FIKRA ZA KITAJIRI: Oktoba 2017

Archive for Oktoba 2017

Mambo Niliyojifunza Kwenye Kitabu cha I Declare 31 Promisies To Speak Over Your Life (Ahadi ya Matamko 31 Dhidi ya Maisha Yako)

Fikra za Kitajiri Jumanne, Oktoba 24, 2017 Add Comment

Habari ya leo rafiki na msomaji wa mtandao wa fikra za kitajiri.

Ni matumaini yangu kuwa unaendelea kupambana kwa ajili ya kuboresha maisha yako. Karibu tena katika mtandao wa FIKRA ZA KITAJIRI kwa ajili ya uchambuzi wa kitabu cha wiki hii. Leo hii ikiwa ni wiki ya 41 katika kipindi cha mwaka 2017 naendelea kukushirikisha uchambuzi wa vitabu mbalimbali kwa ajili ya kukupa maarifa ambayo ni wajibu wako uyatumie kubadilisha kila sekta ya maisha yako.

Makala hizi za uchambuzi wa vitabu zimekuwa zikikufikia kila wiki kwa kadri ambavyo napata muda wa kukushirikisha kile ninachojifunza kutoka kwenye vitabu vya maarifa mbalimbali. Ni matarajio yangu kuwa muda ninaotumia kukushirikisha uchambuzi wa vitabu umekuwa wa msaada mkubwa kwako katika kubadilisha maisha yako. Hata hivyo, mtandao huu bado unahitaji maoni/ushauri au shuhuda kwa namna ambavyo umekuwa wa msaada kwako au namna ambavyo unahitaji makala hizi ziboreshwe zaidi (tuma maoni/ushauri/ushuhuda wako kupitia barua pepe fikrazakitajiri@gmail.com).

Ili uendelee kunufaika na makala za mtandao huu BONYEZA HAPA na ujaze fomu kisha bonyeza “jiunge/subscribe” utakuwa umejiunga na mtandao huu. Kwa kujiunga na mtandao huu utapata makala zinazochapishwa humu moja kwa moja kwenye barua pepe yako bila malipo yoyote.

Kitabu cha wiki hii ni “I Declare 31 Promisies To Speak Over Your Life” kutoka kwa mwandishi na mzungumzaji mahiri Joel Osteen. Joel ni Mchungaji Mkuu wa Kanisa la Lakewood Church lililopo Huston, Texas nchini Marekani. Amekuwa muhubiri, mwandishi, kiongozi na mhamasishaji kwa watu wa rika mbalimbali kupitia kazi zake. Kupitia kanisa lake pekee kwa wiki linapata wahumini wasiopungua 45,000. Joel Osteen ana video za mafundisho mbalimbali ambazo unaweza kuzipata bure kabisa kupitia mtandao wa Youtube.

Kupitia kitabu hiki Joel anatushirikisha ahadi 31 za matamko dhidi ya maisha yako ambazo amezigawa kwa muundo wa siku. Ahadi hizi unaweza kuzinena dhidi ya nafsi yako katika kipindi cha mwezi mmoja na hatimaye ukafanikiwa kubadilisha matamko ambayo yamekuwa kandamizi katika hisitoria ya maisha yako. Mara nyingi tumekuwa tukisikia msemo “maneno uumba” na ndicho mwandishi anachotushirikisha kupitia zawadi ya kitabu hiki.

Kadri tunavyoongea kauli nzuri au mbaya ndivyo tunaumba kile ambacho tumenena na hii ni kutokana na ukweli kwamba maneno yana nguvu katika kuumba. Watu wengi wanaongea kauli mbaya dhidi ya nafsi zao, dhidi ya familia zao au dhidi ya maisha yao ya baadae pasipokugundua nguvu ya kauli hizo katika maisha yao. Hizi ni baadhi ya kauli ambazo zinaongelewa na wengi wetu katika jamii zinazotuzunguka; mfano kauli kama (a) mie ndo niwe tajiri! (b) mtoto huyu hana akili sawa na ndugu zake (c) ugonjwa huu sidhani utaniacha salama (d) biashara ni ngumu siwezi kukabiliana na changamoto zake; na kauli nyinginezo nyingi. Maneno matakatifu yanasema kuwa “tutakula matunda ya maneno yetu” ikiwa na maana kuwa tutapata kulingana na kile ambacho tumekuwa tunajiongelea katika maisha yetu ya kila siku.

Kwa ujumla kama mwongozo wa maisha yako unatakiwa uhakikishe maneno ya kinywa chako yanatolewa katika hali ambayo unahitaji maisha yako yaonekane – maisha yenye msingi wa uchanya kwenye kila hali/tukio unalokabiliana nalo. Tambua kuwa kamwe hauwezi kupata mafanikio wakati mara zote unajiongelea kauli za kushindwa, mara zote hauwezi kushiba wakati wewe mara zote unajinenea kauli za njaa au hauwezi kupata watoto wema wakati mara zote unanena maneno mabaya dhidi yao. Kupitia vinywa vyetu tunaweza kubariki au kulaani maisha yetu ya baadae na hivyo kila mmoja wetu anahitaji kulinda sana maneno ya kinywa chake.

Karibu tujifunze machache niliyojifunza kwenye kitabu hiki:

1. SIKU YA 1: AHADI. Maajabu ya Mungu na baraka zake zilizo kuu kuliko zote zitanishukia katika maisha yangu. Nitaona mlipuko wa mapenzi ya Mwenyezi Mungu dhidi ya nafsi yangu. Wema wa Mungu wenye kunitakia ongezeko katika kila hali kupitia neema zake kuu. Mungu ataniinua kuliko nilivyowahi kuota juu ya mema yake katika historia ya maisha yangu kwani baraka zake nyingi zipo katika njia zangu. Hii ndio ahadi yangu siku ya leo. Mwandishi anatushirikisha kuwa ahadi hii inalenga kukupa tumaini jipya katika maisha yako. Yawezekana umekuwa katika nyakati ngumu kiasi ambacho umekata tamaa na kuona kuwa hakuna nuru tena mbele yako. Maandiko matakatifu (Waefeso 2:7) yanatupa tumaini kuwa Mungu ni mwingi wa neema na wema wake kwetu hauna kiasi.

2. SIKU YA 2: AHADI. Nahadi nitanufahaika na uaminifu wa Mungu, sitakuwa na wasiwasi wal hofu huu ya uaminifu wake kwa waja wake. Uaminifu wangu utakuwa ndani yake muda wote nikiamini kuwa kamwe hataniacha. Nitatumia kila zawadi ambayo Mwenyezi Mungu ameiweka ndani yangu na nitaishi kwa kadri ya mapenzi yake. Nitatimiza kusudi la maisha yangu katika kila nifanyalo. Hii ndio ahadi yangu siku ya leo. Kila mmoja wetu ana ahadi ambazo Mungu ameziweka juu yake. Yawezekana umetumia muda mrefu ukisubiri ahadi hizi zitimie katika maisha yako bila mafanikio lakini mwandishi anatushirikisha kuwa hii haimaainishi kuwa Mungu amekusahau. Watu wengi wanashindwa kuona ahadi hizi zikitimia katika maisha yao kwa vile wanakata tamaa mapema. Kupitia ahadi unapaswa kutambua kuwa ahadi zake Mwenyezi Mungu dhidi ya nafsi yako zipo hai na zitatimia katika maisha yako endapo utaendelea kupambana kupitia vipaji ulivyopewa. Timiza wajibu wako na mkono wake wa kuume upo juu yako mara zote (Waebrania 13).

3. SIKU YA 3: AHADI. Natambua kuwa siku ya leo kuna neema nyingi dhidi ya nafsi yangu. Nina nguvu, ukakamavu, ujasiri na uelewa dhidi ya maamuzi na matendo yangu. Hakuna kikwazo chochote ambacho kitanizuia kukamilisha kile ambacho nimekusuduia kufanya katika kutimiza mapenzi yake Mwenyezi Mungu. Natambua kuwa kila changamoto katika maisha yangu ni kwa ajili ya kunijenga zaidi ili nikomae kuliko nilivyokuwa kabla ya changamoto husika. Mimi ni mshindi na hivyo nitashinda kila kikwazo/changamoto. Hii ndio ahadi yangu siku ya leo. Kama vile Waislaeli walivyopewa ‘manna’ kila siku ndivyo ilivyo kwetu, kila siku tunapewa neema mpya katika maisha yetu. Kila siku tunapewa neema ya hekima, neema ya busara, neema ya amani, neema ya kupendana na neema ya kusameheana. Hivyo ni wajibu wetu kila siku kuhakikisha tunatumia neema hizi kwa ajili ya kuboresha kila sekta ya maisha yetu.

