Mambo 20 Niliyojifunza Kwenye Kitabu cha The Power of the First Step (Nguvu ya Hatua ya Kwanza)

Habari ya leo rafiki na msomaji wa mtandao wa fikra za kitajiri. Nimatumaini yangu kuwa upo vizuri na unaendelea kupambana kwa ajili ya kuyaboresha maisha yako. Leo ninakuletea uchambuzi wa kitabu cha The Power of the First Step. Pia niendelee kukumbusha kuwa kwa mwaka huu nimejipanga kurahisisha maisha yako ya usomaji wa vitabu kwa kuhakikisha kila mwisho wa wiki (ijumaa) nakuletea uchambuzi wa kitabu kimoja ili kupitia vitabu hivi pamoja tuweze kuyaboresha maisha yetu. 

Ili uwe kwenye mfumo wangu wa kupata makala za uchambuzi wa vitabu pamoja na makala za hamasa ya kuyaishi ndoto za maisha yako unachotakiwa kufanya ni rahisi tu kwa kujaza fomu iliyopo mwishoni mwa makala hii.

Karibu tujifunze wote mambo muhimu 20 niliyojifunza kwenye kitabu hiki ambacho kimeandikwa na mwandishi Shemeji Melayeki. Mwandishi wa kitabu hiki ni muhitimu wa shahada ya Uchumi wa Kilimo kutoka Chuo Kikuu cha Sokoine ambapo alihitimu mwaka 2012. Shemeji Melayeki ni mwandishi wa vitabu, mzungumzaji kwenye semina na makongamano, mwimbaji wa nyimbo za kiroho, mfanyabiashara na mtaalamu mwelekezi kwenye fani alizobobea. Katika kitabu hiki mwandishi anatuhamasisha na kutushirikisha umuhimu wa kuanza kufanya mara moja na kuepuka ugonjwa wa kuhairisha mambo kwa kuanza kuchukua hatua ya kwanza. Karibu tujifunze wote:-

1. Kila mtu ana ndoto kubwa ya maisha yake jinsi gani anavyotaka yawe. Katika kufikia ndoto zetu kuna aina tatu za makundi ya watu ambayo ni; (a) Kundi la watu wanaoamua kuchukua njia tofauti za kutafsiri ndoto zao katika vitendo (b) Kundi la watu wanaoamua kuishi na ndoto zao pasipo kuzifanyia kazi yoyote na hatimaye ndoto hizi zinafifia siku hadi siku na (c) Kundi la mwisho ni la watu ambao wameamua kujiondoa kabisa katika mbio za maisha yenye ndoto na hatimaye kuishi maisha yasiyo kuwa na tumaini la baadae.

Soma: Mambo 25 Niliyojifunza Kwenye Kitabu cha Supercoach; 10 Secrets to Transform Anyone’s Life (Siri Zitakazobadilisha Maisha ya Mtu Yeyote kwa Ujumla)

2. Wengi wetu tumekuwa na ndoto nyingi kama vile kumiliki ndege binafsi, kumiliki biashara na kampuni kubwa, kusafiri duniani kote, kumiliki mashamba makubwa, kuwa baba/mama bora, kuishi maisha yenye furaha na ya kumjua Mungu, kuwa mtu hodari katika taaluma yako n.k. Lakini katika kuziendea ndoto hizi mara nyingi tumekutana na hali inayopelekea tunajikuta kwenye kauli kama "hauwezi kuzitekeleza", "hauwezi kufanikiwa", "hauna uwezo wa kufanya hivyo", "utawezaje kuwa mtu wa namna hiyo wakati katika ukoo wako hakuna ambaye aliwahi kufanya hivyo?" na kauli nyingine nyingi. Kauli hizi ambazo usababisha mabishano ya nafsi ndani kwa ndani na hatimaye upande mmoja unatakiwa kuushinda mwingine ili kuziishi ndoto zetu au kuachana nazo kabisa.

3. Watu wengi wameshindwa kutimiza ndoto zao kutokana na tabia kuchelewa/kusita kuchukua hatua (procrastination). Na hii inasababishwa na hofu ya kuchukua hatua ya kwanza. Kama unataka kuishi ndoto za maisha yako lazima uwe tayari kuishinda hofu hii ambayo imepelekea maisha yako yawe jinsi yalivyo sasa. Na sababu kubwa inasababisha hofu kwa walio wengi ni swali ambalo linakuwa kwenye fikra zao la kuwa "itakuwaje endapo sitafanikiwa?" Ili uishinde kauli hii tekeleza yale yanayokuogopesha pindi unapoyawaza badala ya kuogopa kushindwa kwani hata ukishindwa utakuwa umejifunza kitu.

4. Hatua ya kwanza inatoa hamasa na nguvu za kuendelea kuchukua hatua za ziada badala ya uzembe. Ili kuchukua hatua ya kwanza mwandishi anatufundisha kuwa kuna aina tatu za ujasiri (a) ujasiri wa kuanza kuchukua hatua (b) ujasiri wa kuvumilia mara baada ya kuchukua hatua na (c) ujasiri wa kumaliza vizuri hatua ulizoanza kuchukua. Ili kufikia ndoto zako ni lazima uwe tayari kuvaa ujasiri wa aina zote.

5. Safari ya maili milioni inaanza na hatua moja. Hapa mwandhishi anatuamasisha umuhimu wa kuchukua hatua ya kwanza pasipo kuogopa urefu wa safari katika kuzitimiza ndoto zetu. Pasipo kuogopa urefu wa safari yako ni lazima uwe tayari kuanza hatua ya kwanza.

6. Ili kuchukua hatua unahitaji kwanza kuwa na imani thabiti juu ya jambo ambalo unaenda kulitekeleza. Na hapa ndipo imani yako inatakiwa ijengwe kwenye misingi ya ushindi badala ya kufikiria kushindwa. Pia, unatakiwa ufikirie kuwa maisha ni sawa na mchezo au mtihani ambao unaenda kufanya pasipo kuwa na uhakika wa ushindi.

7. Mwandishi anatufundisha kuwa Mungu ndo anaongoza hatua zetu. Hivyo tunapoomba Mwenyezi Mungu kuongoza hatua zetu ni lazima tuwe tayari tumeanzisha hatua za kuendea ndoto zetu vinginevyo hakuna maana ya kuomba tukiwa bado tunaogopa kuchukua hatua kwani Mungu hatotuongoza popote.

Soma: Mambo 25 Niliyojifunza Kwenye Kitabu cha Keys to Leadership (Misingi ya Uongozi)

8. Hatua ya kwanza itakufanya uzinduke kutoka kwenye hali yako ya awali na kuanza maisha mapya. Hii ni sheria ya asili ambayo mwanasayansi Isac Newton aliifafanua kwa kusema “kitu chochote kitaendelea kuwa katika hali yake ya utulivu au kuendelea kuseleleka endapo hakuna msukumo au nguvu yoyote itakayotumika juu ya kitu hiko”. Hivyo hata wewe husipokuwa tayari kuchukua hatua utaendelea kuwa jinsi ulivyo miaka nenda rudi. Pia unapoanza kuchukua hatua kumbuka kuwa unaweza endelea kupiga hatua za ziada endapo hautoruhusu vikwazo vikuzuie au kukata tamaa.

