FIKRA ZA KITAJIRI: Septemba 2019

Archive for Septemba 2019

Mambo Niliyojifunza Kwenye Kitabu cha Automatic Millionaire: A Powerful One-step Plan to Live and Finish Rich (Utajiri wa Moja kwa Moja: Mwongozo wa Kuishi Maisha ya Utajiri).

Fikra za Kitajiri Jumapili, Septemba 29, 2019 Add Comment

Habari ya leo rafiki na msomaji wa mtandao wa Fikra za Kitajiri.

Rafiki naamini kuwa unaendelea kupambana kwa ajili ya kuhakikisha kesho yako inakuwa bora zaidi ya sasa. Ni lazima upambane kwa maana ya kufanya kazi kwa ubunifu na weledi ili kuhakikisha unatimiza ndoto za maisha yako.

Naendelea kutimiza ahadi yangu kwako ya kuhakikisha kila ninapopata muda nakushirikisha kile ninachojifunza kupitia uchambuzi wa vitabu ninavyosoma. Ni mategemeo yangu kuwa Makala hizi za uchambuzi wa vitabu zimekuwa msaada mkubwa kwako katika kubadirisha sekta mbalimbali za maisha yako. Naomba kupata shuhuda sambamba na maoni juu ya makala hizi zilivyogusa maisha yako namna ambavyo kwa pamoja tunaweza kupanua wigo na kufikia wanufaika wengi zaidi.

Kama bado haujajiunga na mtandao huu, BONYEZA HAPA na jaza fomu kisha bofya “jiunge/subscribe” utakuwa umejiunga na mtandao huu. Kwa kujiunga na mtandao huu utapata makala zinazochapishwa humu moja kwa moja kwenye barua pepe.

Kitabu ninachokushirikisha leo hii ni “Automatic Millionaire” kutoka kwa mwandishi maarufu David Bach. Mwandishi anatumia kitabu hiki kutushirikisha namna ambavyo kila mmoja anaweza kutengeneza utajiri katika maisha yake hapa duniani. Mwandishi anatushirikisha kuwa kitabu hiki kinalenga kumsaidia msomaji kutengeneza njia/mpango wa moja kwa moja (Automatic) wa kuwa milionea.

Lengo kubwa ambalo mwandishi anakusudia kupitia kitabu hiki ni kuhakikisha msomaji anapata elimu muhafaka kuhusu “fedha” kwani elimu hii imekosekana kwa watu wengi. Hii ndio sababu asilimia kubwa katika jamii ni masikini kwa kuwa hawana msingi sahihi kuhusu somo la fedha hasa namna ya kuitengeza na namna ya kuitumia kutengeneza fedha zaidi.

Hata hivyo mwandishi anatoa tahadhari kuwa “siri/misingi ya kuwa tajiri ipo wazi kwa kila mmoja” na pengine hata wewe unayesoma makala hii unafahamu misingi hiyo. Pamoja na kwamba siri hizo zipo wazi lakini wengi wameshindwa kufikia utajiri wa ndoto zao kwa vile hawatumii misingi hiyo katika maisha yao ya kila siku. Hivyo, kitabu hiki sio kwa wale wanaotaka utajiri wa haraka haraka kwa maana kulala masikini na kuamka tajiri bali kinalenga kuweka mfumo wa moja kwa moja (automatic) wa kufikia UHURU WA KIFEDHA AU UTAJIRI WA KWELI.

Kwa ufupi, kitabu hiki kimejengwa juu ya falsafa kuwa:-

Kuwa tajiri sio lazima uwe na pesa nyingi;
Sio lazima uwe na nidhamu juu ya fedha zako (najua hii itakuchanganya kama mimi maana tunafahamu kuwa siri mojawapo ya kuwa tajiri ni kuwa na nidhamu ya fedha);
Sio lazima ujiajiri mwenyewe ili kuwa tajiri kwani unaweza kuendelea kuajiriwa na ukawa milionea;
Kwa kutumia kile mwandishi anachokiita “The Latte Factor”, unaweza kutengeneza pesa nyingi kupitia pesa kidogo ulizonazo;
Matajiri wanaendelea kuwa matajiri kwa kuwa wana utaratibu wa kujilipa kwanza;
Wamiliki wa nyumba za biashara wanaendelea kuwa matajiri wakati wapangaji wanaendelea kuwa masikini; na
Zaidi ya yote unahitaji mfumo wa moja kwa moja (automatic system) ili husikwame katika kufikia utajiri wa ndoto zako.

Karibu ushirikiane nami kujifunza machache kati ya mengi ambayo mwandishi anatushirikisha katika kitabu hiki:

1. Njia pekee inayokuhakikishia kufikia utajiri wa ndoto zako ni kuweka mfumo wa moja kwa moja wa mipango yako yote ya kifedha. Mwandishi anatushirikisha kuwa katika maisha kuna majukumu mengi ambayo kila siku mhusika anajishughulisha nayo. Ni kutokana na majukumu hayo watu wengi wanashindwa kufikia mipango waliyojiwekea kwa vile pengine wanasahau au wanashindwa wajigawe vipi. Kumbe, mwandishi anatushirikisha kuwa kupitia mfumo wa moja kwa moja (automatic system) unakuwezesha kupata muda wa kuendelea na majukumu yako bila ya kuwa na wasiwasi juu ya pesa yako. Hivyo, mfumo huu unafaa kwa vile utakufanya husiwe na msongo wa mawazo na hivyo utakuwa na maisha halisi unayotamani kuwa nayo kwa maana ya maisha yenye furaha.

2. Watu wengi wanaigiza maisha ya utajiri wakati maisha waliyonayo ni ya kimasikini. Mwandishi anatushirikisha kuwa katika jamii watu wanaishi maisha ambayo watu wanaowazunguka wanadhania kuwa wana maisha mazuri kumbe ukitembelea akaunti zao hazina kitu na wala hawana kitega uchumi chochote ambacho kina uhakika. Kumbe, kama unahitaji kuwa tajiri wa moja kwa moja unapaswa kuishi maisha yako bila kujali mtazamo wa jamii inayokuzunguka. Fanya kile ambacho kipo kwenye mpango wako wa utajiri bila kujali macho/maneno ya wanaokuzunguka.

3. Kama unahitaji kuwa tajiri hakikisha unajilipa kwanza katika kila shilingi inayoingia mikononi mwako. Somo kubwa hapa ni kwamba ni lazima uweke mfumo wa moja kwa moja ambao utawezesha kila shilingi inayoingia mkononi mwako inawekezwa kwa ajili ya kesho yako. Hivyo, kabla ya kufanya mgawanyo wa kila fedha unayopata kupitia vyanzo mbalimbali ni lazima ujilipe kwanza kwa kutenga asilimia flani ya pato lako kwa ajili ya uwekezaji. Na hapa ndipo mwandishi anatushirikisha kuwa ni vyema ukafungua akaunti maalum ya uwekezaji ili asilimia flani ya pesa unayopata iingie moja kwa moja kwenye akaunti hiyo hata kabla ya kuingia mikononi mwako. Hali hii itakuwezesha kugawanya kiasi cha pesa kinachoingia mikononi mwako bila kugusa kiasi kilichowekezwa kwenye akaunti ya uwekezaji.