4. SIKU YA 4: AHADI. Naahidi kuwa bado sijachelewa kutumia Baraka nilizojaliwa na Mwenyezi Mungu kwa ajili ya kukamilisha kila kitu ambacho Mungu amekusudia katika maisha yangu. Mlango kwa ajili ya fursa bado upo wazi kwa ajili yangu. Mungu ana makusudi mema na mimi na kila wakati anaendelea kuniandaa kwa ajili ya kutimiza ndoto zangu. Huu ndio wakati sahihi, nipo tayari kutimiza ndoto zangu. Hii ndio ahadi yangu. Kila mmoja wetu Mungu ameweka vitu vya kipekee ndani mwake. Hata hivyo, tumeshindwa kutumia upekee huu kutokana na tabia za kusema tupo bize sana, nilijaribu nikashindwa hivyo siwezikuridia tena, mimi sina kipaji hicho – siwezi na nyinginezo nyingi. Hata kama umeenda nje ya ndoto za maisha yako habari njema ni kwamba Mungu aliye hai kamwe hatokuacha endapo utasimama katika nafasi yako ili kukamilisha ndoto za maisha yako (2Timotheo 1:6).

5. SIKU YA 5: AHADI. Najivunia nafasi ya Mwenyezi Mungu na kila jambo ambalo ameniwezesha kwenye maisha yangu. Kamwe sitabweteka na watu, fursa na upendo wake bali kila siku nitaendelea kutafuta watu wapya, fursa pamoja na kuvutia mapenzi yake zaidi. Nitaendelea kutenda yaliyo mema badala kutenda mabaya. Nitaendelea kumshukuru kwa jinsi nilivyo na yale niliyonayo badala ya kuendelea kulalamikia yale ambayo nimekosa. Kila siku nitaichukulia kama zawadi katika maisha yangu na hivyo roho yangu itajawa na sifa na utukufu kwa ajili ya upendo wake mkuu. Hii ndio ahadi yangu. Mwandishi anatushirikisha kuwa maisha yetu hayana uhakika wa kuwa siku kama ya leo mwaka ujao tutakuwepo katika dunia hii. Ni kutokana na ukweli huu tunatakiwa kila siku tuishi kana kwamba ndo siku yetu ya mwisho katika maisha ya ulimwengu huu. Ni kutokana na ukweli huu hatupaswi kuishi maisha ya malalamiko, machukizo, uchoyo, wivu na msengenyo bali kila dakika katika maisha yetu itumike kufanikisha kusudi la uwepo wetu hapa duniani.

6. SIKU YA 6: AHADI. Naahidi kuacha urithi wa imani thabiti kama alama ya maisha yangu kwa vizazi vijavyo. Maisha yangu yatakuwa yenye ubora na uaminifu. Kwa vile napanda hatua kiimani na kutenda matendo mema ni matarajio yangu kuwa watu wengi watanifuata kwa ajili ya utimilifu wa utukufu wa Mwenyezi Mungu. Hii ndio ahadi yangu. Mwandishi anatushirikisha kuwa kadri unavyotenda wema na kuishi misingi ya imani ndivyo Baraka zake Mwenyezi zitamiminika katika maisha yako na hivyo kushibishwa katika kila sekta ya maisha yako. Shibe hii ni pamoja na amani ya roho, afya njema pamoja na wema kutoka kwa jamii inayokuzunguka.

7. SIKU YA 7: AHADI. Natambuwa kuwa Mungu ana mipango mikubwa kwa ajili ya maisha yangu. Anaongoza hatua zangu hata kama yawezekana sijui ni kwa jinsi gani miujiza yake inatendeka katika maisha yangu lakini bado natambua kuwa Mungu hashangazwi na tabia yangu hiyo. Mungu ni mwingi wa rehema, upendo na uvumilivu hata nyakati ambazo naenda kinyume na mapenzi yake. Hata hivyo natambua kuwa katika nyakati ambazo yeye amekusudia kutenda miujiza yake katika maisha yangu, kila kitu kitakwenda sawa. Hii ndio ahadi yangu. Ahadi inatokana na ukweli kwamba maandiko yanatuambia kuwa kila mmoja siku za maisha zimeandikwa katika kitabu cha Mwenyezi Mungu kuanzia mwanzo wa maisha yako hadi mwisho wake. Hivyo Mungu anatutambua mafanikio na changamoto tunazopitia katika kila siku ya maisha yetu.

8. SIKU YA 8: AHADI. Natambua kuwa mipango ya Mwenyezi Mungu dhidi ya maisha yangu ipo karibu kutimia. Mipango hii haitasimamishwa na mwanadamu wala changamoto ya aina yoyote ile. Mungu atanipatia majibu ya matatizo au changamoto zote ambazo nitakutana nazo katika kutimiza ndoto za maisha yangu. Watu wema na mapito sahihi yananisubilia kwa ajili ya kutimiza ndoto hizi. Nipo tayari kutimiza wajibu wangu kwa ajili ya ndoto hizi. Hii ndio ahadi yangu. Mwandishi anatushirikisha kuwa Mwenyezi Mungu anajua ni nyakati zipi atatimiza mipango yake kwetu hata kama nyakati ambazo sisi kama wanadamu hataturajii miujiza yake. Maandiko yanatukumbusha kuwa Mungu ni mwaminifu naye si sawa na mwanadamu kwani akiahidi anatimiza.

9. SIKU YA 9: AHADI. Natambua kuwa miujiza isiyotarajiwa inakuja katika maisha yangu. Muda si mrefu nitatoka katika hali ya kuwa na uchache na kuingia kwenye hali ya kutosheka kwa kila hali/tukio katika kila sekta ya maisha yangu. Wajibu wangu ni kusimama imara kwa ajili ya kupokea Baraka hizi na kuziishi katika maisha yangu ya kila siku. Naye Mwenyezi Mungu atafungua milango yake ya asili kwa ajili ya mafanikio yangu (Waefeso 3:20). Hii ndio ahadi yangu. Maandiko yanasema kuwa ukiwa na imani katika mambo madogo naye Mwenye Mungu atakuzawadia kwa mambo makubwa (Mathayo 25:21).

10. SIKU YA 10: AHADI. Natambua kuwa Mungu ataharakisha mipango yake dhidi yangu katika maisha yangu kwa kadri ninavyoendelea kumwamini. Nitatimiza ndoto zangu ndani ya muda mfupi kuliko ambavyo nimewahi kufikiria. Haitakuchukua mwaka kumaliza madeni yangu au kukutana na watu wema katika maisha yangu. Mungu anatenda miujiza kwa kasi kuliko ilivyowahi kutokea na hivyo atanipa ushindi muda si mrefu tofauti na nidhaniavyo. Hii ndio ahadi yangu. Mwandishi anatushirikisha kuwa kama ambavyo Yesu aliweza kutengeneza muujiza wa kugeuza maji kuwa mvinyo bora ndani ya dakika chache ndivyo pia atafanikisha miujiza katika maisha yako ndani ya siku chache. Ili miujiza hii iweze kufanyika ni lazima kwanza uamini kuwa Mungu anaweza kukutendea maajabu kwa maana ya kwamba ni lazima uwe tayari kutekeleza wajibu wako.

11. SIKU YA 11: AHADI. Kwa kuwa namwabudu na kumuheshimu Mwenyezi Mungu natambua kuwa atanishibisha na kunitosheleza katika kila sekta ya maisha yangu. Mungu atatenda kwa wingi na ziada nazo Baraka zake zitapita kiasi katika maisha yangu. Natambua kuwa ili haya yote yatimie ni lazima niwe sehemu sahihi na kwa wakati sahihi. Watu wote watakuwa wema kwangu kwa ajili ya kukamilisha miujiza ya maisha yangu. Nami nimezungukwa na wema wa Mungu. Hii ndio ahadi yangu. Mungu anawapenda wale wote wanaotii sheria zake na hivyo uwazidishia katika kila hali kwenye maisha yao. Unachotakiwa kufanya ni kuishi sheria zake na matokeo yake ni kupendwa na kila mtu na hatimaye utapata mafanikio kwenye kila sekta ya maisha yako (biashara au kazini kwako).

