FIKRA ZA KITAJIRI: Februari 2018

Archive for Februari 2018

Mambo Niliyojifunza Kwenye Kitabu cha Winning The Loser’s Game: Mikakati ya Uwekezaji Wenye Mafanikio

Fikra za Kitajiri Jumapili, Februari 18, 2018 Add Comment

Habari ya leo rafiki na msomaji wa mtandao wa fikra za kitajiri.

Ni matumaini yangu kuwa unaendelea kupambana kwa ajili ya kuboresha maisha yako. Karibu tena katika mtandao wa FIKRA ZA KITAJIRI kwa ajili ya uchambuzi wa kitabu cha wiki hii. Leo hii ikiwa ni wiki ya 7 katika kipindi cha mwaka 2018 naendelea kukushirikisha uchambuzi wa vitabu vyenye mafundisho tofauti katika kila sekta ya maisha yako.

Makala hizi za uchambuzi wa vitabu zimekuwa zikikufikia kila wiki kwa kadri ambavyo napata muda wa kukushirikisha kile ninachojifunza kutoka kwenye vitabu hivi. Ni matarajio yangu kuwa muda ninaotumia kukushirikisha uchambuzi wa vitabu umekuwa wa msaada mkubwa kwako katika kubadilisha maisha yako.

Unaweza kujiunga na mtandao huu, KWA KUBONYEZA BONYEZA HAPA na kujaza fomu kisha bofya “jiunge/subscribe” utakuwa umejiunga na mtandao huu. Kwa kujiunga na mtandao huu utapata makala zinazochapishwa humu moja kwa moja kwenye barua pepe yako bila malipo yoyote.

Kitabu cha wiki hii ni “Winning the Loser’s Game” kutoka kwa mwandishi Charles D. Ellis. Mwandishi huyu ametumia kitabu kutushirikisha mbinu mbalimbali ambazo zinatumiwa na wawekezaji wakubwa kufanikiwa kiuwekezaji. Mwandishi anasisitiza kuwa katika uwekezaji ni muhimu mwekezaji kuwa msimamizi mkuu na kuhakikisha anafuatilia kila aina uwekezaji alionao. Hii ni pamoja na kufikiri na kuchukua hatua za kivitendo kwenye kila za uwekezaji ulizonazo. Epuka sana kutegemea mawazo ya washauri katika uwekezaji kwani mara nyingi wengi wao hawana uzoefu juu ya kile wanachoshauri.

Katika uwekezaji kuna aina makundi mawili ya wawekezaji, kundi la kwanza ni wawekezaji ambao kwa namba ni wachache lakini wako macho katika kuhakikisha wanaboresha masoko. Hawa ndio wanafanya vitu vinaonekana kwenye soko kwani wapo tayari kuwekeza muda na akili kwa ajili ya ubunifu mpya katika soko. Kundi la pili ni wawekezaji ambao kwa namba ni wengi sana lakini hawajishughulishi kutengeneza mazingira ya soko la uwekezaji. Hawa hawawekezi kwenye rasimali au elimu kwa ajili ya kuboresha mazingira ya soko bali wanategemea kutumia mazingira yaliyopo kwenye soko husika.

Karibu tujifunze machache kati ya mengi ambayo mwandishi anatushirikisha katika kitabu hiki:

1. Katika uwekezaji wa aina yoyote kinachoamua ushindi ni matendo sahihi ya mwekezaji na kinachoamua kushindwa ni maamuzi ya kimakosa yanayofanywa na mwekezaji. Kutokana na ukweli huu tunajifunza kuwa kwenye kila aina ya uwekezaji ili ushinde ni lazima uwe na ufahamu sahihi. Hivyo kwenye uwekezaji kuna waliobobea na hawa ndio wanapata pointi za ushindi ikinganishwa na wale wanaosindikiza.

2. Kwenye uwekezaji ni muhimu kutambua kuwa mbinu za ushindi zinabadilika kulingana na nyakati. Hapa tunajifunza kuwa ili tufanikiwe kiuwekezaji ni muhimu kuboresha mbinu zetu kulingana na nyakati zilizopo. Mwandishi anatushirikisha kuwa wengi wanashindwa kupata mafanikio kwenye soko kwa kuwa wanaendelea kutumia mbinu zilizopitwa na wakati.

3. Katika mchezo wa fedha ni lazima utambue kuwa ushindi unachangiwa na namna ambavyo unapoteza fedha kidogo kwenye soko na hivyo kubakiza sehemu kubwa ya fedha kama ushindi wako. Hii ni kanuni ambayo inatumika kuamua ushindi kwenye mchezo wowote ule. Mfano, mshindi wa tenisi anapatika kulingana na pointi nyingi anazokusanya ikilinganishwa na zile anazopoteza.

4. Katika mchezo wa uwekezaji/fedha mara zote unahitaji kuhakikisha unamridhisha mteja. Hii ni kutokana na ukweli kwamba mteja anaporidhika wewe kama mwekezaji unapata uhakika wa kuwekeza zaidi. Wateja ni njia pekee ambayo itaendelea kukuweka sokoni endapo umetekeleza mahitaji muhimu ya uwekezaji.

5. Soko la uwekezaji hasa uwekezaji wa hisa limepitia kwenye mabadiliko makubwa ambayo kwa ujumla wake yanatofautisha wawekezaji kwenye soko. Wawekezaji ambao wameendelea kuwekeza kwa kutumia mbinu zile zile wameendelea kupotea kwenye soko kwa kasi kubwa kuliko wale ambao wanabadilisha mbinu kulingana na mabadiliko yaliyopo. Muhimu ni kuwa na taarifa sahihi kuhusu soko kila wakati.