Soma: UCHAMBUZI WA KITABU The Rules of Money: How to Make It and How to Hold on to It (Kanuni za Pesa: Jinsi ya Kuzitengeneza na Jinsi ya Kuendelea Kutengeneza Pesa Zaidi)

4. Siri nyingine ya kuwa tajiri nikutofanya manunuzi ya aina yoyote ile kwa mkopo. Katika siri hii una chaguzi mbili ambazo ni kununua kwa pesa taslimu (cash) au kutonunua kabisa. Pamoja na siri ni kuhakikisha unanunua bidhaa iliyotumika lakini ikiwa bado ina ubora badala ya kununua bidhaa mpya – mfano kununua gari kutoka kwa mtu badala ya kwenda kununua “show room”. Pale unaponunua kwa mkopo unajiweka kwenye hatari ya kuingilia matumizi ya pato lako kabla hata halijaingia mkononi mwako. Pia, unaponunua kwa mkopo kuna hatari ya kupandishiwa bei zaidi ya ile ambayo ungelipa kwa fedha taslimu. Aidha, unaponunua bidhaa iliyotumika inakuwezesha kupata punguzo katika bei ikilinganishwa na bei halisi ya bidhaa husika dukani.

5. Kama unahitaji kuwa tajiri ni lazima uipende pesa yako kwa kupunguza matumizi yasiyo ya lazima. Hii ni pamoja na kuhakikisha pesa ambayo ingetumika kwenye matumizi ya ovyo inatumika kufanya mambo ya maana kwa maana yale yanayochangia kukuza utajiri wako. Na ni siri hii mwandishi ndiyo anatushirikisha kuwa unahitaji kutumia “The Latte Factor” kwa maana pesa ambayo ungetumia katika matumizi yasiyo ya lazima; moja kwa moja inatumika kukuza utajiri wako (angalia pointi Na. 8). Kumbe unahitaji kutambua kuwa sio pato lako linalokufanya uwe tajiri bali nini ufanya kutokana na pato lako bila kujali kama una kipato kikubwa au kidogo kiasi gani. Utajiri ni maamuzi ambayo yapo akilini mwako yanasubiria uchukue hatua.

6. Unatahitaji kuwa na mfumo wa moja kwa moja na siyo kuwa na nidhamu ya pesa. Mwandishi anatushirikisha kuwa hakuna kitu kigumu kama kuwa na nidhamu juu ya matumizi ya pesa ambayo ipo mikononi mwako kutokana na vishawishi katika ulimwengu wa sasa. Ili kufanikisha siri hii, mwanishi anatushirikisha kuwa ili uepukane na matumizi ya ovyo ni lazima utengeneze mfumo wa moja kwa moja ambao utakufanya husiwe na pesa mkononi kwa ajili ya matumizi ambayo hayana tija katika kufikia utajiri wa ndoto zako. Kumbe siri zote hizi zinatukumbusha nguvu ya maamuzi na umuhimu wa kuchukua hatua stahiki katika maisha ya kila siku. Hakika hauwezi kufa masikini endapo umezitendea haki siri hizo.

7. Je unahitaji kuwa tajiri? Naamini jibu lako ni ndio kama ndo hivyo basi mwandishi anatushirikisha kuwa ni lazima uhakikishe matumizi yako yanakuwa madogo ikilinganishwa na kipato. Kumbuka kuwa baada ya kutoa asilimia kwa ajili ya uwekezaji (kujilipa) matumizi yako ni lazima yaendane na kiasi kinachobakia. Kama matumizi yanazidi kipato chako hakika utajiri utakuwa ni ndoto kwako. Mwandishi anatushirikisha kuwa kama unahitaji kuwa tajiri unahitaji kutenga angalau asilimia 15 hadi 20 kwa ajili ya kujilipa kwanza kabla ya kuanza kulipa matumizi mengineyo. Watu wengi wanashindwa kuwekeza kwa vile wanapoteza fedha ambayo inaonekana kuwa ni ndogo katika vitu vidogo vidogo ambavyo si vya muhimu katika maisha ya kila siku. Kumbe, unahitaji kutambua kuwa katika safari ya utajiri hakuna pesa ndogo kwani unayoiona kuwa ndogo ikutumiwa vyema thamani yake inaongezeka.

8. Je upo tayari kuwa tajiri? Kama jibu ni ndiyo basi angalia ni matumizi yapi ya fedha ambayo kila siku unafanya lakini si ya lazima au yanaweza kupunguzwa kwa kununua kwa bei pungufu. Baada ya kutambua sehemu ambazo unaweza kuokoa pesa basi hakikisha unajiwekea utaratibu wa kuwekeza hicho kiasi kidogo cha pesa kila siku ya maisha yako bila kuacha kufanya hivyo. Hakika utaona maajabu ndani ya mwaka wa kwanza. Maajabu haya yanatokana na muujiza wenye nguvu unaoitwa ongezeko la riba (interest) kwa kila shilingi inayowekezwa. Mfano, kama umewekeza 1,000/= kila siku kwenye benki ambayo ongezeko la riba ni asilimia 10. Baada ya mwaka mmoja kiwango ulichowekeza kitakuwa ni 1,000X30X12+1,000X0.1X30X12 = 396,000.00. Bila kuongeza uwekezaji wowote hela hii ambayo kitaani inaitwa “buku” iliyowekezwa kwa mwaka mmoja tu katika kipindi cha miaka 10 itakuwa imeongezeka kama ifuatavyo: 396,000.00+396,000.00X0.1X10 = 792,000.00. Fikiria kama umeendelea kuweka buku kila siku ndani ya miaka 10 utakuwa na shilingi ngapi kwani hapo tumepigia hesabu ya buku ile ya mwaka wa kwanza tu ikiwekezwa kwa kipindi cha miaka 10. Naamini mpaka hapo rafiki yangu umeona nguvu ya buku halisi kuliko ile ambayo umekuwa ukiambiwa na muhindi. Unaweza kupunguza matumizi kwenye vocha, soda, sigara, chakula, bia, mishikaki, bodaboda, chips n.k hizo nimekusaidia tu baadhi.

9. Mfumo wa bajeti sio njia sahihi ya kukuwezesha kuwa tajiri. Mwandishi anatushirikisha kuwa ni mara nyingi tumeambiwa kuwa ili uwe tajiri ni lazima uishi kwa kuzingatia bajeti. Ukweli ni kwamba ni vigumu mno kuishi kwa bajeti na nyakati nyingine inaweza kusababisha ugomvi ndani ya familia kwa sababu mmoja anaweza kumdu kuishi kwa bajeti husika wakati mwenza wake hawezi kabisa. Mwandishi anatushirikisha kuwa watu wengi wanashindwa kutumia pesa kulingana na mahitaji ya bajeti yao kwa kuwa mfumo huu wa bajeti unamfanya mhusika kuwa mtumwa na hivyo anakosa uhuru. Kumbuka kuwa tunatafuta utajiri ili kuwa na maisha yenye furaha zaidi ya tuliyonayo sasa na maisha utumwa kamwe hayawezi kuwa na furaha ndani mwake. Kumbe suruhisho la bajeti ni kuhakikisha wewe mwenyewe unaidhibiti pesa yako na sio pesa ikuchanganye kiasi cha kufanya matumizi ambayo hayana uhalisia. Bila kujali pesa ipo mfukoni au benki haupaswi kuitumia kwenye vitu ambavyo havina tija na badala yake fanya manunuzi pale ambapo umekusudia kufanya hivyo.

