FIKRA ZA KITAJIRI: Julai 2017

Archive for Julai 2017

Mambo Niliyojifunza Kwenye Kitabu cha Procrastinte on Purpose: 5 Permissions to Multiply Your Time (Hailisha kwa Makusudi; Ruhusa 5 za Kuongeza Muda Wako)

Fikra za Kitajiri Jumatatu, Julai 31, 2017 Add Comment

Habari ya leo rafiki na msomaji wa mtandao wa fikra za kitajiri.

Ni matumaini yangu kuwa unaendelea kupambana kwa ajili ya kuboresha maisha yako. Karibu tena katika mtandao wa FIKRA ZA KITAJIRI kwa ajili ya uchambuzi wa kitabu cha wiki hii. Leo hii ikiwa ni wiki ya 29 katika kipindi cha mwaka 2017 naendelea kukushirikisha uchambuzi wa vitabu mbalimbali kwa ajili ya kukupa maarifa ambayo ni wajibu wako kuyatumia ili ubadilishe kila sekta ya maisha yako.

Ni matumaini yangu kuwa makala hizi zimekuwa na msaada mkubwa kwako kwa kadri ambavyo umekuwa ukichukua hatua za kubadilisha maisha yako. Hata hivyo, makala hizi haziwezi kubadilisha chochote kama umekuwa mtu wa kusoma na kutokufanyia kazi yale unayojifunza.

Ili uendelee kunufaika na makala za mtandao huu BONYEZA HAPA na ujaze fomu kisha bonyeza “jiunge/subscribe” utakuwa umejiunga na mtandao wa fikra za kitajiri. Kwa kujiunga na mtandao huu utapata makala zinazochapishwa humu moja kwa moja kwenye barua pepe yako bila malipo yoyote.

Kupata uchambuzi wa kitabu cha The Rules of Money (Kanuni 107 za Kutengeneza pesa na kuwa tajiri) BONYEZA HAPA

Kitabu cha wiki hii ni “Procrastinate on Purpose” kutoka kwa mwandishi Rory Vaden. Rory Vaden ni mwanaharakati wa mafanikio ambaye anaongozwa na nidhamu binafsi na uadilifu katika kutimiza majukumu yake. Mwandishi huyu ni mkufunzi (kocha), mzungumzaji wa kimataifa na mshauri ambaye amejikita kwenye maono ya kuwaongoza watu ili waishi maisha yaliyojikita kwenye msingi wa nidhamu binafsi. Mwandishi anatumia uzoefu alionao katika biashara zake kuwashirikisha mamia ya watu ili wafikie mafanikio ya ndoto zao.

Muda ni rasilimali ambayo watu wotu wote tumepewa sawa. Yaani kila mtu kwa siku anapewa masaa 24 ambayo ni sawa na dakika 1,440 ambazo ni sawa na sekunde 86,400. Hivyo, kila kukicha kila mmoja ambaye yu hai anapewa sekunde hizo ndani ya masaa 24 na yeye ndo mwamuzi mkuu wa nini afanye katika kila sekunde.

Tunasema muda ni rasilimali kutokana na ukweli kwamba yale tunayofanya katika kila sekunde ya maisha yetu ndiyo yanaamua nafasi ya mafanikio yetu. Kutokana na muda kutumiwa visivyo katika makundi ya watu kwenye jamii ndio maana tunaweza kutofautisha mafanikio ya watu ndani ya jamii moja. Wale wanaotumia muda wao kufanya mambo ya maana wamefanikiwa kupiga hatua kubwa ya mafanikio katika maisha yao ikilinganishwa na wale ambao wanatumia muda wao kufanya mambo ya hovyo.

Hata hivyo watu wengi wameendelea kulalamika kuwa muda hautoshi kwa ajili ya kukamilisha majukumu yao siku pengine kwa vile hawajatambua njia nzuri ya kupangilia vizuri muda wao. Mwandishi Rory Vaden anatumia kitabu hiki kutushirikisha njia bora ambazo kila mtu anaweza kutumia kwa ajili ya kuboresha matumizi ya muda wake.

Karibu tujifunze wote machache niliyojifunza kwenye hiki:

1. Tofauti kubwa iliyopo kati ya watu waliofanikiwa na watu wa kawaida ni uwezo mkubwa wa kufikiri walionao watu wenye mafanikio ikilinganishwa na watu wa kawaida. Mwandishi anatushirikisha kuwa watu wenye mafanikio makubwa wanatambua na kuishi msingi huu “ili uweze kutoa matokeo makubwa unahitaji kufikiri nje ya boksi”. Kutokana uwezo wa kuishi msingi huu, watu wenye mafanikio wanatumia kila sekunde ya maisha yao kwa ajili ya kuzalisha matokeo makubwa kwenye majukumu yao ya kila siku.

2. Kukosekana kwa vipaumbele ni mfumo mpya wa kupoteza muda. Mfumo huu hauna tofauti na watu wanaopoteza muda kutokana na uzembe au uvivu wa kufanya kazi. Mfumo huu umesababisha kupoteza muda mwingi wa kuzalisha katika sehemu za kazi kama vile viwandani, ofisi za serikali au sekta binafsi na matokeo yake ni upotevu wa rasilimali muda ambayo inapelekea kampuni au serikali kukosa mapato ya kutosha. Hali hii inapelekea mtu kujiona kama vile kadri anavyozidi kupigana kufanya kazi ndivyo anazidi kurudi nyuma au ndivyo kazi zinazidi kuwa nyingi zaidi. Watu wa namna hii wanafanya kazi kwa presha kubwa kwa ajili ya kukamilisha majukumu yaliyopo mbele yao huku muda wote maisha yao yakitawaliwa na msongo wa mawazo wa kujiuliza ni lini watapata muda huru kwa ajili ya kufurahia maisha yao.

3. Epuka ubize wa muda wote ambao hauna tija au tija yake ni ndogo. Mwandishi anatushirikisha kuwa ni kawaida watu wengi kusema wapo bize muda wote na matokeo yake ni kwamba ukifanya tathimini ya ubize wao utagundua kuwa uzalishaji walionao ni wa kawaida na pengine upo chini zaidi. Watu hawa siyo kweli kuwa wapo bize bali wanashindwa kupangilia majukumu ya kazi zao na matokeo yake ni kushindwa kutafuta suluhisho la changamoto zinazowakabili. Watu wenye mafanikio hawasemi kuwa wapo bize muda wote bali wanatambua namna ya kucheza na vipaumbele vya ratiba zao za kila siku na hatimaye kupelekea watu hawa kuwa na uzalishaji wa juu na hivyo wana matokeo mazuri katika maisha yao.

4. Epuka neno “mlinganyo/usawa (balance)”. Mwandishi anatushirikisha kuwa kama unahitaji kutumia muda wako vizuri ni lazima kwanza ufahamu kuwa kuna wakati utahitaji kutumia muda mwingi kwa ajili ya kukamilisha kazi uliyoipanga ili kwa baadae ikuletee matokeo mazuri. Kuna muda utahitaji kulala masaa machache kwa ajili ya kukamilisha jukumu ulilonalo au kuna wakati utapaswa kufanya kazi bila malipo.

