Kitabu hiki kimeandikwa na Dr. Myles Munroe ambaye ni mwandishi na mhamasishaji mkuu wa maswala ya uongozi, kiroho na mtalaamu mwelekezi kwenye masuala ya biashara na serikali. Katika kitabu hiki mwandishi amejikita katika misingi muhimu ya uongozi ambayo inajumuisha uongozi binafsi na jamii inayokuzunguka. Karibu nikushirikishe mambo muhimu 25 niliyojifunza kutoka kwenye kitabu hiki.
1. Kila
mtu ameumbwa kuongoza na kila mmoja amepewa jukumu la kukamilisha hapa duniani
na jukumu hilo ndilo linaloamua sehemu ya uongozi kwa kila mmoja wetu. Na hili
kutimiza jukumu hili ni lazima kila mtu aanze kwa kutengeneza fikra za kuwa
kiongozi imara katika eneo husika.
2. Uongozi
bora unajengwa na misingi ya kuwa na roho ya shauku, ubunifu, nidhamu, fikra
chanya, kujiamini, amani, kujali muda na huruma. Kama mtu anataka kuwa kiongozi
bora lazima kwanza aanze na kujifunza misingi hii muhimu ili iwe mwongozo
katika safari anayoiendea. Na mtu anapoanza kuishi misingi hii anaanza
kubadilika kutoka kuwa mfuasi na kuwa kiongozi.
3. Viongozi
wa kweli hawatafuti madaraka bali wanaongozwa na shauku ya kuwatumikia wafuasi
wao kupitia vyeo walivyonavyo. Kama unataka kuwa kiongozi jenga nidhamu ya kufanya
vitu kwa manufaa ya jamii nzima na sio kutafuta manufaa binafsi tu.
4. Ujinga
mkubwa binadamu alionao ni juu ya kujijua yeye mwenyewe. Kwa maana mwonekano wa
binadamu ni matokeo ya jinsi anavyojifikiria yeye mwenyewe na imani anazoamini
juu ya uwezo wake. Yale unayoyaamini ndiyo yanayokufanya uonekane jinsi ulivyo.
Kama unataka kuwa kiongozi bora jifunze kufikiria kuwa unaweza kuwa kiongozi wa
aina hiyo na si vinginevyo na kumbuka kuwa hakuna mwanadamu anayeweza kuishi nje ya mipaka ya imani yake.
Hii
ni kutokana na ukweli kwamba fikra zinazaa imani, imani inaleta mtazamo na mtazamo
unaleta tabia na tabia ndio inatoa mwonekano wa matendo yako.
5. Fedha
zinaweza kukupa utajiri na mamlaka yanaweza kukupa nguvu lakini vyote hivi
haviwezi kukufanya uwe kiongozi bora bali sifa za uongozi bora zinaanzia kwenye
tabia yako na tabia hii ni matokeo ya yale unayoyafikiria na kuyaamini katika
maisha yako ya kila siku.
6. Uongozi
ni fadhila unayopata kutokana na uaminifu wa wafuasi wako walionao juu yako. Ili
wafuasi wako waendelee kukuamini ni lazima uwe tayari kujua misingi
inayopelekea uaminiwe na wafuasi wako ili uendelee kujiimarisha katika misingi
hiyo.
7. Tabia
zako zina nguvu sana katika kuamua uwe mtu wa aina gani kuliko kitu chochote
kile hapa dunia. Kutokana na ukweli huu tabia ulizonazo ndizo zinaamua ubora
wako katika kila sehemu ya maisha yako. Na tabia hizi ni chimbuko la mtazamo
wako juu ya maisha yako na hivyo wewe ni chimbuko la mtazamo wako na mtazamo
wako ni wewe. Hivyo, kama hauwezi kudhibiti mtazamo wako kamwe hauwezi
kujidhibiti wewe mwenyewe na hivyo hauwezi kudhibiti tabia zako.
8. Mtazamo
au tabia ni sifa kuu ya kutofautisha kati ya mtu aliyefanikiwa na yule
aliyeshindwa. Kutokana na ukweli huu fursa nyingi zimepotea au kusubirishwa kutokana na mtazamo au tabia za
watu kuliko sababu yoyote ile. Hivyo kama unataka kuziona fursa zaidi na zaidi
katika eneo unaloongoza huna budi kutathmini upya mtazamo au tabia zako katika
maisha yako ya kila siku. Kadri utakavyobadilisha mtazamo/tabia zako ndivyo
utakavyoona fursa nyingi zilizokuwa zinakusubiria.