6. Wawekezaji wote wana sifa zinazofanana kama vile kuhitaji kufanya vyema kwenye soko (kutengeneza faida). Sifa hii ndio inamfanya kila mwekezaji kuwa na uhuru wa kuchagua wapi awekeze fedha zake katika soko. Hata hivyo, kinachotofautisha wawekezaji hawa katika soko ni pamoja na: rasilimali wanazomiliki, mitaji, majukumu ya matumizi, elimu ya biashara, uwezo wa kuvumilia hatari za uwekezaji na uzoefu wa soko. Tofauti hizi ndizo zinaonesha kuwa wawekezaji hawa ili wafanye vyema kwenye soko ni lazima pawepo msaada wa kielimu au mawazo.

7. Njia pekee ya wawekezaji makini kuendelea kufanya vyema kwenye soko ni kutumia makosa yanayofanywa na wawekezaji makini wa ngazi zao. Mwandishi anatushirikisha kuwa katika uwekezaji kosa moja kwa mwekezaji ni baraka kwa mpinzani wake wa karibu. Njia hii imekuwa ikiamua mwenendo wa makampuni katika soko, hivyo, kama mwekezaji unahitaji kufahamu mbinu hii ili kuepuka makosa ya kiuwekezaji lakini pia kuitumia kwa ajili ya kufaidi makosa ya wawekezaji wengine.

8. Ili kuepuka makosa ya kiuwekezaji kwenye soko ni lazima ujitoe kufanya kazi kwa bidii kwa ajili ya kulifahamu soko, kuwa na taarifa sahihi na elimu sahihi ya soko husika. Njia hizi ndizo zinatumiwa na wawekezaji makini kwa ajili ya kuepuka makosa ya kiuwekezaji. Mfano, katika uwekezaji wa hisa unahitaji kulifahamu soko kwa nyakati husika, kuchagua hisa sahihi kwa wakati husika na kufahamu ni lini mabadiliko na yanaweza kutokea kwenye soko na hivyo yakaathiri thamani za hisa. Mwekezaji ambaye amefanikisha kufahamu yote haya ni rahisi kwake kufanya vyema kwenye soko kwani ana uwezo wa kununua hisa pale ambapo thamani hisa imeshuka (wakati ambao kila mtu anauza) na kuuza hisa zake pale ambapo thamani ya hisa imepanda (wakati ambao kila mtu ananunua).

Soma: Mambo Niliyojifunza Kwenye Kitabu cha The Warren Buffet Way (Njia za Warren Buffet: Mwenkezaji na Bilionea wa Siku Nyingi)

9. Njia nyingine ya kufanya vyema kwenye soko la hisa ni kuwa uelewa wa kina hisa za makampuni yaliyoorodheshwa kwenye soko la hisa. Mwandishi anatushirikisha kuwa wawekezaji makini wanachagua hisa ambazo thamani ya beiza hisa iliyotangazwa kwenye soko ni ya chini kuliko thamani halisi ya hisa husika. Na hii ndio inaamua nyakati zipi wawekezaji makini wanunue au kuuza hisa wanazomiliki.

10. Wawekezaji makini ni wale ambao mara zote wanatafuta fursa mpya za kiuwekezaji. Wawekezaji hawa mara zote wanaandaa njia kwa ajili ya wengine kufuata njia husika na wanaacha njia hii pale ambapo kila mtu ameingia kwenye njia husika. Hii ni kutokana na ukweli kwamba nyakati ambazo kila mtu anatumia njia husika ni nyakati ambazo soko limefurika na hivyo faida inakuwa ni ndogo matokeo yake mwekezaji makini anatakiwa kutafuta njia mpya.

11. Kama mwekezaji unahitaji kufahamu nguvu za soko na thamani ya vitu/bidhaa katika soko. Mwandishi anatushirikisha kuwa soko mara zote lina kelele nyingi ambazo upelekea mabadiliko ya thamani ya bidhaa/kampuni kwa nyakati tofauti. Mabadiliko haya mara nyingi yanasababishwa na taarifa za uongo na hivyo yanapelekea kupanda na kushuka kwa thamani/bei ya bidhaa. Kama mwekezaji makini hautakiwi kuendeshwa na miemko/kelele za soko ambazo mara nyingi huwa ni za muda mfupi bali unatakiwa kujikita kwenye malengo/sera ya uzalishaji/uwekezaji wa muda mrefu wa kampuni yako.

12. Mara nyingi katika kukabiliana na kelele za soko wawekezaji makini wanatumia mantiki (logic) badala ya kuongozwa na hisia. Mwandishi anatushirikisha kuwa kinachosababisha mabadiliko makubwa kwenye soko ndani ya muda mfupi ni kutokana na soko kutawaliwa na wawekezaji wasio makini. Wawekezaji hawa wanaongozwa na hisia ambazo zinawafanya wapaniki kutokana na hofu ya kupoteza kile walichowekeza. Hali hii inawafanya wauze kwa haraka au kununua kwa pupa na matokeo yake ni kushuka/kupanda kwa thamani ya bidhaa/hisa.

Soma: Mambo Niliyojifunza Kwenye Kitabu cha How The Stock Markets Works (Mwongozo wa Jinsi Soko la Hisa Linavyofanya Kazi)

13. Kama ilivyo michezo mingine, mchezo wa uwekezaji nao pia unaundwa na timu yenye watu mbalimbali na timu hii ndio inaamua ushindi au kukosa ushindi. Mwandishi anatusirikisha kuwa uwekezaji mitaji unahitaji timu makini kwa ajili ya kuamua ushindi wa wawekezaji. Hii inaanzia kwa wamiliki wa soko kama taasisi inayoendesha soko, mfano, kwa hapa Tanzania Dar es salaam Stock Exchange (DSE) ni lazima soko liwe na wataalamu wa kila kada zote za fedha za uchumi kwa ajili ya kufanikisha ukuaji wa soko husika.