9. Mwandishi anatushirikisha kuwa nia ya kutuhamasisha kuchukua hatua ni kutokana na ukweli kwamba unapochukua hatua ya kwanza utapata uzoefu na hata pale utakaposhindwa kufikia lengo tayari utakuwa umejifunza kitu. Pia, baada ya hatua ya kwanza unafungua milango ya fursa nyingi ambazo kwa sasa huzioni.

10.  Ili ufanikiwe katika maisha lazima uwe tayari kujiona mjinga. Hii nikutokana na ukweli kwamba kadri utakavyoanza kuchukua hatua kuna mambo mengi yanayokuzunguka yatasababisha ujione kama vile kila kitu ni kipya kwako na pia wewe utatakiwa kuwa mtu wa tofauti pale inapobidi. Kwanza jamii inayokuzunguka haitakuelewa, wakosoaji watakuwa wengi na mengine mengi kwa vile jamii inasubilia wewe ushindwe. Unachotakiwa kufanya ni kuhakikisha unajua njia unayoiendea na kusimama imara katika kila hatua unayopiga.

Soma: Salamu za Mwaka 2017 kwa Wafanyakazi wa Umma na Sekta Binafsi. Fahamu siri 10 Ambazo Zitayabadilisha Maisha Yako kwa Ujumla

11. Kitu muhimu katika kuanza hatua ya kwanza ni ubora wa ndoto yako. Je ni kubwa kiasi gani? Je itakupa changamoto kiasi gani? Baada ya kuwa na ndoto iliyo bora unapoanza kuchukua hatua ya kwanza husiogopeshwe na kiasi cha fedha ulichonacho mfukoni au kwenye akaunti ya benki wala hali ya yako ya maisha kwa wakati huo bali la muhimu ni kwa kiasi gani una dhamira ya kutimiza ndoto yako. Hivyo unatakiwa kuwa tayari kufumba masikio kwa sauti za ndani na nje ya nafsi na kuanza mara moja pasipo kungoja.

12. Ili uhirusu imani yako ifanye kazi kuwa tayari kuonekana mwendawazimu. Hii ni kutokana na ukweli kwamba kadri unavyoanza kuchukua hatua yapo mambo mengi ambayo unatakiwa kuongozwa na imani kuliko mazoea ya jamii. Kadri utakavyofanya vitu tofauti na mazoea ya jamii ndivyo utaonekana mtu wa hajabu na wengi wao watakuona kama wewe ni kichaa. Fumba macho endapo unaamini upo kwenye njia salama na piga hatua na mwisho wake jamii itakuelewa baadae.

13.  Unapoanza kuchukua hatua husikubali kudanganjwa na mtu kuwa kwa sasa hakuna tena uvumbuzi bali ongozwa na kauli kuwa dunia bado imejaa fursa kutokana na uasili wake wa milele. Hakikisha unatumia urithi wa asili ambao kila mmoja wetu amepewa na Muumba kwa ajili ya kuitawale dunia.

14. Dunia ipo kwa ajili ya wale wanaothubutu na hawa ndio wenye thamani ya maisha yao hapa duniani. Kwa maana nyingine kama unataka maisha yako yawe na thamani lazima uwe tayari kuishi kusudi la maisha. Mwenyezi Mungu alikuwa ukiwa mtawala na wala sio mtawaliwa na umeumbwa ukiwa kichwa na wala sio mkia. Hivyo basi, hakikisha unakuwa mzalishaji kwa kutumia talanta uliyonayo ndani mwako, husikubali talanta hiyo ipatwe na kutu kwa vile una uoga wa kuthubutu. Zinduka na anza sasa.

Soma:Dunia inabadilika kwa kasi sana; JE UMEIJENGA SAFINA YAKO?

15. Mwandishi anatushirikisha kuwa ili upate zaidi ni lazima uwe tayari kutoa zaidi. Anza kutoa yale uliyonayo ndani mwako, nenda hatua za ziada ambazo hujawahi kufikia, tumia vipaji na nguvu ulizonazo kwa ajili ya kuhakikisha unatekeleza ndoto zako. Kabala haujaanza kuchukua hatua kamwe hauwezi kujua nguvu, vipaji na thamani ya maisha yako kwa wengine. Kadri utakavyopiga hatua moja baada ya nyingine ndivyo utakavyogundua kuwa umekuwa unajikwamisha mwenyewe kwa kuchelewa kuchukua hatua.

16. Husiishie kusoma makala za namna hii au vitabu na kuhamasika kwa muda halafu baada ya hapo ukarudi kwenye hali ya maisha yako ya awali. Hakikisha unaanza mara moja kwa kujiwekea mipango maalumu ya kubadilisha sehemu ya maisha yako ambayo kwa muda imekuwa kikwazo kwako kuchukua hatua.

17. Baada ya kuchukua hatua ya kwanza ili ufanikiwa lazima uwe tayari kuendeleza hatua zako. Hapa chukulia mfano wa mwanariadha wa mbio ndefu kama anataka kushinda ni lazima awe tayari kuendelea kukimbia pasipo kujali upinzani ulipo mbele yake. Hata wewe, hakikisha changamoto unazokutana nazo unazitumia kama chachu ya mafanikio yako. Jiulize kwani nini unakutana na changamoto husika na fundisho lipo unaweza kulipata kwenye kila changamoto unayokutana nayo.

18.  Maisha yako yapo mikononi mwako na wewe ndio muhusika mkuu wa maisha yako. Huna sababu ya kutafuta miujiza nje ya uwezo wako kwa kuwa tayari miujiza ipo ndani mwako. Cha msingi kuhakikisha unaiamisha miujiza hii ilianze kutekeleza kusudi la Muumba.

19. Wanamafanikio ni wale ambao wana ndoto na wanatambua kuwa wamepewa talanta (vipaji) ambazo zinahitaji kutumika na katika maisha yao ya kila siku wanatumia vipaji hivi ili kufikia ndoto zao. Kwa mtazamo huu wanamafanikio wapo tayari kusherekea ushindi kutokana na vitu vidogo vidogo katika maisha yao ya kila siku.

20.  Wanamafanikio ni wale ambao wanatambua kuwa ili kutumia talanta walizopewa ni lazima wawe tayari kujifunza kwa vitendo, uzoefu na kupitia wanamafanikio waliowatangulia. Hapa ndipo tunaona umuhimu wa kusoma vitabu, makala na majarida kwa ajili ya kuendelea kuwasha moto ndani mwetu ambao utaendelea kutusukuma kuchukua hatua. Je unataka kuishi kusudi la maisha yako?? Chukua hatua yako ya kwanza leo hii!

Soma: Mwaka 2017 Jifunze Kusema Hapana kwa Mambo haya ili Kuwa na Uhuru wa Kifedha

Haya ndiyo niliyojifunza katika kitabu hiki. Ni matumaini yangu kuwa ukiyafanyia kazi yatabadilisha maisha yako kwa ujumla. Niendelee kukuomba usambaze jumbe hizi kwa kadri uwezavyo ili yale unayojifunza yawafikie wengi na hatimaye tufanikiwe kuibadilisha dunia hii kuwa mahali pazuri pa kuishi. Nakutakia mapambano mema.

Ili kupata makala za namna hii kwa mfumo wa barua pepe BONYEZA HAPA

Karibuni kwenye fikra tajiri ili upate elimu hisiyokuwa na mwisho.