10. Unaweza kupata utajiri kwa njia sita tofauti ambazo ni: (a) unaweza kushinda kupitia mchezo wa bahati na sibu; (b) unaweza kuoa au kuolewa na tajiri; (c) unaweza kushinda kesi ambayo itakufanya uwe tajiri – kama ipo; (d) unaweza ukarithi utajiri wa ndugu zako; (e) unaweza kuishi kwa bajeti – japo tumeona ni kazi ngumu; na (f) unaweza kupata utajiri kwa kujilipa kwanza. Kati ya njia zote hizo mwandishi anatushirikisha kuwa utajiri wa kweli ambao unatangenezwa na mhusika, njia ya kujilipa kwanza ndio njia sahihi ambayo itakufikisha sehemu unayotaka kufika. Hata hivyo, njia hii sio njia mpya kwani kama ni msomaji wa vitabu au mhudhuriaji wa semina utakuwa umeisikia mara kwa mara. Sasa jiulize maswali haya: a) Je unajua kiasi gani unatakiwa kujilipa kwanza? b) Je unatambua ni sehemu ipi sahihi ya kuwekeza pesa hiyo unayojilipa? c) Je ni kweli kwa sasa unajilipa kwanza? na d) Je una mfumo wa moja kwa moja wa kujilipa kwanza?

11. Mwandishi anatushirikisha kuwa kama majibu ya maswali yote hapo juu ni NDIYO basi unastahili hongera kwa kuwa tayari upo kwenye safari ya kuwa tajiri. Kama majibu yako baadhi au yote ni HAPANA basi na wewe husikate tamaa kwa kuwa ndio maana unasoma makala kama hii kwa ajili ya kubadirisha mfumo wa maisha yako. Ukweli ni kwamba watu wengi hawajilipi kwanza japo wanahitaji kuwa matajiri jambo ambalo ni gumu mno labda kama utajiri huo waupate kwa zari tu. Maana halisi ya kujilipa kwanza ni kuhakikisha kila shilingi inayoingia mkononi mwako unatenga asilimia yake kulingana na mpango wako wa kufikia utajiri na pesa hiyo unaiwekeza kwenye akaunti maalumu ya uwekezaji. Mwandishi anatushirikisha kuwa kama unahitaji kuwa tajiri hakikisha unajilipa asilimia 15 hadi 20 ya pato lako. Kama kiasi hicho ni kikubwa kwa kuanzia unaweza kuanza na asilimili 5 kwa ajili ya kujijengea nidhamu ya kujilipa kwanza.

12. Tunapima masaa halisi unayofanyia kazi kwa ajili yako na wategemezi wako kwa kuangalia kiasi unachowekeza kwa kujilipa kwanza. Mwandishi anatushirikisha kuwa kila tunachofanya iwe kazini au kwenye biashara ni kwa faida ya mhusika mwenyewe na wategemezi wake. Je ni kwa kiasi gani unatumia muda mwingi kufanya kazi kwa ajili yako na wategemezi wako? Majibu ya swali hili yanapatikana kwa kugawanya kiwango ulichojilipa kwanza dhidi ya masaa uliyofanya kazi. Mfano, chukulia ndani ya mwezi mmoja una masaa 240 ya kazi na umejilipa 50,000. Hivyo, masaa ambayo umefanya kazi kwa faida yako na wategemezi ni sawa na 50,000/240 ambayo kwa kukadiria ni masaa 208 ndani ya mwezi mmoja. Kumbuka kama haukutenga chochote ni sawa na kwamba mwezi mzima umeupoteza bila kujilipa wewe na wategemezi wako.

13. Fikiria kati ya makundi haya na chagua moja ambalo linakufaa: (a) husijilipe kwanza, tumia zaidi ya pato lako, kopa hela kwa ajili ya matumizi na endelea kuishi kwa mshahara husiyounga mwezi hadi mwezi. Kwa dalili hizo wewe ni mtu ambaye kila siku utakuwa umepinda kiuchumi na msongo wa mawazo juu; (b) njia ya umasikini – endelea kusoma kuhusu kujilipa kwanza bila kuchukua hatua, endelea kutumia kila kinachoingia mikononi mwako bila kuwekeza chochote huku ukiendelea kujisemea ipo siku ntakuwa tajiri bila kuweka mpango wowote; (c) njia ya kuwa mtu wa pato la kawaida – jilipe kwanza kati ya asilimia 5 hadi 10 ya pato lako; (d) Njia ya kuwa mtu mwenye kipato cha juu – jilipe kwanza kati ya asilimia 10 hadi 15; (e) njia ya utajiri – jilipe kwanza kati ya asilimia 15 hadi 20; na (f) njia ya utajiri kiasi kwamba unaweza kustaafu umri wako ukiwa mdogo – jilipe kwanza angalau asilimia 20 na kuendelea. Njia zote zipo kwa ajili yako na hivyo kuwa masikini wa kupindukia au tajiri/milionea ni maamuzi yaliyopo mkononi mwako.

14. Weka mfumo wa moja kwa moja wa kujilipa kwanza. Mwandishi anatushirikisha kuwa baada ya kuamua kujilipa kwanza kwenye kila shilingi inayoingia mkononi mwako sasa unahitaji kutengeneza mfumo wa moja kwa moja wa kujilipa ili pesa hiyo husishawishike kuipangia matumizi pale inapoingia mikononi mwako. Mwandishi ametushirikisha mbinu mbalimbali ambazo tunaweza kuzitumia kwa ajili ya kuwa na mfumo wa makato wa moja kwa moja kwa kiasi ambacho tumeamua kujilipa kwanza. Hata hivyo, njia hizo nimeona kuwa katika mazingira ya nchi yetu yawezekana hazipo hasa kwa wale ambao wamejiajiri. Somo, kubwa ni kwamba iwe umeajiriwa au umejiajiri utaratibu wa kujilipa kwanza unawezekana kabisa katika mazingira yetu. Kubwa ni kuwa na nidhamu ya kutekeleza kile ambacho umekusudia kujilipa katika pato lako. Kwa yule ambae yupo tayari kufanya hivyo nitafungua group la WhatsApp la “JILIPE KWANZA”. Tuma ujumbe kwenye namba +255 786 881 155 ukiomba kuunganishwa kwenye kundi hilo na nitakupa masharti ya kundi.

15. Kumbuka hakuna kesho, mwaka kesho au nyakati zilizo bora zaidi ya sasa. Mwandishi anatushirikisha kuwa watu wengi wanafanya makosa kwa kujisemea kuwa kwa sasa mambo yangu hayajakaa sawa hivyo ngoja kwanza yakikaa sawa ndo nitaanza kutenga asilimia ya kujilipa kwanza. Ukweli ni kwamba kama unahitaji kuwa tajiri ni lazima ufanye maamuzi magumu na wakati sahihi wa kufanya maamuzi hayo ni sasa. Anza sasa na hakikisha kila mwezi unatenga asilimia uliyojipangia kwa ajili ya kujilipa kwanza. Pia, hakikisha kila shilingi inayoingia mkononi mwako unajilipa kwanza bila kujali ni nyingi au kidogo. Hakika kwa kufanya maamuzi hayo hautojutia hata siku moja.