14. Katika kuwekeza unahitaji kuwa makini na hatari za uwekezaji. Hii ni pamoja na uhakika wa kulinda mtaji wako kutokana na ukweli kwamba kuna nyakati ambazo unaweza kujikuta unapoteza kila kitu ulichowekeza. Hali inatokea pale ambapo kuna mabadiliko ya kudumu katika soko ambayo mara nyingi yanapelekea upotevu wa thamani ya bidha/hisa kiasi ambacho thamani haiwezi kurudi kwenye hali yake soko. Inapotokea hali kama hii unaweza kujikuta unaharibu maisha yako yote kiuwekezaji na kiroho pia.

15. Mojawapo ya makosa yanayopelekea wawekezaji kuangukia kwenye shimo la upotevu wa pesa ni hali ya kujiamini kuwa wanafahamu zaidi kuliko watu wengine katika soko husika. Hali inapelekea wengi kuwekeza mitaji yao kwa kuongozwa na taarifa ambazo hazina uhalisia wa soko. Hali hii pia inachangiwa na tabia kukimbilia matokeo ya muda mfupi ambayo kiuwekezaji hayana tija.

16. Uvumilivu ni njia mojawapo ya kukuwezesha kudumu katika soko. Mwandishi anatushirikisha kuwa wawekezaji makini mara nyingi katika kuepuka miemko ta soko mara nyingi wanajitahidi kuwa wavumilivu kwa ajili ya kusubilia mapito ya upo wa soko. Kama sio mvumilivu unaweza kujikuta unapoteza mtaji ambao umekusanywa kwa kipindi kirefu na kujikuta unaanza upya.

17. Hatari za uwekezaji zinaweza kuepukwa kwa; kupunguza makosa ya kiuwekezaji hasa yanayosababishwa na miemko ya hisia, kuwa na malengo ya uwekezaji ambayo mwekezaji ameweka mwenyewe, kuwa na mkakati wa uwekezaji unaotekeleza katika kipindi cha muda mrefu (long term investment strategy) na kuendelea kujikita kwenye mpango wako wa muda mrefu bila kujali kelele za soko ambazo mara nyingi zinasabishwa na watu kuwa na hofu ya kutopoteza au tamaa ya kupata zaidi katika soko husika.

18. Mafanikio yako kama mwekezaji yanatemea nguvu yako kwenye elimu ya uwekezaji na uwezo wa kudhibiti hisia zako. Katika uwezo wa kielimu tunaangalia uwezo wako wa kudhibiti fedha (zinazoingia na kutoka), uwezo wako wa kutumia taarifa zilizopo kuhusu soko, na uwezo wa kuchambua hisa za makampuni mbalimbali kwa ajili ya kuchagua hisa sahihi. Katika upande wa hisia tunaangalia uwezo wa kuwa mtulivu na imara hasa nyakati ambazo kuna kelele nyingi katika soko.

19. Mchezo wa uwekezaji hasa kwenye masoko ya mitaji kama hisa, hatifungamani, dhamana au mifuko ya pamoja ni mchezo ambao kila mshiriki (mwekezaji) ana nafasi sawa ya kushinda. Siri ya kwanza katika kushinda kwenye uwekezaji wa mitaji ni kuepuka kupelekeshwa na miemko/kelele za soko. Siri ya pili ni kila mwekezaji kwa utashi wake kuandaa sera ya uwekezaji ambayo anaona inamfaa kwa ajili ya kutumia sera hiyo kukamilisha malengo ya uwekezaji wa muda mfupi na muda mrefu.

20. Uwekezaji wa aina yoyote ile ni lazima uwe na msingi imara kama ilivyo kwenye uhandisi ujenzi. Kwenye uwekezaji pia mwanzoni ni lazima ujiulize kama yale unayofanya kwa sasa yanatosha kukupa msingi imara kwa ajili ya miaka 10, 20, au 30 ijayo. Kama umejiweka sawa kiuwekezaji kwa sasa ni rahisi sana kufanikiwa kiuwekezaji katika miaka ijayo.

Soma: Uchambuzi wa Kitabu the Rules Of Money (Kanuni za Pesa):MWENDELEZO WA SEHEMU YA PILI: KUWA TAJIRI (GETTING WEALTHY)

Haya ni machache ambayo nimeweza kukushirikisha kati ya mengi yaliyo kwenye kitabu hiki. Kupata nakala ya kitabu hiki BONYEZA HAPA na ujiunge na mtandao wa fikra za kitajiri kisha nitumie ujumbe wa kuomba kitabu hiki kupitia barua pepe fikrazakitajiri@gmail.com.

Niendelee kukuomba usambaze jumbe hizi kwa kadri uwezavyo ili yale unayojifunza yawafikie wengi na hatimaye tufanikiwe kuibadilisha dunia hii kuwa mahali pazuri pa kuishi (Unaposambaza makala hizi hakikisha haukopi na kupest badala yake share link). Nakutakia mapambano mema.

Karibuni kwenye fikra za kitajiri ili upate elimu isiyokuwa na mwisho.

Born to Win ~ Dream Big

Augustine Mathias Bilondwa
Namba ya Simu: +255 786 881 155
Mwanzilishi wa Mtandao wa fikrazakitajiri.blogspot.com

Barua pepe: fikrazatajiri@gmail.com

PATA UCHAMBUZI WA KITABU CHA THE RULES OF MONEY ( KANUNI ZA PESA)

Mwandishi Richard Templar katika kitabu hiki ametushirikisha kanuni 107 ambazo kila mtu anaweza kuzitumia kutengeneza pesa na hatimaye kuwa tajiri. Uchambuzi wa kina wa kanuni zote (107) umeandaliwa kwa mfumo wa pdf na unapatikana kwa gharama ya Tshs. elfu tano tu (5,000/=). Kanuni zote zimechambuliwa na kuandaliwa kijitabu kidogo chenye kurasa 39 ambazo unaweza kusoma kwenye simu ya mkononi (smart phone) au kwenye kompyuta (pc).

