyofanya Kazi. Kama ilivyo kwenye masoko mengine kuwa kuna kununua na kuuza, kununua kwa bei ya chini na kuuza kwa bei ya juu, ndivyo ilivyo kwenye soko la hisa. Utanunua hisa za kampuni uliyochagua na kuuza hisa zako pindi thamani ya hisa ikiongezeka. Zaidi ya hapo unatakiwa ujifunze ni kipindi kipi unatakiwa kununua hisa na kipindi kipi unatakiwa kuuza hisa zako.  

56. Kanuni ya Hamsini na Sita: Nunua Hisa (au Kitu chochote kile) Ambazo ni Rahisi Kuelewa. Mwandishi katika kanuni hii anatufundisha kuwa kununua hisa au kitu chochote kile kwa ajili ya kuuza kwa faida ni aina nyingine ya kamari hivyo ni muhimu sana kuwa na uelewa wa kutosha kabla ya kujitosa kununua. ili ufanikiwe kwenye kanuni hii ni muhimu kuepuka kununua kwa hisia na badala yake unatakiwa kununua kitu ambacho umefanyia utafiti na kujiridhisha kuwa asilimia ya kutengeneza faida ni kubwa kuliko hasara.

57. Kanuni ya Hamsini na Saba: Tumia Kichwa Chako. Sababu kubwa ya kuendelea kusoma kanuni hizi ni kwa vile una msukumo wa kuwa tajiri. Katika safari ya utajiri ni lazima utambue kuwa kila maamuzi utakayofanya ni lazima yawe na nguvu ya kukusogeza hatua moja hadi nyingine katika utajiri wako. Kwa maana hii hauna nafasi ya kujutia matokeo ya maamuzi yako kutokana na uzembe wa kutumia kichwa chako katika kufanya maamuzi kwenye kila hatua unazopiga. Daima maamuzi yako yatokane na mchanganuo wa faida na hasara ambazo zinaweza kujitokeza.

58. Kanuni ya Hamsini na Nane:  Katika Kila Hali Watumie Wabobevu wa Masuala ya Uwekezaji (Lakini Husikubali Wakuendeshe). Mwandishi anatushirikisha kuwa pale ambapo tumekwama ni bora kupata ushauri kutoka kwa watu wenye uzoefu kwenye masuala ya uwekezaji lakini ni muhimu tuendeshwe na busara zetu kwa yale tunayoshauriwa. Kama unahitaji ushauri kutoka kwa mawakala wa hisa muda wote ni lazima wakupe ushauri wa kukuvutia ili ufanye nao biashara hivyo ni vyema kutafuta taarifa zaidi na kujiridhisha juu ya kile unachoshauriwa.

59. Kanuni ya Hamsini na Tisa: Kama Unahitaji Ushauri wa Kifedha Ulipie Kwanza. Wapo watu wengi ambao wanakusubiria kwa ajili ya kukupa ushauri, taarifa au miongozo ya kifedha. Mfano kwa hapa Tanzania kama unahitaji taarifa za mienendo ya hisa za kampuni tofauti unaweza kulipia kupitia tovuti ya DSE na utapewa taarifa unazohitaji. Pia zipo kampuni na watu ambao wanatoa ushauri wa kifedha na masuala yote ya uwekezaji hivyo ni wewe kujiweka sawa kutegemeana na ushauri unaohitaji. Muhimu, unatakiwa kuwa makini na sehemu ambazo unatafuta ushauri ili husije kuangukia kwenye mikono ya matapeli.

60. Kanuni ya Sitini: Husipoteze Muda Kwa Yale Ambayo Tayari Umefanya. Baada kukamilisha kazi yako hata kama haujaridhika nayo husipoteze muda kuirudiarudia ukidhani kuwa ndo itakuwa bora zaidi kwani pengine unaweza kuifanya iwe mbaya zaidi. Baada ya kufanya kazi yako unatakiwa kusubiria wakati wa mavuno na sio kurudiarudia kazi husika. Mara nyingi ni kawaida watu kuwa na wasiwasi au hofu baada ya kufanya maamuzi ya kifedha, mwandishi anatushirikisha kuwa ukishafanya maamuzi ni vyema kuachana nayo ili asili (nature) ichukue nafasi yake na wewe uendelee na mambo mengine.