5. Watu waliofanikiwa wanafurahia majukumu ya kazi zao. Mwandishi anatushirikisha kuwa watu wa kawaida wana fikra kuwa ipo siku ambayo watakuwa na muda wa kupumzika ili wafurahie maisha. Hii ni fikra ambayo watu waliofanikiwa wanapingana nayo kwa vile wao kila wanachofanya ni furaha na faraja katika maisha yao ya kila siku. Hapa ni muhimu kutambua kuwa unatakiwa kuishi leo kana kwamba kesho hautakuwepo kwa maana ya kwamba hautakiwi kuairisha furaha ya leo kwa ajili ya kesho. Kwa maana hii kazi inatakiwa kuchukuliwa kwa mtazamo wa kuwa kazi ni sehemu ya maisha ya kila siku na ni chanzo cha furaha katika maisha ya kila mmoja. TUMIA MUDA WAKO KUFANYA MAMBO YANAYOKUFURAHISHA.

6. Fahamu kuwa watu wenye mafanikio makubwa wanahitaji kulipwa kutokana na matokeo ya kazi zao. Mwandishi anatushirikisha kuwa hii ni tofauti kubwa kati ya watu wenye mafanikio mkubwa na watu wa kawaida. Watu wa kawaida mara nyingi wanahitaji kulipwa kulingana na muda wanaotumia kazini na wala hawajali kipi wanazalisha pindi wanapokuwa kazini. Kwa ujumla watu wenye mafanikio wanafanya kazi kubwa kwa sasa wakitegemea kupata faida baada ya matokeo ya kazi waliofanya kuonekana. Watu waliofanikiwa hawafanyi kazi kwa ajili ya malipo bali wanafanya kazi kwa ajili ya kutoa matokeo mazuri kwenye jamii inayowazunguka na matokeo hayo ndiyo yanarudisha mshindo nyuma (feedback) kwa muhusika kama malipo ya kazi yake.

7. Watu wengi wanaendelea na falsafa ya zama ya “kutunza muda” na kusahau kuwa kamwe muda hautunzwi badala yake mhusika anapaswa kudhibiti matendo yake kwenye kila sekunde ya muda wake. Mwandishi anatushirikisha kuwa hakuna namna yoyote ile mtu ataweza kutunza muda kama anashindwa kuwa na nidhamu binafsi ya matendo yake. Kwa maana hii kila mtu ni muhusika mkuu wa kuamua ni kipi kifanyike au kisifanyike kwenye kila sekunde ya muda alionao. Unaweza kuamua kufanya vitu vyenye matokeo mazuri pekee au unaweza kuamua kufanya mambo ya hovyo. Hapa ndipo watu wanaachana na kuanza kuona makundi ya watu waliofanikiwa kimaisha na wengine wanaangaika kimaisha lakini wote kila siku wanapewa muda sawa. Kwa ufupi ni kwamba “KAMA UNASHINDWA KUJIDHIBITI MWENYEWE KAMWE HAUWEZI KUTUMIA VYEMA MUDA WAKO”.

8. Njia ya kwanza ya kudhibiti matendo yako ni kutenga majukumu yako kwa vipaumbele. Hakikisha majukumu yako kwa siku nzima unayagawanya katika makundi manne ambayo kwa ujumla yanaitwa “time management matrix”. Kundi la kwanza ni majukumu ambayo ni MUHIMU na ni ya HARAKA, kundi la pili ni majukumu ambayo ni MUHIMU lakini SIO YA HARAKA, kundi la tatu ni majukumu ambayo SIO YA MUHIMU lakini YANA UHARAKA na kundi la mwisho ni majukumu ambayo SIYO MUHIMU na SIYO YA HARAKA. Makundi haya kwa ujumla yanatoa nafasi kwa mhusika kufikiria juu ya kipi ni cha muhimu kufanyika na kwa muda upi kifanyike. Kwa maana nyingine makundi haya yanatuhitaji kutekeleza majukumu yetu kwa mtiririko wa umuhimu na uharaka wake. Hii ni tofauti na falsafa ya zamani ya kutunza muda ambayo ililenga mtu kufanya kazi kwa haraka na presha kubwa ili aendane muda uliyopo.

9. Wanamafanikio wanatambua kuwa kadri wanavyotenga muda wa kutosha kwa ajili ya kufuatilia/kukamilisha majukumu waliyonayo kwenye kila sekta ya maisha yao ndivyo wanapata matokeo makubwa kwenye husika. Mfano, kwa wastani watu wengi katika jamii wanapambana kwa ajili ya kufanikisha maisha yao katika sekta sita ambazo ni Kazi, Familia, Imani, Fedha, Afya/Utimamu wa mwili na Kijamii. Mafanikio yako katika kila sekta yatategemea na muda unaotenga kwa siku au wiki kwa ajili ya kujiendeleza kwenye kila sekta. UTAVUNA KULINGANA NA UNACHOPANDA.

10. Watu waliofanikiwa zaidi wana uwezo wa kuongeza/kupanua muda wao. Unaweza kujiuliza kuwa wanaweza vipi kuongeza muda? Mwandishi anatushirikisha kuwa watu wenye mafanikio pamoja na kufanya vitu kwa mtiririko wa umuhimu na uharaka wake, watu hawa wana uwezo wa kufanya mambo yenye matokeo makubwa na yanayoweza kudumu kwa muda mrefu. Uwezo wa kuongeza muda unatokana na ufanisi wa utendaji kazi ambao unapelekea kuwekeza muda mwingi kwenye kazi ambazo zinawapa muda wa kutosha kwa ajili ya kufanya kazi nyingine siku zijazo. Kwa maana nyingine ni kwamba watu wenye mafanikio makubwa sio tu wanaangalia umuhimu na uharaka wa jambo kwa wakati uliopo pekee bali wanaangalia umuhimu wa jambo husika kwa siku zijazo. Hivyo, watu wenye mafanikio makubwa wanajiuliza ni kwa namna gani matumizi ya muda wao kwa sasa yatabadilisha maisha yao ya baadae.

11. Ruhusa ya kwanza ya kuongeza muda; AMUA KUPOTEZEA AU KUSEMA HAPANA. Mwandishi anatushirikisha kuwa kama unataka kutunza muda wako vizuri ili utumike kwa ajili ya kufanya vitu vyenye manufaa ni lazima uwe na nguvu ya kupotezea au kusema hapana kwa baadhi ya vitu ambavyo havina tija katika maisha yako. Hapa unahitaji kuwa jasiri wa kukataa kuwa kila sio linalokuja kwenye fikra zako au mbele yako lazima lifanyiwe kazi au sio kila anayekuja utimize haja zake. Hakikisha unafanya vitu ambavyo kamwe hautojutia kwa nini umefanya mara baada ya matokeo ya vitu hivyo kujidhihirisha.

Baadhi ya tabia ambazo unapaswa kuachana nazo mara moja ni mabishano, kufanya kazi za wengine ambazo sio lazima ufanye wewe, epuka kupoteza muda kwa kuangalia TV, epuka kupoteza muda kujibu emails au chati za kwenye mitandao ya kijamii ambazo hazina tija, epuka vikao visivyo na tija, epuka kazi za kujitolea ambazo zimepitiliza, epuka kufanya kazi mbili kwa mkupuo, epuka kutoa maelezo marefu n.k. Tabia hizi zinapoteza muda ambao ungeutumia kwa ajili ya kuwa karibu na familia yako au kufanya mambo mengine ambayo ni muhimu.