Kupata uchambuzi wa kanuni zote tuma pesa yako kwa njia ya M-pesa au Airtel Money kupitia namba zifuatazo:-

M – Pesa tumia namba: 0763 745 451 (Majina ni Augustine Mathias)
Airtel Money tumia namba: 0786 881 155 (Majina ni Augustine Mathias)

Baada kutuma pesa hiyo nitumie ujumbe kwenye namba ya airtel (0786 881 151 451) ukiwa na barua pepe yako ili nikutumie uchambuzi wa kanuni hizi moja kwa moja kwenye mtandao wako.

UTAJIRI NI HAKI YAKO YA KUZALIWA "BEING RICH IS YOUR BIRTH RIGHT"

Mambo Niliyojifunza Kwenye Kitabu cha The Craving Mind: Jinsi ya Kutumia Utulivu wa Akili Kubadilisha Ulevi wa Kila Aina

Fikra za Kitajiri Jumapili, Februari 11, 2018 Add Comment

Habari ya leo rafiki na msomaji wa mtandao wa fikra za kitajiri.

Ni matumaini yangu kuwa unaendelea kupambana kwa ajili ya kuboresha maisha yako. Karibu tena katika mtandao wa FIKRA ZA KITAJIRI kwa ajili ya uchambuzi wa kitabu cha wiki hii. Leo hii ikiwa ni wiki ya 6 katika kipindi cha mwaka 2018 naendelea kukushirikisha uchambuzi wa vitabu mbalimbali vyenye mafundisho tofauti katika kila sekta ya maisha yako.

Kitabu cha wiki hii ni “The Craving Mind” kutoka kwa mwandishi Judson Brewer. Mwandishi Judson ametumia kitabu hiki kuelezea namna ambavyo mwanadamu ni kiumbe mwenye uwezo wa kutumia ubongo wake kujifunza mambo yenye kila aina ya ubunifu ikiwa ni pamoja na uwezo wa kutumia ubongo huu katika kuamua hatma ya maisha ya mhusika.

Watu wengi katika maisha wanaishi kwenye aina ya uteja/ulevi wa kila aina, wapo ambao ulevi wao ni sigara, pombe, mitandao ya kijamii, madawa ya kulevya, ubinafsi, tamaa ya mwili kwenye kila kitu au ulevi wa kudharau nafsi zao kupitia fikra hasi.

Katika hali kama hii, mwili unakuwa unaitikia vichocheo pasipo kushirikisha ubongo kwani tayari uteja/ulevi huo ulishakuwa sehemu ya vitu ambavyo havihitaji kujadiliwa na ubongo ili vifanyike. Mfano, kama umegusa waya ya umeme haraka utatoa mkono kwa vile hali hatarishi zote zilishakuwa sehemu ya ubongo.

Mwandishi ametumia uzoefu wake katika tasnia ya sayansi ya ubongo pamoja na mafundisho ya budha ambayo amekuwa akiyaishi kwa muda mrefu kutushirikisha namna ambavyo kila mtu anaweza kutumia “utulivu wa akili” kukabiliana na kila aina ya ulevi/uteja ambao umekuwa sehemu ya maisha yetu kwa muda mrefu.

Karibu tujifunze machache kati ya mengi ambayo mwandishi anatushirikisha katika kitabu hiki:

1. Ulevi/uteja wa tabia yoyote unatengenezwa kwa kurudia tabia mara kwa mara na hatimaye kujenga mazoea. Mwandishi anatushirikisha kuwa unavyotumia kitu mara ya kwanza kuna ujumbe unatumwa kwenye ubongo juu ya kitu husika. Ujumbe huu unahifadhiwa na kazi ya ubongo ni kukumbusha mara kwa mara juu ya tabia husika na matokeo yake ni mazoea/ulevi uliopitiliza juu ya tabia husika. Mfano, mvuta sigara mara kwa mara akili yake inamkumbusha kuvuta akihisi kuwa kwa kufanya hivyo mwili utajisikia vizuri na matokeo yake ni ulevi wa sigara.

2. Uteja/ulevi wa tabia yoyote unatengezwa kupitia mzunguko wa Kichocheo ambacho kinaleta tabia na tabia inaleta matokeo au zawadi. Hizi sehemu tatu ambazo zinatumiwa na wanyama au binadamu katika kujifunza tabia mpya. Pale tabia inapokuwa imekolea kiasi cha kumwendesha mtu ndipo tunasema kuwa flani ni teja/mlevi (addicted) wa tabia flani.

3. Kadiri unavyojifunza tabia mpya ndivyo tabia husika inaambatana na mabadiliko ya akili ambayo pia yanapelekea mabadiliko ya mwili. Hali hii inapelekea mwili na akili/ubongo kupelekeshwa na tabia husika kila unapokutana na mazingira ya yabayoendana na tabia hiyo. Katika hatua hii ndipo unajikuta umekuwa teja/mlevi wa tabia husika. Mfano, kama umezoea kunywa soda kila baada ya kula, utajikuta kwenye uhitaji wa soda kila unapomaliza kula kama tulizo la nafsi yako.

4. Mwili wa binadamu unaitikia vichocheo kulingana na mazoea yaliyopita. Tunaweza kuitikia vichocheo vya upande chanya au kuachana na vichocheo vya upande hasi. Katika upande chanya mara nyingi unapelekea kwenye tulizo la nafsi wakati upande hasi mara zote unapelekea kwenye hali ambazo si nzuri kwa mhusika. Hata hivyo tulizo la upande chanya kama umekuwa teja wa tabia flani huwa ni la muda mfupi na matokeo yake ni kujikuta kwenye magonjwa ambayo chimbuko lake ni tabia za awali. Mfano, unapenda kula sana bila kufanya mazoezi ya kutosha, matokeo yake unajikuta kwenye magonjwa kama presha na sukari.