61. Kanuni ya Sitini na Moja: Fikiria Uwekezaji wa Muda Mrefu. Mwandishi anatushirikisha kuwa kama unataka utajiri wa muda mfupi ni bora ukaachana na kanuni hizi na ukaenda kucheza kamari na kwenye mikeka ya mhindi. Utajiri wa kweli unatakiwa uandaliwe kwa muda mrefu kwani kila unalofanya kwa sasa unapaswa kufikiria mchango wake kwenye pato lako kwa siku za baadae. Hivyo ni vyema ukawa na uwekezaji wa muda mfupi, muda wa kati na uwekezaji wa muda mrefu. Hii ni kutokana na ukweli kwamba kadri unavyopata utajiri kwa muda mrefu ndivyo unajenga uzoefu wa kulinda utajiri wako.

62. Kanuni ya Sitini na Mbili: Kuwa na Muda Katika Siku kwa Ajili ya Kutathimini Mipango Yako. Mwandishi anatushirikisha kuwa ni muhimu kutenga muda kila siku kwa ajili ya kufikiria juu ya hatua zetu. Hapa anatushauri kuwa ni vyema muda huu ukawa ni asubuhi na mapema au usiku wakati kuna hali tulivu ili uweze kuzama kwenye tafakari ya kina ya mipango yako. Hii inatoa nafasi kwako kutafakari ni wapi umefanikiwa na wapi bado haujafikia malengo ili hatimaye uweke mikakati ya kuboresha zaidi.

63. Kanuni ya Sitini na Tatu: Kuwa Makini Kwenye Kila Sehemu ya Uwekezaji Wako. Hii inajumuisha kuhakikisha kila kinachoingia na kutoka kimeorodheshwa ikiwa ni pamoja na kuwa na rekodi za lini unatakiwa kulipia kodi, pango, lini unatakiwa kulipwa, kuangalia riba ya uwekezaji wako, mawasiliano na watu muhimu, emails, lini unatakiwa kutangaza biashara zako n.k. Mwandishi anashauri kuwa kama inakuwa ngumu kwako kufanya kazi hii ya uhakiki unaweza kumuajiri mtu maalum kwa ajili ya kufanya kazi hii.

64. Kanuni ya Sitini na Nne: Anzisha Mifereji Mipya ya Kipato. Hii ni kanuni muhimu kwa ajili ya kukuza utajiri wako kwani kadri unavyokuwa na mifereji mingi ni rahisi kuongeza kipato chako. Mwandishi anatushirikisha kuwa kamwe husitegemee mfereji mmoja kwani hauwezi kukupa utajiri badala yake utakufanya uwe na maisha ya huzuni. Hakikisha unawekeza kwenye vitega uchumi kwa kadri uwezavyo ili ufanikiwe kupata pesa kutoka sehemu tofauti.

65. Kanuni ya Sitini na Tano: Jifunze Kuwa na Utamaduni wa Kujiuliza Maswali Kabla ya Kuchukua Hatua. Mwandishi anatushirikisha kuwa ni muhimu kujiuliza maswali nafsini mwako kabla ya kuchukua hatua. Mfano unaweza kujiuliza maswali kama (a) Itakuwaje kama shamba/kiwanja hiki kina migogoro? (b) Itakuwaje hisa za kampuni hii zikashuka thamani au kampuni ikafisilika (c) Itakuwaje wateja wangu wakihamia kwa wapinzani wangu? n.k. Maswali haya ndo yanatakiwa kuwa mwongozo wako katika kuboresha sehemu ambazo unaona hazijakaa sawa. Pia, maswali haya yanatakiwa kukuongoza kuchangamkia fursa mpya kwa ajili ya kuanzisha mifereji mipya ya kipato.