12. Ruhusa ya pili ya kuongeza muda; WEKAZA MUDA WAKO KUPITIA MAAMUZI YAKO YA FEDHA. Mwandishi anatushirikisha kuwa maamuzi yako ya fedha unayofanya kwa sasa yana mchango mkubwa wa kuamua hatima ya kipato chako na muda wako kwa siku zijazo. Watu wenye mafanikio kabla ya kufanya matumizi yoyote ya pesa ni lazima wajiulize thamani ya fedha hiyo kama ingewekezwa sehemu ambayo inatoa asilimia flani kama faida kwa mwaka na je baada ya miaka kadhaa fedha hiyo ingelipa thamani sawa na hicho ambacho wanahitaji kuitumia kwa sasa?. Swali hili linamfanya mtu mwenye mafanikio atafakari gharama na faida ambazo atazikosa kwa kuamua kutumia kiasi cha fedha husika kwa sasa badala ya kuiwekeza ili baada ya miaka kadhaa apate ongezeka la thamani ya fedha husika. Kutokana na msingi huu unatakiwa kufahamu kuwa kila shilingi unayoitumia kwa sasa ina athari kubwa kwenye nafasi yako ya kifedha kwa miaka ijayo. Hapa unaweza ukajitathimini kwenye matumizi yako ya fedha ambayo siyo ya lazima kama ununuzi wa vocha, magazeti, uvutaji wa sigara, ulevi au matumizi ambayo hayapo kwenye bajeti yako. MUDA UNA THAMANI ZAIDI YA PESA KUTOKANA NA UKWELI KUWA MUDA UKITUMIWA VIZURI UNATENGENEZA PESA AMBAZO ZITAENDELEA KUJITENGENEZA ZENYEWE.

13. Tumia njia ambazo zinasaidia kupunguza muda wa utendaji kazi. Kama ambavyo tumeona katika ruhusa ya pili hapo juu kuwa shilingi ya leo kwa kesho itakuwa na thamani kubwa kama imewekezwa, ndivyo mwandishi anatukumbusha pia juu ya matumizi ya muda wetu katika kazi zetu za kila siku. Kama kuna uwezekano wa kutumia teknolojia ambayo imeboreshwa katika kazi yako hakuna haja ya kuendelea kutumia teknolojia ya zamani ambayo inasababisha upoteze muda mwingi ambao ungeutumia kufanya mambo mengine. Mfano, kama kazi inaweza kufanywa na mashine hakuna haja ya kung’ang’ania kufanya hizo kwa kutumia mikono. Nguvu iliyopo katika kufanya kazi kwa teknolojia ni kwamba itakusaidia kufanya kazi masaa yote na siku zote saba za wiki kulingana na teknolojia pamoja na kazi husika. Mfano, mauzo kwa kutumia mtandao, mhusika anaweza kuuza hata kama amelala.

14. Ruhusa ya tatu ya kuongeza muda; ONGEZA MUDA WAKO KWA GATUA MADARAKA/KAZI AMBAZO ZIPO JUU YA UWEZO WAKO AU SIO ZA KIWANGO CHAKO. Mwandishi anatushirikisha kuwa ni muhimu kufanya tathimini ya majukumu ya kazi zako za kila siku na kisha ukajiuliza kama kuna ulazima wa kazi zote kufanywa na wewe. Chagua kazi ambazo unaona unaweza kumfundisha wa chini yako ili azitekeleze kwa niaba yako na kukufanya hivyo utakuwa umetunza muda ambao utautumia kufanya mambo mengine.

Pia, sehemu nyingine ambayo unahitaji kugatua madaraka ni zile ambazo zipo nje ya taaluma yako. Badala ya kukomaa na kazi ambayo hauna utaalamu wa kutosha ni vyema ukamtafuta wa kuifanya kazi hizo kwa ufanisi zaidi huku wewe ukiwa unatekeleza majukumu mengine. Mfano, ni kawaida kukuta kuwa wafanyabiashara wa kawaida wanatumia muda mwingi kutekeleza majukumu yote ya biashara kuanzia kazi za uhasibu, sheria, mipango n.k. Mwandishi anatushauri kuwa kama unahitaji kuwa na mafanikio makubwa ni lazima uwe tayari kuamini kuwa kazi yako inaweza kufanywa na mtu yeyote kwa viwango unavyohitaji.

15. Ruhusa ya nne ya kuongeza muda; ONGEZA MUDA WAKO KWA KUKUBALI KUAIRISHA MAMBO PALE INAPOBIDI. Mwandishi anatushirikisha kuwa watu wenye mafanikio sio tu wanafanya kwa mtiririko wa umuhimu, uharaka na umuhimu wa vitu husika kwa siku zijazo bali pia wanaangalia ni upi muhafaka kwa ajili ya kufanya kazi husika. Watu waliofanikiwa wanafahamu kama endapo kuna ulazima wa kazi husika kukamilishwa kwa sasa au kusubirishwa kwa baadae kwa kutegemea umuhimu wake kwa wakati husika. Kwa ujumla mwandishi anatushirikisha kuwa kila kazi au maamuzi unayofanya ni lazima kwanza usome alama za nyakati. Kama alama za nyakati haziruhusu kazi/maamuzi husika kufanyika kwa wakati huo hakuna haja la kulazimisha kukamilisha/kufanya maamuzi badala yake ni vyema ukasubiria kwa makusudi mpaka pale hali itakapokuwa vizuri.

16. Watu wenye mafanikio wanajua nguvu iliyopo kwenye kusubiria mpaka dakika ya mwisho katika fursa husika. Mwandishi anatushirikisha kuwa watu waliofanikiwa wantambuwa kuwa dakika ya mwisho kwenye fursa husika ndio muda kutengeneza faida kubwa. Kutokana na ukweli huu, wanamafanikio wanatumia pindi wanaposubirisha kazi/fursa kama ambavyo tumeona kwenye ruhusa ya nne ya kuongeza muda wanasubiria mpaka dakika ya mwisho ambayo ndo fursa husika inakuwa imeiva. Hii ndio siri ambayo watu wenye mafanikio wanaitumia kutengeneza pesa nyingi kwa vile wanakuwa na taarifa sahihi kuhusu fursa husika na hawana hofu pindi wanaposubiria ili fursa husika ikomae. KILA KITU KINABADIRIKA HASA KWENYE SOKO LA ULIMWENGU WA SASA HIVYO UNAHITAJI KUFAHAMU NYAKATI ZIPI NI SAHIHI KUKALIMISHA KAZI/MAAMUZI ULIYOYASUBIRISHA KWA MAKUSUDI ILI KUEPUKA GHARAMA YA KUFANYA MAAMUZI YA HARAKA.

17. Fahamu kuwa matajiri hawalipii bili za kodi mwanzoni bali wanasubiria mpaka siku za mwisho wanazotakiwa kulipia. Siri hii ndio mwandishi anatushirikisha kwa ajili ya kufahamu nguvu iliyopo katika kusubilia mpaka dakika ya mwisho. Matajiri wanafahamu kuwa katika muda wanaosubilia kulipa wanawezakutumia fedha husika kwa ajili kukamilisha fursa endapo itajitokeza ndani ya muda husika. Kwa kufanya hivi wanafanikiwa kuongeza muda ambao unazalisha muda zaidi kwa ajili ya kukamilisha kazi za siku zaijazo.