Born to Win~Dream Big

A.M. Bilondwa
0786881155
fikrazatajiri@gmail.com

http://fikrazakitajiri.blogspot.com

Karibu Ujiunge na Mtando wa Fikra za Kitajiri

* indicates required

Barua pepe *

Jina la Kwanza *

Jina la Ukoo

Namba ya simu

Salamu za Mwaka 2017 kwa Wafanyakazi wa Umma na Sekta Binafsi. Fahamu siri 10 Ambazo Zitayabadilisha Maisha Yako kwa Ujumla

Habari ya leo rafiki yangu na msomaji wa mtandao wa fikra za kitajiri. Naamini upo vizuri na unaendelea kupambana kwa ajili ya kuyaboresha maisha yako. Ni jambo la heri kuona una nguvu hata za kukuwezesha kusoma ujumbe huu ambao ni muhimu kwa ajili ya chakula cha ubongo wako.

Kama ambavyo mtandao wa fikra za kitajiri umeendelea kukuhamasisha kuchukua hatua kwa ajili ya kuyaboresha maisha yako, leo hii kupitia mtandao huu ningependa kutumia dakika chache kuongea na wafanyakazi wa sekta ya umma na sekta binafsi kwa ujumla. Makala ya leo inawalenga wale wote walioajiriwa kwenye sekta ya umma na sekta binafsi pamoja na wale wanaotarajia kuingia kwenye ajira. Karibu nikushirikishe siri kumi ambazo zitayabadirisha maisha yako kwa ujumla endapo utazifanyia kazi kuanzia mwaka 2017.

1# Siku ulipoanza kazi ndo mwanzo wa maandalizi ya kustaafu. Kwa mujibu wa sheria waajiriwa kwenye sekta zilizo rasmi wanakatwa sehemu ya mshahara kama malipo ya mifuko ya jamii ambayo kwa baadae yanalipwa kama kiinua mgongo na mafao ya uzeeni. Makusudi ya makato haya ni kumwezesha mwajiriwa apate unafuu wa maisha pindi anapostaafu.

Wafanyakazi wengi wana shauku ya kuhitimisha safari yao ya utumishi ili mwhishowe wapate stahiki zao ambazo wamekuwa wakichangia kila mwisho wa mwezi. Asilimia kubwa ya wafanyakazi wamekuwa wakisubiria fedha hii wakidhani kuwa ni fedha nyingi ambazo zitawawezesha kuishi maisha ya furaha katika kipindi cha uzee wao. Lakini kumbe ni kinyume na matarajio yao, kwa uzoefu wastaafu wengi utumia fedha hizi kinyume na matarajio na mwisho wake zinaisha kwa muda mfupi. Hii ni kutokana na wengi wao kuona ni fedha nyingi ambazo zinaweza kutatua kila aina ya matatizo waliyonayo. Na wengine mara baada ya kupata fedha hizi ndo wanafikiria kuanzisha miradi ya biashara ambayo hawakuwahi kufanya na hatimaye biashara hizi zinakufa kwenye miezi ya mwanzoni kutokana na wamiliki kukosa uzoefu kwenye biashara husika.

Ili uepuke changamoto za namna hiyo hakuna namna nyingine zaidi ya wewe kufanya maandalizi binafsi ukiwa bado kijana. Unachotakiwa kufanya ni kuhakikisha kila pesa inayoingia mkononi mwako unatenga asilimia yake kwa ajili uwekezaji. Hakikisha unatenga asilimia ya mshahara wako na fedha za kuwa safarini kikazi au kufanya kazi ya ziada (extra duty) kwa kujiwekea mazingira mazuri ya kustaafu. Ukifanya zoezi hili kwa nidhamu na uadilifu kwa kipindi cha miaka uliyobakiza kazini nakuhakikishia kuwa fedha utakayojiwekea itakuwa zaidi ya mara tatu ya hiyo unayotarajia kupewa kutoka mfuko wa hifadhi ya jamii ambao wewe ni mwanachama. Hata hivyo unaweza kuwekeza fedha hizo kama sehemu ya kukusanya mtaji ili uwekeze kwenye vitega uchumi kama ardhi, majumba ya biashara, kilimo, ufugaji na biashara nyinginezo ambazo ni rahisi kuziendesha huku ukiendelea kufanya kazi.

Soma: Hii Hapa Kauli Mbiu Ambayo Nakusihi iwe Mwongozo wako kipindi chote cha mwaka 2017

2# Nyongeza ya mshahara si suruhisho la matatizo yako. Imekuwa kawaida kwa wafanyakazi hasa watumishi wa umma kusubiria mwisho wa mwezi wa saba kwa hamu kutokana na mazoea kuwa serikali imekuwa ikiongeza mshahara kila mwaka. Lakini jambo muhimu ambalo naomba ulifahamu ni kuwa kamwe mshahara hauwezi kutatua matatizo yako ya kiuchumi hata ungekuwa mkubwa kiasi gani. Chukulia mfano ni kawaida sana kukuta watumishi wa kada nyingine kutamani mshahara wa daktari, mhandisi, mwanasheria au kada nyingine ambazo kwenye jamii inaaminika zina mishahara mikubwa. Lakini cha ajabu ni kwamba hata waliopo kwenye hizo kada kilio chao ni kile kile mshahara kutokutosheleza.

Fundisho kubwa hapa ni kwamba kadri mshahara wako unavyoongezeka ndivyo na matumizi yako yanavyoongezeka na mwisho wake kila kitu kinarudi kwenye mringanyo wake (state of equilibrium). Hata hivyo, unapaswa kufahamu kuwa mshahara umekokotolewa katika njia ambayo itakufanya uendelee kuwa tegemezi kwa mwajiri wako kwani bila kufanya hivyo watu wengi wangeacha kazi.

Nakusihi sana rafiki yangu badala ya kusubiria mshahara uongezeke ndo uanze kuchukua hatua za kuyaboresha maisha yako anza sasa kwa mshahara huo mdogo ulionao. Hakikisha unajenga nidhamu ya kutumia hicho kidogo ulichonacho ili hatimaye kikupatie mafanikio makubwa sana. Kufanikiwa katika zoezi hili ni lazima ujenge utamaduni wa kutenga sehemu ya mshahara wako kwa ajili ya akiba kama nilivyoeleza kwenye siri ya kwanza.

3# Ajira siyo sehemu salama. Zamani wafanyakazi walikuwa na usalama na uhakika wa vibarua vyao kutokana na idadi ya wataalamu walikuwepo kipindi hiko pamoja na mfumo wa Serikali. Leo hii mambo yamebadilika na Serikali imebadilika kiasi kwamba unaweza kuaga asubuhi unaenda kazini na kufika ukakutana na barua ya kuachishwa kazi. Katika mazingira kama haya unatakiwa ujiandae kwa ajili ya lolote linaloweza kutokea.

Soma: Dunia Inabadilika Kwa Kasi Sana; Je Umeijenga Safina Yako?

4# Epuka ugonjwa wa nikipanda cheo. Fanya kazi ukiwa na nadharia ya kwamba cheo ulichonacho kwa sasa ndo utadumu nacho mpaka unastaafu. Chukulia kama vile mshahara wako wa sasa pamoja na marupurupu yako hayataongezeka hadi kustaafu kwako na hatimaye fikiria jinsi gani utafanikiwa kutatua changamoto za kifedha kwa muda wote utakaokuwa kazini.