9. Kila mmoja wetu kwa asili ni kiongozi hata kama muhusika
hajitambui. Uongozi huu wa asili tulionao hauna uhusiano wowote na utaifa,
rangi, kipato, umri, jinsi au elimu wala kitu chochote kile bali kwa asili kila
mmoja wetu ameumbwa na kupewa mamlaka ya kutawala mazingira yanayomzunguka. Kuwa
katika nafasi ya ufuasi hakukuondolei uongozi wako wa asili bali uongozi
umerithishwa kwa asili na hivyo ni wajibu wako kutafuta sehemu inayokusubiria
kwa ajili ya kutumia kwa vitendo urithi huu wa asili.
10. Uongozi
wa kweli unatokana na mtazamo sahihi uliojengeka kwenye misingi ya
kuwahamasisha na kuwapa motisha wengine. Hii ni ukamilisho wa ugunduzi wa
makusudi ya nafsi yako (the purpose of your life). Hivyo, uwezo wako wa
kuongoza unatokana na picha iliyojengeka akilini mwako. Kwa ukweli huu
mawazo/fikra zako ndizo zinazo amua uwezo wako.
11. Kama
unataka kuwa kiongozi bora lazima ujifunze kwanza jinsi ya kubadili mtazamo
wako kwa sababu mtazamo una nafasi kubwa ya kuamua jinsi tunavyoishi kwenye
mazingira yanayotuzunguka. Ni lazima ujifunze jinsi ya kufikiri, kuzungumza,
mavazi, vitendo, kutembea, majibu, kuamua, kazi na kuishi kama kiongozi.
12. Wengi
wetu leo hii tumeshindwa kuwa viongozi kutokana na kutokujiamini sisi wenyewe. Hatujiamini
kwa yale tunayoyafanya na pengine tunafikiria tutaonekanaje kwenye jamii. Hii ni
kutokana na ukweli kwamba viongozi wa kweli wanagundua na kufahamu makusudi ya
nafsi yao na hivyo ni rahisi kwao kushawishi mazingira yanayowazunguka kuliko
wanavyoweza kushawishiwa na mazigira hayo. Vilevile viongozi wa kweli wanalenga
kutatua changamoto wanazokutana nazo na hivyo wanatakiwa kuwa wabunifu katika
yale wanayoyafanya.
13. Kila
mmoja wetu ana wajibu wa kugundua makusudi ya nafsi yake na kuhakikisha anarekebisha
mtizamo wa maisha kulingana na madhumuni ya nafsi yake. Mara nyingi tumeshindwa
kuishi makusudi ya maisha yetu kutokana na kukatishwa tamaa au kuwa na hofu kwa
pale tunapopaswa kuthubutu.
14. Kiongozi
imara ni yule mwenye uwezo wa kushawishi wengine kupitia shauku na hamasa ambayo
imejengwa kwenye msingi wa huruma. Kama unataka kuwa kiongozi imara ni lazima
uwe tayari kuwahamasisha wengine ili kupitia matendo yako nao waweze kuchukua
hatua kuyaboresha maisha yao.
15. Uongozi
wa kweli haupimwi kwa yale unayoyafanya bali unapimwa kwa mtazamo au tabia zako.
Kwa maana hii kiongozi wa kweli anaweza kujifunza kutoka kwa viongozi wengine
lakina hapaswi kuwa wao bali anatakiwa atumie vipaji alivyonavyo katika kutimiza
jukumu la maisha yake alilopewa kama zawadi ya uwepo wake hapa duniani.
16. Viongozi
hawasubiri mambo yatokee bali wao wanakuwa ni sehemu ya kuandaa mambo yao ya
baadaye (leaders create their own future). Kwa maana hii viongozi hawasubiri
watu wengine wawafanyie yale wanayoyataka bali wao wanakuwa mstari wa mbele
katika kutekeleza yale wanayoyahitaji katika maisha yao ya baadae.
17. Viongozi
wa kweli hawana kazi bali wana jukumu la maisha yao yote hivyo viongozi wa
kweli hawana kustaafu wala kuwa likizo katika kipindi cha maisha yao yote.