18. Ruhusa ya tano ya kuongeza muda; ONGEZA MUDA WAKO KWA KUTULIZA AKILI KATIKA NYAKATI MUHIMU. Mwandishi anatushirikisha kuwa kuna nyakati ambazo utatakiwa kufanya kazi mara mbili zaidi ya ulivyozoea kwa ajili ya kuhakikisha unakamilisha jukumu lililo mbele yako. Hii ni pamoja na kuhakikisha kuwa rasilimali zote unazielekeza kwenye jukumu husika kwa kadri zinavyotakiwa mpaka pale ambapo utaona kuwa umefanikisha kukamilisha jukumu hilo. Katika hatua hii unahitaji kutambua kuwa baada ya kuairisha fursa/kazi kwa makusudi sasa ni muda ambao upo kwenye dakika ya mwisho ambayo ukizembea kidogo tu unakosa kila kitu na hivyo kusubilia kwako hakutakuwa na faida bali ni hasara. Hapa unahitaji kuongeza muda wako kwa kuhakikisha unafanyia kazi ambayo ni kipaumbele kwa wakati na si vinginevyo. Hakikisha haurusu mwingiliano wa vitu vingine ambavyo vinaweza kukupoteza kwenye kipaumbele chako.

19. Tengeneza mtiririko wa vipaumbele. Somo kubwa katika kitabu hiki ni kuona kuwa msomaji anaweza kuongeza muda wake wa kesho kwa kadri awezavyo kupitia majukumu anayofanya kwa sasa. Mwandishi anatushirikisha kuwa ili ufanikishe zoezi la kuzalisha muda ni lazima uhakikishe unakuwa na vipaumbele ambavyo vina muunganiko wa matukio kiasi kwamba kukamilika kwa kipaumbele kimoja kunapelekea kuanza kwa kipaumbele kingine. Pia, kipaumbele kimoja kisaidie kuongeza muda kwa ajili ya kipaumbele kinchofuatia.

20. Baada ya kuondoa tabia au kazi ambazo zimekuwa zikipoteza muda wako sasa unatakiwa kuongeza uzalishaji wako. Hapa unahitaji kutengeneza utamaduni au falsafa ambazo zitakuongoza katika kipindi chako chote ili hatimaye uzidi kuongeza muda wako kwa ajili ya kufanikiwa katika kila sekta ya maisha ya maisha yako. Kama wewe ni mwajiri unahitaji kuhakikisha unaishi misingi uliyojifunza hapa ili kila mmoja chini yako ajifunze kutoka kwako kwa ajili ya kuongeza ufanisi utendaji kazi.

Haya ni machache ambayo nimeweza kukushirikisha kati ya mengi yaliyo kwenye kitabu hiki. Kupata nakala ya kitabu hiki BONYEZA HAPA na ujiunge na mtandao wa fikra za kitajiri kisha nitumie ujumbe wa kuomba kitabu hiki kupitia barua pepe fikrazakitajiri@gmail.com.

Niendelee kukuomba usambaze jumbe hizi kwa kadri uwezavyo ili yale unayojifunza yawafikie wengi na hatimaye tufanikiwe kuibadilisha dunia hii kuwa mahali pazuri pa kuishi (Unaposambaza makala hizi hakikisha haukopi na kupest badala yake share link ili hatimiliki za mwandishi wa makala ziheshimiwe). Nakutakia mapambano mema.

Karibuni kwenye fikra za kitajiri ili upate elimu hisiyokuwa na mwisho.

Born to Win ~ Dream Big

Augustine Mathias Bilondwa
Namba ya Simu: +255 786 881 155
Mwanzilishi wa Mtandao wa fikrazakitajiri.blogspot.com

Barua pepe: fikrazatajiri@gmail.com

Mambo Niliyojifunza Kwenye Kitabu cha How To Negotiate Better Deals: A practical guide to successful negotiation (Jinsi ya Kufanya Majadiliano ya Dili za Kibiashara)

Fikra za Kitajiri Jumapili, Julai 16, 2017 Add Comment

Habari ya leo rafiki na msomaji wa mtandao wa fikra za kitajiri. Ni matumaini yangu kuwa unaendelea kupambana kwa ajili ya kuboresha maisha yako. Karibu tena katika mtandao wa FIKRA ZA KITAJIRI kwa ajili ya uchambuzi wa kitabu cha wiki hii. Leo hii ikiwa ni wiki ya 27 katika kipindi cha mwaka 2017 naendelea kukushirikisha uchambuzi wa vitabu mbalimbali kwa ajili ya kukupa maarifa ambayo ni wajibu wako kuyatumia ili ubadilishe kila sekta ya maisha yako.

Ni matumaini yangu kuwa makala hizi zimekuwa na msaada mkubwa kwako kwa kadri ambavyo umekuwa ukiachukua hatua za kubadilisha maisha yako. Hata hivyo, makala hizi haziwezi kubadilisha chochote kama umekuwa mtu wa kusoma na kutokufanyia kazi yale unayojifunza.

Kitabu cha wiki hii ni “Ho To Negotiate Better Deals” kutoka kwa mwandishi Jeremy G. Thorn. Katika kitabu hiki mwandishi anatushirikisha jinsi tunavyoweza kutumia mbinu za kufanya majadiliano ya dili kubwa za kibiashara kwa kujiamini ili hatimaye tufanikiwe kupata/kuuza bidhaa/huduma kwa bei nzuri.

Katika biashara yoyote ile majadiliano kwenye bei ya bidhaa/huduma ni muhimu kutokana na ukweli kwamba bei ya awali huwa inalenga kunufaisha upande mmoja. Kupitia majadiliano haya pande zote mbili zitakubaliana bei ya mauziano na hatimaye ushindi kwa kila upande utategemea na uwezo wake kwenye kufanya majadiliano. Hata hivyo, ni lazima kukumbuka kuwa dili nzuri za biashara zinaharibiwa na uwezo mdogo wa majadiliano kwa mhusika.

Mbinu hizi za majadaliano tukiachana na matumizi yake kwenye ulimwengu wa biashara tunatakiwa kufahamu kuwa ni mbinu hizi hizi pia zinatumika katika makubaliano ya aina yoyote ile kati ya pande mbili. Yanaweza kuwa makubaliano kwa ajili ya kuomba kazi, kuongezewa mshahara, makubaliano ya amani au makubaliano kwenye mahusiano.

Mbinu za majadiliano zipo wazi kwa kila mtu kwani kila mtu anaweza kujifunza mbinu hizi nakuzitumia kwa faida yake katika maisha yake ya kila siku. Kupitia kitabu hiki mwandishi anatushirikisha sifa na mbinu muhimu ambazo unatakiwa kuwa nazo kwa ajili ya kufanya majadilino ya kibiashara kwa faida yako.

Karibu tujifunze wote machache niliyojifunza kwenye hiki:

1. Watu wengi wanashindwa kufanya majadiliano ya dili za kibiashara kwa vile wanakandamizwa na tamaduni za sehemu husika au fikra hasi. Tamaduni hizi mara nyingi zinapelekea watu wengi kuwa na uoga wa kufanya majadiliano ambao mara nyingi hugawanyika katika sehemu kuu tatu ambazo ni uoga wa kushindwa, uoga wa kukataliwa na uoga kutokueleweka. Mwandishi anatushirikisha kuwa kama unahitaji kufanya vyema kwenye makubaliano ya kibiashara kwanza kabisa unahitaji kuondoa hofu, uoga pamoja na imani za kijamii na hatimaye ujivike roho ya ujasiri. HUSIOGOPE KUVUNJA BEI AU KUSIMAMIA BEI UNAYOHITAJI.