66. Kanuni ya Sitini na Sita: Dhibiti Hisia Zako za Matumizi. Njia ya haraka ya kuharibu utajiri wako ni kuruhusu hisia za matumizi kwenye kila kitu ambacho hakipo kwenye mipango yako. Utajiri ni sawa na mbio za marathoni kwani wengi wanaanzisha lakini wanaofikia mwisho ni wachache. Kinachowatofautisha watu katika mbio hizi ni namna gani wanaweza kupambana na changamoto ikiwa ni pamoja na matumizi yao ya kila siku. Uwekezaji wowote ni lazima ufahamu kuwa unahitaji hewa kama ilivyo kwako ili uishi unahitaji hewa ya oxjeni vivyo hivyo na uwekezaji unahitaji hewa ambayo ni mwendelezo wa mtaji. Kila shilingi unayotumia kutoka kwenye biashara yako ni lazima uhakikishe shilingi hiyo si sehemu ya mtaji wako.

67. Kanuni ya Sitini na Saba: Husijibu Matangazo ya Kwenye Mtandao Yanayohusu Utajiri wa Haraka, Kwani Hiyo Siyo Sehemu Yako ya Kuwa Tajiri. Pamoja na kwamba kuna njia nyingi za kutengeneza utajiri wa haraka kwenye mitandao unachotakiwa kufanya ni kuamini kuwa njia hizo si salama kwako. Hii ni kutokana na ukweli ambao tumeupata katika kanuni nyingi zilizopita kuwa utajiri wa bahati na sibu si salama kwani ni sumu kwa fedha zako hasa wewe unayeanza safari hii.

68. Kanuni ya Sitini na Nane: Tambua Kuwa Hakuna Siri. Kutokana na kiu yako kubwa ya kuwa tajiri njiani utakutana na mengi ambayo yatakushawishi kutoa fedha zako kwa ajili ya kujua siri za kupata utajiri. Hapa ni lazima usimame imara kwani hakuna siri ya utajiri zaidi ya hizi ambazo umezipata kupitia kwenye kila kanuni ya kitabu hiki. Kuwa makini na matapeli vinginevyo watatumia kiu yako ya utajiri kufilisi fedha zako. Katika kila hatua ongozwa na kauli mbiu kuwa hakuna siri ya utajiri kwani utajiri upo kwa kila mtu na ni haki ya kuzaliwa kwa kila mmoja (rejea kanuni namba moja).

69. Kanuni ya Sitini na Tisa: Husiishie Kusoma Kanuni Hizi Bali Chukua Hatua. Kufahamu kanuni hizi ni mwanzo lakini haina maana kama haupo tayari kuchukua hatua kuanzia sasa. Husiishie kusema haya nayafahamu pasipo kuchukua hatua za kutekeleza yale unayoyafahamu. Tambua kuwa kama kweli una hamasa ya kuwa tajiri inabidi ubebe siraha zako mara moja na kuanza kupigana vita dhidi ya umasikini. Kubadili tabia ni jambo ambalo ni gumu kwa kiasi flani lakini huna budi kuanza taratibu ili hatimaye ufanikiwe kujenga msingi imara ambao ni vigumu kuharibiwa.

Tukutane wiki ijayo kwa ajili ya awamu ya nne ya mfululizo wa uchambuzi wa kitabu hiki.

Ili kupata makala za namna hii kwenye barua pepe yako BONYEZA HAPA na acha taarifa zako. 

Karibuni kwenye fikra za kitajiri ili upate elimu hisiyokuwa na mwisho.

Born to Win~Dream Big 

Augustine Mathias Bilondwa
Namba ya Simu:      0786881155
Mwanzilishi wa Mtandao wa fikrazakitajiri.blogspot.com

Barua pepe:  fikrazatajiri@gmail.com

Ukurasa wa facebook: Fikra za Kitajiri: Fikri na Kutenda Kitajiri: Elimika na Tajirika