16. Wekeza pesa unayojilipa kwenye akaunti au ambayo ina ongezeko la riba. Mwandishi anatushirikisha kuwa sifa kubwa ambayo matajiri wanayo ni kuifanya pesa iwafanyie kazi badala ya wao kuifanyia kazi. Hata nyakati ambazo wanakuwa wamelala pesa yao inakuwa inawafanyia kazi – huo ndio utajiri wa kweli. Njia mojawapo wa kufanikisha hilo ni kuwekeza pesa sehemu ambayo ina ongezeko la riba au thamani. Mfano, unaweza kuwekeza kwenye dhamana za serikali (Government bond), Mifuko ya Uwekezaji wa Pamoja (UTT), fixed account au kununua hisa. Lengo la kuwekeza katika sehemu hizo ni kwa ajili ya kupata muujiza wa uwekezaji unaotokana na “Ongezeko la Riba”. Kumbuka kuwa njia ya utajiri inayotafutwa hapa sio ya kulala masikini na kuamka tajiri bali ni njia ya kutafuta utajiri kwa mpango maalum ambao ni wa muda mrefu. Ni kutokana na muda huo ndipo utashangaa maajabu ya “ongezeko la riba” (angalia Na. 8).

17. Unaweza kuwekeza pesa unayojilipa kwenye mchanganyiko wa makundi haya ya uwekezaji: (a) fedha taslimu (cash); (b) dhamana za serikali; (c) hisa za makampuni (stocks); (d) uwekezaji wa mapato (miradi mbalimbali); na (e) ukuaji wa uwekezaji (kujikta kwenye uwekezaji mkubwa zaidi). Hata hivyo, mchanganyiko huo wa uwekezaji utategemea nyakati mbalimbali ambazo unapitia kama vile: (i) kipindi cha maandalizi (kukusanya mtaji); (ii) kipindi cha kutengeneza pesa; (iii) kipindi cha maandalizi ya kustaafu; na (iv) kipindi cha kustaafu. Katika kila kipindi mahitaji yako na malengo ni tofauti hivyo unahitaji mchanyiko mzuri wa makundi tofauti ya uwekezaji. Pia, mchanganyiko huo wa makundi ya uwekezaji (fedha taslimu, dhamana za serikali na hisa) utategemea na umri wako kwa wakati huo.

18. Mchanganyiko wa uwekezaji unaouchagua (angalia Na. 17) unatakiwa kuzingatia hatari za uwekezaji. Hivyo, uwekezaji wako unapaswa kuwa katika muundo wa umbo la piramidi (pembe tatu iliyogeukia juu). Kwa maana kuanzia chini ya piramidi kwenda juu yake hatari za uwekezaji zinaongezeka zaidi. Hii inamaanisha kuwa katika kipindi cha maandalizi (kukusanya mtaji) unahitaji kuwekeza pesa unayojilipa kwenye sehemu yenye usalama zaidi ambayo katika umbo la piramidi inakuwa ni kama msingi wa umbo. Mfano, kwa hapa kwetu unaweza kuwekeza kwenye Mifuko ya Uwekezaji wa Pamoja au kwenye Akaunti Maalum ya Uwekezaji – saving account). Kadri mtaji unavyoongezeka ndivyo unahitaji kuchukua hatari zaidi kiuwekezaji kwa kupanda ya piramidi. Lengo la kuwa na mchanganyiko wa uwekezaji ni kuepuka kuweka mayai yote katika kapu moja.

Soma:Mambo Niliyojifunza Kwenye Kitabu cha The Warren Buffet Way (Njia za Warren Buffet: Mwenkezaji na Bilionea wa Siku Nyingi)

19. Baada ya kujilipa kwanza sasa unatakiwa kutenga hela kwa ajili ya dharura. Mwandishi anatushirikisha kuwa hakuna mwenye uhakika na matukio ya baadae katika maisha yake. Ni kutokana na ukweli huo kama “Automatic Millionaire” unatakiwa utenge fedha kwa ajili ya dharura. Lengo la kufanya hivyo ni kulinda fedha unazojilipa zisijekutumika kwa ajili ya dharura katika maisha yako ya baadae. Mwandhishi anashauri kuwa kiasi unachotenga kinatakiwa angalau kiwezeshe kukidhi mahitaji yako yote katika kipindi cha kuanzia miezi mitatu na kuendelea. Fedha hizi ni kwa ajili ya dharura kama vile kufukuzwa kazi, umepata uremavu, magonjwa au kuunguliwa na nyumba. Baada ya kuchagua kiasi unachotakiwa kutenga kwa ajili ya dharura sasa unatakiwa kukiwekeza kwenye akaunti maalum ambayo pia ina ongezeko la riba na kama unaweza hakikisha kinaingizwa kwenye mfumo wa makato ya moja kwa moja.

20. Miliki nyumba na hakikisha haidaiwi kodi kwa maana kodi ya Serikali. Mwandishi anatushirikisha kuwa hatua kubwa katika safari ya kuelekea kwenye utajiri ni kuhakikisha unamiliki nyumba unayoishi. Hii ni kutokana na ukweli kwamba pesa unayotoa kwa ajili ya kulipia kodi hakuna siku hata moja ambayo itakuwezesha umiliki nyumba yako. Hii ni pesa ambayo ni lazima kila mwisho wa mwaka au mwezi uitoe kwa mwenye nyumba na mwisho wa pango haumiliki chochote. Mfano, kama unakaa kwenye nyumba ambayo kodi ni Tshs. 200,000.00 kwa mwezi. Kwa mwaka ni Tshs. 2,400,000.00 ambayo katika kipindi cha miaka kumi ni Tshs. 24M. Pesa hii ni nyingi kiasi kwamba ingekuwezesha kumiliki nyumba yako bila kujali ukubwa wake.

21. Wekeza kwenye nyumba za biashara kama njia ya kutengeneza utajiri zaidi. Mwandishi anatushirikisha kuwa baada ya kumiliki nyumba unayoishi sasa unatakiwa kumiliki nyumba za biashara ili pesa yako ianze kukufanyia kazi. Kubwa ni kwamba nyumba ya biashara ni: (a) uwekezaji ambao mtaji wake uonaongezeka thamani kila kukicha; (b) unapata faida kutokana na uwepo wa wapangaji – malipo ya kodi; na (c) unaweza kuitumia kama dhamana kwa ajili ya kupata fedha za wengine zikufanyie kazi. Faida hii ya tatu inahusiana na kukopa benki ambapo unapewa fedha za wateja wengine ili uzitumie kwa ajili ya kuwekeza zaidi.

22. Hakikisha unamaliza madeni yasiyo na faida kama tayari unayo. Hii ni sambamba na kuhakikisha unakimbia mikopo yote ya hasara ambayo umekuwa ukifanya bila kutambua athari ya mikopo hiyo kwenye safari yako ya utajiri. Unahitaji kubadirisha tabia ya kununua kwa mkopo bila kujali ukubwa wa mkopo husika. Mwandishi anatushirikisha kuwa mikopo mingi huwa inasababishwa na wahusika kuishi maisha ya kuigiza kwa kutaka waonekane wapo vizuri kuliko uhalisia wa kipato chao. Kumbe, baada ya kufahamu kuhusu siri hii unachotakiwa kufanya ni kuishi kulingana na uwezo wa pato lako. Matajiri huwa hawaishi maisha ambayo hayapo kwenye akaunti zao. Katika jamii wengi ambao unadhania kuwa ni matajiri ukiuliza wanamiliki nini kwenye akaunti utagundua kuwa hawana chochote zaidi ya nguo, viatu au gari la kifahari wanalotembelea.