Soma: UCHAMBUZI WA KITABU The Rules of Money: How to Make It and How to Hold on to It (Kanuni za Pesa: Jinsi ya Kuzitengeneza na Jinsi ya Kuendelea Kutengeneza Pesa Zaidi)

2. Tambua kuwa mara zote bei ya kwanza huwa sio nzuri kibiashara. Mwandishi anatushirikisha kuwa kama unahitaji kununua bidhaa/huduma kubwa kibiashara ni lazima utambue kuwa bei inayotolewa awali juu ya bidhaa/huduma husika sio rafiki kwako wewe. Hapa unahitaji kufanya makubaliano ya kibiashara (kuvunja bei) mpaka kufikia hatua ambayo bei husika itapungua angalau kwa asilimia 10 – 20. Kufanikisha zoezi hili unahitaji kuwa mvumilivu, mtulivu wa akili, jasiri, udhibiti hisia zako na kuweka msimamo wako wa bei ambayo upo tayari kutoa. Hizi ni baadhi ya sifa muhimu ambazo unahitaji kuwa nazo kwa ajili ya kumudu makubaliano ya dili bora za kibiashara.

3. Anzisha majadiliano juu ya makubaliano ya kibiashara kama kweli umejiandaa na kama haujajiandaa ni vyema ukasubiri muda ambayo utajisikia kuwa upo tayari. Mwandishi anatushirikisha kuwa watu wengi wanashindwa kufanya makubaliano ya dili kubwa za kibiashara kwa vile wanaingia kwenye makubaliano ya bei kichwa kichwa pasipo kuwa na taarifa muhimu juu ya bidhaa/huduma iliyopo sokoni. Kumbe basi hapa tunashauriwa kuwa kitu cha kwanza unachotakiwa kufanya ili ufanikishe makubaliano ya kibishara unahitaji kuifahamu kwa kina bidhaa/huduma husika na namna ambavyo unaweza kuitumia katika mazingira ya kazi yako.

4. Fahamu kuwa sio kila sehemu unaweza kufanya makubaliano ya kibiashara. Mwandishi anatushirikisha kuwa makubaliano ya kiabiashara yanabadilika kutoka sehemu moja hadi nyingine au kutoka kabila moja hadi jingine. Kutokana na ukweli huu unahitaji kubadilisha mbinu zako za makubaliano ya kibiashara kwa kutegemea sehemu ulipo au nani unahitaji kufanya naye biashara.

5. Fahamu kuwa mara zote wauzaji wa bidhaa/huduma wanalenga bei ya juu ambayo ina faida kubwa. Lengo kubwa la mfanyabiashara au mtoa huduma ni kuona anatengeneza faida ikiwezekana hata mara mbili ikilinganishwa na bei halisi ya bidhaa/huduma yake. Kutokana na ukweli huu mfanyabiashara au mtoa huduma anawalenga wateja ambao wana uzoefu wa makubaliano ya biashara ambao kwa vyovyote vile atawauzia kwa bei ya chini. Lakini pia anawalenga wateja ambao hawana uzoefu na makubaliano ya kibiashara ambao mara nyingi wanauziwa kwa bei ya juu. Dhana hii unaweza kuilewa vizuri ukiangalia mbinu wanazotumia machinga kuuza bidhaa zao mitaani. Machinga wanachofanya ni kutaja bei ya juu zaidi ili mteja ataje bei aliyonayo, kama hauna uzoefu utataja bei inayokaribia ile aliyokutajia na hivyo kujikuta unanunua bidhaa kwa bei ya juu sana.

6. Kumbuka kuwa haupotezi chochote pale ambapo utauliza kama unaweza kulipia kwa bei uliyonayo. Mwandishi anatushirikisha kuwa suala la makubaliano ya kibiashara sio tu kwa dili kubwa za biashara bali hata kwenye manunuzi ya bidhaa za kila siku. Kutokana ukweli huu, mwandishi anatushirikisha kuwa mara zote epuka kununua bidhaa/huduma kwa kuangalia bei iliyoorodheshwa na badala yake uliza kama unaweza kupunguziwa bei kwa kila bidhaa husika. Kumbuka kuwa pamoja na kuorodhesha bei ya kila bidhaa, mfanyabiashara anakuwa na ukomo wa bei ya chini kabisa kwa kila bidhaa ambayo huwa ni siri yake hivyo kama haujatoa bei uliyonayo mfanyabiashara atakuuzia kwa bei ya juu.

7. Kumbuka kuwa kila makubaliano ya biashara ni lazima yawe na muundo wake. Kuna miundo ya aina mbili ambayo unaweza kutumia kulingana na aina ya makubaliano ya biashara unayofanya. Muundo wa kwanza ni ule unaolenga kunufaisha pande mbili (win-win negotiation) na muundo wa pili ni ule unaojikita kwenye ushindani (competitive negotiation). Muundo huu wa pili unalenga kunufaisha zaidi upande mmoja (win-lose negotiation). Kuchagua ni muundo upi utumike katika makubaliano ya kiabiashara itategemeana na mtu unayefanya nae biashara ameanzisha muundo upi. Mfano, kama muuzaji hajatoa nafasi kwako kwa ajili ya majadiliano kwa vyovyote vile utatumia muundo wa aina ya pili. Katika hali kama hii unaweza kukubali dili husika kwa bei iliyotolewa au ukatoa bei yako na kupendekeza endapo muuzaji atajifikiria akutafute kwa ajili ya kukamilisha biashara.

8. Heshima na uaminifu kati ya pande mbili ni nyenzo muhimi katika kukamilisha makubaliano ya biashara hasa katika muundo unaonufaisha pande zote. Ili kila mmoja anufaike na biashara husika ni athamini utu wa mwenzake lakini pia awe na uaminifu kwa kile anachohitaji kupata kutoka kwa mwenzake.

9. Unapojiandaa kwa ajili ya kuanza makubaliano ya dili za kibiashara unahitaji kujiuliza maswali ya kwa nini, nani, kipi na lini? Maswali haya yanatoa nafasi kwako kutafakari juu ya msingi wa majadaliano yenu ya kibiashara na sababu kuu ya kwa nini mnafanya makubaliano husika, kwa faida ya nani, juu ya bidhaa/huduma ipi na lini mnatakiwa kukamilisha biashara husika. Hapa utagundua kuwa baada ya majadiliano yenu mnatakiwa kila mmoja awe amefahamu jinsi mtakavyofanikisha kukamilisha biashara husika na masharti yapi yanatakiwa kutekelezwa kabla ya kukabidhiana bidhaa/huduma.

10. Fahamu ni lini unatakiwa kusema HAPANA au NDIYO juu ya biashara husika. Hii ni pande zote zinazohusika kwenye makubaliano ya biashara, iwe ni muuzaji au mteja unahitaji kutambua ukomo wako wa bei ya chini au bei juu ambayo upo tayari kutoa au kupokea. Pale ambapo unaona kuwa makubaliano hayaendani na mahitaji au uwezo wako huna budi ya kuachana na biashara husika ili kuokoa muda wa kufanya mambo mengine.