18. Kama
utaweza kuwa na hisia za hatima ya maisha yako kwa yale yaliyopita na yale yanayokuja
na ukapata picha kubwa ya maisha yako hadi inakuogopesha mwenyewe basi tambua
kuwa njia yako ya kuwa kiongozi bora inaanzia hapo. Hii ni kutokana na ukweli
kwamba shauku ya uongozi inaanzia kwa kuunganisha picha ya maisha yako
yaliyopita na yale yajao.
19. Binadamu
tunao uwezo wa kufanya mambo mengi lakini si yote tunayoyafanya yana mchango
katika kutimiza kusudi la maisha yetu. Kiongozi bora ni yule anayefanya yale
yanayomsaidia kutimiza kusudi la maisha yake. Viongozi wa kweli lazima waweze
kutofautisha jema na baya au fursa ya kweli na ya ovyo na hivyo wapo tayari
kuweka vipaumbele kwenye majukumu yao ya kila siku.
20. Viongozi
wa kweli wana malengo yanayotokana na mtazamo wao na malengo haya ndiyo yanayowatofautisha
viongozi kutoka kwa wafuasi wao. Hivyo kiongozi bora anajua jinsi yakuweka
malengo sahihi na kuhakikisha malengo haya yanakuwa kinga dhidi ya ushawishi wa
kufanya yale ambayo hayapo kwenye mpango wa malengo ya maisha yake ya kila siku.
Kama kiongozi bora unatakiwa kila siku unaweka bidii ya kufikia malengo yako
kwa kuwa malengo yako ndio maisha yako na husipofanya hivyo watu wengine
watatawala maisha yako.
21. Malengo
yanatusaidia kuwa na viashiria vya hatua zetu na hivyo kuepuka kuahirisha yale
tuyoliyopanga kutekeleza. Viongozi wa kweli wanatumia orodha ya malengo yao
kama mwongozo wa matendo yao na hivyo wanakuwa na nidhamu ya hali ya juu pale
wanapotekeleza majukumu yao.
22. Viongozi
wa kweli wanapenda kufanya kazi kwa kushirikiana na wenzao kwa vile shauku yao
kubwa ni kuona kila mmoja akifanikiwa. Hivyo viongozi bora wanatambua ukweli
kuwa mtu hawezi kufanikiwa kwa kufanya kazi peke yake. Pia, katika kutimiza
hili viongozi bora wanathamini michango ya wenzao kutokana na ukweli kwamba
kila mmoja wetu ameumbwa na kupewa kipaji tofauti na cha mwenzake.
23. Ubunifu
ni hazina pekee walionayo viongozi bora. Viongozi bora wana imani katika uzoefu
lakini hawatumii kigezo cha uzoefu kama nyenzo pekee ya utendaji kazi bali
wanajifunza kila siku kwa ajili ya kujiongezea maarifa pamoja na ubunifu katika
kutekeleza majukumu yao.
24. Viongozi
wa kweli kamwe hawafungwi na tamaduni za jamii inayowazunguka. Hii ni kutokana
na athari za tamaduni kudumaza shauku ya uongozi. Kama unataka kuwa kiongozi
bora hakikisha kila ukikutana na fursa, changamoto au tatizo jifunze kufikiria
katika njia ya hali tofauti na ulivyoizoesha akili yako ili uepuke kufanya
vitu kwa mazoea bali fanya vitu kwa ubora wa hali ya juu.
25. Viongozi
wa kweli wanatambua kuwa nidhamu binafsi ni msingi namba moja katika mitazamo
na matendo yao na hii ni kutokana na ukweli kwamba nidhamu ni inathibitisha viwango
vya hali ya juu kwa kiongozi husika. Hivyo ili kuwa na viwango vya hali ya juu
ni lazima uwe tayari kuzuia hisia na mihemko yako kwa kila maamuzi
unayoyafanya.
Haya ndiyo niliyojifunza katika
kitabu hiki. Ni matumaini yangu kuwa ukiyafanyia kazi yatabadilisha maisha yako
kwa ujumla. Niendelee kukuomba usambaze jumbe hizi kwa kadri uwezavyo ili yale
unayojifunza yawafikie wengi na hatimaye tufanikiwe kuibadilisha dunia hii kuwa
mahali pazuri pa kuishi. Nakutakia
mapambano mema.
Ili kupata makala za namna
hii acha taarifa zako kwa kujaza fomu hapo chini.
Karibuni kwenye fikra
tajiri ili upate elimu hisiyokuwa na mwisho.
Born to Win~Dream Big
A.M.
Bilondwa
0786881155
fikratajiri@gmail.com
0786881155
fikratajiri@gmail.com