12. SIKU YA 12: AHADI. Mimi ni wa kipekee na wa ajabu na wala sio mtu wa kawaida hivyo nastahili kupata matokeo yasiyo ya kawaida. Kati viumbe vyote vilivyoumbwa, Mungu muumba anajivunia kwa kuniumba. Mimi ni sawa na kito cha thamani kwake. Nami sitamwangusha bali nitaendelea kumwabudu na kumtukuza kwani mimi ni mtoto wake na nimeumbwa kwa sura yake. Hii ndio ahadi yangu. Tunaishi katika jamii ambayo inaweza kututazama kwa jicho tofauti na Mungu anavyotutazama. Jamii inaweza kutuona kuwa sisi si chochote na hatimaye kama ni wepesi wa kukubali tutazama kwenye mtazamo wa jamii. Matokeo yake ni kuishi maisha ya kawaida ambayo si makusudi ya Mungu (Waefeso 10:2).

13. SIKU YA 13: AHADI. Natambua kuwa Mungu analeta siku ya mafanikio na ukuaji kwenye kila sekta ya maisha yangu. Nami sipo tayari kukwamishwa na vizuizi vya ulimwengu huu kwani nipo tayari kubadilika kwa ajili ya kupokea mafanikio na ukuaji huu. Milango mipya ya fursa, mahusiano mapya, baraka mpya na upendo wa kila hali upo mbele yangu. Hii ndio ahadi yangu. Mungu anaongoza hatua zako na yupo tayari kufungua milango ya asili kwa ajili ya mafanikio yako. Hapa unahitaji kukumbuka kuwa kila changamoto unayopitia ni sehemu ya kukufanya ukue zaidi kwa ajili ya maisha yako ya baadae.

14. SIKU YA 14: AHADI. Naahidi kutumia maneno ya kinywa changu kwa ajili ya kuwabariki watu badala ya kuwalaani. Nitaongelea wema na ushindi badala ya kuongelea ubaya dhidi ya familia yangu, marafiki na jamii inayonizunguka. Maneno kama wewe ni mzuri, una kipaji cha hali ya juu, wewe ni wa pekee, najivunia kuwa karibu na wewe na utakuwa mtu mkubwa katika maisha yako yatakuwa sehemu ya maongezi yangu ya kila siku dhidi ya watu ninaokutana nao. Hii ndio ahadi yangu. Maneno haya ya ushindi yana nguvu kubwa ya kubadilisha watu na hivyo kupitia maneno hayo unakamilisha uumbaji wa Mwenyezi Mungu kwa watu wake.

15. SIKU YA 15: AHADI. Natambukuwa naianza siku hii nikiwa na akili timamu zenye uchu wa kushinda kuliko kushindwa kwenye jambo lolote lile. Kwa imani nipo vizuri kiuwezo, nimetiwa mafuta, nina vifaa vyote vya ushindi na nina nguvu za ushindi. Mawazo yangu yanaongozwa na neno la Mungu wala hakuna kikwazo ambacho kitanishinda kwa kuwa akili yangu imewekewa ushindi. Hii ndio ahadi yangu. Ahadi za Mungu zipo katika wakati timilifu uliopita na zinaonesha kuwa tayari zipo ndani mwako, wajibu wako ni kuzifanya ahadi hizi ziwe timilifu katika maisha yako. Hii haijalishi nyakati unazopitia kwa sasa iwe kimahusiano, kiuchumi, kikazi au kijamii bali wajibu wako unahitaji kujisema kuwa Mungu ana makusudi mema na mimi naye ahadi zake sio za uongo. Kupata baraka hizi unahitaji kuongea, kutembea, kutenda, kufikiri, kufurahi na kuvaa kama mbarikiwa wa Mungu.

16. SIKU YA 16: AHADI. Nitaishi maisha ya uponyaji nikiguswa sana na mahitaji ya wengine wanaonizunguka. Nitawainua walioanguka, nitawahuisha waliovunjika moyo na kuwapa hamasa waliokata tamaa. Nitatimiza haya yote kwa wema na huruma. Sitasubulia miujiza itokee bali nitakuwa sehemu ya kutimiza miujiza hii kwa kuonesha upendo wa Mungu kila sehemu ninapoenda. Hii ndio ahadi yangu. Kazi kubwa tuliyopewa katika maisha haya nikufuta machozi watu walio kwenye maisha ya huzuni. Sasa kila mmoja anatakiwa kujitazama upya kama kweli amakuwa sehemu ya kuwafariji watu au amekuwa sababu ya kuwaumiza watu.

17. SIKU YA 17: AHADI. Naahaidi kuwa nitakuwa imani yangu itaongozwa na na vitendo kwani imani bila vitendo imekufa. Nitaonesha imani yangu kwa kuchukua hatua thabiti na za ujasiri ili kudhihirisha kile ambacho Mungu ameweka ndani ya moyo wangu. Imani yangu haitafichwa bali itaonekana. Natambua kuwa kadri nitavyoonesha imani yangu ndivyo Mungu atakavyoonekana katika maisha yangu na kutenda mambo ya kushangaza katika maisha yangu. Hii ndio ahadi yangu. Mara zote penye nia pana njia hivyo husikubali kukatishwa tamaa na changamoto za muda kwani kufanya hivyo utajikuta unakimbia ushindi ambao ulishatayarishwa kwa ajili yako (Marko 2:5).

18. SIKU YA 18: AHADI. Natambua kuwa mafanikio yanakuja katika maisha yangu, mpasuko wa ghafla wa wema wa Mungu. Mafuriko ya nguvu za Mungu, mafuriko ya uponyaji, mafuriko ya hekima, mafuriko ya neema na mafuriko ya upendo vyote kwa pamoja vinakuja katika maisha yangu. Mimi ni mshindi na nimeamua kuishi maisha ya ushindi na hivyo natarajia Mungu anizidishie wema wake na anishangaze kwa huruma yake. Hii ndio ahadi yangu. Umeumbwa na nguvu ya ajabu ambayo hakuna kinachoweza kuisimamisha. Mungu anaporuhusu mafuriko yake katika maisha yako hakika hakuna wa kuyazuia mafuriko hayo.

19. SIKU YA 19: AHADI. Natambua kuwa kuna upako kwa ajili ya urahisi wa hatua zangu. Mungu yupo upande wangu akinyoosha sehemu zote zilizopinda kwani kwake mzigo unakuwa mwepesi. Sitaangaika tena, kwani yote yaliyokuwa magumu sasa yatakuwa mapesi. Neema na baraka zake zimenipa nuru na kuondoa mafadhahiko yote. Hii ndio ahadi yangu. Mungu anasema nira yake ni rahisi na mzigo wake ni mwepesi hivyo wote tunakaribishwa kwake kwa ajili ya kupata makuu yake.

20. SIKU YA 20: AHADI. Natambua kuwa mimi ni mwenye amani na mpole na hivyo sitaruhusu watu au hali yoyote kuharibu amani ya roho yangu. Nitainuka dhidi ya changamoto yoyote ile kwani Mungu amenipa nguvu za kushinda. Nachagua kuishi maisha ya furaha na amani ili ni mpe nafasi ya Mungu kutenda kazi yake katika maisha yangu. Hii ndio ahadi yangu. Kadri unavyoruhusu maneno au matendo ya watu kukuchukiza au kuharibu amani yako ndivyo unaruhusu watu watawala maisha yako. Watu wana haki ya kuongea au kutendo wanayopenda katika maisha yao dhidi yako lakini una mamlaka ya kupuuza maneno au matendo yao.