Rafiki ninachotaka ujifunze hapa ni kwamba wafanyakazi wengi wamekuwa na tumaini la kwamba siku watakapopanda cheo ndo wataweka mambo yao sawa au ndo watapata fedha nyingi lakini ukweli ni kwamba hata hao mabosi bado wanateseka katika kukamilisha mahitaji yao ya kifedha. Ndio maana makazini ni kawaida sana kuona bosi anapindisha hata elfu hamsini iliyokuwa iende kwa mtu wake wa chini ili mradi tu aichukue yeye.

5# Husiruhusu mtu achezee muda wako nje ya muda wa mwajiri. Rafiki yangu naomba utambue kuwa ukitoa masaa 8 ya mwajiri hasa kwa wafanyakazi wa Serikali katika siku unabaki na masaa 16 ambayo kati ya hayo angalau una masaa yasiyopungua 5 kila siku kwa ajili ya kufanya shughuli zako ukiachilia mbali siku za jumamosi na jumapili ambazo una masaa yote kufanya shughuli zako. Tatizo ni kwamba wafanyakazi wengi tumejenga mazoea kuwa baada ya muda wa kazi ndo muda wa kupumzika. Mbaya zaidi wengi wanatumia muda huu kwa ajili ya kwenda kwenye sehemu za starehe na kwenye makundi yasiyokuwa na tija.

Nakushauri sana rafiki yangu uhakikishe unatumia muda huu kwa ajili ya kufanya shughuli binafsi za kujiongezea kipato. Na hautakiwi kuchagua kazi kwa kuogopa kuwa Afisa utaonekana vipi kwa kufanya kazi ya namna hiyo kwani wewe ndo mwenye hatma ya maisha yako na wewe ndo unajua nini unafanya na kwa nini unafanya hivyo. Jifunze sana kufanya vitu ambavyo hauvunji sheria lakini jamii inayokuzunguka inakushangaa kwa nini wewe na elimu yako unafanya vitu hivyo.

6# Epuka ugonjwa wa kuairisha mambo (Procrastination syndrome). Mpendwa mwajiriwa ugonjwa wa kuairisha mambo umekuwa ni kizuizi kikubwa kwa wafanyakazi wengi kufikia ndoto zao. Hii ni kutokana na wafanyakazi wengi kuishi maisha ya “ubize” ambao kiuhalisia ni ubize wa kinadharia uliojengeka kwenye mfumo wa fikra za wafanyakazi wengi kuliko majukumu ya kazi zao. Kwa mfumo huu wafanyakazi wengi wamekuwa ni wapangaji wazuri wa mipango binafsi lakini utekelezaji wake wengi wao wameshindwa kufanya hivyo.

Rafiki yangu kama unataka kuishi kusudi la maisha yako huna budi kuchukua hatua mara moja kwa yale ambayo unalenga kuyatekeleza katika maisha yako. Hakikisha unakuwa na ndoto hai ambazo unazitafsri katika maisha yako ya kila siku. Epuka sana kauli za nitafanya na badala yake anza pasipo kujali hatua zako ni fupi kiasi gani kwani hata Mji wa Roma ulijengwa kwa zaidi ya miaka 50. Na hii ni kutokana na ukweli kwamba mafanikio yanakuja kwa kupata ushindi mdogo kwa muda mrefu.

Soma: Mambo 25 Niliyojifunza Kwenye Kitabu cha Supercoach. Siri za Kubadilisha Maisha Yako kwa Ujumla

7# Mshahara wako ndio kipato pekee cha uhakika kazini kwako. Imekuwa ni kawaida kwa wafanyakazi walio wengi kufikiria zaidi fedha nje ya mshahara wao hasa zile za marupurupu ya kazini au pengine kupitia “dili”. Kutokana na ukweli kwamba fedha za namna hii upatikanaji wake unakuwa hauna kanuni maalumu na hivyo sio rahisi kuweka mipango ya muda mfupi au mrefu wa jinsi gani unaweza kuzitumia fedha hizi. Mbaya zaidi fedha za namna hii zinaweza kusababisha upoteze kazi yako hasa zile zinazopatikana kwa njia ya udanganyifu.

Kwa upande wa fedha za posho kazini na zenyewe upatikanaji wake sio rahisi kwa kuwa kila mmoja katika kituo chako cha kazi anazitolea macho. Jambo hili limesababisha wafanyakazi wengi kuwa na msongo wa mawazo kutokana na ukosefu wa fedha nje ya mshahara kwani ni wazi kuwa mshahara hautoshi na hivyo wengi wao wanakuwa na manunguniko kwa mabosi wao au wenye mamlaka.

Rafiki yangu ili kuepuka maisha ya namna hiyo nakusihi sana utambue kuwa kipato chako cha uhakika ni mshahara wako unaopokea kama malipo ya kazi yako kila mwisho wa mwezi. Kutokana na uhakika wa mshahara huu unaweza kujiwekea kanuni maalum za namna gani utatumia kipato chako kwa ajili ya kufikia maisha ya mafanikio unayoyataka.

8# Kila mtu anatolea macho fedha yako. Mpendwa rafiki mfanyakazi naomba kuanzia leo hii utambue kuwa ni wewe pekee ambaye kila mtu ana uhakika na fedha yako. Ukiingia mtaani na jamii zinazotuzunguka zinafahamu fika kuwa wafanyakazi wana fedha za kutosha. Popote utakapoenda ukishafahamika kuwa wewe ni mfanyakazi wapo tayari kukuuzia kitu chochote au huduma yoyote hata kama siyo mahitaji yako. Vilevile ni wewe pekee ambaye unakopesheka kwenye taasisi za fedha na hata mitaani na hasa kwa upande wa mikopo yenye riba. Watu/taasisi zipo zinakusubiria ili uende ukakope na pengine unabembelezwa kutokana na uhakika walio nao juu ya fedha zako.

Katika mazingira kama haya rafiki yangu unatakiwa kuwa makini sana vinginevyo fedha zako zitaishia kwenye kulipa madeni miaka nenda rudi. Jambo la msingi hapa unatakiwa kujitazama upya katika madeni unayodaiwa na kuweka mkakati wa kuyalipa mara moja na baada ya hapo husijiingize kwenye mkopo ambao hauna tija kwenye kutimiza malengo yako. Kabla ya kuchukua mkopo fanya tathmini ya kufahamu kama unaweza kutumia mkopo huo kuanzisha mradi na kupitia mradi huo utaweza kulipa deni la mkopo na faida juu yake.

9# Huduma yako ndo thamani yako. Imekuwa ni kawaida sana kwa wafanyakazi walio wengi kwenda kazini ili mradi kuwaridhisha wakubwa wao wa kazi. Katika hali kama hiyo unakuta mtu hana vipaumbele vya nini anatakiwa kufanya kwa siku husika bali sana sana akifika ofisini anaanza kuangalia yaliyojiri kwenye mitandao ya kijamii, kupiga stori na hatimaye kusubilia muda wa kuondoka. Kwa mazingira ya namna hii hata pale mteja akija kwa ajili ya kupata huduma anapewa majibu ya juu juu kutokana na ukweli kwamba muhusika hana muda wa kufuatilia yanayohusu taaluma yake.