23. Kumbuka kurudisha kwa jamii. Mwandishi anatushirikisha kuwa mbinu zote zilizoshirikishwa hapa zinalenga kukusanya utajiri ambao kila mmoja anatamani kuwa nao. Hata hivyo, maisha mengine ni lazima yaendelee kwa maana haupaswi kuwa mchoyo kwenye jamii inayokuzunguka. Kumbuka unabarikiwa zaidi kadri unavyotoa kwa wale wenye uhitaji. Tunahitaji kutambua kuwa tunatafuta utajiri si tu kwa ajili ya kuwa na uhuru wa kifedha bali kwa ajili ya kuendelea kuishi maisha yenye furaha ambayo yanaguswa na maisha ya jamii inayotuzunguka. Kumbe, kuwa tajiri kisiwe kigezo cha kutokuwa na hisia dhidi ya maisha ya wale ambao hawajabahatika kuwa matajiri badala yake tumia utajiri wako kuifikia jamii zaidi kwa kadri uwezavyo. Utajiri wako uwe nyenzo ya kubadirisha dunia hii kuwa mahala pazuri pa kuishi kwa viumbe vyote.

Soma: UCHAMBUZI WA KITABU I Can, I Must, I Will: The Spirit of Success (Naweza, Nalazimika, Nitafanya: Msukumo/shauku ya mafanikio)

Haya ni machache ambayo nimebahatika kukushirikisha kati ya mengi yaliyo kwenye kitabu hiki. Kupata nakala ya kitabu hiki BONYEZA HAPA na ujiunge na mtandao wa fikra za kitajiri kisha nitumie ujumbe wa kuomba kitabu hiki kupitia barua pepe fikrazakitajiri@gmail.com.

Kwa ambao wamehamasika ushauri wangu ni kwamba husiishie kuhamasika bila kuchukua hatua. Hakikisha unachukua hatua ya kwanza kwa kuanzisha mpango wa kujilipa kwanza. KARIBU KWENYE KUNDI LA “JILIPE KWANZA” ambapo kwa pamoja tutaianza safari ya kuwa MILIONEA.

Karibuni kwenye fikra za kitajiri ili upate elimu isiyokuwa na mwisho.

Born to Win ~ Dream Big

Augustine Mathias Bilondwa
Namba ya Simu: +255 786 881 155
Mwanzilishi wa Mtandao wa fikrazakitajiri.blogspot.com

Barua pepe: fikrazatajiri@gmail.com

PATA UCHAMBUZI WA KITABU CHA THE RULES OF MONEY ( KANUNI ZA PESA)

Mwandishi Richard Templar katika kitabu hiki ametushirikisha kanuni 107 ambazo kila mtu anaweza kuzitumia kutengeneza pesa na hatimaye kuwa tajiri. Uchambuzi wa kina wa kanuni zote (107) umeandaliwa kwa mfumo wa pdf na unapatikana kwa gharama ya Tshs. elfu tano tu (5,000/=). Kanuni zote zimechambuliwa na kuandaliwa kijitabu kidogo chenye kurasa 39 ambazo unaweza kusoma kwenye simu ya mkononi (smart phone) au kwenye kompyuta (pc).

Kupata uchambuzi wa kanuni zote tuma pesa yako kwa njia ya M-pesa au Airtel Money kupitia namba zifuatazo:-

M – Pesa tumia namba: 0763 745 451 (Majina ni Augustine Mathias)
Airtel Money tumia namba: 0786 881 155 (Majina ni Augustine Mathias)

Baada kutuma pesa hiyo nitumie ujumbe kwenye namba ya airtel (0786 881 151 451) ukiwa na barua pepe yako ili nikutumie uchambuzi wa kanuni hizi moja kwa moja kwenye mtandao wako.

UTAJIRI NI HAKI YAKO YA KUZALIWA "BEING RICH IS YOUR BIRTH RIGHT"

Mambo Niliyojifunza Kwenye Kitabu cha A Note From a Friend: Dondoo Muhimu kutoka kwa rafiki. Mwongozo wa Kuishi Maisha ya Ndoto Yako.

Fikra za Kitajiri Jumapili, Septemba 08, 2019 Add Comment

Habari ya leo rafiki na msomaji wa mtandao wa fikra za kitajiri.

Ni matumaini yangu kuwa unaendelea kupambana kwa ajili ya kufikia ndoto za maisha yako. Rafiki siku kadhaa zimepita bila kukushirikisha maarifa ninayojifunza kwenye vitabu mbalimbali hali ambayo imetokana na mwitikio mdogo wa usomaji wa makala ninazowashirikisha kupitia barua pepe kwa wale ambao wamejiunga na mtandao huu. Ninakusudia kufanya mabadiliko ambayo yatafanikisha kuendelea na watu wachache ambao ni wasomaji wazuri wa makala ninazowashirikisha kupitia mfumo wa barua pepe.

Hata hivyo, kila ninapofungua mfumo wa barua pepe pamoja na orodha ya wasomaji wa mtandao wa Fikra za Kitajiri najikuta kwenye hali ya kuona kuwa nina deni la kuhakikisha nafanya jambo litakalopelekea makala za uchambuzi wa vitabu zinakuwa endelevu kwa faida ya wale wanaojifunza kutokana na makala hizo. Kwa ajili ya maboresho zaidi, naomba kupata maoni/ushauri au shuhuda kwa namna ambavyo makala hizi zimekuwa msaada kwako (tuma maoni/ushauri/ushuhuda kupitia barua pepe fikrazakitajiri@gmail.com).

Kijitabu cha leo ni “A Note From A Friend” kutoka kwa mwandishi Anthony Robins. Anthony Robins ni mwandishi, mshauri na mhamasishaji mahili katika kusaidia makundi mbalimbali kwenye jamii kufikia ndoto za maisha yao. Kupitia kitabu hiki Robins anatushirikisha dondoo muhimu ambazo kila mtu angependa kuzipata kutoka kwa rafiki yake wa karibu. Dondoo hizi zinatoa faraja kwa wale ambao wanahitaji ukumbusho kuhusu misingi mikuu ya ukweli wa maisha na namna ya kukabiliana na changamoto za kila siku katika kufikia maisha ambayo mhusika anahitaji.

Karibu tujifunze machache kati ya mengi ambayo Robins anatushirikisha katika kitabu hiki:

1. Njia rahisi ya kufikia furaha ya maisha yako ni kuwasaidia wanaokuzunguka kufikia furaha ya kweli ya maisha yao. Mwandishi anatushirikisha kuwa mara nyingi tunaishi maisha ya kichoyo ambayo yanajikita kwenye hitaji la nafsi zetu na kusahau kuwa nafsi zetu zipo kwa ajili ya ukamilisho wa maisha ya jamii inayotuzunguka. Kumbe ili kuwa na furaha ya kweli katika maisha ya kila siku mwandishi anatushirikisha kuwa ni lazima tuyatoe maisha yetu kwa ajili ya wengine. Kadri unavyojitoa kwa ajili ya watu wenye uhitaji mkubwa ndivyo wanafarijika zaidi na kutambua kuwa wanapendwa na jamii inayowazunguka.