21. SIKU YA 21: AHADI. Natambua wema wa ajabu wa Mungu katika maisha yangu. Mungu ataniwezesha kutimiza yale ambayo mimi kama mimi siwezi kuyatekeleza kwa akili yangu ya ubinadamu. Fursa za ajabu, uponyaji, kuuhishwa pamoja na mafanikio vyote vipo njia kwa ajili ya utimilifu katika maisha yangu. Nami nitapata nguvu, afya, hekima na busara. Nitagundua talanta ambazo sikuwahi kuzigundua kuwa ninazo katika maisha yangu na hatimaye nitatimiza ndoto zangu nilizojaliwa na Mwenyezi Mungu. Hii ndio ahadi yangu. Je kuna jambo gumu kwa Mwenyezi Mungu? (Mwanzo 18:14). Je unadhani ndoto zako ni ngumu kwa Mungu? Maandishi yanasema kuwa endapo mtaondoa vikwazo vyote juu yangu nami nitashangaza kwa wema wangu (2Wakorintho 9: 8 – 9).

22. SIKU YA 22: AHADI. Naahaidi kuishi maisha ya ushindi kwani nimeumbwa kwa sura yake Mwenyezi Mungu na hivyo nina vinasaba (DNA) za ushindi. Mimi ni kichwa na kamwe sio mkia wala wa kawaida. Nimevishwa kilemba cha ushindi na mara zote nipo juu wala sio mtu wa chini. Nitaishi maisha yenye kusudi, shauku, shukrani na utukufu kwani sasa natambua kuwa haya ndio maisha ambayo niliumbwa kwa ajili ya kuishi. Hii ndio ahadi yangu. Mungu anatuona sisi kama washindi/wafalme na wala sio watu walioshindwa (Warumi 5:17). Kwa vile bado una uhai wewe bado ni mtawala na hivyo hupaswi kukata tamaa.

23. SIKU YA 23: AHADI. Naahaidi kuwa mimi nipo kwa ajili ya kuwajenga watu. Nitatafuta fursa kwa ajili ya kuwahamasisha wengine ili watumie vipaji walivyonavyo kwa ajili ya kutimiza ndoto zao. nitaongea maneno ya ushindi na imani kwa ajili ya kuwahakikishia, kuhidhinisha na kuwawezesha kuwa wao ni wa thamani kubwa. Nitawaita kwa ajili ya kutambua mbegu ya ukuu iliyopo ndani mwao ili hatimaye waweze kuishi maisha yenye kusudi la muumba. Hii ndio ahadi yangu. Kila mmoja anahitaji kuambiwa sifa zake kuu alizonazo ili kupitia maneno ya wanaomzunguka aweze kukua kutoka hatua moja hadi nyingine. Kuwa mmoja kati ya watu wanaowabariki watu wanaowazunguka.

24. SIKU YA 24: AHADI. Nahaidi kuwa nitanena maneno chanya ya imani na ushindi dhidi ya nafsi yangu, familia yangu pamoja na nyakati zijazo za maisha yangu. Sitatumia maneno yangu kuelezea hali yangu badala yake nitatumia maneno yangu kwa ajili ya kubadilisha niliyonayo. Nami nitaita wema, huruma, upendo, ushindi na uhuishwaji wa nafsi zote kwa ajili sifa na utukufu kwake Mungu. Sitamwambia Mungu namna matatizo yangu jinsi yalivyo na nguvu bali nitayaambia matatizo yangu jinsi Mungu wangu alivyo na nguvu kupita vitu vyote. Hii ndio ahadi yangu. Mara zote ongelea ushindi katika maisha yako badala ya kujikita kwenye kushindwa au kukata tamaa.

25. SIKU YA 25: AHADI. Naahaidi kuwa maisha yangu si ya kuishi tu bali nitaishi maisha ya mafanikio pamoja na changamoto zote ambazo zipo mbele yangu. Najua kuwa kila kikwazo ni kwa ajili ya kuanza upya na sio muda wa kudumaa katika kufikia mafanikio ya ndoto zangu. Natambua namna ambavyo hatua moja inavyoweza kubadilisha kila sekta ya maisha yangu na hivyo nitachukua hatua muda wote. Hii ndio ahadi yangu. Mungu anaweza kuzidisha muda wako na kukuwezesha kutimiza kila jambo la muhimu katika maisha yako.

26. SIKU YA 26: AHADI. Nitachagua imani dhidi ya hofu na hivyo nitayafikiria yaliyo mema na chanya katika hali ya maisha yangu. Nitatumia nguvu nilizonazo sio kwa ajili ya kuwa na hofu bali kwa ajili ya kuamini kwani hofu haina nafasi katika maisha yangu. Sitatoa nafasi ya kudumu kwenye mambo hasi wala mawazo ya kukatisha tamaa kwani akili yangu imejikita kwa yale ambayo Mungu ananiwazia. Kwani natambua mpango wake kwa ajili yangu ni wa ushindi, mafanikio na wingi/shibe kwenye kila sekta ya maisha yangu. Hii ndio ahadi yangu. Hofu na imani vyote kila kimoja kinamfanya mtu awe na mtazamo kuwa kuna jambo lisiloonekana litatokea kwa baadae na vyote kwa pamoja vinakinzana. Hii ina maanisha kuwa ukiamua kuwa na hofu badala ya imani, maisha yako yatatawaliwa na matendo ya hofu (Ayubu 3:25).

27. SIKU YA 27: AHADI. Natambua kuwa nina kila aina ya vifaa na nyenzo kwa ajili ya utimilifu wa kazi nzuri ambazo Mungu amepanga dhidi yangu. Mimi nipakwa mafuta na kutiwa nguvu na Muumba wa ulimwengu. Kila aina ya vikwazo na vifungo vimefunguliwa dhidi yangu nami nipo huru na hivyo ni muda wangu wa kung’aa kama kito cha thamani. Nitainuliwa juu na kushinda vikwazo vyote kwa ajili ya kushuhudia kila aina ya ufanisi katika maisha yangu. Hii ndio ahadi yangu.

28. SIKU YA 28: AHADI. Naahaidi kuwa nitamwomba Mwenyezi Mungu vitu vikubwa katika maisha yangu. Nitaendesha sara kwa ajili ya kuendelea kutegemea kupata na kuwa na imani juu ya matokeo makubwa. Nami sitayumbishwa na mawimbi katika nyakati za changamoto kwenye maisha yangu bali katika nyakati hizi nitamwomba Mungu kwa ajili ya kuonesha uwepo wake kwani natambua hakuna linaloshindikana kwake. Hii ndio ahadi yangu. Mara nyingi tunahisi kuwa hatupaswi kuomba mambo makubwa kutoka kwa Mungu lakini maandiko yanasema kuwa tunashindwa kupata kwa vile tunashindwa kuomba (Yakobo 4:2 & Zaburi 2:8). Tunahitaji kuomba tena bila kuchoka tukiongozwa na imani (Marko 11:23).

29. SIKU YA 29: AHADI. Natambua kuwa Mungu anaweka mambo sawa kwa ajili ya ufanisi wa maisha yangu. Kupitia yeye natakiwa kuwa na mpango kazi wa maisha yangu. Hata kama kuna vitu ambavyo kwa sasa sivielewi lakini sitaogopa kwani ni suala la muda tu. Kwani ipo siku maarifa yote yatafunuliwa kwangu nami nitaona mpango wa ajabu wa Mungu ukinipeleka sehemu ambazo sikuwa kuziwaza. Hii ndio ahadi yangu. Haupaswi kushindwa kuwa mvumilivu kwani maisha kwako bado mpaka pale Mungu atakaposema sasa basi.

30. SIKU YA 30: AHADI. Natambua kuwa Mungu anaongoza hatua zangu kwa kuhakikisha kuwa mapito yangu yananyoshwa ajili ya mafanikio yangu. Mpaka sasa tayari ameshaniandalia watu sahihi wa kufanya nao kazi, fursa sahihi pamoja na majibu ya changamoto zote ambazo nitakutana nazo katika safari yangu ya mafanikio. Hakuna mtu wala magonywa wala vikwazo ambavyo vitasimamisha makusudi yake katika maisha yangu kwani yote aliyoahidi katika maisha yangu yatatimia muda si mrefu. Hii ndio ahadi yangu. Mungu mwenye nguvu atakupigania kwenye kila hali na hatimaye utashinda (Kutoka 9:1 - 35).