11. Chagua timu yako makini kama makubaliano ya biashara yanafanywa na watu wa taaluma mbalimbali. Mwandishi anatushirikisha kuwa ni kawaida makubaliano juu ya dili kubwa za biashara kuwashirikisha watu wa kada tofauti kwa ajili ya kila mmoja kushughulikia upande wa taaluma yake. Kutokana na hali hii, kama kiongozi wa timu unahitaji kuhakikisha unachagua watu ambao wanafahamu nini wanatakiwa kufanya na wana uzoefu wa kutosha katika makubaliano ya dili kubwa za kibiashara. Baada ya kupata timu ya wataalamu hakikisha kila mmoja unampa majukumu yake na mamlaka aliyonayo wakati wa zoezi la makubaliano ya dili za kibiashara.

12. Kabla ya kuingia kwenye makubaliano ya dili za kibiashara tumia muda wako kuwafahamu kwa kina wapinzani wako. Hapa mwandishi anatushirikisha kuwa kama umebahatika kufahamu watu ambao wanagombea dili husika hakikisha unatumia muda wako kufahamu nguvu na mapungufu waliyonayo. Pia, kama wewe ni mnunuzi/muuzaji mtarajiwa unahitaji kufahamu kwa kina uwezo wa muuzaji/mnunuzi ili kuondoa nafasi ya kushutukizwa katikati ya makubaliano ya dili za kibiashara. Mara zote kumbuka kuwa kadri unavyomfahamu kwa kina mpinzani wako ndivyo unakuwa na nafasi kubwa ya kushinda makubaliano ya dili ya kibiashara husika.

13. Katika makubaliano ya dili za kibiashara daima unahitaji kukumbuka kuwa kila sentensi inayotoka kwako ni lazima iwe ina masharti ndani mwake dhidi ya muuzaji/mnunuzi kwa kutegemea nafasi yako. Mfano, kama wewe ni mnunuzi unaweza kutumia sentensi kama “endapo utapunguza bei yako kwa asilimia 10 tunaweza kupunguza masharti ya kutufikishia mzigo” au “kama utakuwa tayari kufikisha mzigo mpaka kwenye anuani yetu basi sisi tupo tayari kutoa kiasi hiki cha bei”. Sentensi zote mbili zinatoa masharti ambayo muuzaji wa bidhaa anapaswa kuyatafakari kwa ajili ya kuboresha bei ya bidhaa yake.

14. Mara zote kama wewe ni muuzaji kumbuka kutangaza bidhaa yako kwa bei ya juu japo ukumbuke kuwa bei husika ni lazima iwe halisi ikinganishwa na thamani ya bidhaa/huduma. Mwandishi anatushirikisha kuwa kati majadiliano ya dili za kibiashara mara zote ni rahisi kushusha bei ya bidhaa/huduma lakini ni vigumu kupandisha bei zaidi ya bei iliyotolewa awali. Kutokana na ukweli huu, kama wewe unahitaji kuuza bidhaa/kutoa huduma ni lazima bei yako ya awali iwe juu ili pale itakaposhushwa uendelee kuwa kwenye sehemu ya faida. Vivyo hivyo, kama wewe ni mnunuzi unahitaji kutaja bei chini kabisa japo yenye uhalisia ili kupitia majadiliano wote mfikie bei ambayo kila upande utaridhika.

15. Kumbuka kuweka wazi masharti ya ziada wakati wa makubaliano ya dili za kibiashara. Mwandishi anatushirikisha kuwa wakati wa makubaliano wa dili za kibiashara ni sehemu pekee ambapo unahitaji kuweka wazi masharti yako. Mfano, kama wewe ni mnunuzi unahitaji kutaja masharti juu ya bidhaa husika kuhusiana na vifungashio, mwaka wa kutengenezwa, namna na lini mzigo unatakiwa uwe umefika, nani atahusika na gharama za usafirishaji, bima endapo mzigo hautafika salama n.k. Haya masharti ambayo yatakulinda wewe dhidi ya muuzaji kwani yanakuwa ni sehemu ya mkataba wa mauziano kati yako na muuzaji.

16. Kuwa mwepesi wa kumsoma mwenzako unayefanya nae makubaliano ya dili za kibiashara kwa ajili ya kugundua uelekeo wake. Mwandishi anatushirikisha kuwa wakati wa zoezi la makubaliano ya dili za kibiashara unahitaji kuwa macho muda wote kwa ajili ya kusoma hisia/ishara za yule unayetaka kufanya nae biashara. Hii ni pamoja na kumsoma dimina ya uso wake kwa kile anachozungumza pamoja na kuangalia lugha ya mwili muda wote mazungumzo yanavyoendelea. Kama makubaliano yanafanyika kupitia mtandao unaweza pia kujua hisia zake kupitia mtiririko wa mawasiliano yenu.

17. Tumia lugha ambayo una uhakika kuwa pande zote mnaelewana kwa ufasaha. Mwandishi anatushirikisha kuwa endapo unafananya biashara na mtu ambaye sio wa kabila au taifa lako unahitaji kuhakikisha unachagua maneno rahisi ili kila mmoja wenu aweze kushiriki makubaliano ya biashara husika. Hapa unahitaji kujifunza mbinu za kuongea na kusikiliza ikiwa ni pamoja kuongea kwa taratibu ili upande wa pili upate maana ya kile unachowasilisha.

Soma: Mambo Niliyojifunza Kwenye Kitabu cha So Smart But….: How Intelligent People Lose Credibility and How They Can Get It Back (Jinsi Watu Wenye Akili Wanavyopoteza Uaminifu na Jinsi ya Kuurejesha)

18. Baada ya kufanya majadiliano ya muda mrefu na wote mkakubaliana kwenye masharti ya kukamilisha dili husika sasa unahitaji kuwa makini pindi mnapokamilisha majadiliano yenu. Huu ni muda ambao kila mmoja anajifunga kwa kile ambacho ameahidi kutekeleza kwa ajili ya kukamilisha dili husika. Mwandishi anatushirikisha kuwa katika hatua hii ni muhimu kutiliana saini za makubaliano kwa ajili kulinda matakwa ya kila mmoja. Hivyo, kila upande hauna budi ya kusoma mkataba husika ili kujiridhisha kama umeweka yale yaliyokubaliwa wakati wa majadiliano.

19. Ili kupata matokeo mazuri kutoka kwenye makubaliano ya dili ya biashara husika unahitaji kuwa na nguvu ya kushawishi upande wa pili katika biashara husika. Nguvu inapatikana kupitia ujasiri wako, nguvu uliyonayo kwenye soko au ikibidi ujasiri wa kuondoka kwenye makubaliano huku ukiwa umeacha masharti yako ili endapo watajisikia kuyakamilisha wakutafute kwa ajili ya kukamilisha biashara husika.

20. Kabla ya kutia sahihi mkataba wa makubaliano jidhirishe kupitia kwa mwanasheria wako kama mkataba husika unatekelezeka kisheria. Mwandishi anatushirikisha kuwa mikataba ya makubaliano inatofautiana kutoa sehemu moja hadi nyingine au taifa moja na jingine. Kutokana na tofauti hizi, inabidi kupitia mwanasheria wako mjiridhishe kama yale mliyokubaliana yanatekelezeka kisheria kwa mjibu wa sera, sheria za taifa husika au sera za kampuni yako.