5. Mwandishi anatushirikisha kuwa njia pekee ya kuisha maisha ya ukamilisho/furaha ni kuwa na utulivu wa akili kwenye kila tukio tunalojihusisha nalo kwa wakati husika ikiwa ni pamoja na kushiriki tukio hilo kwa ukamilifu wake. Utulivu wa akili pia unahusisha tafakari ya kwa nini unafanya kile unachofanya kwa wakati husika pamoja na udhibiti wa hisia/maamuzi yanayoegemea upande mmoja katika kila hali au tukio husika. Hivyo, utulivu wa akili unajumuisha kuona kwa mapana, kuhusika na kufurahia yale tunayokutana nayo katika miili na akili zetu. Kadiri tunavyofanya hivi kwa kila tukio ndivyo tunagundua tabia mbaya na kuamua kuachana nazo.

6. Tunashutuka kuwa tupo kwenye ulevi/uteja wa tabia flani wakati ambao tayari athari hasi zimeonekana kwenye mwili/akili zetu. Hali hii inatuingiza kwenye gharama kubwa za kiafya wakati wa kukabiliana na athari husika. Pia ni muhimu kufahamu kuwa uteja/ulevi unasababishwa na tabia ya kupenda raha au faraja ya muda mfupi. Mfano, mtu anakunywa pombe kali kwa kisingizio cha kupoteza mawazo wakati pombe hizo mwisho wake zina madhara makubwa kiafya.

7. Watu wengi wanapoteza mahusiano na watu wa karibu nao kutokana na kuwa mateja/walevi wa vitu flani. Mfano, watu wengi wamekimbiwa na wapenzi wao kutokana na tabia ya ulevi wa pombe au uteja wa madawa ya kulevya. Pia, uteja huu unaongeza msalaba kwa serikali katika kugharamia watu walioathirika.

8. Uteja/ulevi wa tabia yoyote mhusika anaweza kuachana nao endapo yupo tayari kushinda vichochoe vinavyomsukuma kwenye tabia husika. Mwandishi anatushirikisha kuwa kuna wakati teja wa tabia yoyote ile anakuwa kwenye mazingira ambayo hayampi nafasi ya kufanya tabia ambayo amezoea, mfano, kama ni mvutaji wa sigara, huwezi kuvuta sigara wakati upo kwenye basi au usafiri wa ndege. Katika mazingira kama hayo mhusika anapata vichocheo vya tabia husika lakini anavipotezea. Hii ni mbinu ambayo kila mtu anaweza kuitumia kushinda vichochoe vya uteja alionao.

9. Njia nyingine ya kuachana na uteja/ulevi ni kutumia hatua hizi; i) tambua ni kichocheo cha tabia ipi kinachotawala akili yako kwa wakati husika; ii) kubaliana na uwepo wa kichocheo husika kwenye akili yako – kwa maana husipambane na kichocheo hicho; iii) chunguza mwitikio wa mwili, hisia na fikra – jiulize maswali kama “ni nini kinaendelea ndani ya mwili na akili yangu?” na iv) elewa hali ulinayo kwa wakati husika. Hatua hizi kwa ujumla wake zitaunganisha mwili wako na akili katika kuelewa sababu zinazopelekea vichocheo vya tabia husika na hivyo kuchukua hatua stahiki dhidi ya vichocheo hivyo.

10. Watu wengi wamekuwa watumwa/mateja wa mitandao ya kijamii (facebook, instangram) bila kujua kuwa utumwa huo unachochewa na yale wanayofanya kila wanapokuwa kwenye mitandao hii. Uteja huu wa mitandao unajengeka kwa kufuata hatua zile tatu (angalia point ya pili juu), mfano, kila unapowaza facebook unakuwa umetengeneza kichocheo ndani ya akili yako; kila unapowaza ‘kupost’ picha au kitu chochote unakuwa tayari umejenga tabia ya kutaka kila mara ‘upost’ vitu kwenye mtandao. Hata hivyo, baada ya kupost unasubilia kuona mwitikio wa marafiki zako kwenye mtandao husika kupitia ‘likes’ na ‘comment’ zao. Kadiri likes zinavyokuwa nyingi ndivyo tunashawishika kuendelea kutumia mitandao ya kijamii.

11. Uteja wa mitandao ya kijamii ni uteja sawa na uteja wa madawa ya kulevya au uvutaji wa sigara. Uteja huu unaendelea kutengeneza kizazi ambacho kinafikiria zaidi nafsi zake kuliko nafsi za wengine. Hii ni kutokana na ukweli kwamba kila mtu kwenye mitandao hii anatafuta kukubalika zaidi kwa marafiki zake. Hivyo, kila mara anafanya vitu ambavyo vitawavutia marafiki zake. Pia, mitandao hii imekuwa ni sehemu ya kukuza umbea jambo ambalo ni uteja mbaya.

12. Uteja mwingine ambao unamtesa mwanadamu wa kizazi hiki ni ule wa kufikiria hatima ya nafsi yake kuliko kitu chochote kile. Uteja huu unapelekea mwanadamu kuwa na mawazo finyu/uongo juu ya ulimwengu kutokana na mtazamo wake juu ya jinsi anavyotaka ulimwengu uwe kuliko ukweli ulivyo. Hali hii inapelekea kuwa mtazamo wa uongo na hivyo kujikuta tunaishi kulingana na kipimo cha mtazamo wetu kuliko uhalisia wa uwezo wa ulimwengu. Pia, uteja huu umepelekea watu wengi kuishi kwenye maisha ya mashindano kwa vile kila mmoja anaiona nafsi yake ni bora kuliko mwenzake.