31. SIKU YA 31: AHADI. Naahaidi kubadilisha kila tabia ambayo inaenda kinyume na maono ya Mungu katika maisha yangu. Natambua kuwa magonjwa, shida, ukosefu wa kila hali na ufinyu wa pesa ni vitu ambavyo napitia tu na muda si mrefu vyote hivi vitakuwa ni historia. Sitaendeshwa tena na yale ninayoyaona bali nitaendeshwa na yale ninayoyatambua. Mimi ni mshindi kamwe sitashindwa. Hii ndio ahadi yangu. Hapa mwandishi anatushirikisha umuhimu wa kuona kuwa hali tunazopitia ni mapito tu na muda si mrefu Mungu atatenda miujiza yake (2 Wakorintho 4:13).

Haya ni machache ambayo nimeweza kukushirikisha kati ya mengi yaliyo kwenye kitabu hiki. Kupata nakala ya kitabu hiki BONYEZA HAPA na ujiunge na mtandao wa fikra za kitajiri kisha nitumie ujumbe wa kuomba kitabu hiki kupitia barua pepe fikrazakitajiri@gmail.com.

Niendelee kukuomba usambaze jumbe hizi kwa kadri uwezavyo ili yale unayojifunza yawafikie wengi na hatimaye tufanikiwe kuibadilisha dunia hii kuwa mahali pazuri pa kuishi (Unaposambaza makala hizi hakikisha haukopi na kupest badala yake share link ili hatimiliki za mwandishi wa makala ziheshimiwe). Nakutakia mapambano mema.

PATA UCHAMBUZI WA KITABU CHA THE RULES OF MONEY ( KANUNI ZA PESA)

Mwandishi Richard Templar katika kitabu hiki ametushirikisha kanuni 107 ambazo kila mtu anaweza kuzitumia kutengeneza pesa na hatimaye kuwa tajiri. Uchambuzi wa kina wa kanuni zote (107) umeandaliwa kwa mfumo wa pdf na unapatikana kwa gharama ya Tshs. elfu tano tu (5,000/=). Kanuni zote zimechambuliwa na kuandaliwa kijitabu kidogo chenye kurasa 39 ambazo unaweza kusoma kwenye simu ya mkononi (smart phone) au kwenye kompyuta (pc).

Kupata uchambuzi wa kanuni zote tuma pesa yako kwa njia ya M-pesa au Airtel Money kupitia namba zifuatazo:-

M – Pesa tumia namba: 0763 745 451 (Majina ni Augustine Mathias)
Airtel Money tumia namba: 0786 881 155 (Majina ni Augustine Mathias)

Baada kutuma pesa hiyo nitumie ujumbe kwenye namba ya airtel (0786 881 151 451) ukiwa na barua pepe yako ili nikutumie uchambuzi wa kanuni hizi moja kwa moja kwenye mtandao wako.

UTAJIRI NI HAKI YAKO YA KUZALIWA "BEING RICH IS YOUR BIRTH RIGHT"

Karibuni kwenye fikra za kitajiri ili upate elimu hisiyokuwa na mwisho.

Born to Win ~ Dream Big

Augustine Mathias Bilondwa
Namba ya Simu: +255 786 881 155
Mwanzilishi wa Mtandao wa fikrazakitajiri.blogspot.com

Barua pepe: fikrazatajiri@gmail.com

Mambo Niliyojifunza Kwenye Kitabu cha Primary Greatness: The 12 Levers of of Success (Misingi ya Mafanikio: Nyenzo 12 za Mafanikio)

Fikra za Kitajiri Jumapili, Oktoba 15, 2017 Add Comment

Habari ya leo rafiki na msomaji wa mtandao wa fikra za kitajiri.

Ni matumaini yangu kuwa unaendelea kupambana kwa ajili ya kuboresha maisha yako. Karibu tena katika mtandao wa FIKRA ZA KITAJIRI kwa ajili ya uchambuzi wa kitabu cha wiki hii. Leo hii ikiwa ni wiki ya 39 katika kipindi cha mwaka 2017 naendelea kukushirikisha uchambuzi wa vitabu mbalimbali kwa ajili ya kukupa maarifa ambayo ni wajibu wako kuyatumia ili ubadilishe kila sekta ya maisha yako.

Makala hizi za uchambuzi wa vitabu zimekuwa zikikufikia kila wiki kwa kadri ambavyo napata muda wa kukushirikisha kile ninachojifunza kutoka kwenye vitabu vya maarifa mbalimbali. Ni matarajio yangu kuwa muda ninaotumia kushirikisha uchambuzi wa vitabu umekuwa wa msaada mkubwa kwako katika kubadilisha maisha yako. Hata hivyo, mtandao huu bado unahitaji maoni/ushauri au shuhuda kwa namna ambavyo umekuwa wa msaada kwako au namna ambavyo unahitaji makala hizi ziboreshwe zaidi (tuma maoni/ushauri/ushuhuda wako kupitia barua pepe fikrazakitajiri@gmail.com).

Kitabu cha wiki hii ni “Primary Greatness” kutoka kwa mwandishi mahiri Stephen R. Covey. Stephen Covey ni mwandishi, kiongozi, mshauri, mwalimu na kocha wa mafanikio mahiri katika ngazi ya kimataifa. Mwandishi ameandika vitabu vingi ambavyo vimekuwa vikifanya vyema kwenye soko na mojawapo ya vitabu hivi ni The Seven Habits of Highly Effective People. Kitabu hiki kimetajwa kama kitabu namba moja katika kuhamasisha watu kwenye karne hii ya 21.

Mwandishi anatushirikisha kuwa kuna njia mbili za kuishi; njia ya kwanza ni maisha yaliyojikita kwenye mafanikio ya misingi halisi ya nafsi yako (Primary greatness). Misingi hii ni ya kipekee kwa kila mtu na inajumuisha tabia, uaminifu, uadilifu, shauku na matamanio yako ambavyo vyote hivi vinaanzia ndani mwako. Njia ya pili ni mfumo wa maisha yanayotokana na mafanikio yako ambayo hasa yamejikita kwenye misingi ya kidunia (Secondary greatness). Maisha haya yanatokana na mafanikio yako kupitia kwenye cheo chako, jina lako, umaarufu wako pamoja na heshima uliyonayo kwenye jamii inayokuzunguka.

Mwandishi anatushirikisha kuwa kama unahitaji maisha ya mafanikio makubwa ni lazima uzingatie njia ya kwanza kwa maana ya kuishi misingi halisi ya nafsi yako. Unapoishi misingi halisi ya nafsi yako ni rahisi kufanikiwa katika njia ya pili ya mfumo wa maisha. Hii ni kutokana na ukweli kwamba misingi halisi ya nafsi yako ina tabia ya kumzawadia kila mmoja anayeiishi kwa kadri inavyotakiwa.

Zawadi zinazotolewa na mfumo wa maisha unaozingatia misingi ya nafsi yako ni pamoja na kuwa na amani ya roho, hekima, busara, furaha, kujiamini, kusaidia wengine pamoja na mahusiano mema dhidi ya watu wako wa karibu. Zawadi hizi zote kwa pamoja ni zaidi ya zawadi zinazotolewa na aina ya pili ya mfumo wa maisha kama vile vyeo, fedha, umaarufu, hanasa pamoja na ubinafsi.

Katika maisha mafanikio ambayo yamejikita kwenye aina ya pili ya mfumo wa maisha ni sawa na nyumba ambayo imejengwa juu ya mchanga ambayo ni wazi kamwe haiwezi kudumu ni lazima itaporomoka tu.

Karibu tujifunze namna ya kuishi maisha yaliyojikita kwenye misingi ya nafsi zetu:

1. Kila mtu anaishi katika pande tatu za maisha; upande wa kwanza ni maisha ya wazi dhidi ya jamii inayokuzunguka (public life), upande wa pili ni maisha binafsi (private) na upande wa tatu ni maisha ya siri (secret life). Maisha ya siri ndipo roho yako ilipo na ni kupitia maisha haya unaweza kugundua/kujiuliza shauku/matamanio ya maisha yako. Maisha haya ya siri kwa ujumla ni ufunguo wa kuishi maisha yenye mafanikio ya misingi halisi ya nafsi yako (primary greatness). Hata hivyo, ili kufikia misingi halisi ya maisha yako ni lazima uwe tayari kujikana kutoka kwenye mitazamo ya jamii inayokuzunguka.