Karibuni kwenye fikra za kitajiri ili upate elimu hisiyokuwa na mwisho.

Born to Win ~ Dream Big

Augustine Mathias Bilondwa
Namba ya Simu: +255 786 881 155
Mwanzilishi wa Mtandao wa fikrazakitajiri.blogspot.com

Barua pepe: fikrazatajiri@gmail.com

UCHAMBUZI WA KITABU The Rules of Money: How to Make It and How to Hold on to It (Kanuni za Pesa: Jinsi ya Kuzitengeneza na Jinsi ya Kuendelea Kutengeneza Pesa Zaidi)

Fikra za Kitajiri Jumanne, Julai 11, 2017 Add Comment

Habari ya leo rafiki na msomaji wa mtandao wa fikra za kitajiri. Ni matumaini yangu kuwa unaendelea vizuri katika mapambano ya kuboresha maisha yako kwa kuhakikisha kila siku unakuwa bora zaidi kupitia ushindi mdogo mdogo. Leo hii ninakuletea uchambuzi maalumu wa kitabu cha The Rules of Money ambacho kimeandikwa na mwandishi mahiri na tajiri Richard Templar.

Kupitia kitabu hiki mwandishi anatushirikisha kanuni 107 za pesa ambazo kupitia uchambuzi huu nitakushirikisha kanuni zote ili uanze kuzitumia kwa ajili ya kutengeneza pesa zaidi na zaidi katika mchezo huu wa fedha. Kwa ujumla katika kitabu hiki tunafundishwa kuwa pesa hawezi kununua furaha au mapenzi yako bali pesa inaweza kununua kila aina ya vitu na hivyo kukuwezesha kumiliki kila aina vitu unavyohitaji. Lakini katika yote ni muhimu kukumbuka kuwa furaha ya kweli juu ya matumizi ya pesa yako inatengenezwa na wewe mwenyewe kutoka ndani mwako.

Kanuni hizi zimegawanyika katika makundi saba na kila kundi lina kanuni zinazokuhusu wewe na pesa yako. Kila kanuni imegusa kwa namna ambavyo unaweza kutengeneza pesa na hatua zipi unatakiwa kufuata kwa ajili ya kupata za ndoto yako. Kwa kina katika kila kundi nimekuchambulia kwa kina kanuni moja baada ya nyingine ili kukufikishia kile ambacho mwandishi ametushikisha kwa ajili ya kukuwezesha ufahame kanuni hizi kwa urahisi lakini pia uwe tayari kuzitumia kwa ajili ya kutengeneza pesa zaidi na hatimaye upate uhuru wa kifedha.

Katika makala hii ninakushirikisha kanuni kumi (10) kama sehemu ya utangulizi wa uchambuzi wa kanuni zote mia na saba (107) na kama unahitaji uchambuzi wa kanuni zote maelekezo ya namna ya kuzipata yapo mwishoni mwa makala hizi.

Karibu tujifunze wote kwa haya machache niliyokuchambulia katika kanuni kumi (10) za mwanzo;

SEHEMU YA KWANZA: FIKRI KITAJIRI (THINKING WEALTHY)

Mwandishi katika sehemu hii ya kwanza anatushirikisha kanuni ambazo kwa pamoja zina nia ya kutufumbua macho dhidi ya fikra, hisia au imani zetu dhidi ya fedha. Kwanza tunatakiwa kufahamu kuwa fedha ni dhana ambayo inaambatana na imani nyingi kulingana na sehemu ulipo. Kwa asili fedha inabebeshwa kila aina ya imani kwani ambao wanasema fedha ni mbaya au ni nzuri, ni vibaya kupenda pesa au ni vyema kupenda pesa na imani nyingine nyingi. Kwa ujumla unakiwa kufahamu kuwa imani ulizonazo juu ya pesa zina athari hasi au chanya dhidi ya nafasi yako kwenye uhuru wa kifedha. Jinsi unavyofikiria dhidi ya pesa inaweza kuwa chanzo cha wewe kuendelea kuwa masikini au kutofanikiwa katika yale unayofanya. Hivyo katika sehemu hii ya kwanza mwandishi anatushirikisha kanuni ambazo zinatoa mwongozo wa namna ya kufikri kitajiri na hatimaye kujenga msingi imara wa safari ya utajiri.

1. Kanuni ya Kwanza: Kila mtu anaweza kuwa na fedha anazozitaka, ni suala la yeye kujiweka sawa kwenye kanuni za kutengeneza fedha. Kuwa na pesa ni haki ya kila mmoja bila kujali rangi, kabila, umri, historia ya wazazi wake au utaifa wake. Kila siku inafungua mlango kwako kwa ajili ya kutumia fursa zilizopo ili kuweza kutengeneza pesa unazotaka na hivyo ni muhimu kwako kujifunza mbinu wanazotumia matajiri kutengeneza pesa zaidi na mbinu hizo zipo wazi kwa kila mmoja. Kitu pekee kinachoweza kukukwamisha ni wewe mwenyewe na mtazamo wako juu ya upatikanaji wa fedha. Kanuni hii ndio kanuni kuu ya kutengeneza pesa na kanuni nyingine zinahusu wewe kujijengea misingi ya ya kuendelea kutengeneza pesa zaidi na ziadi.

2. Kanuni ya Pili: Kuwa Na Maana Yako Juu Ya Neno “Utajiri”. Katika kanuni hii mwandishi anatushirikisha kuwa utajiri unaanza na wewe kufafanunua nini maana ya utajiri kwa mtazamo wako. Nini hasa unataka kupata ili ukishapata vitu hivyo ndo uone kuwa umekuwa tajiri. Hivyo kabla haujaanza safari ya utajiri anza kwa kuadaa orodha ya yale yote unayoyataka katika maisha yako ya utajiri. Hapa haupaswi kujifunga kwa kutengeneza picha finyu bali unatakiwa kuwa na fikra pana ambazo pengine zinakufanya uziogope kwa sasa.

3. Kanuni ya Tatu: Tengeneza Lengo Lako. Baada ya kuwa na maana yako ya utajiri ambayo ni sawa na kilele cha safari yako hivyo unapaswa kutengeneza lengo kubwa ambalo litakuwa ni njia ya kuelekea kwenye kilele hicho. Hapa unapaswa kuweka muda ambao unategemea kufikia kilele cha utajiri wako, eleza njia zipi zitatumika kufikia utajiri huo, ainisha changamoto ambazo ambazo unahisi zinaweza kukukwamisha na hatimaye kuwa na mpango wa kupambana na changamoto hizo. Lengo linatakiwa liwe linatekelezeka, lenye uhalisia na linatoka ndani mwako.

4. Kanuni ya Nne: Lifanye Lengo Lako Kuwa Siri. Unapoanza safari ya kuishi lengo kubwa ulilojiwekea ina maana kuwa unaanza maisha mapya ambayo yatakufanya uwe mtu wa tofauti ikilinganishwa na maisha yako ya zamani. Hivyo katika maisha haya mapya wapo wengi ambao hawatafurahia jinsi unavyobadilika kutokana na chuki zao au wivu kwa vile unaelekea kwenye maisha ya tofauti na wao. Kwa hali kama hii unatakiwa malengo uliyojiwekea yawe siri yako ili husikatishwe tamaa na maneno ya jamii inayokuzunguka.