2. Geuza changamoto zinazokukabili kuwa fundisho na zawadi ya maisha kwa wengine sambamba na kupata furaha ya kweli. Mwandishi anatushirikisha kuwa katika maisha ni kawaida kupitia katika nyakati za changamoto. Changamoto hizi zinapelekea mhusika kuwa kwenye mawimbi ya kimaisha kwa maana ya kupanda na kushuka katika kila sekta ya maisha yake. Hata hivyo, changamoto hizo pale zinapochukuliwa kama mlango wa somo la maisha zinageuzwa kuwa fundisho kwa mhusika ikiwa ni pamoja na kuwa zawadi kwa jamii inayomzunguka kupitia shuhuda mbalimbali na hivyo kuwa sehemu ya ukamilifu wa furaha ya kweli katika maisha.

3. Kila mwanadamu ana nguvu kubwa ndani yake na nguvu hiyo inao uwezo wa kubadilisha kila sekta ya maisha ya mwanadamu pale tu inapotumiwa ipasavyo. Mwandhishi anatushirikisha kuwa ni nguvu hii ambayo inaweza kumzawadia kila mmoja miujiza ya kila aina katika maisha. Nguvu hii inapotumiwa ipasavyo itampa mhusika kila aina ya mafanikio kuanzia mafanikio ya kiafya, kiuchumi, kimahusiano na hata kiroho. Hata hivyo, ni wachache sana ambao wameweza kuitumia nguvu hii na hao ndio ambao wamefanikiwa kimaisha. Mwandishi anatushirikisha kuwa hatua ya kwanza ya kuitumia nguvu iliyopo ndani mwako ni kubadirisha fikra na mtazamo wako na hatimaye kujiamini kuwa unao uwezo wa kutimiza kila ndoto uliyonayo katika maisha.

4. Siri kubwa ya mafanikio ni kufanya kazi kwa ajili ya kuwasaidia watu wanaokuzunguka. Ni lazima uwe tayari kuongeza thamani vitu au hali inayokuzunguka kwa faida ya jamii. Ni lazima uwe tayari kuwasaidia watu waishi ndoto za maisha yao kwa maana ya kuwabadilisha kutoka kwenye maisha waliyozoea kuelekea kwenye maisha ya kweli/ukamilisho kwani kila mwanadamu ameumbwa kwa ajili ya kutimiza/kufanikisha kitu katika uhai wake. Hata hivyo, mwandishi anatushirikisha kuwa hauwezi kusaidia wengine kubadilika kama wewe haupo tayari kubadilika. Kumbe, ni lazima uishi ndoto za maisha yako na ndipo ujitoe zawadi kwa ajili ya wengine.

Soma: Mambo Niliyojifunza Kwenye Kitabu cha Power of Motivation: (Nguvu ya Hamasa/Msukumo)

5. Kuwa na fikra chanya bila kuchukua hatua hakutoshi kukufikisha kwenye ndoto za maisha yako. Mwandishi anatushirikisha kuwa kila mmoja ana ndoto za kuwa na maisha bora yenye familia ya upendo, mafanikio kiuchumi, kiroho na hata kugusa maisha ya wengine katika hali chanya. Hata hivyo, ni wachache wanaofanikisha ndoto za matamanio yao kwa kuwa wengi wanaishia hatua ya kuwa na fikra pasipo kuchukua hatua za makusudi zinazolenga kufanikisha ndoto hizo. Kumbe, ili ufanikishe fikra zako ni lazima uwe na mkakati wa muda mrefu ambao ndani yake kuna shughuli zinazonapaswa kutekelezwa hatua kwa hatua kila siku ya maisha yako. Mkakati huu ni lazima ulenge kukubadirisha kifikra, mtazamo, mazoea pamoja na matendo ambayo yamekuwa yakikuzuia katika kila sekta ya maisha yako. Kumbuka, katika kila hali unapaswa kufikiria zaidi namna ya kutatua kila changamoto kuliko kufikiria kukwamishwa na changamoto hizo.

6. Historia haina nafasi katika mafanikio yako. Mwandishi anatushirikisha kuwa watu wengi wanashindwa kuchukua hatua kwa vile walijaribu wakashindwa katika kipindi cha nyuma. Hivyo, wengi wanaishia kusema SIWEZI. Kauli hii ni moja kati ya kauli kandamizi ambazo zimedumaza maisha ya maelfu ya watu katika jamii nyingi. Kumbe, katika kila hali unahitaji kutambua kuwa historia haina uhusiano na maisha yako ya sasa au ya baadae endapo upo tayari kuchukua hatua stahiki za kukabiliana na vikwazo au tabia kandamizi ambazo zimeyafanya maisha yako yawe jinsi yalivyo kwa sasa. Mwandishi anatushirikisha kuwa katika mabadiliko yoyote ya kimaisha ni lazima uanze na kujiuliza ni yapi unaweza kufanya kwa wakati huo kwa ajili ya kufanikiwa na sio kuangalia matukio yaliyopita.

Soma: Mambo Niliyojifunza Kwenye Kitabu cha Healing Your Family History: (Uponyaji wa Tabia Ambazo Umerithi Kutoka kwa Watangulizi Wako)

7. Kiwango cha uvumilivu ndio kinatofautisha kati ya waliofanikiwa na waliokata tamaa. Mwandishi anatushirikisha kuwa watu wengi wanakuwa wepesi wa kukata tamaa kwa vile wanaishia kujaribu njia moja au zaidi na pale njia hizo zisipofanikiwa wanaamua kuacha kabisa na kujisemea kuwa hawana bahati. Kumbe, ili ufanikiwe kimaisha unahitaji kwanza kutambua ni nini unataka katika maisha yako na kuhakikisha kila siku unachukua hatua madhubuti kwa nguvu zako zote pasipo kukata tamaa hata kama matokeo yanakuwa hayaridhishi. Kumbuka, kila hatua unayochukua inakupa uzoefu zaidi na uzoefu huo ndio silaha inayo kutofautisha na wale wanaokata tamaa. Ni kutokana na uzoefu huo kila mara unaboresha kile unachofanya kwa kuzingatia makosa au changamoto zinakuwa sehemu ya kujifunza katika njia ya mafanikio. Husikubali kupoteza dira kwa vile jamii inayokuzunguka haikubaliani na wazo lako kwani ni wewe pekee ambae unatambua maono na lengo kubwa unalohitaji kufanikisha kupitia wazo hilo.

8. Uoga wa kushindwa au kupoteza ni kikwazo kikubwa cha kufikia ndoto au malengo ya maisha yako. Ukweli ni kwamba katika maisha ya kila siku tunakatishwa tamaa na watu wanaotuzunguka kwani mara nyingi tunaambiwa kauli kama vile: haiwezekani, sio rahisi kufanikisha hilo, huwezi kupata faida, utafilisika, utaibiwa na kauli nyingine kama hizo. Kumbe, silaha kuu ambayo unahitaji kuwa nayo ni kuamini kuwa hata kama kwa sasa hali inaonekana haiwezekani – wewe una nguvu ya kipekee na upo tayari kuhakikisha unabadirisha kisichowezekana kuwa kinachowezekana. Kwa nguvu hiyo na ujasili wa aina hiyo ni lazima ufike unakotaka kufika kwani upo tayari kuchukua hatua bila kuogopa changamoto.