2. Maisha ya siri yanajengwa kupitia tathimini binafsi ya nafsi yako. Tathimini hii ni lazima ijikite kwenye uthibitisho wa nafsi. Sifa kuu za uthibitisho wa maisha ambazo zinaweza kutumika kama mwongozo ni:

v Ni lazima uwe uthibitisho huo uwe chimbuko la nafsi yako kwa maana ya kwamba sio wa kuiga kutoka kwa wengine;

v Ni lazima uwe katika hali ya uchanya badala ya kuwa hasi. Kwa maana ya kwamba ni lazima unene yaliyo mema badala ya mabaya juu ya nafsi yako;

v Ni lazima ujengwe katika hali ya usasa au wakati uliopo kwa maana hisitoria ya maisha yako haina nafasi katika maisha yako ya sasa na ya nyakati zijazo;

v Ni lazima uwe na maono, kwa maana unaweza kuutafsiri kwa picha katika mfumo wako wa milango ya fahamu; na

v Ni lazima uwe na hisia, kwa maana ni lazima uwe na muunganiko mkubwa wa kihisia.

3. Tabia yako kwa maana ya jinsi ulivyo ni muhimu kuliko uwezo ulionao kwa maana ya uwezo wako kiutendaji. Hii ina maana kwamba kama unahitaji kuboresha uwezo wako kiutendaji ni lazima kwanza uwe tayari kubadilisha tabia zako ili ziendane na shauku/matamanio yako ya kiutendaji. Kwa maana nyingine, tabia ni msingi wa kufanikisha kila kitu katika maisha yako. Hata hivyo, msingi huu unajengwa na ujasiri, uvumilivu pamoja na staha. Vyote hivi kwa pamoja vinapelekea ukuaji wa kihisia (emotional maturity) kwa muhusika ambavyo pia ni msingi wa maamuzi yote ikiwa ni pamoja na mahusiano yako.

4. Kwa asili kila kiumbe au kila mwanadamu ni lazima aongozwe na kanuni au sheria za asili. Kutokana na ukweli huu kila mwanadamu ni lazima awe tayari kuishi kulingana na kanuni au sheria za asili kwenye kila sekta ya maisha yake. Kanuni au sheria hizi za asili hazibadiliki mara kwa mara au kutoka sehemu moja hadi nyingine (there are universal). Pia kanuni/sheria hizi zimekuwepo vizazi na vizazi hivyo zinauongoza ulimwengu kwa ujumla wake na hivyo kwenda kinyume na sheria hizi ni sawa na kupoteza muda wako.

Unachotakiwa kujifunza hapa ni kwamba hauwezi kuishi maisha yenye mafanikio ya nafsi yako halisi kama hauna kanuni au sheria zinazokuongoza. Unahitaji kujiwekea kanuni binafsi ili ziwe mwongozo wa maisha yako ya kila siku. Hii ni pamoja na kuainisha yapi lazima yafanywe na wewe na yapi hautakiwi kufanya. Haya kwa pamoja ndiyo yataamua tabia zako na hivyo kuboresha utendaji wako wa kazi.

5. Binadamu wote tumepewa zawadi kuu nne ambazo ni kujitambua (self awareness), uwezo wa kutambua jema na baya (conscience), utashi wa kujitegemea (independent will) na mawazo ya ubunifu (creative imagination).

Kupitia zawadi ya kujitambua kila mwanadamu anaweza kutathimini dhana/misingi yake kwenye ulimwengu unaomzunguka na hivyo anaweza kurudi kwenye misingi ya nafsi yake katika ulimwengu huu kupitia zawadi hii.

Kupitia uwezo wa kutambua mema na mabaya tunapata muunganiko wa nafsi zetu dhidi ya mazingira ya nje kwa maana ulimwengu unaotuzunguka. Na hapa ndipo utagundua kuwa daima nafsi zetu zinatuvuta kwenye matendo mema wakati ulimwengu unavutia kwenye matendo ya ulimwengu ambayo yanakinzana na nafsi.

Kupitia utashi wa kujitegemea ndipo tunapata uwezo wa kutenda. Ni kupitia uwezo huu kila mwanadamu anaweza kuamua hatima ya maisha yake kwa kuamua ni matendo yapi anaweza kufanya ambayo awali hakutarajia kama anaweza kuyafanikisha.

Kupitia mawazo ya ubinifu kila mwanadamu amepewa mamlaka ya kushinda historia ya utumwa wa maisha yake. Hii ina maana kwamba kupitia zawadi hii mwanadamu anaweza kuwa na maono makubwa juu ya nafsi yake na hivyo anaweza kupanga mipango mikubwa kwa ajili ya mafanikio ya kila sekta ya maisha yake.

6. Unahitaji daima kuishi kwenye misingi ya nafsi yako halisi ili ufanikishe matamanio ya maisha yako. Mwandishi anatushirikisha kuwa watu wengi wanashindwa kufikia kusudi la maisha yao kwa vile wanayumbishwa na mawimbi pindi wanapokuwa njiani. Baadhi ya mawimbi ambayo ni hatari kwa kila mtu ni tamaduni – kadri mtu anavyohama kutoka sehemu moja hadi nyingine ndivyo mabadiliko ya tamaduni yanavyotokea na hivyo kupelekea kuyumba kwa muhusika kwenye misingi ya nafsi yake. Pia, hisia kali ni wimbi jingine ambalo linahatarisha mtu kuishi misingi ya nafsi yake – daima unahitaji kuzishinda hisia zako kwenye maamuzi au mazingira unayopitia kwenye kila hatua ya maisha yako.

7. Imani tulizonazo juu ya ulimwengu na vyote vilivyomo ndizo zinatufanya tuonekana jinsi tulivyo. Imani hizi ndizo zinatufanya tuonekane wafungwa wa akili kiasi kwamba zinatuzuia kuishi misingi halisi ya nafsi zetu na hivyo kushidwa kuishi maisha yanayoongozwa na kanuni maalumu. Kutokana na kufungwa na imani hizi tunashindwa kuona mwanga na tumaini jipya katika maisha yetu. Hali hii inasababishwa na vikwazo vikuu ambavyo ni pamoja na (a) utumwa wa hisia (emotional imprisonment) – hisia hizi zinatufanya kujiona wema ukilinganisha na wale wanaotuzunguka; (b) ugonjwa wa kutafuta makosa pekee – ni kawaida kwa watu wengi kutafuta makosa badala ya kutafuta yaliyo mema kutoka kwa wengine. Kabla kuangalia makosa (kibanzi) ya wengine unahitaji kwanza kuondoa vibanzi vilivyopo ndani mwako; (c) utumwa wa mara zote kuona uachache (scarcity) katika kila hali/tukio au rasilimali – ukiwa na mtazamo wa uchache daima utaendelea kuamini kuwa hauwezi kufanikisha matamanio yako kwa sababu ya uchache huo. Kukabiliana na hali hii unahitaji kuwa na mtazamo wa ushindi kwa pande zote – win win situation; (d) kushindwa kulinganisha majukumu yetu – hii ni kanuni ya asili ambayo inatutaka kuhakikisha tunakamilisha majukumu yetu kwa uwiano. Kwa maana ya kwamba usizame kwenye jukumu moja na kusahau mengine.

NYENZO 12 ZA MAFANIKIO

8. Nyenzo ya kwanza: Uadilifu. Uadilifu ni hali ya kuishi kwa kufuata na kulinda misingi ya kanuni ulizojiwekea katika maisha yako. Uadilifu ni hatua ya kwanza ya kuishi maisha yenye misingi ya nafsi yako (primary greatness) na mtu anayeishi pasipokuwa na kanuni zozote zinazoongoza maisha yake ni sawa na kwamba tayari ameyapoteza. Maisha yenye uadilifu kwa ujumla wake ni maisha yanayozingatia maadili mema katika jamii na maisha haya yanazingatia vitu kwa ujumla wake. Hii ina maana kwamba hautakiwi kuchagua kuwa na maadili mema katika sehemu moja na kuacha sehemu nyingine bali kila sekta ya maisha yako inatakiwa iongozwe na uadalifu. Watu ambao wamepoteza uadilifu wanaishi maisha ya kuigiza huku wakiogopa mtazamo wa jamii kuliko kuogopa kwenda kinyume na kanuni halisi za nafsi zao.