5. Kanuni ya Tano: Watu Wengi Ni Wavivu Kufikia Utajiri Wao. Hakuna njia nyingine ya kuwa tajiri zaidi ya kufanya kazi kwa bidii. Ni lazima uwe tayari kufanya kazi kwa nguvu zako zote kuhakikisha unafanikisha malengo uliyojiwekea. Hakikisha unaamka asubuhi na kuanza kutekeleza majukumu yako ya kila siku na hata pale unapoenda kulala fanya hivyo ukiwa katika picha kubwa ya lengo kubwa la maisha yako.

Husitegemee kuwa tajiri kwa fedha za kurithi, fedha za bahati na sibu au fedha za kuokota. Watu wengi wanataka utajiri lakini hawapo tayari kujibidisha ili wafikie utajiri huo, hawapo tayari kujifunza, hawapo tayari kufanya kazi, hawapo tayari kutoa sadaka kwa ajili ya kuupata utajiri na mbaya zaidi wengi wana fikra hasi kuwa ili uwe tajiri ni lazima uende kwa wachawi au utajiri ni kwa ajili ya wateule wachache. Utajiri wa kweli hauko hivyo bali ni lazima uandaliwe kwa kutumia misingi na mifumo ambayo inakuhusisha wewe kama mhusika mkuu wa safari hii. Hii nikutokana na ukweli kwamba matajiri wote wana sifa kubwa ya kufanya kazi za ziada kiasi kwamba kazi wanazofanya kwa siku ni zaidi ya zile tunazofanya kwa mwezi mzima.

6. Kanuni ya Sita: Jifanyie Tathmini Ambayo Ni Ya Kweli. Ili uwe tajiri ni lazima ujifanyie upekuzi kwanza. Katika upekuzi huu unatakiwa kufahamu ni tabia zipi ambazo zimekufikisha hapo ulipo na hatimaye weka mikakati ya kukabiliana na tabia ambazo zinakukwamisha. Kaa chini na fikiria ni tabia zipi ambazo ukianza kuzifanya zitapelekea utajiri wako uongezeke na anza mara moja kuzifanyia kazi. Kuwa mkweli kwenye matumizi ya pesa yako, muda, marafiki na manunuzi yako. Kisha jenga tabia ya kutenga kiasi cha fedha kwenye kila shilingi inayoingia mkononi mwako kwa ajili ya uwekezaji wa muda mfupi na muda mrefu.

7. Kanuni ya Saba: Fahamu Imani/Kauli Zako Kuhusu Pesa Na Vyanzo Vya Kauli Hizo. Katika jamii tunazoishi kuna kila kauli juu ya fedha na utajiri kwa ujumla. Wapo wanaoamini kuwa pesa ni chanzo cha maovu yote, utajiri ni kwa wateule tu, matajiri ni watu wabaya, warafi, wachoyo, wachawi kwa maana ya kwamba hauwezi kuwa na fedha na kwa wakati huo huo ukawa msafi wa roho, ni afadhari kuwa maskini na kauli nyinginezo. Je wewe imani/kauli zako juu ya fedha na utajiri ni zipi? Pata muda wa kutafakari na hatimaye jipe imani/kauli mpya ambazo zitakupeleka kwenye mtazamo mpya juu ya pesa na utajiri.

8. Kanuni ya Nane: Fahamu kuwa Utajiri ni Mchakato na sio zawadi. Katika kutafuta utajiri ni lazima ujitoe kufanya kazi kwa bidii ili fedha zifuatie kama zawadi kwa bidii na ubunifu katika utendaji kazi wako. Kadri unavyofanyakazi kwa bidii na ubunifu ndivyo unavyopata pesa zaidi.

9. Kanuni ya Tisa: Andaa sababu zinazokusukuma kuwa tajiri. Hakikisha unaandaa sababu za kwa nini unataka kuwa tajiri. Eleza nini utafanyia pesa zako pindi ukiwa na pesa za ndoto yako, chagua ni starehe zipo utakuwanazo pindi ukiwa tajiri, sehemu zipi utapenda kutembelea, vitega uchumi vipi utapenda kuwa navyo n.k. Hapa unatakiwa kuandaa sababu ambazo zitakufanya uridhike na kufurahia utajiri wako badala ya kuja kuangamizwa na utajiri wako. Pia andaa orodha ya vitu ambavyo hautakuwa tayari kufanya kupitia utajiri wako ili kesho na keshokutwa uongozwe na hiyo kuepuka matumizi mabaya ya fedha zako.

10. Kanuni ya Kumi: Fahamu kuwa Pesa zinatengeneza Pesa. Tumia pesa zako kuhakikisha zinatengeneza pesa nyingine zaidi na zaidi. Ndio maana matajiri wanaendelea kuwa matajiri wakati masikini nao wanaendelea kuwa masikini. Hivyo kwa kutumia kanuni hii unatakiwa kutumia pesa kidogo ulizonazo sasa kwa ajili ya kuzalisha pesa zaidi na zaidi kwani hiyo ndo njia pekee ya kuwa tajiri. Hakikisha unatenga kiasi cha pesa katika pato lako kwa ajili ya kuwekeza ili kiasi hicho ndo kitumike kama mbegu ya kuzalisha pesa nyingine. Kama ilivyo kwa mkulima au mfugaji hawezi kula mbegu au mifugo yake yote na akategemea kuzalisha zaidi shambani au mifugo kuongezeka ndivyo ilivyo kwenye fedha. Uamzi upo mikononi mwako kati ya kuchagua kuwa masikini au kuwa kati ya matajiri.

Uchambuzi wa kina wa kanuni zote (107) umeandaliwa kwa mfumo wa pdf na unapatikana kwa gharama ya Shilingi za Kitanzania (TSHS) elfu tano tu (5,000/=). Uchambuzi wa kanuni zote una jumla ya kurasa 39 na ni kitabu ambacho unaweza kusoma kwenye simu yako ya mkononi kama ni simu janja (smart phone) au kwenye kompyuta mpakato (pc).

Kupata uchambuzi wa kanuni zote tuma pesa yako kwa njia ya M-pesa au Airtel Money kupitia namba zifuatazo:-

M – Pesa tumia namba: 0763 745 451 (Majina ni Augustine Mathias)

Airtel Money tumia namba: 0786 881 155 (Majina ni Augustine Mathias)

Baada kutuma pesa hiyo nitumie ujumbe kwenye namba ya airtel (0786 881 155) ukiwa na barua pepe yako ili nikutumie uchambuzi wa kanuni hizi moja kwa moja kwenye mtandao wako.

Karibu kwenye mtandao wa FIKRA ZA KITAJIRI ili upate elimu isiyokuwa na mwisho.

Born to Win~Dream Big

Augustine Mathias Bilondwa
Namba ya Simu: 0786881155
Mwanzilishi wa Mtandao wa fikrazakitajiri.blogspot.com

Barua pepe: fikrazatajiri@gmail.com

Ukurasa wa facebook: Fikra za Kitajiri: Fikri na Kutenda Kitajiri: Elimika na Tajirika