Rafiki yangu nakuomba sana hakikisha unatambua majukumu yapi unatakiwa kuyamilisha kila siku unapokuwa kazini. Njia nzuri ya kufanya hivyo ni kuhakikisha kila asubuhi ukifika mezani kwako unaandaa orodha ya vitu vya kukamilisha kwenye siku husika na baada ya hapo unaanza kuvitekeleza mara moja.

10# Kuwa na muda wa kujielimisha. Kama nilivyotangulia kusema kuwa wafanyakazi wengi wamejenga nadharia ya ubize kwenye maisha yao. Hivyo ni kawaida mtu ukimuambia suala la kusoma vitabu, makala au majarida mbalimbali moja kwa moja atakuambia kuwa hana muda wa kufanya hivyo. Cha kushangaza mtu huyo ana muda wa kusoma posts zote za mitandao ya kijamii, kusoma magazeti ya siasa, mitandao ya udaku ili kujua Diamond kafanya nini kwa mwanae na mengine mengi. Mbaya zaidi wafanyakazi wengi wamejifungia kwenye fani zao na hawapo tayari kupata maarifa mengine. Hii ni sawa na kujiweka kifungoni bila ya wewe kufahamu.

Wanamafanikio wanatufundisha kuwa elimu wala sio stashahada au shahada bali elimu ya kweli ni ule uwezo wa mtu kujua vitu vichache kwenye kila fani na kuvitumia kutatua changamoto za kila siku kwenye maisha ya mwanadamu. Hivyo, unapaswa utambue kuwa kama lilivyo tumbo lako kwa kuhitaji chakula kila siku na ubongo wako ndivyo ulivyo kwa kuhitaji maarifa mapya kila siku. Epuka sana kauli za hayo nayafahamu, hakuna jipya na badala yake pigana sana kuulisha ubongo wako kwa kutenga muda wa kujisomea kila siku.

Hizi ndizo siri kumi ambazo nimekushirikisha ewe mfanyakazi ili ziwe mwongozo wa maisha yako. Ni matumaini yangu kuwa endapo utazifanyia kazi zitabadilisha maisha yako kwa ujumla. Niendelee kukuomba usambaze jumbe hizi kwa kadri uwezavyo ili yale unayojifunza yawafikie wengi na hatimaye tufanikiwe kuibadilisha dunia hii kuwa mahali pazuri pa kuishi. Nakutakia mapambano mema.

Ili kupata makala za namna hii acha taarifa zako kwa kujaza fomu hapo chini.

Karibuni kwenye fikra za tajiri ili upate elimu hisiyokuwa na mwisho.

Born to Win~Dream Big

A.M. Bilondwa
0786881155
fikrazatajiri@gmail.com

http://fikrazakitajiri.blogspot.com

Jiunge na Mtandao wa Fikra za Kitajiri ili kutumiwa makala moja kwa moja kwenye email

* indicates required

Barua pepe *

Jina la Kwanza *

Jina la Ukoo

Namba ya simu

Mambo 25 Niliyojifunza Kwenye Kitabu cha Supercoach; 10 Secrets to Transform Anyone’s Life (Siri Zitakazobadilisha Maisha ya Mtu Yeyote kwa Ujumla)

Habari ya leo rafiki na msomaji wa mtandao wa fikra za kitajiri. Nimatumaini yangu kuwa upo vizuri na unaendelea kupambana kwa ajili ya kuyaboresha maisha yako. Leo ninakuletea uchambuzi wa kitabu cha Super Coach na pia kama ndo unatembelea mtandao huu kwa mara ya kwanza nipende kukufahamisha kuwa kwa mwaka huu nimejipanga kila mwisho wa wiki (ijumaa) kukuletea uchambuzi wa kitabu kimoja ili kupitia vitabu hivi tuweze kuyaboresha maisha yetu. 

Karibu nikushirikishe mambo 25 niliyojifunza kwenye kitabu hiki ambacho kimeandikwa na Michael Neill. Mwandishi wa kitabu hiki ni mwanafamanikio na kocha bora kwenye masuala ya kuhamasisha watu kuishi ndoto zao kwa kipindi cha miaka 20 sasa. Katika kipindi hiki mwandishi amefanikiwa kuwa kocha, mshauri na mhamasishaji wa kimataifa kwa watu wenye nia ya kuishi ndoto zao katika maisha yao ya kila siku (biashara, kazi na kiroho).

Kwa ujumla kupitia kitabu hiki mwandishi anatushirikisha siri kumi ambazo zinaweza kutumiwa na kila mtu na hatimaye kumbadilisha mtu yeyote yule anayefanyia kazi mafundisho haya. Mwandishi kupitia kitabu hiki anatuhamasisha mafanikio yanayoanzia ndani mwa mtu (fikra) na hatimaye kujidhihilisha katika maisha ya kila siku. Pia anatushirikisha kuwa kila mmoja wetu alizaliwa akiwa na furaha na hivyo ni ndivyo makusudi ya maisha. Karibu tujifunze wote mambo muhimu 25 niliyojifunza kwenye kitabu hiki;

1. Mwandishi anatufundisha kuwa kuna hatua tatu za mabadiliko ambazo mtu anapitia ili kufikia viwango vya mafanikio. Na hatua hizi zote zinahusisha mabadiliko ya ndani ambayo upelekea mabadiliko ya mfumo mzima wa maisha ya mhusika. Hatua hizo ni:-

2. Hatua ya kwanza ni mabadiliko kwenye tabia au changamoto husika – hapa ni pale mtu yupo tayari kumtafuta mshauri ambaye atamsaidia kumpa maelekezo yatakayosaidia kubadilisha tabia/changamoto ambayo imekuwa ikimkwamisha kufikia malengo yake. Mfano, mtu anaweza kutafuta ushauri wa jinsi gani anaweza kukabiliana na changamoto za kikazi, msongo wa mawazo, uvivu au uzembe. Mwandishi anatufundisha kuwa hatua hii inatumika kubadilisha mtazamo wa mtu, fikra au matendo na katika hatua hii watu wanabadilika kutoka kwenye kuwa na hofu na kujiamini, kwenye maudhi na kuridhika au kutoka kwenye kutokuchukua hatua na kuanza kuchukua hatua.

3. Hatua ya pili inahusisha mabadiliko katika sehemu maaluma ya maisha – hapa ni pale ambapo mtu anahitaji kukabiliana na tatizo linalomsumbua katika maisha yake ya kila siku au jamii inayomzunguka. Mfano, mtu anaweza kuwa anahitaji kuboresha maisha yake kwenye sekta ya mahusiano, mauzo, malezi, kujiamini n.k. katika hatua hii muhusika anakuwa na programu ya kubadilisha sehemu ya maisha yake ambapo anaweza kusoma vitabu au makala yanayohusiana na changamoto aliyonayo.