13. Matumizi ya simu hasa simu janja yameanzisha aina nyingine ya uteja kwa watumiaji. Watu wengine wameshindwa kujidhibiti kwenye matumizi ya simu kiasi ambacho wanatumia muda mwingi kwenye simu kuliko yale waliyopanga kutekeleza ndani ya muda husika. Uteja huu unapelekea watu waathirika washindwe kutulia kwenye kazi wanayofanya na hivyo kujikuta kila mara wanawaza kushika simu kwa ajili ya mawasiliano. Hii ni pamoja na matumizi ya simu hata kwenye kazi ambazo zinahitaji utulivu wa akili kama vile kuendesha vyombo vya moto.

14. Uteja mwingine ambao unawatesa watu bila ya ufahamu wao ni uteja wa kufikiri ambao pia ni chimbuko la uteja wa kufikiria nafsi zao zaidi. Mwandishi anatushirikisha kuwa kama hauwezi kudhibiti fikra zako unakuwa upo kwenye hatari kubwa ya kundeshwa na fikra. Katika hali kama hii mhusika anafanya vitu kwa kutegemea maamuzi binafsi ambayo mara nyingi yanatokana na historia ya mafanikio yake. Mara nyingi mafanikio yanapumbuza watu, hali ambayo inapelekea waone kuwa hakuna jipya zaidi ya kile walichofanikisha.

15. Tunaweza kudhibiti fikra kwa kufanya tajuhudi (meditation). Mwandishi anatusshirikisha kuwa tafiti zinaonesha kuwa watu ambao wamezoea kufanya tajuhudi wana uwezo mkubwa wa kutuliza fikra zao kwenye tukio moja ikilinganishwa na wengine.

16. Upo uteja mwingine ambao watu wanaingia bila ufahamu nao si mwingine bali ni uteja wa mapenzi. Katika uteja huu, mhusika anajikuta katika hali ambayo kila analofanya anaona haliwezi kukamilika pasipo uwepo wa mwenza wake ambaye kwa pamoja wapo kwenye dimbwi la penzi zito. Ni katika hali hii unajikuta kila mara unamuwazia yule ambaye umempenda na haupo tayari kusikiliza jambo lolote baya juu yake kutoka kwa watu wa karibu yako.

Zifuatazo ni njia za kukabiliana na aina yoyote ile ya uteja;

17. Uwezo wa kutuliza akili bila kuruhusu mwingiliano wa kitu chochote kile ni muhimu kwa ajili ya kufanikisha jambo lolote. Hii ni pamoja na mafanikio kwenye biashara, kazini au kiroho. Njia pekee ya kutuliza akili ni kuwa na muda kwa ajili ya kufanya tajuhudi. Hii ni pamoja na kujenga hali ya kujiamini katika kila hali unayokutana nayo.

18. Mafundisho ya kibudha ni njia nyingine ya kukabiliana na uteja. Mfano, moja ya mafundisho ya kibudha ni namna mtu anavyotakiwa kuwa na mtazamo juu ya furaha na mateso. Yapo matukio yanayoonekana kuwa ni ya furaha lakini katika mafundisho ya kibudha yanaonekana kuwa ni mateso. Vivyo, hivyo yapo matukio ambayo yameaminishwa kuwa ni mateso lakini katika mafundisho ya kibudha yanaonekana kuwa ya kifuraha.

19. Mara zote katika kila hali jitahidi kuwa mwema au wastani. Hii ni pamoja na kuepuka kukaa kwenye hali ya msongo wa mawazo. Hali hii itakusaidia kukabiliana na uteja wa mapenzi pamoja na uteja wa kutanguliza nafsi yako kuliko kitu chochote.

20. Jenga tabia ya kuwa na huruma. Huruma ni ile hali ya kuelewa na kuwa na mguso dhidi ya matatizo ya watu wa karibu yako. Hali hii inavunja tabia ya kujifikiria sisi pekee na kuona kuwa kuna watu wenye kuhitaji uwepo wetu katika kila hali.

21. Jenga mazoea ya kutokubaliana na vichocheo vya uteja ulionao, hii ni pamoja na kuepuka mazingira yanayokusuma kwenye hali ya kuhitaji kurudia tabia yako.

Karibuni kwenye fikra za kitajiri ili upate elimu isiyokuwa na mwisho.

Born to Win ~ Dream Big

Augustine Mathias Bilondwa
Namba ya Simu: +255 786 881 155
Mwanzilishi wa Mtandao wa fikrazakitajiri.blogspot.com

Barua pepe: fikrazatajiri@gmail.com

PATA UCHAMBUZI WA KITABU CHA THE RULES OF MONEY ( KANUNI ZA PESA)

Mambo Niliyojifunza Kwenye Kitabu cha Powerful People Skills: How to form, build and maintain stronger, long lasting relationship; Jinsi ya kuanzisha na kulinda mahusiano bora kwa muda mrefu

Fikra za Kitajiri Jumapili, Februari 04, 2018 Add Comment

Habari ya leo rafiki na msomaji wa mtandao wa fikra za kitajiri.

Ni matumaini yangu kuwa unaendelea kupambana kwa ajili ya kuboresha maisha yako. Karibu tena katika mtandao wa FIKRA ZA KITAJIRI kwa ajili ya uchambuzi wa kitabu cha wiki hii. Leo hii ikiwa ni wiki ya 5 katika kipindi cha mwaka 2018 naendelea kukushirikisha uchambuzi wa vitabu mbalimbali vyenye mafundisho tofauti katika kila sekta ya maisha yako.