9. Uadilifu unajengwa na mihimili miwili ambayo ni unyenyekevu pamoja na ujasiri. Mtu mnyenyekevu ni lazima aongozwe na misingi ya kanuni au sheria kwa utashi wake bila kuogopa nguvu za jamii inayomzunguka. Kwa maana hii mtu mnenyekevu anatambua kuwa kanuni na sheria za asili ndizo zenye mamlaka katika ulimwengu huu na hivyo anachotakiwa kufanya ni kuishi kwa kufuata kanuni au sheria hizi kwa faida ya nafsi yako. Muhimili wa pili ni ujasiri, ujasiri ndio unampima mtu namna anavyokabiliana na maamuzi yake pindi anapokuwa katika hali ya majaribu au anapokabiliwa na changamoto. Katika kipindi hiki ni muda muafaka wa kumpima mtu kama atasimama imara kwenye misingi ya kanuni au sheria za asili zinazomuongoza.

Matunda ya uadilifu kwa muhusika ni busara na hekima, wingi wa fikra pevu na chanya, uwezo wa kufanya kazi ukiongozwa na utashi, ushindi kwa kila mwanatimu, na uaminifu kutoka kwa wote wanaokuzunguka.

10. Nyenzo ya Pili: Utashi wa kujitoa kwa ajili ya wengine. Maisha ya mafanikio yenye misingi halisi ya nafsi yako ni lazima yawe na nia thabiti kwa ajili ya kuwasaidia wengine kupitia vipaji au kalama ambazo umejaliwa. Muda wote unahitaji kujiuliza ni kipi naweza kuchangia kwa ajili ya kuwanufaisha wengine badala ya kufikiria kunufaisha tu nafsi yako. Unahitaji kujifunza mara kwa mara kwa ajili ya kutambua wewe ni nani na umeumbwa kwa ajili ya kukamilisha kazi ipi katika ulimwengu huu. Muda wote unahitaji kujiuliza maswali matatu; (a) Je ulimwengu unataka nini kutoka kwangu? (b) Je mimi ni mzuri katika sekta au kazi ipi? na (c) Je nawezaje kufanya vyema kwenye kazi nizipendazo katika sehemu yangu ya kazi na hatimaye kufanikisha matakwa ya wadau wangu?.

11. Kabla ya kufikiria kuwaongoza wengine unahitaji kwanza kujiongoza mwenyewe. Hii inamaanisha kwamba unahitaji kubadilisha sehemu zote za maisha yako ambazo zinaenda kinyume na uadilifu ambao ndio unabeba maadili mema. Jikomboe kwanza kabla ya kufikiria kuwakomboa wengine, huu ndio msingi wa kujitoa kwa ajili ya wenzako. Hapa unahitaji kwanza kubeba majukumu ya maisha yako badala ya kutegemea mtu flani atahusika nayo – hii inaondoa nafasi ya kuwalalamikia wengine bali unapaswa kulaumu mwenyewe pale unaposhindwa kufikia malengo; pili, ni lazima uwe tayari kulipa gharama kwa ajili ya kuwa mtu yule unayetamani kuwa (mwadilifu); tatu, unahitaji kuendelea kuishi misingi ya kanuni za maisha yako kila wakati na kila sehemu; na nne, unahitaji kuelekeza akili kwa ajili ya kuishi misingi halisi ya nafsi yako katika kipindi chote cha maisha yako.

12. Nyenzo ya tatu: Kipaumbele. Kubadilika kutoka katika mafanikio ya kidunia (secondary greatness) kwenda kwenye mafanikio ya msingi halisi wa nafsi yako (primary greatness) ina maana kuwa vile vitu ulivyozoea kuvipa kipaumbele cha kwanza sasa vinatakiwa kupewa nafasi ya mwisho katika mrorongo wa vipaumbele vyako. Katika maisha yenye msingi halisi wa nafsi yako huna budi kutanguliza vipaumbele kama vile maisha yako, afya bora, ukuaji wa kiroho, kiakili, mahusiano, familia yako pamoja na ukuaji wa kiuchumi badala ya kutanguliza vipaumbele ambavyo vimejikita kwenye raha za muda. Kufanikisha vipaumbele hivi unahitaji kujiuliza vipawa ambavyo umejaliwa kiasi kwamba kadri unavyotumia vipawa hivyo ndivyo unaishi maisha ya furaha yenye chimbuko kutoka ndani mwako. Hata hivyo, ni muhimu hakikisha kila kipaumbele kwenye mtiririko wako kinatekeleza kwa ufanisi ikiwa ni pamoja na kutekeleza kila jukumu kwenye mrorongo wa vipaumbele vyako kwa kuzingatia uharaka wake (keep the first things first).

13. Badilisha mfumo wa kutegemea saa kama mwongozo wako na badala yake uongozwe na dira (compass). Saa inaweza kuwa na nafasi yake kama tayari umefanikiwa kuwa na ufanisi katika vipaumbele vyako lakini kama bado hauwezi kusimamia vipaumbele vyako ni vyema ukatumia mfumo wa dira. Hii ni kutokana na ukweli kwamba dira ni alama nzuri ya ufanisi kwa vile muda wote inaonesha mwelekeo – hii katika maisha ya kawaida ni sawa na kusudi, maono, mtazamo pamoja na usawa. Kama compass (daima haiwezi kupoteza mwelekeo), uwezo wako wa kutambua mema na mabaya unakuweka kwenye nafasi ya kujibana kwenye mema tu kila mara unapowaza mabaya. Kutoka kwenye kutumia saa kama mwongozo hadi kutumia compass unahitaji kuacha kutumia ratiba kama ulivyozoea na badala yake utumie vipaumbele. Mfano, ratiba inaweza kuonesha kuwa kuna kikao sehemu flani lakini haiwezi kukuonesha kama kikao hicho ni muhimu kwako.

14. Nyenzo ya Nne: Jitoe sadaka. Maisha yenye mafanikio halisi ya nafsi yako yanategemea kufanya kazi kama timu na wenzako. Maisha haya hapa yanaongozwa na kanuni kuwa kazi inakuwa bora zaidi pale tunapofanya kazi kama timu kuliko kila mmoja akifanya kivyake. Ni kupitia shauku ya kujitoa kila mwanadamu anaweza kuunganika na wenzake na muunganiko huu ni unajengwa na misingi ya mapenzi mema juu ya wengine, fadhira/wema, unyenyekevu, heshima, uvumilivu na msamaha. Nyenzo ya kujitoa ni muhimu katika kukuza mahusiano kati ya baba/mama/watoto, ufanisi kazini pamoja na mahusiano kati ya mteja na mfanyabiashara.

15. Nyenzo ya Tano: Huduma. Kuwa tayari kutoa huduma hata kama ni kwa ngazi ya chini kwani katika watu kitu unachokiona kidogo kwa wengine kinaonekana kikubwa zaidi. Hata hivyo, mzigo mkubwa ambao unazuia watu kusonga mbele kwenye nyenzo hii ni tabia ya uchoyo. Katika kutoa huduma unahitaji kuwa tayari kujikana kwa ajili ya wengine pasipo kujali kama unawafahamu au hawakufahamu. Jukumu lako kubwa ni kutoa thamani kwa wengine ili hatimaye ubarikiwe kupitia mafanikio ya unaowagusa.

16. Nenzo ya Sita: Wajibu. Kukubali wajibu wako ni muhimu katika kufikia mafanikio yenye misingi halisi ya nafsi yako. Ni muhimu kila mmoja kutekeleza wajibu wake katika hali zote japokuwa changamoto kubwa ni pale ambapo mambo hayaendi kama inavyotakiwa. Katika nyakati hizo ndipo watu wanaanza kulaumu wenzao au mazingira yaliyopelekea badala ya kuanza kujitathimini wao. Katika mafanikio ya maisha halisi ya nafsi yako unahitaji kutambua kuwa wewe ni muhusika mkuu wa maisha yako kupitia maamuzi yako na wala sio mzazi, serikali, jamii au mazingira yanayokuzunguka. Nyenzo hii ya wajibu unatakiwa kuitumia katika kila hali au tukio; unahitaji kujiuliza wajibu wako ni upi kwenye hali/tukio husika. Hivyo unaweza kutumia nyenzo hii kwa gharama yoyote ile ili kuponya makovu ya mahusiano yako na watu wanaokuzunguka.