4. Hatua ya mwisho inahusisha mabadiliko ya jumla – hatua hii inahitimisha mabadiliko ya jumla katika mfumo mzima wa maisha ya mhusika. Katika hatua hii muhusika anabadilika moja kwa moja kutoka kwenye hali yake ya awali na kuingia kwenye ulimwengu mpya wa kusudi la maisha yake. Hivyo katika hatua hii mtu anabadilisha mazoea yake yote katika kila nyanja ya maisha. Mfano, mabadiliko ya jinsi mtu anavyojitazama mwenyewe, kujiamini na mtazamo wake kwa watu wanaomzunguka. Hata hivyo, hatua hizi zinategemeana na katika kila hatua lazima mhusika awe tayari kubadilika ndani mwake ili hatimaye mabadiliko hayo yajitokeze katika mfumo wa maisha ya nje.

5. Mabadiliko yoyote kwenye maisha ya mtu ili yadumu ni lazima yajengwe kwenye mfumo wa maisha unaolenga kuwa na mafanikio ya muda wote (life time success). Ili kufanikiwa katika mabadiliko ya namna hii ni lazima mfumo mpya wa maisha uambatane na vitendo. Pia, kufanikisha mfumo wa namna hii ni lazima mhusika aishi maisha ya furaha yanayoleta hamasa kwani hamasa huleta shauku na kwa pamoja hamasa na shauku huleta maisha yenye kila aina ya mafanikio.

6. Ukiamini juu ya jambo flani kwa kipindi kirefu na ukaweza kuliona jambo husika katika picha kuna uwezekano mkubwa wa kuona uhalisia wa jambo hili katika maisha yako. Kwa maana hii yale tunayoyawaza kwa muda mrefu na kuyajengea imani ndo yanaamua mwonekano wa maisha yetu katika ulimwengu huu. Imani zetu juu ya maisha, fedha, furaha na mazingira yanayotuzunguka zina nafasi kubwa ya kuamua jinsi maisha yetu yalivyo. Hivyo yale tunayoyaona, yale tunayoyasikia, yale tunayoyafanya na yale tunayoyahisi ni matokeo ya fikra na mtazamo wetu juu ya mambo hayo. Jifunze kuona ukweli/uchanya katika kila hali au tukio unalokutana nalo.

Soma: Hii Hapa Kauli Mbiu Ambayo Nakusihi iwe Mwongozo wako kipindi chote cha mwaka 2017

7. Kitu chochote kinachotokea katika maisha yetu ni lazima kianzie kwenye mfumo wa mawazo na baadaye ndo kinajidhihirisha kwenye mfumo wa hisia. Ubongo kupitia kwenye milango mitano ya fahamu unapokea taarifa na kuzihifadhi ndani ya mfumo wa fikra/mawazo. Kinachowatofautisha watu ni namna gani tunavyotafsiri taarifa hizi na jinsi zinavyofanyiwa kazi kwa kila mmoja wetu. Kwa maana nyingine chochote katika dunia hii kipo jinsi kilivyo kutokana na fikra/mtazamo wetu juu ya kitu hicho. Hakuna jambo baya au zuri bali mtazamo wetu juu ya ubaya au uzuri wa jambo husika ndo unalifanya jambo hilo lionekane baya au zuri.

8. Matarajio yako hujenga uzoefu wako. Kwa maana hiyo wewe ni muumbaji mkuu wa yale yanayotokea kwenye maisha yako ya kila siku. Kama ambavyo tunameona kuwa kile unachokiwaza ndicho unachoishi, vivyo hivyo matarajio yetu kwa maisha ya baadae ndo yanatujengea uzoefu kwa maisha ya sasa. Lakini habari njema ni kwamba kila mmoja wetu anaweza kubadili matukio ya maisha yake kwa kubadili fikra/mtazamo wake.

9. Mara nyingi tumekuwa tukiangalia michezo ya filamu na hatimaye kuona ile michezo katika uhalisi wa maisha yetu. Vilevile mwandishi wa kitabu hiki anatufundisha kuwa maisha yetu tunaweza kuyaona katika mfumo wa mchezo wa filamu huku sisi tukiwa ni wahusika wakuu (stering) wa hiyo filamu. Jipe muda wa kutafakari juu ya umahili wa mhusika mkuu wa filamu ambayo ulitokea kuikubali sana kati filamu zote ambazo umeangalia na tafakari jinsi gani mhusika mkuu alivyokuwa imara katika kukwepa vikwazo mbalimbali hadi akakufanya uwe na hisia kana kwamba maisha yake ya kila siku yapo jinsi alivyocheza katika filamu hiyo. Baada ya kupata picha hiyo jitafakari wewe kama mhusika mkuu wa filamu ya maisha yako, ona jinsi unavyokwepa vikwazo na jinsi unavyosherekea ushindi katika kila sekta ya maisha yako na hatimaye tafakari jinsi unavyomaliza filamu hii kwa ushujaa wa hali ya juu. Mwisho kama mhusika mkuu ione filamu ya maisha yako kwa jinsi unavyofanikiwa au kushindwa kwenye sekta ya mahusiano, uhuru wa kifedha, kuwa baba au mama bora, jinsi gani watu wanakuwa wema au wabaya kwako, jinsi gani unafanikiwa kwenye ulimwengu wa kiroho na kijamii, jinsi unavyofanya kazi au biashara zako, jinsi unavyomiliki majumba na magari ya kifahari pia ione picha inayokujia ukikabiliana na changamoto za kiafya na mengine mengi.

10.  Mwandishi wa kitabu hiki anatufundisha kuwa kila mmoja wetu ni muumbaji na uumbaji huu umejengwa kwenye misingi na kanuni. Hivyo ili kila mmoja wetu afanikiwe kuwa muumbaji bora ni lazima kwanza ajifunze misingi na kanuni hizo. Na uumbaji wa aina yoyote ile ni lazima pawepo vitu vitatu;

Moja: uwepo wa nishati (Energy); Na hii ni sheria ya asili ambayo tayari wanafizikia walishaiweka wazi kuwa kila kitu tunachoweza kusikia, kuona, kuhisi, kuonja, kuongea au kugusa ni lazima pawepo nishati au chanzo kama kisababishi kikuu. Na nishati hii ndio imewezesha uumbaji wa vitu vyote hapa duniani.

Mbili: Ufahamu (Consciousness); Kupitia ufahamu tunaweza kujitofautisha sisi wenyewe kutoka kwa wengine, tunaweza kutofautisha kitu kimoja na kingine, vilevile tunaweza kutofautisha sauti, milio, rangi n.k. Hivyo uwezo wetu katika kuumba vitu unategemea mazoea tulionayo kwenye kutofautisha vitu vinavyotuzunguka.

Tatu: Mawazo/fikra (Thought); Mawazo au fikra katika uumbaji yanachangia pale ambapo yanakaa katika akili ya mtu kwa muda mrefu na hatimaye mhusika kuyatafsiri katika vitendo kwa kutumia nishati na ufahamu wake. Kwa maana hii tunaweza kupata kanuni ya uumbaji ambayo ni; Uumbaji = Nishati + Ufahamu + Mawazo.

Kwa kifupi; katika uumbaji wa vitu tunapaswa kufahamu kuwa ni lazima pawepo sababu au kisababishi cha kwanini tunataka kufanya hivyo – unaweza kuiita nishati au chanzo, pili lazima pawepo nia au nguvu inayokusuma katika kubuni vitu – hii ndo mawazo/fikra na mwisho ni lazima pawepo uzoefu na uelewa wa vitu au mazingira yanayokuzunguka – hii ndo ufahamu.