9. Uwezo wa kufanya maamuzi sahihi na kwa muda muhafaka ndio kipimo cha mafanikio. Mwandishi anatushirikisha kuwa nguvu ya maamuzi ndio injini ya mabadiliko. Ni kutokana na ukweli huu, katika maisha tunatakiwa kutambua kuwa hatuwezi kubadirisha au kuzuia matukio yasiyo rafiki kwa maisha yetu ya kila siku. Hata hivyo, tuna uwezo wa kudhibiti fikra, imani, hisia na vitendo vyetu kuhusiana na matukio hayo. Kila sekunde ya maisha yetu tunajikuta kwenye mtihani wa kufanya chaguo sahihi au kuchukua vitendo sahihi kati ya mbadala iliyopo. Kumbe, kila mmoja na ana nguvu ya kufanya maamuzi na maamuzi anayofanya katika kila tukio ndio yanaamua mafanikio au kutofanikiwa katika maisha. mapya.

10. Upo jinsi ulivyo kutokana na maamuzi uliyochagua kutumia muda mwingi katika kufikiria, kuhisi, kujishughulisha, kula/kunywa, kuamini au kujifunza katika maisha yako ya kila siku. Kumbe, tunahitaji kujifunza kuwa mafanikio tunayohitaji tunayaandaa au kuyaharibu wenyewe kutokana na maamuzi tunayofanya katika kila sekunde ya maisha yetu. Kama tunahitaji kubadilika ni lazima kwanza tujifanyie tathimini inayolenga kutambua vikwazo vinavyotuzuia na hatimaye kuanza kuchukua hatua mpya zinazolenga kutuondoa kwenye tabia za zamani na kuingia kwenye mabadiliko. Na hapa ndipo tunakiwa kufanya maamuzi ya dhati ambayo yatafanikisha mabadiliko ya moja kwa moja. Ni lazima kutambua ni sadaka ipi tupo tayari kutoa kupitia muda, mapenzi, nguvu, rasilimali na hata kazi zetu kwa ajili ya kuhakikisha tunaingia kwenye ulimwengu mpya wa mafanikio bila kukata tamaa au kufikiria kurudi nyuma.

11. Maamuzi maamuzi maamuzi – maamuzi sahihi. Mwandishi anatushirikisha kuwa njia pekee ya kubadilisha maisha yako ni kufanya maamuzi sahihi na maamuzi hayo ndio yatakufanya uonekane una bahati sana baada ya kufanikiwa. Hapa mwandishi anatushirikisha kuwa maamuzi sahihi ni yale ambayo yatakulazimisha kuachana na mbadala zote na kubakiwa na njia ambayo umejiridhisha kuwa itakufikisha kwenye mafanikio ya kweli. Na hakikisha kila siku fikra zako zinajikita kwenye maamuzi uliyofanya. Ili kufikia kilele cha mafanikio unayohitaji mwandishi anatushirikisha kuwa ni lazima:-

Utambue au kuchagua ni nini hasa unahitaji kufanikisha;
Uchukue hatua stahiki kwa muda muhafaka;
Fanya tathimini ya mara kwa mara ili kutambua kama hatua unazochukua zinafanya kazi au hazitekelezeki kwa ajili kufanikisha lengo kuu;
Endelea kufanya maboresho ya hatua unazochukua;
Kuwa mvumilivu bila kukata tamaa wala kuyumbishwa mpaka pale utakapofanikiwa.

12. Kuna nguvu kubwa inayodhibiti au kuamua nguvu ya maamuzi yako nayo si nyingine bali ni IMANI. Ukweli ni kwamba imani yako ndio inaamua: ni yapi unaweza kufanikisha na yapi hauwezi kufanikisha; yapi unaweza kufanya na yapi hauwezi kufanya; yapi utatazama na yapi hayataonekana machoni pako; hisia zipi zikutawale na zipi uachane nazo; sehemu zipi uwekeze na sehemu zipi husiwekeze na mengine mengi. Unapojenga imani kwenye tukio au hali yoyote ile moja kwa moja unafanya ubongo wako ufungue au kufunga milango kuhusiana na tukio au hali husika. Kumbe, imani ulizonazo kukuhusu wewe mwenyewe na yale unayoweza kufanikisha ndicho kipimo cha mafanikio unaweza kufikia katika maisha. Muhimu ni kuhakikisha unabadilisha imani ulizonazo ili ziendene na ndoto za maisha yako.

13. Je IMANI ni nini hasa katika maisha yetu ya kila siku? Mwandishi anatushirikisha kuwa imani ni kuwa na UHAKIKA juu ya hali au tukio linalosadikika. Unapokuwa na uhakika juu ya hali au tukio unakuwa umefungua mlango wa kubadilisha hali/tukio kutoka kwenye hali ya kusadikika hadi kwenye hali ya uhalisia. Kwa maana nyingine imani inawezesha kuumbika kwa vitu ambavyo awali havikuwepo kwenye maisha yako. Kumbe tunapokosa UHAKIKA wa matukio au mafanikio ndani mwetu moja kwa moja tunajiondoa kwenye ushindani kupitia imani tulizonazo. Athari ya kutokuwa na uhakika ndani mwetu ni kushindwa kutumia nguvu kubwa iliyopo ndani mwetu ambayo ina uwezo wa kutenda miujiza ya kila aina katika maisha yetu.

14. Msingi wa imani ni wazo kwa maana imani zinajengwa na mawazo. Kwa maana hiyo ili tuwe na uhakika wa matukio au hali tunazotarajia katika maisha yetu ni lazima tuanze na tathimini ya mfumo wa mawazo yetu. Ni kutokana na ukweli huu sisi zao la yale tunayowaza muda mwingi kwani mawazo hayo ndiyo yanajenga imani tulizonazo na hatimaye imani hizo ndizo zinatupa uhakika wa yale tunayoweza kufanikisha katika maisha. Kumbe, kama tunahitaji kubadilisha imani tulizonazo ni lazima kwanza tubadilishe mfumo wa mawazo ambao pia ni lazima uende sambamba na kubadilisha matendo au uzoefu ambao umepelekea tuwe na mawazo ya aina hiyo.

15. Watu wengi wanahitaji mabadiliko lakini wanaofanikiwa kubadilika ni wachache. Mwandishi anatushirikisha kuwa njia rahisi ya kufanikiwa kubadilika kiujumla ni kunabadilisha fikra zako ikiwa ni pamoja kuhakikisha fikra zako zinatawaliwa na mambo ambayo ni muhimu katika kufikia mabadiliko unayohitaji. Mwandishi anatushirikisha kuwa unaweza kuwa na hisia za uzuni kwa kumbuka/kufikiria tukio ambalo lilikuhuzunisha siku za nyuma. Vivyo hivyo, unaweza kuwa na furaha kwa kufikiria au kuwaza tukio ambalo lilikufurahisha. Ndivyo, ilivyo hata kwenye mabadiliko ya kweli, kwa maana kama unahitaji kubadilisha maisha yako ni lazima ujikite kwenye mawazo na fikra ambazo zitapelekea kufanikisha mabadiliko unayohitaji katika maisha. Ni kutokana na ukweli huu, unatakiwa kuhakikisha unajikita kwenye yale yaliyopo ndani ya uwezo wako wa kufanya/kudhibiti na kuachana na yaliyo nje ya uwezo wako.