Kitabu cha wiki hii ni “Powerful Skills” kutoka kwa mwandishi Heather Hansen. Mwandishi wa kitabu hiki ni mtaalamu wa masuala ya mawasiliano na amekuwa msaada kwa watu wengi kitaifa na kimataifa katika kuboresha mawasiliano yao katika masuala ya mahusiano, biashara na kazini. Kitabu hiki mwandishi ametushirikisha mbinu muhimu kwa ajili ya kutengeneza marafiki wengi, kudumisha mahusiano sehemu za kazini au na watu wako wa karibu.

Karibu tujifunze machache kati ya mengi ambayo mwandishi anatushirikisha katika kitabu hiki:

1. Ili uwe na mafanikio katika kuwasiliana/mahusiano na wengine ni muhimu kujifunza sifa za watu wenye mafanikio katika mawasiliano/mahusiano. Sifa hizi ni pamoja na kujiamini na kuwa na uhakika juu ya kile anachoongea, wanajua kuvuta hisia za wasilikilizaji/watu wao wa karibu, wanaongea ukweli na wanajivunia jinsi walivyo, wanajiheshimu na kuwaheshimu wengine na mara zote wanakuwa na mawazo chanya – sifa hizi kwa pamoja zinawavuta watu pamoja na fursa kwa ajili ya mafanikio zaidi.

2. Jinsi ulivyo katika mawasiliano au mahusiano na watu wengine ni matokeo ya majumuisho ya michango mbalimbali kutoka kwa watu ambao umekutana nao katika vipindi tofauti vya maisha yako. Hawa wanaweza kuwa ni walimu, wazazi, walimu wa kiroho, majirani au watu wa karibu na wewe kwa ujumla wake. Watu hawa wanatoa athari (chanya/hasi) kwenye uwezo wako wa kuongea/kujieleza na hivyo mahusiano yako na watu wengine kwa ujumla wake. Wazazi/walezi wana mchango mkubwa kutokana na ukweli kwamba hawa ni watu wanaoongoza watoto wao toka enzi wakiwa wadogo.

3. Katika mahusiano kuna vitu vitatu vya kuzingatia; moja, kukubalika – kila mtu kwenye mahusiano anahitaji kuwa na uhakika wa kukubalika na wenzake, mbili, faraja – kwenye mahusiano kila mtu anapenda apate faraja au aone watu wake wa karibu wanamjali/kumpenda, na tatu, nguvu ya kuamua – katika kila hali kwenye mahusiano kila mtu angependa awe na uhuru wa kuamua mambo muhimu juu yake pamoja na mazingira yanayomzunguka. Nguvu hii inatakiwa iwe kwenye mlinganyo kati ya wote waliyopo kwenye mahusiano kwa kuzingatia sheria au taratibu walizojiwekea.

4. Katika mahusiano ni lazima kwanza mhusika atambue mahitaji yake binafsi na hatimaye atambue wengine wanahitaji nini kutoka kwake. Hii ni pamoja na kutambua watu wa rika mbalimbali kutoka sehemu tofauti pasipo kujali rangi au utaifa wanahitaji nini kutoka kwako. Kama unafanya kazi au biashara ambayo wateja wako ni watu tamaduni tofauti ni lazima uwe tayari kujifunza namna ya kuwasiliano nao kwa mafanikio.

5. Jifanyie tathimini binafsi pale unapoenda kuingia kwenye mahusiano mapya au pale unapotegemea kukutana na watu wapya. Ni kawaida sana watu kuogopa wenzao hasa pale wanapokutana kwa mara ya kwanza. Mwandishi anatushirikisha kuwa kabla ya kuingia kwenye mahusiano na watu wapya ni muhimu kujitathimini kwa kujiuliza maswali kama vile, Je ningekuwa wao ningependa kujisikiliza kile ninachoenda kuwasilisha? Je ningekuwa upande wao ningefanya biashara hii? Je nina uhakika na ninachowasilisha, na Je najipenda mwenyewe?

6. Kinachowafanya watu wengi washindwe kuwa na mahusiano bora na watu wengine ni kutokana na tabia ya kuingia kwenye mahusiano wakiwa na matazamio hasi dhidi ya wale wanaoingia nao kwenye mahusiano. Katika hali kama hiyo ni vigumu kujenga mahusiano ya muda mrefu kwa vile hakuna uaminifu.

7. Tabia ndio msingi mkuu katika mahusiano. Tabia ni maamuzi ya mhusika kwani unaweza kuamua kuwa na tabia njema au mbaya. Tabia uliyonayo ndiyo itakuwa mwamuzi dhidi ya watu kuvutika kuja kwako au kukimbia dhidi yako. Mfano, katika mahusiano na watu wengi tabia za kichoyo, ubinafsi, kukosa uvumilivu, hasira na kukosa heshima haziwezi kukufikisha kwenye mahusiano mema na wanaokuzunguka.

8. Unahitaji kuepuka hali hizi katika kuboresha tabia yako. Kundi la kwanza ni kukosa muda wa kutosha kwa ajili ya usingizi, hii ni changamoto dhidi ya tabia yako katika mahusiano na watu wengine – unapokosa muda wa kusinzia inakuwa vigumu kufikiri vyema na matokeo yake muda wote unaonekana umechoka. Hali hii inawakimbiza watu wengi dhidi yako.

9. Kundi la pili ni msongo wa mawazo, matatizo binafsi na kushindwa kujiamini. Unapokuwa na msongo wa mawazo pamoja na kuchanganya matatizo binafsi unakuwa na hali ya hasira dhidi ya watu wa karibu yako. Pia, kushindwa kujiamini ni chanzo cha kukimbiwa na watu wengi kwani kama haujiamini mwenyewe ni vigumu kuaminiwa na watu.