11.  Mwandishi anatufundishi kuwa kama unataka kuwa muumbaji bora ni lazima uepuke malalamiko. Hii ni kutokana na ukweli kwamba malalamiko ni kinyume cha uumbaji na hivyo kadri unavyolalamika ndivyo unavyodumaza karama zako za uumbaji wa vitu. Hivyo kama tunavyofanya mfungo (fasting) kwa ajili ya kuyatafakari matendo yetu mbele ya mwenyezi Mungu ndivyo tunatakiwa kujiweka kwenye mfungo wa malalamiko (complaint fasting) kwa muda wote maisha yetu. Katika kila tukio ambalo ulitakiwa kulalamika jiulize ni kipi unaweza kufanya au kujifunza kupitia tukio husika. Mtu anaanza kuwa muumbaji bora pale anapotambua kuwa kila jambo linaanzia ndani mwetu; uzuni, furaha, msongo wa mawazo, hamasa na shauku vyote hivi vinaanzia ndani mwetu kama vile maandiko matakatifu yanavyosema kuwa sio kimuingiacho mtu ni najisi bali kimtokacho mtu.

Pata mapumziko na stori hii

“Hapo zamani Muumbaji alitaka kuficha ujumbe kwa wanadamu na hivyo akavikusanya viumbe vyote hisipokuwa mwanadamu na kuviuliza ni wapi ambapo anaweza kuficha ujumbe huo. Ndege aina ya Tai alikuwa wa kwanza kumshauri kwa kusema nipe ujumbe huo nitaruka juu ya milima na kuuficha huko na binadamu hawataweza kufika huko. Muumbaji akasema hapana, binadamu ni wabunifu siku moja watatawala milima na mwishowe wataweza kuuona huu ujumbe. Samaki aina ya papa akasema nipatie ujumbe huu nami nitauficha kwenye kina kirefu cha bahari nao hawataweza kuuona, Muumba akasema hapana binadamu wataweza kufika huko na hatimaye watafanikiwa kupata huo ujumbe. Faru akasema nipe huo ujumbe nami nitaufukia ardhini katika maeneo ya nyika ambapo mwanadamu hawezi kuuona, Muumba akasema hapana nyikani ni rahisi sana kwa mwanadamu kupafikia na siku moja wakati akichimba uso wa dunia ataweza kupata huu ujumbe. Ndipo muumba akawa amekata tamaa kwa ushauri anaopewa. Hatimaye fuko aliye kipofu na mzee akasema kwa nini ujumbe huo husiuweke ndani mwao kwani sehemu hii ndo sehemu ya mwisho kwao kuangalia! Muumba akakubali na kusema huo ni ukweli. Je kwa mtazamo wako hii ni kweli? Majibu unayo.

12.  Kuna hatua mbili zinazotutofautisha nazo ni hatua ya “kiini” (essence) na hatua ya “binafsi” (persona). Katika hatua ya kiini wote tunakuwa sawa, mfano, wote tunahitaji kupenda au kupendwa, sote tunataka kuwa na faraja, wote tunaka kuwa na maisha yenye kila aina ya furaha na amani. Lakini tunakuja kuachana kwenye hatua “binafsi”, katika hatua hii tofauti yake na hatua ya “kiini” ambayo kila mmoja wetu amezaliwa nayo ni kwamba hatua hii ya pili inahitaji kutengenezwa na kuboreshwa kupitia mazoea yetu ya kila siku. Hivyo hapa ndipo tunaona makundi ya watu tofauti katika jamii yetu kutokana na jinsi wanavyojiendeleza ili kuboresha hatua hiyo ya pili.

13.  Kwa uzoefu maisha ya mwanadamu yanazungukia kati ya maisha ya furaha na maisha ya huzuni. Ili kuyafurahia maisha ni lazima ujifunze kutumia muda mwingi kwenye sehemu ya furaha kuliko sehemu ya huzuni. Kuwa na maisha ya furaha sio lazima uwe na utajiri wa majumba, magari, fedha au mashamba kwani wapo watu wengi wenye vitu hivyo lakini rohoni mwao wana huzuni. Hivyo maisha ya furaha yanaanzia rohoni mwako na wewe ni mwamuzi mkuu wa aina ya maisha unayoyataka. Na siri kubwa ya kuishi maisha ya furaha ni kutenda matendo mema katika jamii inayokuzunguka.  

14.  Ili uishi maisha ya furaha ni lazima ujifunze kuwaza katika hali chanya ili kuhakikisha kuwa unadhibiti mawazo hasi ambayo yanasababisha maisha ya uzuni. Watu wengi wameshindwa kuishi maisha ya furaha kwa kudhani kuwa furaha ni kitu kinachotoka nje ya uwezo wao. Huu ni mtazamo potofu kutokana na ukweli kuwa furaha/uzuni ni ile hali ya maisha ambayo mtu ameamua kuishi.

15.  Kwa kutumia sheria ya asili ya mvutano (the law of attraction) ambayo inasema fafana uvuta fanana (like attracts like) vivyo hivyo fikra/mawazo uleta vitu na sisi ni matokeo yale tunayoyawaza kwa muda mrefu. Katika maisha ya mafanikio tunatakiwa kutumia sheria hii kuishi maisha ya furaha kwani kwa kufanya hivyo tutavuta vitu vingi na watu wengi kwa yale tunayoyafanya. Kufanikiwa katika sheria hii ya asili tunatakiwa kuhakikisha kuwa mawazo, hisia, nia na matamanio yetu tunayaweka kwenye yale tunayoyataka yatokee katika maisha yetu.

16.  Ili uishi maishi ya furaha ni lazima ujenge tabia ya kuridhika na hali au vitu ulivyonavyo kwa sasa. Baada ya kujenga tabia ya kuridhika unatakiwa uwe na mfumo mpya wa maisha ambao utakuongoza kupata matokeo makubwa sana huku ukiendelea kufurahia jinsi ulivyo na yale unayoyafanya.

17.  Njia rahisi ya kufanya maamuzi katika maisha yetu ni kila tufanyapo maamuzi kukumbuka kuwa maamuzi yetu kamwe hayaathiri maisha yetu bali kinachoathiri maisha ni jinsi gani tunavyokabiliana na matokeo ya uamuzi wetu. Mfano, unaweza kukosea kuchagua kazi lakini athari ni kuendelea kufanya kazi husiyoipenda kwa zaidi ya miaka mingi. Kwani katika kipindi hiki utaendelea kuishi maisha ya kulalamika na hatimaye kukosa furaha ya maisha kwa kipindi chote hicho. Hivyo tunapofanya maamuzi ni lazima tujiulize jinsi tukavyokabiliana na athari za matokeo ya maamuzi yetu. Njia bora ya kufanya hivyo ni kuhakikisha tunafanya maamuzi yanayoridhisha na kujitoshereza kukidhi mahitaji ya tukio husika pasipo kujali maamuzi hayo yamepelekea uchaguzi ulio bora au la kwa wakati huo.