17. Nyenzo ya Saba: Uaminifu. Watu wenye mafanikio kwenye maisha ya halisi ya nafsi zao ni waaminifu na mara zote sio watu wa kusengenya au kuongea uongo dhidi ya wenzao. Mtihani mkubwa kwa watu walio wengi ni kuwa waaminifu kwa wenzao pindi wanapokuwa hawapo pamoja. Badala kulalamika kwa mtu ambaye hayupo ni vyema kumfuata au kuwasiliana nae kwa ajili ya kutatua suala ambalo unaona hajatekelezwa ipasavyo. Kulalamika bila kuchukua hatua ni sawa na kwamba na wewe umehusika kwenye tatizo lililopo. Hali hii ni muhimu kwa kila mtu ambaye ana kiu ya kuishi maisha halisi ya nafsi yake kwani kuwaongea watu vibaya bila ya uwepo wao unatafsiliwa vibaya na jamii inayokuzunguka. Wengi wanaweza kukuona kama vile unatafuta umaharufu, unajifanya uonekane bora au unajifurahisha kupitia migongo ya watu wengine.

18. Nyenzo ya Nane: Usawa (win win situation). Kanuni ya usawa ina nafasi kubwa katika mafanikio ya maisha yaliyojengwa kwenye misingi halisi ya nafsi yako kutokana na ukweli kwamba kanuni hii inaeleza kuwa kile unachotoa kitarudi kwako katika hali nyingine pasipo ufahamu wako. Kutokana na kanuni hii watu wenye mafanikio katika maisha halisi ya nafsi yao wanaishi katika kauli mbiu ya kuwa “hakuna mafanikio katika maisha endapo wengine hawajafanikiwa”. Wale wanaoishi kwa ajili ya mafanikio ya kidunia kaulimbiu yao kubwa ni “nitapata nini kutokana na kazi hii?” Kanuni hii ni muhimu katika kila sekta ya maisha yetu kuanzia kwenye mahusiano yetu katika familia, sehemu za biashara na hata kwenye sehemu ya kazi. Inapotokea kuwa kila mmoja katika pande mbili akatambua umuhimu wa ushindi kwa mwenzie inakuwa rahisi kufanya kazi husika kwa roho moja na hivo kila mmoja anaridhika kwa nafasi yake jambo linalopelekea mafanikio makubwa sana kwa pande zote.

19. Kufanikisha nyenzo hii ya usawa katika maisha yako mwandishi anatushirikisha baadhi ya mbinu;

v Kwanza jitathimini na kuwa mkweli juu matakwa na nafsi yako – hapa unahitaji kubadilisha tabia ambazo zimekuwa zinakufanya uhitaji faida kubwa ikilinga kutoka kwa wengine. Jiulize kama wewe ndo ungekuwa upande wa pili ungejisikia vipi?;

v Hakikisha kuna muunganiko mkubwa katika yako na upanda wa pili – muunganiko huu uwe zaidi ya kile ambacho mnahitaji kutekeleza. Kama ni mteja jenga urafiki zaidi ya biashara ambayo huwa mnafanya ili mteja aone kuwa unamjali na uelewa wa manufaa ya bidhaa/huduma yako kuliko yeye;

v Badilishana ujuzi na taarifa kati ya pande zote mbili; na

v Husisha matakwa ya wadau wote pasipo kupendelea mdau mmoja katika timu husika.

20. Nyenzo ya Tisa: Utofauti/Mchanganyiko (diversity). Watu wenye mafanikio ya chimbuko halisi la nafsi yao muda wote wanahitaji kujichanga na watu wa aina mbalimbali. Muda wote nia yao ni kujifunza kutoka kwenye kila kundi la watu kwa ajili ya kuendelea kuboresha uelewa wao na huduma zao pia. hii ni kutokana na ukweli kwamba pasipo kujichanganya na watu wengine hawawezi kupata timu/netiweki ya watu na bila mtandao wa watu hakuna kipya wanaweza kutekeleza kwa ufanisi wa hali ya juu. Watu wengi wanapenda kujichanganya watu wanaofahamu jambo linawafanya wanaendelea kuwa na marafiki walewale au uelewa uleule siku hadi siku.

21. Nyenzo ya Kumi: Kujifunza (Learning). Mafanikio yenye chimbuko la nafsi yako halisi muda wote yanahitaji uwe kwenye kujifunza kwa ajili ya maarifa mapya. Kujifunza ndio njia pekee ambayo itakuwezesha kufahamu makusudi ya uwepo wako hapa duniani na wajibu wako ni upi katika kuifanya dunia iwe mahala pazuri kwa kila kiumbe. Mtu ambaye hajifunza ni rahisi kupoteza maisha yake kwa kuangaikia mambo ya dunia hii ambayo mara nyingi uishia kwenye majuto. Elimu hii unayoipata inatakiwa kujikita kwenye kila sekta ya maisha yako kwa ajili ya kukua zaidi ya ulivyo sasa. Unahitaji kujifunza namna ya kuwa mme/mke bora, baba bora, mfanyakazi/mfanyabiashara bora ikiwa ni pamoja na ukuaji wa kiroho.

22. Nyenzo ya Kumi na Moja: Kuuhishwa (Renewal). Kamwe hauwezi kupata mafanikio ya chimbuko la nafsi yako wewe ni mtu wa kuikataa nafsi yako, afya yako, akili yako, hali yako ya kiroho au hisia zako. Kwa ujumla unahitaji kwanza uponye makovu yote ambayo yamekuwa yakikuzuia kusonga mbele kwa ajili ya maisha mapya. Uihishwaji unatakiwa ufanyike kwenye kila sekta ya maisha yako pasipo kujali historia ya maisha yako. Unahitaji kuponya historia yako katika masuala ya kiroho, mahusiano, kazi, kijamii na kiuchumi. Kumbuka kuwa kuanguka sio mwisho wa safari.

Soma: Mambo Niliyojifunza Kwenye Kitabu cha Healing Your Family History: (Uponyaji wa Tabia Ambazo Umerithi Kutoka kwa Watangulizi Wako)

23. Nyenzo ya Kumi na Mbili: Kufundisha. Mpaka sasa umejifunza nyenzo kumi na moja kwa ajili ya kufanikisha maisha yenye chimbuko la nafsi yako halisi. Njia rahisi ya kuendelea kukumbuka kitu chochote ulichojifunza ni kuwafundisha wengine, kwa kadri unavyofundisha wengine ndivyo na wewe unakuwa bora zaidi. Hii ni kutokana na ukweli kwamba njia rahisi ya kujifunza kitu kupitia kufundisha topic husika. Unapofundisha inakusaidia (a) kupata taarifa/maarifa husika kwa undani (b) kuongeza uelewa wako kwenye maarifa husika; na (c) kufanikisha ukuaji wa wengine.

PATA UCHAMBUZI WA KITABU CHA THE RULES OF MONEY ( KANUNI ZA PESA)

Kupata uchambuzi wa kanuni zote tuma pesa yako kwa njia ya M-pesa au Airtel Money kupitia namba zifuatazo:-

M – Pesa tumia namba: 0763 745 451 (Majina ni Augustine Mathias)

Airtel Money tumia namba: 0786 881 155 (Majina ni Augustine Mathias)

Baada kutuma pesa hiyo nitumie ujumbe kwenye namba ya airtel (0786 881 151 451) ukiwa na barua pepe yako ili nikutumie uchambuzi wa kanuni hizi moja kwa moja kwenye mtandao wako.

UTAJIRI NI HAKI YAKO YA KUZALIWA "BEING RICH IS YOUR BIRTH RIGHT"

Karibuni kwenye fikra za kitajiri ili upate elimu hisiyokuwa na mwisho.

Born to Win ~ Dream Big

Augustine Mathias Bilondwa
Namba ya Simu: +255 786 881 155
Mwanzilishi wa Mtandao wa fikrazakitajiri.blogspot.com

Barua pepe: fikrazatajiri@gmail.com