10. Kundi la tatu ni kuwa na hisia kali. Mwandishi anatushirikisha kuwa hisia ni chanzo cha kuona kuwa wewe ni bora kuliko wengine na hivyo hali kama hii inasababisha mhusika kuwa na majivuno. Unapokuwa na mahusiano na watu wengine mara zote unapaswa kujitahidi kudhibiti hisia zako.

11. Ili ujiamini ni lazima mtazamo wako wa nje uwe vizuri. Hii ni pamoja na kujisitiri kwa mavazi mazuri yanayoendana na tamaduni za sehemu ulipo. Hata hivyo muda wote unapaswa kuwa na uso wa furaha ili kuepuka sura ya kuogepesha. Hali hii itakusaidia kupendwa na watu zaidi katika shughuri zako hasa wale wanaoendana na hadhi yako.

12. Jitahidi kuonesha nafsi yako halisi pale unapokutana na watu wapya. Mwandishi anatushirikisha kuwa watu wanahitaji kuingia kwenye mahusiano ya undugu au urafiki na watu ambao ni wa kweli na wanasimama kwenye misingi ya maisha yao. Katika mawasiliano na watu unatakiwa kuepuka kuwa na sura mbili ili uweze kuaminiwa na watu. Hii ni muhimu pia kwenye mahusiano ya kibiashara – watu hawapo tayari kufanya biashara na wewe kama una sura ya kutoaminika.

13. Epuka kuwa mtu wa maneno bila vitendo. Tumezoea kusikia msemo wa kuwa ‘video haiendani na audio’ kwenye tasnia ya muziki. Ndivyo ilivyo hata kwenye mawasiliano na watu, watu wanakupima kile unachoongea kupitia matendo yako. Kama matendo yako ni kinyume na maneno yako utawekwa pembeni. Mara zote hakikisha maneno, sauti na vitendo vyako vinaendana.

14. Mara zote epuka kuoongelea umaarufu, kipato, cheo, mali unazomiliki, hisitoria yako na mambo mengine kama hayo pale unapokutana na watu wapya. Mwandishi anatushirikisha kuwa watu tuna mitazamo na tafsiri tofauti, unaweza kudhani kuwa kuongelea mafanikio uliyonayo kama chachu ya kuvuta watu kwako kumbe ukatafisiriwa kama vile unaringa au una majivuno.

15. Kumbuka kuwa hauwezi kupendwa na kila mtu kwenye makundi ya watu unayokutana nayo. Kadri unavyokutana na makundi ya watu wapya usilazimishe kutafuta umaarufu ili upandwe na watu wote kwani kufanya hivyo unaweza kushusha heshima zako na kujikuta unadharauliwa.

16. Tafuta sehemu muhimu ambazo zinakuunganisha na watu pale unapokutana na watu wapya. Sehumu hizi zinaweza kuwa vitu ambavyo wote mnafahamu, hobi ambazo wote mnazo, wote mmetokea sehemu moja (kijiji, wilaya, mkoa, taifa au bara) au fani zenu zinafanana. Baada ya zoezi hili, sasa unahitaji kutumia sehemu hizi muhimu kwa ajili ya kuanzisha mazungumzo na yule au kundi la watu ambao umekutana nao kwa mara ya kwanza. Kumbuka kujizuia ili husionekana kuwa kiongozi wa maongezi husika badala yake maongezi yawe ya pande zote.

17. Jifunze kusikiliza kutoka kwa wenzako ili uelewe mada kwa mapana. Mwandishi anatushirikisha kuwa usikivu ni nyenzo muhimu katika kutengeneza marafiki wapya. Hii ni kutokana na ukweli kwamba kadri unavyosikiliza ndivyo unapata uelewa na hisia zaidi juu ya mada husika. Katika kusikiliza unapaswa kudhibiti hisia zako ili kuepuka kuwa na majibu, maamuzi au mawazo yanayotokana na hisia binafsi.

18. Baadhi ya makosa ambayo yanafanywa na watu kwenye usikivu ni pamoja na; i) tabia ya kufanya maamuzi – hapa watu wanajiona kuwa bora kuliko wenzao. Tabia hii inawafanya washindwe kufungua akili yao kwa ajili ya kusikiliza wenzao; ii) tabia ya kumalizia mawazo ya wengine – hapa pindi mtu anao wewe unatafuta namna bora ambayo unaweza kuelezea mada inayowasilishwa na matokeo yake unakosa pointi muhimu kutoka kwa mwasilishaji; na iii) tabia ya kuweka hisia zako mbele – unapokubali hisia zikutawale moja kwa moja unakuwa umezuia muunganiko wewe na yule anayeongea.

19. Matumizi ya lugha ya mwili ni nyenzo muhimu ya kumuunganisha msikilizaji na mtoa mada. Mwandishi anatushirikisha kuwa unaposikiliza ni muhimu kutumia lugha ya mwili kama vile kutikisa kichwa ili mtoa mada afahamu kuwa mko pamoja.

20. Ukiwa katika kutoa mada jitahidi sana kutumia sauti inayoendana na kile unachowasilisha. Mfano, kama unawasilisha mada ya furaha ni muhimu kutumia sauti ambayo itawafanya wasikilizaji wapate mguso wa furaha. Hali kadharika kama unawasilisha mada ya uzuni, tumia sauti ya uzuni. Hali hii inaleta muunganiko wa hisia kati ya msikilizaji na mtoa mada.

Karibuni kwenye fikra za kitajiri ili upate elimu isiyokuwa na mwisho.

Born to Win ~ Dream Big

Augustine Mathias Bilondwa
Namba ya Simu: +255 786 881 155
Mwanzilishi wa Mtandao wa fikrazakitajiri.blogspot.com

Barua pepe: fikrazatajiri@gmail.com

PATA UCHAMBUZI WA KITABU CHA THE RULES OF MONEY ( KANUNI ZA PESA)