18.  Hisia ulizonazo kwenye maisha yako ya kila siku ni mwitikio wa moja kwa moja wa fikra/mawazo yako na sio kwa sababu ya mazingira yanayokuzunguka. Kama unataka kudhibiti hisia zako ni lazima ujifunze kudhibiti fikra zako. Na kadri unavyogundua kuwa hisia zako ni matokeo ya fikra zako ndivyo unatakiwa kujifunza kudhibiti fikra ambazo zimekuwa zikipelekea ufanye vitu unavyojutia mara baada ya kuvifanya. Kutokana na mtazamo huu hakuna kitu kama “siku flani kuwa mbaya au mwaka wenye namba flani kuwa mbaya”. Kwa mfano, Jamii imezoea kuwa miaka inayoishia na namba ambazo sio shufwa kuwa ni miaka yenye mikosi. Pia, tumezoea kusikia kuhusu siku ya Jumatatu na Ijumaa kuonekena kama siku zenye uzalishaji mdogo. Huo ni uongo ambao tokea sasa unatakiwa kuukimbia kwani hizo ni hisia ambazo zimetokana na fikra zetu. Siku njema unaiandaa mwenyewe kwani sio siku inayoandaa hali ya akili yako (mood) bali hali ya akili yako ndiyo inayoiandaa siku. Ondoa fikra hasi kwenye akili yako na hatimaye utakuwa na siku njema daima.

19.   Kila kitu unachoamua kufanya au kutokufanya ni uchaguzi wa maamuzi yako. Swali muhimu la kiujiliza katika maamuzi yetu ni kwa nini tunafaya yale tunayoyafanya? Au kwa nini kuna mambo mengine huwa hatufanyi? Mara nyingi tunafanya vitu kwa matarajio ya baadae. Mfano, tunafanya kazi ili tupate kula na tunakula ili tuendelee kuishi. Jambo la msingi katika maisha ya mafanikio ni kujenga misingi ya kutuongoza kwa yale tunayopaswa kuyafanya na yale ambayo hatupaswi kuyafanya. Na kutekeleza misingi hii katika maisha yetu ya kila siku ni lazima tuongozwe na nidhamu binafsi. Hivyo, maisha ya mafanikio yamejikita katika kufanya yale tunayoyapenda na kuepuka yale ambayo hatuyapendi au tunayafanya kwa manunguniko.

20.  Tunatengeneza watu kwa maana ya kuwapa motisha kadri tunavyowasikiliza. Na tunavyowasikiliza wenzetu ndivyo tunavyojifunza kutoka kwao. Kadri tunavyo wasikiliza ndivyo tunavyo waweka karibu na mfumo wa fikra zetu na hivyo tunatengeneza picha zao katika mfumo wetu wa akili. Hivyo jifunze kuwasikiliza watu wa karibu na wewe, mwenza wako, watoto, wazazi, wafanyakazi wenzako, waajiriwa wako na marafiki ili kwa kufanya hivyo utajifunza mengi kutoka kwao na hatimaye nao watabadilika. Hata hivyo, unapowasikiliza watu huna budi kuchambua yale ambayo yanaendana na falsafa za maisha yako.

21.  Unaweza kuomba kitu chochote kutoka kwa mtu yeyote pasipokujali utapewa jibu la ndio au hapana. Mfano, kama unatangaza biashara au bidhaa za namna yoyote ile husikatishwe tamaa na jibu la HAPANA kutokana na ukweli kwamba kati ya watu ambao utawafikia kuna ambao watakuwa tayari kukusikiliza. Kama tulivyoona kuwa furaha inatoka ndani mwetu vivyo hivyo hata yale tunayotaka lazima yaanzie ndani ya nafsi yetu na tukifanya hivyo ulimwengu upo tayari kutupa vyote tutakavyoomba kulingana na imani na jitihada zetu. Tunapoomba tunatakiwa kuzingatia kanuni nane:-

• Omba ukiwa na imani ya kwamba utapata na si vinginevyo;
• Omba kwa mtu ambaye unahisi anaweza kukupa kile unachohitaji;
• Kuwa wazi na moja kwa moja eleza unachoitaji;
• Omba kwa ucheshi na ubunifu;
• Omba kutoka rohoni mwako;
• Kuwa tayari kutoa chochote kwa ajili ya kupata kile unachohitaji;
• Husichoke kuomba bali omba mara kwa mara; na
• Kuwa tayari kupokea HAPANA au NDIYO kwa furaha.

22.  Uhuru wa kifedha hautokani na kiasi cha fedha ulichonacho kwa sasa bali unatokana na uwezo wako wa kupata zaidi ya kiasi hicho wakati wowote pale unapotaka. Hii ni kutokana na ukweli kwamba fedha ni sawa tu na bidhaa nyingine kama vile mbao, chuma, mchanga, nyama n.k. Tofauti ya fedha na bidha nyingine ni kwamba unaweza kutumia fedha kupata bidhaa hizo au ukatumia bidhaa hizo kupata fedha. Kupata kiasi chochote cha fedha unachohitaji kwa wakati wowote inategemea uwezo na ufahamu wako juu ya fedha na bidhaa zinazokuzunguka.

23.  Hali ya maisha yako hisipimwe kwa kiasi cha fedha ulichonacho mfukoni au kwenye akaunti yako. Ili uwe na uhuru wa kifedha ni lazima kuweka misingi ya kuitawala fedha ili kwa kufanya hivyo maisha yako yaendeshwe na misingi hiyo na wala sio kiasi fedha ulichonacho.   

24.  Jifunze sanaa ya kuwatumikia wengine ili uwe na uhuru wa kifedha hapo baadae. Kwa maana nyingine kila unachofanya fanya kwa mapenzi yako juu ya hicho unachofanya nasi kwa ajili ya kupata fedha bali fedha zikufuate baadae. Ili kufanikisha siri hii unatakiwa kujiuliza thamani ya yale unayoyafanya kama yanagusa jamii inayokuzunguka. Kama unayoyafanya yana thamani ndogo kwenye jamii inayokuzunguka itakuwa sio rahisi kwako kuwa na uhuru wa kifedha.

25.  Kuwa na tumaini la maisha yako. Tumaini jema la maisha lina nafasi kubwa ya kuwezesha ndoto zako, kuonyesha mianya ya fursa zilizopo na kukuwezesha uishi zaidi ya mipaka ya tamaduni za jamii inayokuzunguka. Hii ni kutokana na ukweli kwamba tumaini jema linakupa nafasi ya kupanga yale unayoyataka yatokee katika maisha yako ya baadae huku ukiendelea kutekeleza ndoto za maisha yako.

Haya ndiyo niliyojifunza katika kitabu hiki. Ni matumaini yangu kuwa ukiyafanyia kazi yatabadilisha maisha yako kwa ujumla. Niendelee kukuomba usambaze jumbe hizi kwa kadri uwezavyo ili yale unayojifunza yawafikie wengi na hatimaye tufanikiwe kuibadilisha dunia hii kuwa mahali pazuri pa kuishi. Nakutakia mapambano mema.

Ili kupata makala za namna hii acha taarifa zako kwa kujaza fomu hapo chini.

Karibuni kwenye fikra tajiri ili upate elimu hisiyokuwa na mwisho.

Born to Win~Dream Big

A.M. Bilondwa
0786881155
fikrazatajiri@gmail.com

http://fikrazakitajiri.blogspot.com

Jiunge na Mtandao wa Fikra za Kitajiri

* indicates required

Barua pepe *

Jina la Kwanza *

Jina la Ukoo

Namba ya simu