16. Njia nzuri ya kuendelea kwenye fikra muhimu kwa ajili ya mafanikio unayohitaji ni kujenga utaratibu wa kujiuliza maswali kila mara. Maswali sahihi yana majibu sahihi juu ya kile tunachohitaji kukamilisha katika maisha yetu. Je maswali sahihi ni yapi? Mwandishi anatushirikisha kuwa maswali sahihi ni yale ambayo hayana malalamiko na badala yake yanajikita kwenye kutafuta majibu juu ya changamoto zinazotukabili. Hata maandiko yanasema “Omba na mtapewa” – hivyo maswali ni mojawapo ya njia inayosaidia kufikia kwenye matumizi ya kweli ya ile nguvu iliyopo ndani mwetu. Hii ni kutokana na ukweli kwamba kila unapojiuliza maswali sahihi unapata majibu ambayo yanakupa mtazamo mpya kuhusiana na tatizo lililopo mbele yako. Unahitaji kuwa na muda wa kijiuliza maswali pale unapoianza siku asubuhi mara baada ya kuamka na usiku kabla ya kulala.

17. Hisia zina nafasi kubwa juu ya mwonekano wa kila mmoja wetu – mfano, kama unatawaliwa na hisia za huzuni mara nyingi utaonekana kuwa mtu wa huzuni machoni pa jamii inayokuzunguka. Hata hivyo, hisia zinatokana na matendo tunayojihusisha nayo katika maisha yetu ya kila siku. Kwa maana nyingine kuna uhusiano mkubwa kati ya vitendo vya mwili na hisia zako. Kumbe, kama unahitaji kutawala hisia mbaya ndani mwako huna budi kutawala matendo ya mwili wako. Badilisha namna unavyotembea, unavyoongea, unavyocheka, unavyokaa na kila tendo ambalo unatamani uwe nalo kulingana na mafanikio unayotaka. Hakika nguvu kubwa iliyopo ndani mwako itakufanya ubadilike na kuingia kwenye hisia na mawazo ya mafanikio zaidi. Hapa ndipo unahitaji kuwa na watu ambao unatamani kufikia mafanikio yao (role models).

18. Zungumza lugha ya mafanikio. Kumbuka kuwa maneno unayonena dhidi ya nafsi yako yana athari kubwa katika mafanikio kutokana na ukweli kwamba maneno yanaumba. Maneno tunayonena mara kwa mara yanaathiri mfumo wa fikra na hivyo jinsi tulivyo (kihisia na kivitendo) ni matokeo ya maneno tunayonena dhidi ya nafsi zetu. Mfano, kama ukisema nina hasira sana, moja kwa moja hisia za hasira zitakutawala na matokeo yake utafanya vitendo vinavyoendana na hisia hizo. Somo kubwa hapa mwandishi anatufundisha kuwa mara zote tunakiwa kuwa makini na maneno au misamihati tunayotumia dhidi ya nafsi zetu. Chagua misamihati ambayo inakupa tulizo la nafsi kulingana na hali inayokukabili au chagua misamihati inachochea kutumia nguvu kubwa iliyopo ndani mwako katika kufikia mafanikio unayotaka.

19. Tumia misamihati ambayo inajenga picha bora katika mfumo wako wa akili. Mwandishi anatushirikisha kuwa kila misamihati tunayotumia katika maisha yetu ya kila siku inajenga picha chanya au hasi katika akili zetu. Picha hizo ni alama ambazoo zinatafsiliwa kwa ajili ya kutupa nguvu ya kuumba au kubomoa. Mfano, tafsili sentensi hizi: (a) Maisha ni mapambano; na (b) Maisha ni mchezo. Sentensi ya kwanza inakufanya siku zote uyaone maisha ni sehemu ya kupambana kana kwamba upo vitani siku zote. Kumbuka katika uwanja wa vita hakuna furaha hivyo maisha yako daima hayawezi kuwa na furaha. Sentensi ya pili inaonesha umuhimu kufurahia maisha kwa kuona mema yaliyomo ndani yake. Kumbuka mchezo ni kati ya matukio ambayo kila mmoja anaburudika. Hivyo, kwa kuyatazama maisha katika picha hiyo mhusika atakuwa na mengi ya kufurahia kwenye kila hatua maisha yake.

20. Kumbuka kila nyuma ya misamihati unayotumia kuna imani ndani yake. Mwandishi anatushirikisha ubaya au uzuri wa misamihati tunayotumia ni kuendena na imani zinazotuongoza kwenye maisha yetu. Kumbe, tunachohitaji kufahamu ni kwamba misamihati inaunda imani na imani hizo ndizo zinakuwa mwongozo wa maisha yetu katika njia chanya au hasi kulingana na misamihati husika.

21. Tambua kuwa katika maisha hakuna mwenye alama ya bahati nzuri au mbaya. Mwandishi anatushirikisha kuwa mafanikio ya namna yoyote ile yanaanza na mhusika kutambua ni nini hasa anahitaji kufanikisha na kisha kuweka malengo ya kufika kule anakokusudia. Hapa ndipo unapaswa kujiwekea lengo la kuwa bora kuliko wote katika tasnia uliyoichagua. Hata hivyo, unahitaji kukumbuka kuwa kuweka lengo tu hakutoshi kwani ni lazima lengo hilo liwe na vitendo madhubuti vinavyomlazimisha mhusika kuchukua hatua kila mara. Kumbe, kila mara unahitaji kujikumbusha kuwa hakuna bahati kwani bahati inatengenezwa na mhusika kwa kufanya kazi kwa bidii na maarifa kwenye tasnia alioichagua.

Haya ni machache ambayo nimeweza kukushirikisha kati ya mengi yaliyo kwenye kitabu hiki. Kupata nakala ya kitabu hiki BONYEZA HAPA na ujiunge na mtandao wa fikra za kitajiri kisha nitumie ujumbe wa kuomba kitabu hiki kupitia barua pepe fikrazakitajiri@gmail.com.

Lengo langu ni kuona kila kitabu ninachokushirikisha kinawaafikia watu zaidi ya elfu moja. Nisaidie kusambaza ujumbe wa kitabu hiki kwa ndugu na marafiki kwa kadri uwezevyo. Kumbuka umepata ujumbe wa kitabu hiki bila malipo yoyote sasa kwa nini husindwe kuwashirikisha wengine bila gharama yoyote. Wote tumeumbwa ili kuibadirisha dunia hii kuwa mahali pazuri pa kuishi hivyo kuwa sehemu ya kuleta mabadiriko hayo (Unaposambaza makala hizi hakikisha haukopi na kupest badala yake share link). Nakutakia mapambano mema.

Karibuni kwenye fikra za kitajiri ili upate elimu isiyokuwa na mwisho.

Born to Win ~ Dream Big

Augustine Mathias Bilondwa
Namba ya Simu: +255 786 881 155
Mwanzilishi wa Mtandao wa fikrazakitajiri.blogspot.com

Barua pepe: fikrazatajiri@gmail.com

PATA UCHAMBUZI WA KITABU CHA THE RULES OF MONEY ( KANUNI ZA PESA)